IUZYO 5
Uzye Caya Sile Ningo Ukuzumila Vino Baibo Ikalanda?
Uzye yatala yamunenapo ivya ufi pa muntu umwi? Limwi muvwile kuno yauze yakulanda pa muntu wiyo nanti ukulanda mazwi yano walanzile. Mwalondanga ukupata umuntu wiyo, nomba mwizile imumanya ukuti vino yalandanga pa muntu wiyo i vya ufi. Vikwene avino caya uku yantu aingi ukulozya kuli Baibo.
Antu aingi aasambilila yatacindika Baibo. Uzye mungamanya icalenga? Ivingi vino yakalanda pi buku lilyo nanti ivyayamo, yakavilanda mu nzila yakuti vyauvwika kwati vitaya ningo, visiuvwana na vyakwe sayansi, nanti ukuti ivyayamo visi vya cumi. Uzye i cacumi ukuti yakalanda ivya ufi pali Baibo?
Lino mwabelenganga kabuku kaa, uzye mwazungwike ukumanya ukuti vino Baibo ikalanda pali sayansi ivya cumi? Antu aingi yakazunguka. Yakazunguka ukumanya ukuti Baibo isilanda vintu vimwi vino amu mipepele iingi yakalanda ukuti avino ikasambilizya. Yamwi yakalanda ukuti Baibo ikalanda ukuti Leza wapanzile ivintu vyonsi kumwi ni vya umi vyonsi mu manda sile 6 aa maawazi 24. Nupya muli Baibo mutaya ivili vyonsi ivikapaazyanya na vino ya sayansi yakatunganya ukuti ali nsita iyapitapo ukufuma pano ivintu vyonsi vyaumbiilwe nanti insi. *
Nupya vino Baibo yalanda sile ivintu vinono pali vino Leza waumvile ivya umi pano nsi calenga ya sayansi yakwate isyuko ilya kulondelezya nu kumanya na vyuze. Baibo ikalanda ukuti Leza waumvile ivya umi vyonsi nu kuti ivya umi vyaumvilwe mu misango ino vyayelamo. (Utandiko 1:11, 21, 24) Amazwi yaa limwi yatanga yuvwane ni visambilizyo vimwi vyakwe ya sayansi, lelo yakauvwana ni vintu ivyasininkiziwa ivikalanda pali sayansi. Ilyasi lya mpiti lyakwe ya sayansi likalangilila ukuti ivisambilizyo vya kwelenganya vikaiza nu kupita; lelo ivyasininkiziwa vyene vikasyala.
Nomba kwaya antu aingi akasitooka ukusambilila Baibo pa mulandu wakuti yatatemwa ivikacitika umu mipepele. Yakalola ukuti mu mipepele mwaya usomvi, ucenjezi, nu kutungilila inkondo. Nomba uzye caya sile ningo ukulola Baibo ukulingana ni vicitwa vya yantu akalanda sile ukuti yakalondela ivyayamo? Antu aya nu luse na ya sayansi acisinka yakauvwa uyi pali vino antu yamwi aaya nu unkalwe yakaomvya icisambilizyo ca kusanguka pa kutungilila ulupato luno yakwatila antu yauze. Uzye cingaya sile ningo ukulola icisambilizyo ca kusanguka ukulingana ni vintu kwene vii ivikacitika? Kwene cingazipa ukulondelezya icisambilizyo kwene cico na vino cikalandapo nu kuvilinganya ku usininkizyo uwayako.
Vikwene avino tukumukomelezya ukucita na kuli Baibo. Cingamuzungusya sana ukumanya ukuti vino ikasambilizya vyapusana sana na vino amu mipepele iingi yakasambilizya. Mu cifulo ca kutungilila inkondo nu unkalwe, aomvi yakwe Leza yalinzile ukutaluka uku nkondo alino nu ku lupato ulukatungulula uku unkalwe. (Ezaya 2:2-4; Mateo 5:43, 44; 26:52) Baibo isikomelezya ukwika sana mano nanti ukuzumila umu cintu ukwaula usininkizyo, lelo ikasambilizya ukuti usininkizyo wacindama pa kuya nu utailo wa cumi nu kuti amaka ya kwelenganya yacindama sana pa kuombela Leza. (Loma 12:1; Aebele 11:1) Mu cifulo ca kutoovola akulonda ukumanya vimwi, Baibo ikakomelezya ukulondelezya sana pakuti mumanye amasuko ku mauzyo acindame sana nu ku mauzyo atale yano antu yakauzya.
Uzye mwatala mwayuzyapo ukuti, ‘Ndi cakuti Leza akuno waya, u mulandu ci uno wazumilizizya iviipe?’ Baibo ikaasuka iuzyo lilyo kumwi na mauzyo yauze aingi, umu nzila isuma sana. * Tukumukomelezya ukutwalilila ukulondelezya pakuti mungamanya icumi. Mungazana masuko angamuletela insansa, yano mungatemwa, asuma nupya akwata usininkizyo wa cumi. Nupya cico citanga ciicitikile sile.
^ pala. 5 Nga mukulonda ukumanyilapo na vyuze, lolini kabuku kakuti Was Life Created? akalembwa na ya Nte Yakwe Yeova.
^ pala. 9 Lolini icipande 11 icaya umwi buku lyakuti Uzye Baibo Ikasambilizya Ukuti Uli? ilyalembwa na ya Nte Yakwe Yeova.
Limwi Mungatemwa Ukulolako na Vii
MASUKO KU MAUZYO AMULI BAIBO
Uzye Vino ya Sayansi Yakalanda Vikauvwana ni Vyaya Muli Baibo?
Uzye Baibo yalandapo ivya ufi pali sayansi?
