Pa cisila cakuti Devedi wakoma Golyati, Umwene Saulo wamwisile ukuya umu kalamba wa yasilika yakwe. Devedi wacimvizye umu nkondo izingi, nupya wamanyikwe sana. Lyosi lino Devedi wawela uku nkondo anaci yacinanga nu kwimba iyati: ‘Saulo wakoma antu mazimbi, lelo Devedi wene wakoma antu mazimbi maila makumi!’ Saulo watandike ukuvwila Devedi uzuwa nupya walondanga ukumukoma.

Devedi wamanyile ukulizya ningo sana izeeze. Uwanda umwi lino Devedi walizizyanga Saulo izeeze, Saulo wamuvwintile isumo. Lilyo kwene Devedi walewike, ni sumo lyatosile umu ciumba. Pa cisila cakwe vii, Saulo walondanga ukukoma Devedi pa miku iingi. Nu mukusyalikizya Devedi utwike aya afisama umu lwanga.

Saulo na asilika yakwe 3,000, yaiile umukulonda Devedi . Waile ukwafisime Devedi na onsi yakwe. Aonsi yano yaali na  Devedi yamutotozile iyati: ‘Likwene ali syuko ilyakuti ukome Saulo.’ Devedi watundeliile aya ukwali Saulo nupya wasuswile insalu ku cakuzwala cakwe Saulo. Saulo atamanyile ivyacitikanga. Pa cisila, Devedi uvwile sana uyi pali vino atalangizye umucinzi ku mwene wino Yeova wasoolwile. Fwandi aatazumilizye antu yakwe ukuti yakome Saulo. Nupya wanenyile Saulo ukuti, ngi na kukoma lino inakwata isyuko ilya kucita vivyo. Uzye Saulo watile ukulonda ukukoma Devedi?

Awe. Watwalilile ukulonda ukukoma Devedi . Uwanda umwi usiku Devedi na Abisyai umwipwa wakwe, yaile kuno Saulo wapangiile inkambi. Yonsi yakaswile kumwi na Abineli uwalindanga Saulo. Abisyai watile: ‘Likwene alisyuko litu! Leka nemo mukome.’ Devedi nawe waswike ati: ‘Yeova aalafulula Saulo. Tola sile isumo lyakwe na cino akamwelamo amanzi twapita.’

Devedi wakwezile umwamba uwali mupiipi na kuno Saulo wapangiile inkambi. Alino apunda ati: ‘Abineli, i cani cino utali wacingilila umwene wako? Uzye cino Saulo akamwelamo amanzi ni sumo lyakwe vili kwi?’ Lino Saulo uvwile izwi wamanyile ukuti i lyakwe Devedi, nupya watile: ‘Ngi wankoma nomba asi vino iwacita. Imanya ukuti wewe ulaya umwene wa Ina Izlaeli aalalondelelapo.’ Saulo waswilile kwi isano lyakwe. Nomba asi yonsi aa mu lupwa lwakwe Saulo aapasile Devedi.