TWALILILINI UKUYA AITEYANYE!
Ivimvulunganya Ivikacitika pa Mulandu ni Vikanza Vya Miteekele— Uzye Baibo Yalandapo Uli?
Ivimvulunganya ivikucitika pa mulandu ni vikanza vya miteekele ivivula sana, cii cikulenga ukuti antu mu nsi yonsi yauvwa intente.
Umu Mexico, ukukomwa kwa yakalamba ya mu vikanza vya miteekele alino ni vimvulunganya ivikayako pa mulandu ni vikanza vya miteekele, vyapumvyanya ukuvota ukwali nu kuyako umu 2023-2024.
Umu Europe mwacitika sana ivimvulunganya pa mulandu ni vikanza vya miteekele, ukwikako sile nu kulonda ukukoma prime minister uwa ku Slovakia ukwacitike pa 15 Mei, 2024.
Antu amu United States yavulunganyiziwa sana pa mulandu ni vimvulunganya ivyacitiike lino yamwi yalondanga ukukoma uwali kateeka wa mpanga ii Donald Trump pa 13 Julai, 2024.
U mulandu ci uno ivimvulunganya ivikacitika pa mulandu ni vikanza vya miteekele ivivulila? Uzye vilasila? Uzye Baibo yalandapo uli?
Casoowilwe ukuti antu yali nu kupatukana pa mulandu ni vikanza vya miteekele
Baibo yasowile ukuti umu manda itu, kuli kuti “manda akusyalikizya,” antu aingi yalaya ni miyele ilalenga ukuti kwaya ivimvulunganya alino nu kupazyanya.
“Umu manda akusyalikizya mulaya insita izitale sana. Pano antu [yalaya]. . . aasitaizya, aataya ni cisinka, . . . aasizumilizyanya na auze, . . . aankalwe, . . . aakafutuka auze, aasilonda ukuuvwa uku yauze, aacilumba.” —2 Timoti 3:1-4.
Baibo yasowile ukuti umu manda akusyalikizya antu yalaapondokela uteeko nupya ivimvulunganya vilacitika pa mulandu ni vikanza vyamitekele. (Luka 21:9) Nomba, ivimvulunganya alino nu kupatukana vyasya visile.
Impela ya vimvulunganya vya miteekele
Baibo ikalanda ukuti Leza alafumyapo amauteeko ya yantu nu kupyanikizyapo uteeko wakwe uwa kwiyulu.
“Leza wa kwiyulu alakatusya uwene uno. . . ulonona amawene yauze yonsi” nupya wene utalatala ononwe— Danieli 2:44.
Uwene Wakwe Leza ulalenga antu ukuya alemane nupya ulaleta umutende pano nsi.
Umwene wa wene uu Yesu Klistu akaamwa ukuti “Cilolo wa mutende,” nupya alasinikizya ukuti “mutende” watwalilila amanda pe—Ezaya 9:6, 7.
Na ndakai kwene atekwa ya uteeko uu yakasambilila ivyakuya nu mutende. Na cii calenga Baibo ilande ukuti: “Yalasula ya panga yao ukuya ya pulao Na masumo yao ukuya ivya kutungwilako imiti. Kusi uluko ululakatusizya uluko luze ulupanga, Nupya yatalatala yasambililepo inkondo.”— Ezaya 2:3, 4.
Ngamukulonda ukumanyilapo na vyuze belengini cipande cakuti “What Will God’s Kingdom Accomplish?” nupya tambini vidyo yakuti Uzye Uwene Wakwe Leza I Cani?
Limwi Mungatemwa Ukulolako na Vii
LUPUNGU LWA MULINZI
I Vyani Vino Uwene Wakwe Leza Ulacita?
Yesu wamanyile ukuti Uwene Wakwe Leza ali uteeko sile uungasisyapo intazi zyonsi zii pano nsi. I vyani vino Uwene uu wacita ivingalenga tutaile ukuti ulasisyapo iviipe vyonsi?
TWALILILINI UKUYA AITEYANYE!
U Mulandu ci Uno Ivikanza Vya Miteekele Vikapatukanyizizya Antu?—Uzye Baibo Yalandapo Uli?
Vikanza vya miteekele vikupatukanya antu umu nsi yonsi. Baibo ikatunena icingamala intanzi ii kuli kuti intunguluzi ingalenga antu ukulemana.
LUPUNGU LWA MULINZI
