Antu aingi aakaomba umulimo wa kusenula yasiombela pa musambo, lelo yakaombela uku maofesi yakwe ya kasenula (yano yakati RTO). U mulandu ci uno mapekanyo yaa yazipila? I viombelo ci vino ya kasenula yakalondekwa pakuti yaomba ningo imilimo yao umu ma RTO? Uzye ukukayela ma ofesi yakwe ya kasenula kukalenga umulimo wa kusenula ukuya uli?

 Maofesi yakwe ya kasenula yakalenga ya kasenula ukwikala kuuku kwene kuno antu yakavwanga ululimi lwao. Nkazi Karin aakasenula ululimi ulwa Cilow German, watiile: “Kufuma pano twakuukile uku maofesi yakwe ya kasenula mu musumba uwa Cuauhtémoc ku Chihuahua, uku Mexico, lyonsi tukalanda ululimi ulwa Cilow German na ya kasenula yanji, lino twaya umu mulimo wa kusimikila, na lino twaya umu kukala vimwi. Lyene twaya na antu akavwanga ululimi lwitu. Tukauvwa imvwango zino antu yakalanda zino tutatazile ituvwapo pa nsita itali, nupya tukaomvya mazwi yano antu aakaomvya ululimi luu yakaomvya ndakai.

 Ya James aakasenula ululimi ulwa Cifrafra uku Ghana, yatiile insita zimwi yakaluuka ukuya pamwi na aa mu lupwa ulwa pa Betele uku musambo. Nupya yalanzile nu kuti: “Natemwa ukuombela uku RTO. Ukusimikila umu lulimi luno antu yakauvwa nu kulola vino yakucita nga yuvwa ilyasi lisuma kukalenga inje sana ni nsansa.”

 Uzye aina yakacita uli pa kusoolola incende ukungayela RTO? Ya Joseph aaya muli Dipatimenti Iikaangalila Mulimo wa Makuule Umu Nsi Yonsi iyayela uku Warwick, mu New York, ku U.S.A, yatiile: “Intazi yonga ino tukakwata iyakuti uku ncende zimwi kusiya malaiti, manzi, nanti intaneti ya kuomvya pa kutumila ya kasenula ivyeo ivya kusenula. Fwandi lino tukusoolola incende kuno kumayela RTO, tukasoolola incende ukucila pali yonga kuno yakavwanga ululimi ulukusenulwa.”

 Kwene, inzila iyakungupale nupya isilondekwa ukuomvya sana impiya lino tukusoola ukwa kupangila RTO, u kuipangila pa Cikuulwa ca Ukongano, pa Ng’anda ya Wene, nanti pa ng’anda apakaikala ya misyonali, pano ya kasenula yangaaya umu kuombela. Ndi cakuti kusi vikuulwa wakwe vii, aina yangayazumilizya ukukala incende ukwa kukuula maofesi nu mwakwikala ya kasenula. Ndi cakuti ivintu vyasenuka, cingangupala ukukazya ivikuulwa vii nu kuomvya impiya zizyo kuno zikulondekwa sana.

 Umu mwaka wa mulimo uwa mu 2020, twaomvizye impiya madola 13 milyoni pakuti imilimo itwalilile ukuombwa umu ma RTO. Ya kasenula yakalondekwa makompyuta, mapuloglamu ya pa kompyuta, ivya kuomvya pa kukopa, intaneti, malaiti, manzi, alino na vyuze. Pakuti iike vyonsi ivikulondekwa pali kompyuta yakwe cila kasenula, yaomvizye impiya madola umupiipi na 750. Pa makompyuta pakaya mapuloglamu yakukala alino na puloglamu ino ya Nte yapanga ino yakati Watchtower Translation System, iikayazwa ukuomba ningo imilimo yao alino nu kuzana zuwa vino yakulonda.

 Ya kasenula yakapokelela iviombelo vino yangaomvya pa kukopa mazwi mumukwene mu ofesi muno yakaombela. Viombelo vii vyaomvile ningo sana lino ulwale wakwe COVID-19 watandike, pano ya kasenula yavisenzile uku mang’anda yao nu kulaviomvya ukukopa impapulo na mavidyo.

 Aakaikala ukwayela RTO yakaazwilizya lino yakupituluka umu mpapulo izisenulwe, nu kuzifya ivikuulwa ivya pa RTO. Umwina Cirstin aakaombela uku RTO iyayela umu Cape Town, uku South Africa kuno yakasenula Iciafrikaans watiile: “Ya kasimikila alino na ya Painiya yakwata isyuko ilya kuombela pano.”

 Aakaipelesya ukuomba umulimo uu yakaipakizya sana. Nkazi umwi aakaazwilizya pa RTO walanzile ukuti: “Nkauvwa ningo sana ukuombela pa RTO.” Aina yamwi na ya nkazi yakaya umu kukopa mazwi. Nkazi Juana aakasenula ululimi ulwa Citotonac umu Veracruz, uku Mexico, watiile: “Pa mulandu wakuti lyene tukaikala umupiipi na matauni umwaya antu aakalanda sana ululimi lwitu, cikaangukila sana aina itu ukwazwilizya umu mulimo wa kukopa impapulo na mavidyo.”

 Uzye ukukwata ma RTO kwalenga ukuti ivyeo vino tukasenula vizipileko? Aingi akabelenga yakalanda ukuti ee. Ya Cédric aakasenula ululimi ulwa Cikongo uku Democratic Republic of Congo yatiile: “Inzila ino twasenwilangamo ululimi lwa Cikongo yalenzile Aina na ya nkazi yamwi ukulalanda ukuti i Cikongo ca mu mpapulo zyakwe ya Nte pa mulandu wakuti tutaomvyanga amazwi aomviwanga sana na antu aakalanda Icikongo. Nomba ndakai, yakalanda ukuti Icikongo ica mu mpapulo zintu ali cino antu yakalanda ndakai.”

 Ya Andile aakasenula ululimi ulwa Cixhosa, yuvwile antu yakulanda ivikolineko na vii uku South Africa. Yatiile: “Aingi yakatunena ukuti yalola ukuti misenwile itu yasenuka. Na ance kwene aabelenganga Ulupungu Lwa Mulinzi umu Cizungu ndakai lyene yakabelenga umu Cixhosa. Nupya yatemwa sana vino Baibo umupitulukwemo uwa Malembo ya Nsi Ipya waomvya mazwi yano antu yakaomvya.”

 Pa kukuula, kuzifya, alino nu kusakamala aomvi ya pa ma RTO, tukaomvya imisangulo ino mukasangula uku mulimo uwa mu nsi yonsi, ukwikako na ino mukasangula ukuomvya donate.pr418.com.