Lino Falao uvwile ukuti Aina Izlaeli iyafuma umu Ijipti, wasenwile mano pali vino wayaneenyile ukuti yaapita. Wanenyile asilika yakwe ati: ‘Pekanyini maceleta yane aa nkondo, uleke tulondelele Aina Izlaeli! Fwandi nga tutayazumilizye ukuti yaapita.’ Wene na antu yakwe yalondeliile Aina Izlaeli.

Yeova watungululanga antu yakwe ukuomvya ikumbi mu nsita iya kasanya, nu moto umu nsita ya usiku. Wayatungulwile kuli Yemba Muyenzu, nu kuyanena ukuti yapange inkambi.

Lyene Aina Izlaeli yaaweni Falao na asilika yakwe yakuyakonka. Yuvwile intete pano uku nkoleelo kwali Yemba Muyenzu ku cisila nako kwali asilika Aina Ijipti. Fwandi yalilile kuli Mose iyati: ‘Tumafwa! Nga waatulesile sile itwikala umu Ijipti kwene.’ Lelo Mose wayanenyile ati: ‘Mutuvwa intete. Tekeelini, mumalola vino Yeova amatupususya.’ Mose wataile sana Yeova, uzye asi avivyo?

Yeova wanenyile Aina Izlaeli kufuma pano yaapanzile inkambi. Uwanda kwene uwa usiku, Yeova wisile ikumbi pakasi ka Ina Ijipti na Ina Izlaeli. Ku lusansa lwa Ina Ijipti kwali imfinzi. Lelo uku lusansa lwa Ina Izlaeli kwene kwali uluswepo.

 Yeova waneenyile Mose ukukonzolwela ikasa pali yemba. Lyene Yeova walenzile ukuti kuye icimuza icikalamba usiku onsi. Yemba wapaatukiine paili, nupya wapanzile inzila pakasi. Aina Izlaeli aingi sana yaapisile pa musili uume ala manzi iyapanga iciumba kuu na kuu.

Falao na asilika yakwe yalondiile Aina Izlaeli lino yalambanga pali Yemba uwapaatukiine. Lyene Yeova wavulunginye asilika. Maceleta yao yatandike ukusokoka matayala. Asilika yapunzile iyati: ‘Lekini tuutuke! Yeova akuyalwila yaa.’

Yeova wanenyile Mose ati: ‘Konzolola ikasa lyako pali yemba.’ Papo kwene sile amanzi yonsi yaweliile pa yasilika Ina Ijipti. Falao na antu yakwe yaafwile. Kutaali nanti a wenga uwapuswike.

Ku lusansa luze lwakwe yemba, kwali antu aingi aalumbanyanga Leza ala yakwimba ati: “Imbilini Yeova pa mulandu wa kuti watacimvya umu lulumbi. Imfwalasi na akwezilepo watayavwintila muli yemba.” Lino antu iimbanga, anaci yamwi nayo yacinanga nu kulizya utungoma. Yonsi kwene yaali ni nsansa pa mulandu wakuti yakulwilwe.