Ukongano wa citungu uwa mu 2020 wali ali ukongano witu uwa kutandikilapo uno twakofile nu kwika pa intaneti! Lelo, aina itu aingi aaku Malawi nu ku Mozambique, yalonganyile ukongano uu ukwaula ukuomvya intaneti. Uzye cii cacitike uli?

 Komiti Iikalolekesya Pali Vino Vikumile Ya Nte Yakwe Yeova na Komiti ya Mulimo wa Kusambilizya Iiumba Ilikatungulula yazumilizye ukwika ukongano pa TV na pa ledyo uku Malawi nu ku Mozambique. U mulandu ci uno iikileko amapekanyo yaa? Uku Malawi, ama bandozi yakoma sana umutengo, fwandi ya Nte sile anono aliyo yakakwanisye ukuomvya intaneti. Ya William Chumbi, aaya muli Komiti ya Musambo uku Malawi yalanzile ukuti: “Ledyo na TV ali nzila sile zino aina na ya nkazi yali nu kuomvya pa kukutika uku ukongano.” Ya Luka Sibeko, nayo kwene aaya muli Komiti ya Musambo uku Malawi yalanzile iyati: “Ndi cakuti ukongano utisilwe pa TV na pa ledyo, aina na ya nkazi sile anono aaya umu cifulo cino umusambo witu ukaangalila aali nu kuipakizya uku ukongano uu.” Vikwene nga ali vino cali nu ku Mozambique, aina na ya nkazi sile anono aliyo yaali nu kukwanisya ukukala iviombelo vino yangakutikilako ukongano alino nu kukwanisya ukukala ama bandozi.

 Pa mulandu nu ulwale wakwe COVID-19, ukulongana kwa pa cilongano kwayanga pa TV na pa ledyo. a Fwandi aina yaile nupya uku vifulo ukukayela ma puloglamu aapa TV na pa ledyo kukuleenga ukuti yayalundileko insita iya kwikapo nu ukongano wa citungu.

 Ivintu vyataliile aina uku Malawi. Ilingi pa TV na pa ledyo, yakazumilizya sile mapuloglamu aasikucila pi aawala lyonga. Yakasakamala ukuti ya kakutika ya ngata ukwikako amano ndi cakuti puloglamu yatalimpisya. Lelo aina yayalondolwelile ukuti umulimo witu ukaazwa antu yonsi. Nu mu nsita kwene ii iya ulwale wake COVID-19 tucili tukuneena antu ilyasi lya kuteekezya ilyaya muli Baibo ilingayazwa ukuya ni miyele isuma, alino nu kuya ni nsansa umu lupwa. Lino yuvwile vii, yazumile ukulundilako aina insita iyakwikapo ukongano wa citungu.

 Uku Malawi, isile ukongano apa TV na pa ledyo pano antu yonsi umu mpanga yii yakakwanisya ukutamba nu kukutikako. Uku Mozambique, isile ukongano pa TV alino nu ku vifulo 85 ukukaya mapuloglamu aapa ledyo.

 Ku mpanga zyonsi zyoili, icipendo ca mpiya icaomviwe ukukwika ukongano pa TV caali madola 28,227 b alino ni cipendo consi icaomviwe ukukwika ukongano pa ledyo cafisile umupipi na madola 20,000. Imitengo yakwikila ukongano pa ledyo yapusananga, yatandikiile pa madola 15 kwizafika uku madola 2,777.

 Aina itu yaombisye pakuti yamvye ningo imisangulo. Uku Malawi, aina yalanzyanyizye na aakaombela uku vifulo apakaya mapuloglamu apa TV na pa ledyo ukuti yayawezezyeko umutengo. Icipendo ca mpiya cino yayawezizyeko cafisile uku madola 1,711. Uku Mozambique, yazumilanga zuwa ukuwezyako imitengo pa mulandu na vino twaya ni miyele isuma na vino twalipilanga zuwa.

 Aina yataizye sana pa kutamba ukongano pa TV nanti ukukutika uku ledyo ivyayela uku ncende kuno yakaikala. Ya Patrick, ya eluda aaku Malawi, yalanzile ukuti: “Tukutaizya sana aina aaya Umwi Iumba Ilikatungulula pa kwikako amapekanyo yaa aiyele umu nsita ya ulwale uu.” Ya Isaac, nayo kwene aakaikala uku Malawi yatiile: “Tutakwata akaombelo akali konsi kano tungaomvya pa kutamba ukongano pa intaneti, fwandi tukutaizya sana iuvi lyakwe Yeova apakwikako mapekanyo yaa aiyele akukutika ukongano pa ledyo. Pa mulandu na mapekanyo yaa ulupwa lwane lonsi lwaipakizye ukongano. Cii calenzile tusininkizye ukuti Yeova watemwa antu yakwe.”

 Ukongano uwa mu 2020 wali ali ukongano wa utandikilako uno kasimikila umwi uwa ku Mozambique wazanyilweko. Walanzile ukuti: “Mapekanyo aakutamba ukongano pa TV yanjiwisyeko ukuti Yeova a Leza wa Maka Yonsi. Ulwale utalenzile afilwe ukutupeela ivya kukomya utailo witu. Nailoliile vino antu yakwe Yeova yatemwana. Nupya insininkizya ukuti uu ali upefi wa cumi.”

 Eluda uwi zina lyakuti Wyson walanzile ukuti: “Nkutaizya sana pali vino umuomvi umutailwe watwalilila ukutusakamala umu nsita yii ya ulwale. Mapekanyo yaa aakwika ukongano pa TV na pa ledyo iyazwa sweingi ukuipakizya ukongano swe muno twakwata intazi iyakuulizya impiya umu ncende yii ipina sana umu nsi.”

 Komiti Iikalolekesya Pali Vino Vikumile Ya Nte Yakwe Yeova na Komiti ya Mulimo wa Kusambilizya yapekanya ukuti ukongano uwa mu 2021 nao kwene ukaye pa TV na pa ledyo umu ncende zimwi zimwi. Uzye impiya izya kuomvya pa kwika ukongano pa TV na pa ledyo zikafuma kwi? Zikafuma pa musangulo wa kuitemelwa uwa mu nsi yonsi, uno antu aingi ya kasangwilako ukuomvya inzila izyalondololwa pa donate.pr418.com. Tukataizya sana pali ukapekape winu.