Ya Nte Yakwe Yeova yakaika sana mano uku ina na ya nkazi. (1 Petulo 2:17) Sweingi tukayuvwa wakwe vino nkazi Tannis uwa ku Kenya akayuvwa. Walanzile ukuti: “Natemwa ukumanya ivikuvitikila aina na ya nkazi umu nsi yonsi.” Uzye nkazi Tannis na ya Nte yauze aingi yakamanya uli ivikucitika? Ukufuma mu 2013, tukamanya ivikucitikila aina ukupitila umu kubelenga vipande vya malyasi ivyaya pa ciputulwa ca Malyasi pa Vikucitika, icaya pa webusaiti itu iya jw.org.

 Pa ciputulwa ca Malyasi pa Vikucitika paya malyasi aakalanda pali vino vikucitikila Ya Nte Yakwe Yeova wakwe, malyasi pali vino Mabaibo yakufuma, pa mulimo wa kwazwa aatiyaponelwa na mazanzo, pali vino umulimo wa makule ukuombwa, alino na malyasi yauze acindame. Ciputulwa cii cikatwazwa ukumanya aina na ya nkazi anyepwa pa mulandu nu utailo wao. Pa ciputulwa ca Malyasi pa Vikucitika paya na malyasi aakukomelezya aakalanda pa makampeni aa mulimo wa kusimikila ni Ciusyo. Aaweni aakalondelezya malyasi aakwika pa ciputulwa cii, nupya yakapekanyiziwa uli?

 Dipatimenti Iikalondelezya Malyasi pa Vikucitika Iya ku Maofesi Yakalamba mu Nsi Yonsi kuli kuti OPI, iliyo ikapekanya malyasi pa vikucitika. Dipatimenti ii ikalondela utunguluzi ukufuma kuli Komiti Ikalolekesya Pali Vino Vikumile Ya Nte Yakwe Yeova Iiumba Ilikatungulula. Muli dipatimenti yakwe ya OPI mwaya aina na ya nkazi ukucila pali 100 nupya aingi aomvi yakuitemelwa aakaombela uku mang’anda yao, yamwi yakaomba mulimo wa kulemba, kupanga vikope, nu kusenula. Yauze nayo yakalanzyanya na aa mu uteeko, antu aasambilila sana na yamwalimu, na aakasalanganya malyasi pa TV na pa ledyo. Ya OPI yakaombela pamwi na Madipatimenti Aakalondelezya Malyasi pa Vikucitika aa mu Misambo kuli ukuti ya PID aya umu misambo kucila pali 80 mu nsi yonsi.

 Pa kupekanya malyasi aakwika pa ciputulwa ca Malyasi pa vikucitika ya OPI yakaombela pamwi na ya PID. Lino sile aina yamanya ukuti ilyasi limwi lingazipa ukwika pa jw.org, yakatandika ukulondelezya api lyasi lilyo. Mukucita vii mwaya nu kuuzya ivyacitiike. Nga yalondelezya ivisinka yakalemba cipande, ukupitulukamo pakuti yalole umwakuzifya, ukwikamo vikope, nu kutuma kuli Komiti Ikalolekesya Pali Vino Vikumile Ya Nte Yakwe Yeova pakuti izumilizye.

 Uzye yakapepa yanji yakauvwa uli nga yabelenga vipande ivyaya pa ciputulwa ca Malyasi pa Vikucitika? Nkazi Cheryl aakaikala ku Philippines walanzile ukuti: “Cila katondo, natemwa ukutandikilapo ukubelenga malyasi pa vikucitika mwi iuvi lyakwe Yeova alino ni vikucitikila antu yakwe.”

 Aingi aakabelenga yakalola upusano uwaya pa Malyasi pa Vikucitika akaya pa jw.org na yano yakasalanganya pa TV na pa ledyo. Ya Tatiana aakaikala ku Kazakhstan yalanzile ukuti: “Nkataizya sana ukumanya ukuti ningataila malyasi akaya pa jw.org pano acumi. Nkazi Alma aakaikala uku Mexico walanzile ukuti: “Malyasi akaya pa ciputulwa ca Malyasi pa Vikucitika yakakomelezya sana, pano yataya wa malyasi aakalanda pa viipe ivikucitika akaya pa TV na pa ledyo.”

 Malyasi pa Vikucitika asi sile acumi lelo yakakomya nu utailo witu. Ya Bernard aakaikala ku Kenya yalanzile ukuti: “Malyasi pa Vikucitika yangazwa ukulalola aina na ya nkazi umu nsi yonsi ukuti ulupwa lwane usi mulandu na kuno yakaikala. Lino nkupepa, nkalumbula mazina yao ni vikuyacitikila.” Nkazi Bybron nawe kwene aakaikala uku Kenya walanzile ukuti: “Lyonsi nkauvwa ningo nga nalola icipande icikulanda pali vino Baibo itifuma umu lulimi lumwi. Vipande vii vikanjiusyako ukuti Yeova aataya na kapatulula.”

 Na malyasi kwene aakalanda pali vino aina yakuzunyiwa yangatukomelezya. Ya Jackline aakaikala uku Kenya yalanzile ukuti: “Ukwelenganya pali vino aina yakaya asipe lino yakuzunyiwa kukakomya utailo wane. Lyonsi nkaezya ukulola vino yakacita pakuti yazizimizye. Nasambililako ukuti vivikwene vino antu yakalola ukuti vyangupala wakwe, ipepo, kubelenga Baibo, kwikako sile nu kwimba inyimbo vikaazwa sana aina itu ukutwalilila ukuya akome.”

 Nkazi Beatriz aakaikala ku Costa Rica watemwa ukubelenga malyasi aakalanda pa mazanzo akuiponela. Walanzile ukuti: “Malyasi pa Vikucitika yalenga nalola vino iuvi litu likaazwa zuwa aina muli vino yakulondekwa, mu nzila isuma nupya yakalanga ukutemwa lino yakucita vivyo. Cii cikalenga nsininkizye ukuti lii iuvi lyakwe Yeova.”

 Tukaya nu luzango ukupokelela ivyeo ivipya ivikulanda pa vikucitikila aina na ya nkazi mu nsi yonsi. Vii vitanga vicitike ukwaula imisangulo inu iyakuitemelwa ino aingi yakasangwilako ukuomvya donate.pr418.com. Tukataizya sana pali ukapekape winu.