Mu Januwale 2021, Iumba Ilikatungulula lyamanyisizye ukuti ibuku ilipya ilya kuomvya pa kusambilizya antu Baibo ilifuma, ilyakuti Mungaya ni Nsansa Manda Pe! a Uzye mwacisile uli lino muvwile icimanyisyo cii? Ya Matthew aa ku Canada yalanzile ukuti: “Natemiilwe sana! Nupya nacizilemo ukuvwa ningo lino nakutikanga malyasi nu kutamba mavidyo aalondololanga umulandu uno yapangiile ibuku lii nu kukutika kuli vino aezizyepo ibuku lii yalanzile. Nalondesyanga ukulilola nu kuliomvya.”

 Ibuku ilyakuti Mungaya ni Nsansa Manda Pe! lyakwata inzila izipya izya kutungulwilamo masambililo ya Baibo. Nomba uu asi ali upusano sile uwaya api buku lii ilipya na pa mabuku yauze yano twaomvyanga pa kusambilizya antu Baibo. Ndi cakuti mukaomvya ibuku lii ilipulintwe, mufwile muvwa ukuti nga mwalilema vyapusana sana na mabuku yauze. Pakuti tumanye icalenga ukuti ibuku lii lipusaneko na mabuku yauze, lekini tulande pali vino lyapangwa.

 Mapeepa aatikame. U mulandu ci uno yaomvezizye amapepa aatikame? Umwi buku lii mwaya ivikope ukucila pali 600 ivyaya ivyake sana ukucila umwi buku lyakuti Vino Baibo Ikatusambilizya. Nupya mwaya ni ncende izingi apataaya ivikope nanti vilembo ivili vyonsi. Vintu vii viili vyalenga kuye intazi wakwe: Ndi cakuti ipepa asi litikame, ivikope ivili ukwi fwa lyuze vingaaloleka. Pakuti kutaya intazi ii, aina aakaombela uku Dipatimenti ya Kupulinta Umu Nsi Yonsi, iyayela uku Wallkill, mu New York, ku U.S.A., yezizye imisango 4 iya mapepa aakaomviwa ndakai kuno yakapulintila. Komiti Iikalemba Iya Mwi Umba Ilikatungulula yapitulwike umu mapepa yonsi 4 yano yezezyanga ukulola umusango uwa mapepa yano yangaomvya apa kupulinta ibuku nupya yasolwiile ukuti yaomvye mapepa aali atikame pa kupulinta. Nanti cakuti mapepa yano yaomvya umwi buku lii yakoma sana umutengo ukucila mapepa aaya umu mpapulo zitu zyuze, cikalenga ukuti aasambi ya Baibo yaipakizya lino yakubelenga ukwaula ukupumvyanyiziwa ni vikope ivili ukwi fwa lyuze.

 Vino yaomvya pa kulematika inkupo vyapusanako. Inkupo ino iika ukwi buku lii yene yapusanako ni zya nkupo izyaya uku mabuku itu yauze pano yene yaya iikome nupya vino yaomvya pa kulematika vyapusanako. Alino inkupo kwene ii isioca umu manso, na vino yaomvizye pa kuipanga vikalenga ukuti icikope icayapo caloleka ningo sana. Nupya vino yaomvya apa kupanga inkupo vikalenga ukuti ibuku litononeka lino likuomviwa. Nomba vintu vino yaomvya apa kulematika ibuku lii vyakoma sana umutengo ngu kuvilingaanya kuli vino yaomvizye uku mabuku yauze yano twakwata. Ali mulandu kwene uno aa mu misambo yaombiile pamwi pakuti yakale vino yaomvizye apa kupanga inkupo.

 U mulandu ci uno twasolwelile ukuomvya ivintu ivikome umutengo? Umwina umwi aakaombela muli Dipatimenti ya Kupulinta Umu Nsi Yonsi walanzile ukuti: “Tukwenekela ukuti ibuku lii lilaomviwa apa nsita itali, fwandi tukulonda ukuti lice litwalilille ukulaloleka ningo usi mulandu ni miku iingi ino umuntu waomvya ibuku lii.” Ya Eduardo aakaombela ukwi ofesi lya kupulinta uku musambo uwa ku Brazil yatiile: “Twatemwa sana ukulola vino iuvi lyakwe Yeova lyaomvya ivintu ivikome pakuti ibuku lii lyaloleka ningo, liye ilikome, lyauvwika ningo umu milemele, nupya pa nsita ili imwi kwene ala likwelenganya pali vino lingaomvya ningo imisangulo ino aina na ya nkazi yakasangula.”

 Twatandiike kupulinta ibuku lyakuti Mungaya ni Nsansa Manda Pe! umu Maaci 2021. Insita ii ala ulwale wakwe COVID-19 watandika mpiti, fwandi calenzile ukuti tukwate intazi zingi. Vino kutaali ali wensi uwazumiliziwe ukufuma nanti ukuya ku Betele, aina itu na ya nkazi aakaombela uku mang’anda yataazumiliziwe ukulaaya umu kwazwilizyako uku dipatimenti ikapulinta. Nupya aina yataali nu kwama aina na ya nkazi pakuti yangaya aomvi ya pa Betele aa nsita yonsi. Na cii calenzile ukuti ukwa kupulintila kumwi kutaya aomvi aingi, nupya kumwi kwene twayazile pa mulandu na masunde auteeko.

 Uzye cali uli pakuti tucimvye intazi zii? Pakuti intazi zii zicimviwe, aina na ya nkazi yamwi ukufuma umu madipatimenti apusanepusane apa Betele yapeezilwe umulimo uwa kwazwilizyako uku kupulinta ibuku. Ya Joel aakaombela uku dipatimenti iya kupulinta yalanzile ukuti: “Vino aina na ya nkazi yaa yaipeelisye na vino yaitemiilwe ukusambiliila imilimo ipya, vyalenzile ukuti umulimo uu ucindame uombwe.”

 Asi mulandu ni ntazi zino twakweti, twakwanisya kupulinta makopi aibuku lii aingi sana. Pakuti tupange ibuku lii twalondekwanga ivya kuomvya ivipusanepusane wakwe, vimasyini vyakupulintila, ivya kuomvya pa kupanga inkupo, mapepa, inki, alino ni vya kulematikila mapepa. Umu myezi sile 5 kufuma pano twatandikiile kupulinta ibuku lii, twaomvizye madola 2.3 milyoni aa ku U.S. uku kukalila sile ivintu ivyalondekwanga. Pakuti twaomvya ningo impiya, tukapulinta sile mabuku ukulingana na yano icilongano cikulondekwa.

 Uzye ya kasambilizya na asambi ya Baibo yakauvwa uli lino yakuomvya iciombelo cii ica kuomvya pa kusambilila Baibo? Umwina Paul aakaikala uku Australia watiile: “Nkauvwa ningo sana nga nkuomvya ibuku lyakuti Mungaya ni Nsansa Manda Pe! lino nkutungulula masambililo ya Baibo. Vino ibuku lii lyalembwa vyalenga lyaloleka ningo nupya vikalenga kasambilizya nu musambi yalanzyanya ningo. Umwi buku lii mwaya ivyeo ivyuvwike, mauzyo aakalenga umusambi ukwelenganyapo, mavidyo, vikope, macati, alino ni ciputulwa icakuti ezyini vii icikaazwa umusambi ukwimika mauyo. Vino ibuku lii lyalembwa i vikalenga nalondesya ukuzifya imisambilizizye yane.”

 Umusambi umwi uwa Baibo aakaikala uku United States watiile: “Natemwa sana ibuku lii ilipya. Ivikope ivyayamo vikangazwa ukuvwikisya ivisinka ivikalamba. Mavidyo yakamfika sana pa mwenzo icakuti yakalenga nalondesya ukucitapo cimwi.” Umusambi wii akasambilila Baibo imiku iili cila mulungu nupya akazanwa umu kulongana lyonsi.

 Nupya makopi aingi aibuku lii yacili yakulondekwa ukupulintwa umu ndimi zingi. Alino Iumba Ilikatungulula lyazumilizya ukuti ibuku lyakuti Mungaya ni Nsansa Manda Pe! lipulintwe umu ndimi 710, nupya lyacila indimi zino ibuku lyakuti Vino Baibo Ikatusambilizya lyapulinsilwe uku miku 340.

 Uzye impiya zino tukaomvya uku kupulinta zikafuma kwi? Zikafuma pa musangulo uwa kuitemelwa uno antu aingi yakasangwilako ukuomvya donate.pr418.com. Tukataizya sana pali vino mwaya na ukapekape, pano imisangulo inu ikatwazwa ukupanga iviombelo ivya kuomvya pa kusambilizya antu Baibo aakalonda ukumanya Yeova nu kuya ni ‘nsansa manda pe.’—Masamu 22:26.