VINO IMISANGULO INU IKAOMVIWA
Ukwazwa Aatiyaponelwa na Mazanzo mu 2021—Kutwalilila Ukwaza Aina Itu na ya Nkazi
JANUWALE 1, 2022
Mu mwaka wa mulimo wa mu 2021, a vintu vyatwalilile ukwipa pa mulandu nu ulwalwe wakwe COVID-19. Wakwe vino calondololwa umu cipande cakuti “Ukwazwilizya Aina Umu Nsi Yonsi Lino Kuli Ulwale Uwipisye,” twaomvya impiya madola b aingi pa kwazwa aina lino kuli ulwalwe uwipisye nupya twapanga Makomiti Aakwazwa Aatiyaponelwa na Mazanzo ukucila pali 950.
Lino kuli ulwale uwipisye, mazanzo yauze aikuponela na mazanzo aakaiza pa mulandu na vino antu yakacita vyalenzile aina itu na ya nkazi umu nsi yonsi ukucula. Pa kwazwililizya uku mazanzo ukucila pali 200 acitike, Komiti Ikalolekesya Pali Vino Vikumile Ya Nte Yakwe Yeova Iumba Ilikatungulula yazumilizye ukuti impiya madola ukufika kuli 8 milyoni ziomviwe uku kwaza aina ukulunda pali zino yazumilizye ukuti ziomviwe ukukwazwa aina ku ulwale wakwe COVID-19. Lolini vino imisangulo inu yaomviwe pa kwazwa aina uku mazanzo yaili acitike likwene.
Kupuulika Kwa Mwamba wa Nyiragongo
Pa Mei 22, 2021 Umwamba wa Nyiragongo wa ku Democratic Republic of Congo, watandike ukupuulika. Ivimawe ivikaye ivikasungulika nu kupongoloka ukufuma uku mwamba nga wapuulika vyononyile mang’anda, masukulu, na manzi. Lelo vii asi sile vyacitike lino mwamba wapuulike. Pa manda yamwi ulukungu ulwipe ukufuma uku mwamba uwapuulike lwaponiile pa musumba wa Goma nupya kwacitike nu tulundumusi utunono utwingi. Antu ukucila pali hafu aakaikala umu musumba uwa yayanenyile ukuti yafumemo. Antu aingi yafumile uku musumba uu, yamwi yutukile uku mupaka wa Rwanda.
Pa Ng’anda ya Wene, aa muli komiti ikaazwilizya aati yaponelwa na mazanzo yakupeela antu mpome.
Pali yayo aafumile uku musumba uu pali Ya Nte Yakwe Yeova kuma 5,000. Yamwi mang’anda yao yononike lino umwamba wapuulike, yauze nayo yaiile lino yafumileko. Makomiti aakwaazwilizya aati yaponelwa na mazanzo aa ku Rwanda na aa ku Democratic Republic of Congo yaombile pamwi pa kwazwa aaponilwe nu uzanzo. Komiti iya musambo ku Congo (Kinshasa) yalanzile pali komiti imwi ikaazwilizya aati yaponelwa na mazanzo ukuti: “Usi umulandu ni vyacitike umu musumba nupya ala na antu yacili ukuyanena ukuti yafumemo, komiti ikaazwilizya aati yaponelwa na mazanzo yatandika ukupeela antu vyakulya, manzi, vyakuvimbala, ni vyakuzwala.” Umu musumba umwi muno aina itu ukucila pali 2,000 yakolongiine, komiti ikaazwilizya aati yaponelwa na mazanzo yapanzile matenti, kuyapela utwakuvimba pa mpuno na pa kwanwa, nu kuyalondolwela vino yangacita pakuti yatalwala COVID-19 na kolela.
Yakupima ivyakulya lino yatatala yavituma uku ina na ya nkazi aafumile kuno yakaikala pa mulandu nu uzanzo
Pa myezi itatu lino kwacitike uzanzo, aina yapeezile antu mupunga makiloglamu ukucila pa 6,000, usu wakwe cisaka makiloglamu kucila pali 6,000, saladi malita ukucila pali 8,000, na manzi malita ukucila pali 8,000. Pa kuti impiya ziomviwe ningo aa ku musambo yapekinye ukuti yakale ivyakulya ivingi mu ncende kwene iya ukucila ukukala ivyakulya ivikome umutengo uku mpanga yuze.
Nkazi umwi wino ing’anda yakwe yononike lino umwamba wapuulike walanzile ukuti: “Twaali sana nu ulanda nupya tuvwile uyi.” Lelo wene na aa mu lupwa lwakwe yapokelile ivino yalondekwanga lwa kumwili nupya yakomeleziwe pakuti yatwalilile ukuya nu utailo. Lyene paa, akalanda ukuti: “Pa mulandu wakuti Yeova akatwazwa, twakwata vino tukalondekwa. Twalola ukuti Yeova akatusendela ivisendo nupya akalenga citwangukile ukuzizimizya.”
Kutala Kwa Mpiya mu Venezuela
Umu Venezuela mwaya intazi ya kutala kwa mpiya pa myaka iingi. Aina itu yatwalilila ukuzizimizya intazi zya mu wikazi, kuliizya ivyakulya, alino nu upondo. Lelo iuvi lyakwe Yeova litayatazyela.
Yakulonga masaaka ya mupunga aakutwala uku ncende izipusanapusane umu Venezuela
Mu mwaka wa mulimo uwafumako, impiya ukucila pa madola 1.5 milyoni zyaomviwe uku kukala ivyakulya na sopo alino nu kuvituma uku ndupwa izyalondekwanga uwazwilizyo. Aa ku musambo wa ku Venezuela yalanzile ukuti: “Citangupala ukutuma ivyakulya makiloglamu 130,000 cila mwezi umu mpanga yonsi iya Venezuela nu kusininkizya ukuti aina aakulondekwa uwazwilizyo yapokelela ivyakulya.” Pa kuti yasininkizye ukuti ivyakulya vitononike, aina yakatuma ivyakulya ivingikala insita itaali ukwaula ukunoneka. Aa ku musambo yalanzile nu kuti: “Tukakala ivyakulya ivingi pa nsita ino yakuzombola pano ali lino vikatonta imitengo. Nupya tukavituma uku ina ukuomvya inzila ino tutanga tusumbe impiya izingi.”
Pa mulandu nu kutala kwa mafuta aa muli motoka alino na yamotoka kwene, aina acance yakapita makilomita 18 pa majinga pakuti yatwale ivyakulya uku cilongano cao
Ya Leonel aa muli Komiti Ikaazwilizya Aati Yaponelwa na Mazanzo iya mu Venezuela yatemwa umulimo uno yakaomba. Yalanzile ukuti: “Umulimo wa kwazwa antu umulimo uiyele. Umulimo uu ukankomelezya ukufuma pano mamane wafwilile uku ulwale wakwe COVID-19. Nkaya umupamvikwe nupya nkayuvwa ukuti nkaomviwa ukukwazwa aina aakulondekwa uwazwilizyo. Nailolela vino Yeova akafikilizya ulayo uno walaya uwakuti atalatala atazyele antu yakwe.”
Umwina umwi uwapokelile uwazwilizyo waomvilepo muli komiti ikaazwilizya aati yaponelwa na mazanzo. Walanzile ukuti: “Lyene paa nene nalondekwanga uwazwilizyo. Aina yatatupeezile sile vino twalondekwanga, lelo nemo na mamane yatwazwile nu kutwalilila ukuya ateekele. Yatusakamalanga, ukututeekezya, nupya yatukomelezyanga.”
Mazanzo yamwi yakacitika ukwaula ukwenekela. Lelo insita izingi, iuvi lyakwe Yeova likakwanisya ukukala ivyakulya nu kuvitwala zuwa kuli yano yakulondekwa uwazwilizyo. Vii vikacitika pa mulandu ni misangulo ya mu nsi yonsi ino mukasangwilako. Inzila zimwi zino mungaomvya pa kusangwilako zyalondololwa pa donate.pr418.com. Tukataizya sana pali ukapekape winu.
Limwi Mungatemwa Ukulolako na Vii
MAUZYO YANO ANTU YAKAUZYA SANA
Uzye ya Nte Yakwe Yeova Yakafumya Kwi Impiya Zino yakaomvya Umu Mulimo Wao?
Sambililini mumanye vino umulimo witu wa kusimikila uukaombwa umu nsi yonsi nu kutwalilila ukukulilako ukwaula ukuti twapoka imituulo nanti ciikumi.
MAUZYO YANO ANTU YAKAUZYA SANA
Uzye ya Nte Yakwe Yeova Yakaazwilizya Atiyaponelwa na Mazanzo?
Sambililini vino tuka-azwilizya yano tukapepa nayo alino na yano tusipepa nayo ndi yaponelwa na mazanzo.
