Antu ukufika kuli 5 bilyoni yakulondesya ukucatamba bola ya nsi yonsi iilatandika pa 20 Novemba ukufika pa 18 Dizemba, 2022. Antu aingi yakuyuvwa ukuti icangalo cii cilaleta ivintu ivisuma sana nu kulenga antu aalatamba ukuya alemane.

•   Nelson Mandela uwali kateeka uwa ku South Africa, watiile: “Bola ikalenga insi ukusenuka. Ingalenga antu ukucitapo cimwi. Yakwata sana amaka aakulenga antu ukuya alemane ukucila ivyangalo ivyasyala.”

•   Umukalamba uwa kaungwe akakalolekesya pali vyakwe bola (FIFA) a watiile: “Bola iya ku makuulu . . . ikalenga antu ukuya nu upaalilo, alemane, aansansa, ukulalondesya ukulacita ivili vimwi alino nu kutemwana.”

 Uzye Waodi Kapu nanti ivyangalo vyuze vingalenga antu ukuya ni miyele ino itulandapo? Uzye kwaya ivikalangilila ukuti ivyangalo vii vingalenga kuye umutende nu kulemana?

 Waodi Kapu iya mwaka uu itilenga antu ukulaelenganya pa vintu ivingi ukucila sile ukulaelenganya pali bola. Icangalo cii i cilenga antu ukulalanda ivipusanepusane pa mikalile ya yantu, pa vikanza vya mitekeele alino na pa nsambu zino yakwata, pa kupusana kwa nkanda alino na pa vikacitika uku mpanga zya kumwao.

 Nanti ciye vivyo antu aingi umu mpanga izipusanepusane yakaipakizya ukutamba ivyangalo ukwikapo sile na Waodi Kapu. Nanti cakuti antu yakalonda ukuti ivyangalo vii viyazwe ukuya alemane, ukulemana kuko kukaya sile u kwa pa kasita kanono. Lelo mu vyangalo vii mukaya sile ukuilangizya nu kuitutumula, nupya miyele kwene ii a ino Baibo yalandapo ukuti ilalanga ukuti tuli mu “manda akusyalikizya.”—2 Timoti 3:1-5.

 Baibo yalanda pa vilalenga antu umu nsi yonsi ukuya alemane. Yalaya ukuti antu yonsi umu nsi yalaya aalemane lino uteeko uwa kwi yulu kuli kuti “Uwene wakwe Leza” ulateeka insi.—Luka 4:43; Mate. 6:10.

 Umwene wa Wene uu kuli kuti Yesu Klistu, alasininkizya ukuti umu nsi yonsi mwaya umutende. Baibo ikati:

•   “Antu aololoke yalavula, nupya kulaya umutende.”—Masamu 72:7, NWT.

•   “Amapokololanga antu aulilwa akupunda iyati, ‘Tutuulwe!’ . . . Amayapokololanga kuli yayo akuyacuzya.”—Masamu 72:12, 14.

 Na ndakai kwene, vino Yesu wasambilizyanga vyalenga antu aingi sana umu mpanga 239 ukuya alemane. Yaleka ukuya nu lupato. Pakuti mumanyilepo na vyuze, belengini icipande icakuti “Vino Tungacimvya Ulupato.”