Yeova akalonda antu yonsi ukusambilila pali aliwe na pa Wene wakwe uwa kwi yulu usi mulandu na vino vikayacitikila. (1 Timoti 2:3, 4) Pa mulandu na cii, ya Nte Yakwe Yeova yakasenula Mabaibo ni mpapulo izyakwazwa antu yonsi kusambilila Baibo, ukwikako sile na ya ciulu. Alino iuvi litu lyapanga amavidyo aingi a umu ndimi kucila pali 100 zyakwe ya ciulu. Uzye tukapanga uli impapulo zii nu kuzisalanganya? Nupya i vyani vino twacita pa kuzifyako imipangile ya mpapulo zii?

 Mpapulo zya mu lulimi lwakwe ya ciulu zikapangwa na maumba yakwe ya kasenula ukuzinguluka insi yonsi. Cila umba lyakwe ya kasenula likapituluka sana umu lupapulo luno likulonda ukusenula. Lyene aa mwi umba lilyo yakalola inzila isuma ino yangasenwilamo ulupapulo lulo umu lulimi lwakwe ya ciulu. Nga yamala ukusenula, yakakopa vidyo. Ndakai amaumba 60 yakwe ya kasenula, yakasenula lyonsi impapulo izikalanda pali Baibo umu lulimi lwakwe ya ciulu, lyene amaumba na yauze 40 yakasenula sile limwi limwi.

 Mpiti, twalondekwanga impiya izingi sana pakuti tupange amavidyo umu lulimi lwakwe ya ciulu. Makamela alino na vyuze ivya kuomvya pa kupanga mavidyo vyakomile sana umutengo kucila vino caya ndakai. Nupya twakopelanga amavidyo umu mastudyo yano twakuulanga sweineco nanti ukuzifya sile icikuulwa cino twakwata mpiti. Pakuti sile iumba lyonga lyakwe ya kasenula ya lulimi lwakwe ya ciulu likwate vyonsi ivikulondekwa, pasumbwanga impiya ukucila pa madola 30,000 b.

 Pakuti imisangulo yaomviwa ningo, iuvi litu lyaombesya ukuzifya nu kwangupazya inzila iyakusenwilamo. Fwandi tukaomvya iviombelo ivyayako ndakai ivikaomba ningo nupya ivitakoma sana umutengo. Amu maumba yakwe ya kasenula yasikopela amavidyo umu mastudyo, lelo yakaika insalu yakwe gilini umu ofesi kwene amuno iyakopela mavidyo. Ndi cakuti muli vidyo mukulondekwa antu aingi, aina na ya nkazi yakakopa pano yayelile muli vidyo umu ofesi kwene nanti uku ng’anda, yasiya umukukopela umu studyo foo.

 Nupya twapanga appu iyakwazwa aina na ya nkazi lino yakuomba. Appu ii ikaazwa ya kasenula ukusenula zuwa impapulo umu lulimi lwakwe ya ciulu ukucila vino cali mpiti. Aina na ya nkazi yakataizya sana pali vii. Umwina uwizina lyakuti Alexander walanzile ukuti: “Mavidyo amu lulimi lwakwe ya ciulu yakafuma sana ukucila vino cali mpiti. Naya sana ni nsansa pali cii. Nupya nkatamba mavidyo yaa cila wanda.”

 Ndakai pakuti iumba lyonga lyakwe ya kasenula likwate ivikulondekwa pakasumbwa impiya madola ukucepako pali 5,000. Na cii calenga ukuti twapanga mavidyo umu lulimi lwakwe ya ciulu umu ndimi izingi.

 Ndi cakuti ya kasenula yamala sile ukusenula ulupapulo umu lulimi lwakwe ya ciulu, mavidyo yalinzile ukufika kuli yayo aakulondekwa amavidyo yayo. Mpiti twapanganga matepu na ma DVD, lelo vyalondekwanga impiya izingi, vyasendanga insita ikulu, nupya incito yakomile sana. Lyene twatwalanga uku kampani kuti yatupangilemo na vyuze. Nu mu kusyalikizya, twatumanga matepu na ma DVD uku vilongano. Umu 2013 mutupu, twasumvile impiya madola ukucila pali 2,000,000 pa kupanga ama DVD umu lulimi lwakwe ya ciulu.

 Ya ciulu yataizyanga sana pali vii. Lelo asi lyonsi lino cangupalanga ukuomvya mavidyo, pano matepu na ma DVD vyayanga vikuvulilako sile. Insita zimwi, ibuku sile lyonga yakwe Baibo yalikopelanga umu ma DVD aingi. Umwina Gilnei uwa ku Brazil akaiusya vino cayanga, watiile: “Lyonsi lino tukulonda ukubelenga ilembo, twalondekwanga ukulonda tepu muno tungazana ilembo lilyo alino itutandika ukulonda ilembo. Catalanga sana.” Nkazi uwizina lyakuti Rafayane, uwaomvyanga ma DVD mu lulimi lwakwe ya ciulu walanzile ukuti: “Twatontanga sana pa kuisambilizya Baibo. Twasumbanga insita ikulu kulondelezya malembo ni vyeo na vyuze.” Nupya lino aina na ya nkazi yakusimikila, ilingi yasendanga ma DVD nanti matepu yano yatambisyanga umuntu akulondesya ukusambilila Baibo pali TV yakwe kwene. Aina yamwi yasendanga na kalimba umwakulizizya ma DVD. Patalengile kwafumile utulimba utunono umwakulizizya ma DVD utwakwatanga na sikilini, nupya aina aingi yatuomvyanga. Ya Bobby aakaikala uku United States, yatiile: “Ndi cakuti wamala ukulizya ilembo limwi lyene ukulonda ukulizya na lyuze, ilingi kwayanga ukwikamo DVD yuze. Kucita vii kwasendanga insita, nupya calenganga catutalila ukuomvya sana Baibo lino tukulanzyanya na antu.”

 Umu 2013, iuvi lyakwe Yeova lyafumizye appu ya JW Laibulale Iya mu Lulimi Lwakwe ya Ciulu, cii calenzile aina na ya nkazi ukucita daunilodi mavidyo umu lulimi lwakwe ya ciulu pa foni yao nanti pa tabuleti. Yatandikile ukupanga appu ii umu Lulimi Lwakwe ya Ciulu Lwa ku America. Lyene umu 2017, isilemo vimwi ivyakulenga appu yaomviwa uku ndimi zyonsi zyakwe ya ciulu. Aina na ya nkazi umu nsi yonsi yatemilwe sana. Umwina Juscelino aakaila uku Brazil watiile: “Navizilwe ukuzumila! Nelenganyanga sile pali vino aa mwi Iumba Ilikatungulula yakalanga ukutemwa kuli swe ya ciulu na vino yakalonda ukuti twalunduluka muli ukapepa wakwe vivi kwene vino caya kuli yayo aakalanda. Nuvwile ningo sana, nupya appu ii yankomelizye ukulondesya ukulaisambilizya sana Baibo.”

 Ndakai tukafumya mavidyo umu ndimi zyakwe ya ciulu umu nsi yonsi nu kuika pa webusaiti itu alino na pali appu ya JW Laibulale Iya mu Lulimi Lwakwe ya Ciulu. Na cii calenga ukuti impapulo umu lulimi lwakwe ya ciulu ukusenulwa, kukopwa, alino nu kufuma umu manda sile anono ukucila vino casendanga imyezi uku cisila. Nupya umu ndimi zyakwe ya ciulu izingi, impapulo zikafumila pamwi ni mpapulo zyuze zino yayo aakalanda yakaomvya.

 Uvwini vino aina na ya nkazi ya ciulu yamwi yalanzile. Nkazi Klízia watiile: “Iuvi ci ilikasakamala ya ciulu icakuti iliitemelwa nu kuyapekanyizizya ivyeo ivyakuyazwa muli ukapepa umu nzila iyangupale? Umu nsi ii kutaya icili consi icingatucitila vino iuvi lyakwe Yeova likatucitila.” Ya Vladimir yatiile: “Mavidyo yaa yakandangilila vino Yeova akasakamala swe ya ciulu wakwe vivi kwene vino akasakamala antu aakauvwa.”

 Ilingi umu mavidyo amu lulimi lwakwe ya ciulu mukaya amazwi yaa akuti: “Lupapulo luu lusi lwa kukazya. U lwakuomvya umu mulimo wa mu nsi yonsi uwa kusambilizya antu Baibo uukatungililwa ni misangulo ya kuitemelwa.” Tukataizya sana pa misangulo inu, ino mweingi mukasangwilako ukuomvya donate.pr418.com Imisangulo ii ikalenga twapanga Mabaibo alino ni mpapulo izyakuomvya pa kusambilizya antu yonsi Baibo, ukwikako na yayo aakaomvya ululimi lwakwe ya ciulu.