Muli lipoti yakwe Juni 2022, umukalamba aakaangalila iumba lya mabanki amu nsi yonsi (World Bank Group) walanzile ukuti: “Nupya kwene umu nsi yonsi ivintu ivikoma imitengo. Lyene imitengo ya vintu ikukwela zuwa sana lelo antu yatakukwata impiya izikumanile.”

 Akaungwe akakaavwilizya umu vya mpiya umu nsi yonsi, (International Monetary Fund) kalanzile ukuti: “Umutengo wa mafuta ya muli ya motoka nu wa vyakulya iukwela zuwa sana nupya icilenga antu akaikala umu mpanga izipiina ukucula sana.”

 Baibo ikatwazwa ukumanya umulandu uno ivintu vikukwelela imitengo, vino tungazizimizya alino ni cilasisyapo intazi kwene yii uku nkoleelo.

•   Baibo ikalanda ukuti tukwikala “umu manda akusyalikizya.”—2 Timoti 3:1.

•   Yesu walanzile ukuti “vintu vya kutiinya” vilacitika umu manda kwene yaa yano tulimo. (Luka 21:11) Antu yakasakamala ndi cakuti imitengo ya vintu yakwela sana. Yakasakamala pali vino vilayacitikila uku nkoleelo na vino yalaasakamala indupwa zyao.

•   Ibuku lya Kusokolola lyasoowile ukuti imitengo ya vyakulya ilakoma umu manda kwene yaa. Likati: “Alino nuvwa cimwi kwati izwi. . . . liti: ‘Cipimo conga ca ngano . . . nga ni vipimo vitatu vya malezi vyakulingana na malipilo ya muntu a wanda onga.’”—Kusokolola 6:6, Amazwi Yakwe Leza.

 Pakuti mumanyilepo na vyuze pa manda ya kusyalikizya na pa usesemo uwaya umwi buku lya Kusokolola, tambini vidyo iyakuti Vintu mu nsi Vyasenuka Ukufuma umu 1914 nupya mubelenge ni cipande icikuti “Aonsi Yani Akwela pa Mfwalasi—Aaweni?”

•   “Yalakuula amang’anda ya kwikala mwenemo, yalaalima ni vyalo vya matingi nu kulya iviseekwa vya mwenemo. Yatalakuulila umuntu muze kuti aikale mwenemo foo, nanti ukulimila yauze ayano yalye foo.”—Ezaya 65:21, 22.

•   ‘Umu mpanga mulavula ivyakulya ni viseekwa nu mu myamba kwene.’—Masamu 72:16.

•   “Pamulandu wakuzunya alanda, Yawe [Yeova] nawe wavwanga wati, ‘Namakatuka, intuule nu mulanda akufyengwa, nu mupina!’”—Masamu 12:5. a

 Likwene sile Leza wasya ace asisyepo intazi ya kukwela kwa mitengo, asi sile umu mpanga yonga, lelo u mu nsi yonsi. Pakuti mumanye vino alacita vivyo, belengini icipande icakuti “Uzye Intazi ya Kukwela Kwa Mitengo Ilasila?”

 Lelo na ndakai kwene, Baibo ingamwazwa ukuzizimizya intazi ya kukwela kwa mitengo. U mu nzila ci? Muli Baibo mwaya ukupanda mano ukukaazwa pa vya kuomvya ningo impiya. (Mapinda 23:4, 5; Kasambilizya 7:12) Pakuti mumanyilepo na vyuze belengini cipande cikuti “Mwacingilila Ivintu Vinu” ni cakuti “Vino Mungikala Lino Mukweti Sile Impiya Izinono.”