Mu nsi muli intazi yakukaya sana alino nu kusenuka kuze ukwa miceele iipisye. Lolini malipoti aalondelelapo:

•   “Pa myaka 174 yatipitapo umwezi wakwe Juni ali uno wakavile sana nga ukulinganya kuli vino yapimapo mu myaka ya kucisila.”—Lipoti kufuma kuli Department of Commerce yakwe ya National Oceanic and Atmospheric Administration, U.S, ya pa 13 Julai 2023.

•   “Mu mpanga zya Italy, Spain, France, Germany na Poland mukukaya sana ukufika nu ku madigilizi 48. Nupya mu cilila ca Sicily ni ca Sardinia mwakaisye ukucila vino kwatala kwakayapo umu ncende zyonsi zya mu Europe.”—Lipoti kufuma kuli ya European Space Agency, ya pa 13 Julai 2023.

•   “Vino insi ikukaya sana, tukwenekela ukuti kumaya imvula iipisye nupya cii cilalenga kuye mulamba umwipisye.”—Lipoti kufuma kuli ya Stefan Uhlenbrook, director of hydrology, water and cryosphere at the World Meteorological Organization, ya pa 17 Julai 2023.

 Uzye cikulenga mwauvwa sana intete ngamuvwa malipoti akulanda pa miceele? Lolini vino Baibo ikalanda pi lyasi kwene lii ilyatilipamvya.

 Ee. Kukaya sana ukwa nsi alino nu kusenuka kuze ukwa miceele kukulangilila insita ino itufikapo ukulingana na vino Baibo yasowile. Wakwe, Yesu wasowile ukuti tulaalola “vintu vya kutiinya,” nanti “ivizungusyo ivikalamba.” (Luka 21:11) Vino umu nsi mu kuya mu kukaya sana cikulenga antu ukuvwa sana intete nu kwelenganya ukuti insi ilononwa icakuti kusi na alikalamo.

 Awe. Leza wapanzile insi pakuti twaikalamo amanda pe, nupya atalazumilizya umuntu ali wensi ukuyonona. (Masamu 115:16; Kasambilizya 1:4) Walaya ukuti ali “nu konona aakaonona insi.”—Kusokolola 11:18.

 Baibo ikalangilila ukuti Leza ala cingilila insi ku cili consi cingalenga ukuti yononeke.

•   “[Leza] amyalalika icimuza, na maimbi iyalala na zii.” (Masamu 107:29 Leza wakwata amaka aakutungulula vino waumba. Nupya wakwata amaka aakufumyapo mazanzo akayako pa mulandu nu kusenuka ukwa miceele.

•   “Pano nsi, awewe ukasunga impanga nu kuiletela imvula. Ukalenga ukuti iye ikankala nupya iya muvundo.” (Masamu 65:9) Pa mulandu na vino Leza alapaala insi cilalenga iye paladaise.

 Pakuti mumanyilepo na vyuze pa malayo amuli Baibo aakalanda pali vino Leza alazifya insi, lolini cipande ica pa intaneti ca mu cizungu icakuti “Who Will Save the Earth?”