Kulozya kuli vino impanga ya Iran yazanzile impanga ya Israel pa Cibelusi pa 13 Epuleo, 2024, António Guterres, mukalamba uwa mu kaungwe ka United Nations walanzile ukuti: “Ndakai insita ya kukanasakamikwa sana alino nu kucefya intazi ii. Insita ii iya kuikanya.”

 Ivikucitika umu mpanga izyazinguluka impanga ya Izlaeli, i vikucitika nu ku ncende zyuze umu nsi yonsi.

 Apa 26 Januwale, 2023, Dipatimenti iikatungulula akaungwe ka United Nations (Security Council) yalanzile ukuti “ukufuma sile lino kwali inkondo yakwe cili iya nsi yonsi, umu nsi mukacitika sana ivimvulunganya nupya vikalenga antu kufika kuli 2 bilyoni ukucula.”

 Impanga zimwi umukacitika ivimvulunganya aa Israel, Gaza, Syria, Azerbaijan, Ukraine, Sudan, Ethiopia, Niger, Myanmar, alino ni mpanga ya Haiti. a

 A lilaci lino inkondo ilasila? Uzye intunguluzi zya muno nsi zingaleta umutende? I vyani vino Baibo yalandapo?

 Ivimvulunganya ivikucitika umu nsi vikulangilila ukuti inkondo zyonsi zyasya zisile. Inkondo zii zikufikilizya masesemo amuli Baibo aakalanda pa nsita ino tukwikalamo. Baibo ikaama insita ii ukuti “mpelelekezyo ya nsi.”—Mateo 24:3.

•   “Mulauvwa malyasi ya nkondo. . . . Uluko lulakatukila uluko luze nu wene ulakatukila uwene uze.”—Mateo 24:6, 7.

 Pakuti mulole vino inkondo izikucitika ndakai zikufikilizya masesemo aya muli Baibo, belengini icipande icakuti “I Vyani Vikalangilila ‘Manda ya Kusyalikizya Nanti ‘Insita ya Mpelelekezyo’?”.

 Baibo yasowela ukuti ivimvulunganya vino antu yakacita vilasila. Cilaya uli pakuti ivimvulungaya kwene vii vikasile? Asi antu alamala intazi ii lelo i nkondo ya Amagedoni, kuli kuti “nkondo iya pa wanda ukalamba wakwe Leza wa Maka Yonsi.” (Kusokolola 16:14, 16) Inkondo ii ilalenga ukuti Leza afikilizye vino walaya ukuti antu yalaipakizya umutende wa manda pe.—Masamu 37:10, 11, 29.

 Nga mukulonda ukumanyilapo na vyuze pa nkondo yakwe Leza iilamala inkondo zyonsi, belengini icipande icakuti “Uzye Inkondo ya Amagedoni Ali Cani?”