Pa yantu aingi sana aakaikala uku Latin America, aingi yaikwatila indimi zyao alino ni ntambi. Pa yantu yayo, aingi a ina itu na ya nkazi aacindika intambi zyao. Pakuti yazwe antu ukusambilila pali Leza, yakasenula nu kutuma impapulo zyakwe ya Nte Yakwe Yeova umu ndimi ukucila 130 izikaomviwa sana uku Latin America. a Nanti ciye vivyo, aingi yakayacuzya pa mulandu wa kusoololapo ukuombela Yeova nu kukaanacitako intambi izisiuvwana na vino malembo yakalanda izyaseeka sana uku ncende yao. Uzye yaomvya uli imisangulo inu pa kwazwa aina yaa?

 Aina na ya nkazi aa ku Mexico akaikala uku ncende iyayela uku myamba iya mu musumba wa Jalisco, yakanyile ukucitako intambi izya mu mipepele zino yaweni ukuti zituvwananga na vino Baibo ikalanda. b Cii casosizye sana antu yamwi aa mu ncende muno yikalanga. Pa Dizemba 4, 2017, iumba lya yantu aunkalwe lyazanzile iumba lyakwe ya Nte na antu yauze aingi yano yaali nayo. Iumba lii lyazinzile ya Nte umu muzi, ukunona ivintu vyao, alino nu kuyatiinya ukuti yalakoma umuntu ali wensi alawela umu muzi.

 Ya Nte aikalanga umu matauni ali umupiipi yazwilizye aina na ya nkazi muli vino yalondekwanga pa insita kwene iya. Lelo, i vyani ivyali nu kucitwa pakuti yaswilile ukumwao? Umwina Agustín walondolwile ukuti: “Tutakweti impiya izilinge izya kulipila loya nupya tutamanyile wino tunguzya pa vya mu uteeko.”

 Pa mulandu wakuti aina yayaposile insambu zya kupepa, lilyo kwene sile aa ku musambo wa Central America yacisilepo vimwi pakuti yayazwe. Yatandikilepo ukuuzya intunguluzi izya ku ncende kwene iya pakuti yalondelezye ivyacitike. Lyene Komiti Iikalolekesya Pali Vino Vikumile ya Nte Yakwe Yeova yaombile pamwi na Dipatimenti Iikalolekesya pa Milandu iya ku Maofesi Yakalamba mu Nsi Yonsi nu kutwala umulandu wa ina uku cilye pakuti yayazwe. Lyene umulandu wasusile iufika uku cilye icikalamba ica ku Mexico.

 Ya loya aa mu mpanga izipusanepusane yapekinye ivyeo ivyuvwike muno yalondolwile ukuti wakwe vivi kwene vino antu yauze yalinzile ukucindika intambi zya yantu akaila umu ncende kwene zizyo, ali vino yalinzile kucindika nu kucingilila insambu zya yantu aa mu muzi kwene uo. Antu yonsi yakwata isambu asi mulandu na kuno iikala.

 Pa Julai 8, 2020, Icilye Cikalamba cazumilizye vino ya loya yakwe ya Nte yalanzile. Yalanzile ukuti yonsi yano yazinga yalinzile ukuswilila ukumwao. Ya Agustín yano itulandapo mpiti yalanzile vino yene na antu yauze yataizye lino yatiile: “Tukutaizya sana nupya tuli ni nsansa pali vino aina iyatwazwa. Ukwaula ukutwazwa, nga pasi vino itukwanisya ukucita.

 Nupya aina itu uku Ecuador aakaikala umu muzi wa San Juan de Ilumán uwayela umu cifoloma ica Otavalo yakweti intazi ili imwi. Mu 2014, lino yaposile insambu, yatandike ukukuula Ing’anda ya Wene. Lelo, simapepo umwi watungulwile iumba lya antu aunkalwe acizile pali 100, nu kuya umukulesya aina ukuti yate ukukuula. Lyene antu ya mu muzi yanenyile ya Nte Yakwe Yeova ukuti yate ukukongana pamwi mu kupepa.

 Dipatimenti ikalolekesya pa milandu iya ku musambo wa ku Ecuador yaombile pamwi na aa ku Maofesi Yakalamba mu Nsi Yonsi pakuti yacingilile insambu zino aa mu cilongano yakweti izya kupepa. Aina yatwazile umulandu uku cilye. Cii, calenzile ukuti papo kwene sile aa mu muzi yate ukuzunya aina nu kuyazumilizya ukuti yatwalilile ukulongana nu ku malilila ukukuula Ing’anda ya Wene. Lelo pakuti insambu zya ina zitwalilile ukucingililwa, aimililangako ya Nte yanenyile aa mu vilye ukuti yasuke iuzyo ilicindame, lyakuti: Uzye aa mu muzi yalinzile ukucindika insambu zino antu yonsi yakwata?

 Pa Julai 16, 2020, aa mu cilye icikalamba sana icikalolekesya pa masunde ica ku Ecuador yapokelile umulandu. Ya loya ya Nte aa ku Ecuador imilileko aa mu cilongano. Ukulunda pali vii, aina 4 aa mu mpanga izipusanepusane amanyikisya vyakwe uloya yalondolwile umulandu ku ya mu cilye. Vino kwali vino yalesizye pa mulandu nu ulwale wakwe COVID-19, aa mu mpanga izipusanepusane yalazyanyizye ukuomvya inzila imwi iya pa intaneti. Uu wali ali muku wa kutandikilako uno icilye cazumilizye ya loya aimililangako ya Nte Yakwe Yeova ukulanzyanzya nayo umu nzila ii. c Yalanzile pa masunde aa mu mpanga zipusanepusane aakalangilila ukuti umuntu asita ukuomvya insambu zimwi zino wakwata pa mulandu wa kwikala umu muzi wakwe.

 Aina itu aa ku cifoloma ca Otavalo yalondesyanga ukuvwa vino icilye cimapingula. Ndakai, yakataizya sana pa wazwilizyo uno yapokelile. Eluda uwi zina ilyakuti César uwa mu cilongano ca Ilumán Quichua, walanzile ukuti: “Yeova sile, ukuomvya iuvi lyakwe aangazwilizya sana yantu anono.”

 Ya loya yonsi aaombiile pa mulandu uu aa Nte Yakwe Yeova, nupya yaitemilwe ukuombela pa mulandu uu ukwaula ukulipilwa. Lelo pakuti yatwale umulandu uku cilye, kupekanya nu kuyalondolola umu koti, kwalondekwanga insita ni mpiya. Ya loya itu alino na ina yaomvizye maawazi kucila pali 380 kupekanya ivyakuyalanda uku cilye nupya yaomvizye maawazi na yauze 240 pa kusenula ivyeo vivyo mu lulimi luno antu ya ku Mexico yakaomvya. Ya loya umupiipi na 40 yaomvizye maawazi aingi ukupituluka umu mulandu wa ku Ecuador. Uzye twakwanisye uli ukulipila ivyalondekwanga pa kucingilila insambu izya ina itu? Twakwanisye ukucita vivyo pa mulandu ni misangulo ino mukasangula ukuomvya inzila izyaya pa donate.pr418.com. Tukataizya pali ukapekape winu.