Lupungu Lwa Mulinzi lwakwe Juni 1, 1912, lwalanzile ukuti: “Aakabelenga impapulo zitu yafwile yamanyako antu yamwi mpafu. Yangakwata ulupapulo ulwa kubelenga uwila sile. . . . Lupapulo luu ulwa mpafu lukapangwa na matoni aakulu pakuti impafu zingabelenga ningo.” Lupungu Lwa Mulinzi lwalanzile nu kuti: “Antu aingi aasilola yakataizya sana pi lyasi lisuma sana ilyakuti ivintu visuma vili nu kucitika umu nsi.”

 Lino amazwi yaa yalemvilwe, ala impanga izipusanepusane izikaomvya ululimi ulwa Cizungu zikalemba ivilembo vya mpafu umu nzila izipusanepusane. Lelo na pa nsita kwene iya, ala Ya Nte Yakwe Yeova yakapanga impapulo izikalanda pa cumi ica muli Baibo umu vilembo vikulu kuli kuti vilembo vya mpafu. Na likwene tucili tukalemba. Ndakai twakwata impapulo zya mpafu umu ndimi ukucila pali 50. Uzye zikapangwa uli?

 Cino tukatandikilapo ukucita u kulemba mazwi mu vilembo vya mpafu. Ya Michael Millen aakaombela kuli Dipatimenti Iikapekanya Impapulo Pakuti Zifume iya ku Patterson mu New York yalanzile ukuti: “Kucisila twaomvyanga mapuloglamu aapa kompyuta aapanzilwe na antu yauze pa kulemba ivilembo vya mpafu, nomba mapuloglamu yaa yataomba mu ndimi zyonsi zino twalondanga. Lyene ndakai, twakwata puloglamu ino tukaama ukuti Watchtower Translation System iikalenga catwangukila ukulemba ivilembo vya mpafu umupiipi ni ndimi zyonsi mu nsi. Kutaaya puloglamu iyaya wakwe ii.”

 Umu mpapulo zya mu vilembo vya mpafu yakaikamo nu ulondolozi wa vikope. Wakwe, pa cikope icaya pa nkupo ili buku lya mpafu ilyakuti Mungaya ni Nsansa Manda Pe! paya ulondolozi wakuti: “Umonsi akupita umu kazila akazingulukwa na maluwa asuma ni myamba.” Umuomvi aakatumikila nupya painiya aasilola uwizina lyakuti Jamshed walanzile ukuti, “Amazwi yaa aakalondolola ivikope yakangazwa sana.”

 Pa cisila ca kulemba ivilembo vya mpafu, yakatuma impapulo uku maofesi ya musambo pakuti yakakuzye ivilembo. Kuuku, ali kuno yakaika ivilembo pa mapepala aatimbe aakuti yatanga yononeke lino yakukuzya ivilembo nanti ukononeka pa cisila ca kuomvya pa nsita ikulu. Lyene yakaika pamwi mapepala, kuyapiinika, alino nu kutuma ku vilongano pamwi ni mpapulo zyuze nanti kuomvya inzila yakuti “kutuma vintu vya mpafu uwila” ndi cakuti ya positi ofesi aa ku ncende iyo yakwata mapekanyo yaa. Insita zimwi, aamu misambo yakatuma zuwa zuwa impapulo zya mpafu ku vilongano pakuti aina na ya nkazi impafu nanti aasilola sana yangakwata impapulo zya kuomvya pa kulongana.

 Pakuti mulimo uu uombwe cikalondekwa insita ikulu nu lupiya. Alino, insita ino masyini ya ku Wallkill mu New York ikasenda pa kupulinta Mabaibo 50,000 ali insita ino cikasenda na pa kukuzya vilembo mu Mabaibo yaili sile aamu vilembo vya mpafu. Baibo uwa mu vilembo vya mpafu uwa mu Cizungu wakwata mavolyumu 25, nupya vintu vino yakaomvya pa kupanga mavolyumu yaa vyakwata sana umutengo ngu ukuvilinganya kuli vino yakaomvya pa kupanga Baibo wino aakalola yakaomvya. Inkupo zino yakaomvya ku mavolyumu aali 25 zikakalwa kufika ku madola 150 aaku U.S.A.

 Uzye yayo aakaomba umulimo wa kupanga impapulo zya mpafu yakayuvwa uli pa mulimo uno yakaomba? Ya Nadia aakaombela ku musambo wa ku South Africa yalanzile ukuti: “Aina na ya nkazi impafu nanti sile yayo aasilola sana, ivintu vikayatalila umu umi, fwandi nkacilola nga isyuko ukupanga ivintu ivikayazwa. Cii cikandangilila ukuti Yeova wayatemwa sana.”

 Nomba nga ndi cakuti umuntu ataamaya ukubelenga ivilembo vya mpafu? Imyaka imwi uku cisila, twafumizye kabuku kakuti Learn to Read Braille umwali ivilembo vya mpafu alino ni vipulintwe. Kapangwa umu nzila yakuti yonsi kwene aakalola ni mpafu yangakaomvya. Mu kabuku kaa mwaya nu tuombelo tuno umuntu aasilola angaomvya pa kulemba vilembo vya mpafu. Umuntu aakusambilila ukulemba ivilembo vya mpafu angaomvya utuombelo tuu pakuti aikuzizye ivilembo umwineco. Kucita vii kukaazwa umuntu aakusambilila ivilembo vya mpafu ukulaiusya ivilembo nupya cingamwazwa ukuvimanya nga wavilema.

 Uzye aina na ya nkazi impafu alino na aasilola sana yaipakizya uli ukubelenga impapulo zii? Ya Ernst aakaikala uku Haiti yazanwanga umu kulongana nomba ala yatakwata ulupapulo ululi lonsi mu vilembo vya mpafu. Fwandi yasungilanga sile ivyeo pakuti yalande lyasi lya yasambi nanti ukwasukapo pa kulongana. Yalanzile ukuti “Lyene paa nkakatusya ikasa nu kwasukapo insita ili yonsi. Nkayuvwa ukuti twalemana sana na ina na ya nkazi. Swensi kwene tukapokelela ivyeo ivili vimwi ukufuma kuli Yeova.”

 Ya Jan ya eluda aasilola sana aa ku Austria aakatungulula Lupungu Lwa Mulinzi ni Sambililo Lya Baibo pa Cilongano yalanzile ukuti: “Impapulo zitu izya mu vilembo vya mpafu zyangupala sana ukucila impapulo zyuze zino nabelengapo. Wakwe, mu mpapulo zitu amafwa yakwata manamba, mwaya mafutunoti angupale ukuzana, nu ulondolozi wa vikope.”

 Ya Seon-ok ya painiya aa ku South Korea yapafula nupya aacipuuli. Kucisila pakuti yaomvye ululimi lwakwe ya ciulu lino yali pa kulongana yayalemanga iminwe, nomba ndakai yakaibelengela impapulo. Yalanzile ukuti: “Impapulo zyuze izya mu vilembo vya mpamfu zyatala ukubelenga pano mutaya matoni yamwi, masentensi yatololoka, nanti sile mapepala yatatimba. Nomba Ya Nte Yakwe Yeova yene yakaomvya mapepala asuma nupya ivilembo vya mpafu vikaya ivikulu icakuti cisintalila ukubelenga.” Yalanzile nu ukuti: “Kucisila antu yauze aliyo yangazwilizyanga ukubelenga impapulo izikalanda pali Baibo. Nomba ndakai nkaibelengela nemwineco. Nupya nkauvwa ningo ukupekanyana ukulongana nemwineco alino nu kwasukapo. Nkabelenga impapulo zitu zyonsi izya mu vilembo vya mpafu. Ningalanda sile ukuti ntanga inte ukubelenga impapulo zii.”

 Wakwe vino impapulo zitu izipulintwe zyaya, impapulo zya mu vilembo vya mpafu nazyo kwene zyakwata amazwi akuti: “Lupapulo luu lusi lwakukazya. U lwakuomvya umu mulimo wa mu nsi yonsi uwa kusambilizya antu Baibo; alino impiya izikaomviwa uku mulimo uu, i misangulo ya kuitemelwa.” Tukataizya sana pali vino mukasangwilako ukuomvya inzila izyalondololwa pa donate.pr418.com. Imisangulo inu iyakuitemelwa ikaomviwa uku kupanga impapulo izikalanda pali Baibo, izikaazwa antu yonsi ukwikako sile ni mpafu alino na aasilola sana.