“Patalengiile sana kufuma pano calolekanga ukuya icikome ukupokelela ivya kutwazwa muli ukapepa ukuomvya intaneti.” Uzye mukwiusya mazwi yaa? Yaali umwi lyasi ilya kukomelezya lino ya Geoffrey Jackson yalanzile umu Vyeo Ivipya Ukufuma Ukwi Umba Ilikatungulula Ivya mu 2020 Na. 6. Nupya yalunzilepo nu kuti: “Nomba lyene tukwelenganya ukuti nga ntanzi vino cili itukana ukukwata iviombelo wakwe JW Laibulale mu nsita ii itale. Pa myaka iingi, Yeova watupekanyizizyanga uku vintu ivingiza vicitike wakwe vii.”

 Uzye Yeova watupekanyizizyanga uli calimwi? I vyani vyalondekwanga pakuti tupange JW Laibulale, nupya i vyani vikalondekwa pakuti itwalilile ukuomba ningo nu kulazipilako?

 Umu Mei 2013, Iumba Ilikatungulula lyanenyile aakaombela kuli Puloglamu yakwe MEPS, dipatimenti iyaya uku Maofesi Yakalamba Yakwe ya Nte Yakwe Yeova mu Nsi Yonsi ukuti yapange apu apalaya Baibo uwa New World Translation umupitulukwemo. Ya Paul Willies aakaombela kuli puloglamu yakwe MEPS yalanzile ukuti: “Kutaya apu na yuze ino twapanga iikazanwa pa mafoni iyaya wakwe ii. Twapanzile iumba ilyali nu kuombelapo, twatiile ukuomba imilimo imwi, nupya twaombiile pamwi na madipatimenti yauze pakuti tupange apu ii nu kwikapo vyonsi ivyalondekwanga. Twapepelangapo lyonsi, nupya pa mulandu wakuti Yeova watwazwile, pa cisila ca mwezi 5 apu ii izile ifuma apa kukomaama kwa pa mwaka!”

 Intazi yuze ino twaakweti, iyakulenga apu ii ukuya wakwe viivi kwene vino laibulale ilinzile ukuya kuli kuti ukukwata impapulo izingi nupya umu ndimi izipusanepusane. Lino cafisile umu Januwale 2015, impapulo zitu izya mu cizungu zino twakwata ndakai zyatandiike ukuloleka pa JW Laibulale, nupya lino papisile sile imyezi 6, antu yatandiike ukucita daunilodi impapulo zii umu ndimi izingi.

 Kufuma lili kwene, aina yatwalilila ukuzifya apu ii umu nzila izipusanepusane, wakwe ukwikapo mavidyo, kwikapo impapulo alino na vyonsi ivikalondekwa pa kulongana apifwa sile lyonga, nu kulenga ukuti twayula Ibuku Ilya Kwazwa Inte Zyakwe Yeova Ukulondelezya Ivyeo apa cikomo ciici kwene cino tukubelenga muli Baibo.

 JW Laibulale ikaomviwa pa viombelo 8 milyoni cila wanda nupya ukucila pa viombelo 15 milyoni cila mwezi! I cani icikalondekwa pakuti JW Laibulale itwalilile ukuomba ningo pa viombelo kwene vii? Umwina Willies walondolwile ukuti: “Ma apu aakaaya pa viombelo ivikaomvya intaneti yakatwalilila ukuyazifizyako. Fwandi naswe kwene tukatwalilila ukuzifizyako JW Laibulale pakuti antu yaipakizya kuiomvya na pakuti iye iyangupale. Pa mulandu wakuti puloglamu iikalenga iviombelo ivikaomvya intaneti vyaomba ningo yakaizifya lyonsi, naswe kwene tukazifya JW Laibulale pakuti yaombela pamwi na puloglamu ii. Nupya tukatwalilila ukuzifya JW Laibulale pano impapulo na mazwi aakopelwe limwi yano tukaipo vikuya vikuvulilako.” Pa JW Laibulale paya impapulo ku ma 200,000 alino na mavidyo na mazwi aakopelwe limwi kucila pali 600,000 umu ndimi izipusanepusane!

 Pakuti apu ii iombe ningo, ikalondekwa ma puloglamu aingi aapa kompyuta. Nupya pakuti yaomvye ma puloglamu yamwi, yakaakala ma laisensi ya ma puloglamu yayo. Laisensi sile yonga ikakalwa pa madola aaku U.S.A 1,500 cila mwaka. Kulunda pali vii, aakaombela kuli puloglamu yakwe MEPS yakaomvya cipendo ca mpiya madola aaku U.S.A kufika kuli 10,000 pakuti JW Laibulale yaomba ningo pa viombelo ivipya ivili wakwe makompyuta, matabuleti alino na mafoni.

 JW Laibulale yalenga ukuti impiya zicepeko zino twaomvyanga uku kupulinta, kupanga impapulo, alino nu kutuma. Wakwe, twapulinsile makopi 12 milyoni aakabuku kakuti Twasambilila Malembelo Cila Wanda aka mu 2013. Lelo aka mu 2020, twapulinsile sile makopi 5 milyoni nanti cakuti umu nsi yonsi kwalunzilweko ya kasimikila ukufika kuli 700,000. U mulandu ci uno payela upusano uu? Apa mulandu wakuti aina na ya nkazi aingi yakabelenga ilembo lya wanda ukuomvya JW Laibulale. a

 JW Laibulale ikaazwa antu umu nzila izingi. Ya Geneviève, aakaikala uku Canada, yalanzile ukuti JW Laibulale yalenga ukuti yaisambilizya cila wanda. Yalanzile ukuti: “Kulanda sile icisinka, ndi cakuti nalondekwanga ukutoola impapulo zyonsi zino nkulondekwa apa kuisambilizya Baibo, nga cikantalila sana ukuisambilizya cila katondo. Nomba pa mulandu na JW Laibulale, nkatoola sile tabuleti ala na vyonsi vino nkulondekwa vili papo kwene. Kuisambilizya Baibo lyonsi kwalenga ukuti utailo wane ukomeleko nupya kwalenga nu kuti mpalame sana kuli Yeova.”

 JW Laibulale itiyazwa antu aingi sana umu nsita yii ya ulwale wakwe COVID-19. Charlyn aakaikala uku United States, watiile: “Pa mulandu nu ulwale wakwe COVID-19 uliko umu nsi yonsi, ntaatala napokelelapo ulupapulo ulupya ulupulintwe ukucila pa mwaka onga. Lelo JW Laibulale yalenga ukuti twakwata vino tukulondekwa pakuti twakomya utailo witu, nupya nkataizya Yeova pa mapekanyo yaa aakalanga vino watutemwa.”

 Antu aingi yakayuvwa wakwe vino Faye aakaikala uku Philippines akayuvwa. Walanzile ukuti: “Nkaomvya JW Laibulale iciombelo ca maka pakuti natwalilila ukupalama kuli Yeova. Ali ino nkatandikilapo ukuomvya cila katondo. Nkakutika ku nyimbo na mazwi aakopelwe limwi pa JW Laibulale lino nkuomba imilimo ya pa ng’anda. Ali ino nkaomvya lino nkupekanya ukulongana. Nupya ali ino nkaomvya pa kupekanyizizya isambililo lya Baibo. Nkatamba mavidyo aayapo lino nkupuza. Alino nkabelenga ivipande vya malyasi ivyayapo nanti Baibo lino nkuloleela vimwi. Mu cumi JW Laibulale u wila ucindame sana.”

 JW Laibulale ikatwazwa sana lino tukuomba umulimo wa kusimikila. Wakwe, lino nkazi umwi aakaikala uku Cameroon wasimikilanga walondanga ukuomvya ilembo ililimwi na lino nkazi muze waomvizye imilungu iinono uku cisila, lelo wilile ilembo lilyo. Walanzile ukuti: “Icazifileko icakuti, nizile niusya amazwi yamwi aaya api lembo lilyo. Nayuzile Baibo apa JW Laibulale, nu kulembapo amazwi kwene yayo. Papo kwene sile, ilembo lino nalondanga lyaloliike. Kuomvya JW Laibulale kukangazwa ukwiusya malembo aingi yano insita zimwi nkailila.”

 Imisangulo inu iyakuitemelwa ino mukasangwilako ukuomvya inzila izyalondololwa pa donate.pr418.com. yalenga tupange JW Laibulale, nu kutwalilila ukuizifya pakuti aina na ya nkazi umu nsi yonsi yaipakizya lino yakuiomvya. Tukamutaizya sana pali vino mwaya na ukapekape.

1. Okotoba 2013—Apu apali Baibo wa New World Translation umupitulukwemo wafuma

2. Januwale 2015—Yikapo impapulo na zyuze izya Mucizungu, alino ni zya mu ndimi zyuze

3. Novemba 2015—Yikapo ivya kupentelako

4. Mei 2016—Yikapo iciputulwa apakuzana ivyakuomvya umu kulongana

5. Mei 2017—Yikapo iciputulwa apa kulemba ivyeo

6. Dizemba 2017—Yikapo ivya kutwazwa pa kuisambilizya Baibo

7. Maaci 2019—Yikapo ivya kutwazwa ukucita daunilodi mazwi aakopelwe limwi, kulizizya mavidyo papa kwene, alino nu kuzana ibuku lya kutwazwa Ukulondelezya Ivyeo

8. Januwale 2021—Yikapo ivya kutwazwa ukuomvya ningo ibuku lyakuti Mungaya ni Nsansa Manda Pe!