Inyimbo u wila usuma ukufuma kuli Yeova. Zingasenula imyelenganyizizye itu, vino tukayuvwa, nupya zingatukomelezya. Nupya vikwene ali vino inyimbo zitu izipusaneko zyaya. Inyimbo zii zyene, zisisenula sile imyelenganyizizye itu na vino tukayuvwa, lelo zikatupalamika na kuli Yeova.

 Kufuma umu 2014, twapanga inyimbo zii izipusaneko ukucila pali 70, nupya ndakai inyimbo zimwi pali zii akuno zyaya umu ndimi ukucila pali 500! Nomba limwi mukaelenganya ukuti, ‘Aaweni aakaombela pa nyimbo zii, nupya zikapangwa uli?’

 Inyimbo zipusaneko zikapangwa ni iumba lya aina na ya nkazi aaya umu mulimo wa Kukopa Mavidyo na Mazwi, nupya yakalondela utunguluzi ukufuma kuli Komiti ya Mulimo wa Kusambilizya Iiumba Ilikatungulula. Umwi iumba lyakwe ya kapanga ya nyimbo mwaya aina na ya nkazi 13 aakaazwilizya ukulemba inyimbo, kukopa, kutantika ningo ivintu, alino ni milimo yuze ikalondekwa. Kulunda pali vii, Komiti ya Mulimo wa Kusambilizya yazumilizya aomvi ya kuitemelwa umu nsi yonsi aakaazwilizyako umu milimo ya kulemba, kulizya, alino nu kwimba. Aina na nkazi yaa yaicefya nupya yakaomvya vino yamanya ukwaula ukulondesya ukuti yauze yayacindika.

 Uzye inyimbo izipusaneko zikapangwa uli? Cakutandikilapo, Komiti ya Mulimo wa Kusambilizya ikasoolola Malembo pano ulwimbo lumasintilila alino nu kulola vino ulwimbo lulo lulalenga ya kakutika ukuyuvwa. Lyene aaya umwi iumba lyakwe ya kapanga ya nyimbo yakapeela yamwi aaya umwi iumba kwene lii umulimo wa kulemba ivyeo ivimaya umu lwimbo. Lyene yakakopa ulwimbo lwa kwezya. Lyene Komiti ya Mulimo wa Kusambilizya ikapituluka umu lwimbo lulo nu kunena aaya umwi iumba lyakwe ya kapanga ya nyimbo muno yalinzile ukuzifya. Aaya umwi iumba lyakwe ya kapanga ya nyimbo yakazifya muno iyayanena ukuzifya alino nu kukopa nupya. Inyimbo zii yakazikopela umu ncende izipusanepusane, ukwikako sile nu mu misambo alino nu mu mang’anda ya ina aakwata ivya kukopela.

 Pakuti yapange nu kukopa ulwimbo ulupusaneko, aina yakaomvya mapuloglamu apusanepusane aapa kompyuta. Umulimo uu ukalondekwa iviombelo ivili wakwe, viombelo vino yakaomvya pa kupanga iviunda, ivya kukuzizya nu kucefya iciunda, mamaikulofoni, alino na vyuze. Maikulofoni yonga ingakalwa pa ma dola 100 kufika ku ma dola ukucila pali 1,000 aku United States. Umu 2020, twaomvizye ma dola 116,000 uku kukalila iviombelo ivya kuomvya pa kukopa inyimbo.

 Uzye tukacita uli pakuti twaomvya ningo impiya izikasangulwa? Mu cifulo cakukwata iumba ilikalamba lyakwe ya kiimba ya nyimbo pa Betele, aingi aakaomba umulimo uu aaomvi aakuitemelwa. Nupya umu cifulo ca kuti aina na ya nkazi aingi yaiza umu kukopa inyimbo zii pa Betele, insita izingi aina yakapanga nu kukopa inyimbo zii ukuomvya mapuloglamu aapa kompyuta aakapanga iviunda ivipusanepusane.

 Aina na ya nkazi yatemwa ukukutika uku nyimbo izipusaneko. Tara aakaila uku Germany, walanzile ukuti: “Inyimbo zii zikanteekezya nga ndi na masakamika. Kukutika uku nyimbo zii umu lulimi lwane kukalenga nauvwa kwati Yeova atankumbatila.” Umwina aakaila uku Kazakhstan uwi zina lyakuti Dmitry walanzile ukuti: “Natemwa ukukutika sana uku nyimbo zii nupya lino nkukutikako nsisakamala ukuti zimalenga nalondesya ukucita iviipe wakwe vino inyimbo izya mu nsi zyaya. Alino, zikangazwa ukwika mano kuli ucuza wane na Yeova.”

 Delia, aakaikala uku South Africa, walanzile vino akayuvwa pa nyimbo izipusaneko, watiile: “Inyimbo zii zikalenga utailo wane ukukomelako. Nga ndi nu ulanda nanti vintu nga vyantalila umu umi, lyonsi kukaya ulwimbo ulukalingana ni vikuncitikila. Ilingi, ukuvwa sile iciunda ca nyimbo kukasenula vino nkuyuvwa!”

 Kwaya inyimbo zimwi izipusaneko zino antu yatemwa sana. Lerato, aakaila uku South Africa, walanzile ukuti: “Ulwimbo lwakuti ‘Vyasya Vicitike’ nu lwakuti ‘Insi Ipya Ikwiza’ zikalenga naelenganya sana pa nsita ino ndazengela ya mayo yane aafwa. Lyonsi lino nkukutika uku nyimbo zii, nkaelenganya ukuti ya mayo yakwiza umu kunkukula.”

 Ulwimbo lumwi ulupusaneko lwazwile sana uwacance umwi aakaila uku Sri Lanka. Walanzile ukuti: “Mwalimu umwi wankalipiile sana pa mulandu wakuti nene Inte Yakwe Yeova ala ya kasukulu yanji yakuvwako. Nuvwile intete, nupya ntamanyile ni vya kulanda. Lino naswilile uku ng’anda, ya mayo yankomelizye ukukutika uku lwimbo lwakuti ‘Study Makes You Strong.’ Ulwimbo lwangazwile ukwiluka ukuti nalondekwanga ukulondelezya nu kuipekanya vino ningaya nkasuke ya mwalimu. Uwanda uwalondelilepo, nalanzyanyizye na ya mwalimu. Yakutiike kuli nene nupya yalanzile ukuti lyene yamanya vino Ya Nte Yakwe Yeova yazumilamo. Nkataizya sana pali vino iuvi lyakwe Yeova lyatwikilako inyimbo zii izikatwazwa.”

 Aekwi kuno tukafumya impiya izya kuomvya pa kupanga inyimbo zii? Zikafuma pa musangulo wa kuitemelwa uwa mu nsi yonsi, uno antu aingi ya kasangwilako ukuomvya inzila izyalondololwa pa donate.pr418.com. Tukataizya sana pa misangulo inu iyakuitemelwa.