Mu mwaka wa 2020 mwali mazanzo akuiponela aingi sana ukwikako sile nu ulwale wakwe COVID-19 mu nsi yonsi. Uzye ya Nte Yakwe Yeova yazwilizye uli yayo aponiilwe na mazanzo?

 Mu mwaka wa mulimo uwa mu 2020, * Komiti Iikalolekesya Pali Vino Vikumile ya Nte Yakwe Yeova Iiumba Ilikatungulula yazumilizye ukuti yaomvye impiya madola * 28 milyoni ukwazwa atiyaponelwa na mazanzo. Kucita vivyo kwalenzile yazwilizye aina aponiilwe na mazanzo apusanepusane kucila pali 200, pa mazanzo yayo pali nu ulwale wakwe COVID-19, vimiza ivipisye, kuunda umu Africa, kuulizya ivyakulya uku Venezuela, alino ni cilala icali uku Zimbabwe. Yaomvizye imisangulo ku kulipila uku vyakulya, manzi, umwa kwikala, ivyakuzwala, milembo, alino ni vintu ivyakuomvya uku kuzifizyako, ukulungisya ivyononike, nu kuzifya mang’anda aononike. Loliniko yamwi yano yazwilizye.

 COVID-19. Ulwale uu walenzile ukuti vintu vipiile antu umu nsi yonsi lwa ku mwili, mu melenganyo, alino nu kulenga ukuti yaulizya impiya. Pakuti tuyazwilizye, twapanzile Makomiti Akwazwilizya Atiponelwa na Mazanzo kucila pali 800 umu nsi yonsi. Aa mu makomiti yaa iikanga mano kuli vino aina yalondekwanga nu kumanyisya aa muli Komiti Iikalolekesya Pali Vino Vikumile ya Nte Yakwe Yeova pakuti yangamanya ivyakwazilizya atiyaponelwa na mazanzo.

 Mu mwaka onsi makomiti yaa yazwilizyanga antu ukukwata ivyakulya, manzi, ivyakuyazwa kuti yaye nu umi usuma, alino ni milembo. Umu ncende zimwi, aa mu makomiti yaombelanga pamwi na ya eluda pakuti yazwe aina akulondekwa ukwaziwa na aa mu uteeko.

 Na antu asi ya Nte Yakwe Yeova yakalola vino tukaazwilizya atiyaponelwa na mazanzo. Wakwe, ya Field Simwinga akaangalila icitungu ca ku Nakonde mu Zambia, yanenyile aina ukuti: “Tukutaizya sana pali vino mwazwilizya indupwa izyalondekwanga uwazwilizyo.”

 Kuulizya Ivyakulya Uku Angola. Pa mulandu nu ulwale wakwe COVID-19, ivyakulya vyacefile sana umu Angola nupya calenzile ukuti vikome sana umutengo. Na cii calenzile catalila sanaina na ya nkazi aingi ukukala ivyakulya.

 Twanenyile aa ku musambo wa ku Brazil ukuti yatumileko aina aa ku Angola ivyakulya. Pakuti yaomvye ningo imisangulo, aina yalondelizye inzila isuma ino yangaomvya pa kukala alino nu kutuma ivyakulya, nupya yakazile ivyakulya ivingi. Fwandi yaomvyanga sile impiya madola kufika 22 pa kukala nu kutuma ivyakulya ivyafinanga makiloglamu 20 papo apali mupunga, cilemba, na mafuta yakwelekela. Ndakai yatuma ivibokosi vya vyakulya ivili 33,544 vingafina makiloglamu 654,000 (721 U.S. tons). Ivyakulya vino yatumile ukwika pamwi ni vyafumile mu Angola vyazwilizye antu ukucila pali 50,000!

 Uzye aina yakayuvwa uli pali vino yayazwilizye? Ya Alexandre aakaikala uku ncende iyakutali sana uku Angola yatile: “Vii vyalenga njuvwe ukuti Yeova wantemwa sana nupya ntaya nenga. Iuvi lyakwe Yeova lyancindika.” Ya Mariza ya nyina atakwata yawao yatile: “Yeova waswike ipepo lyane. Nkamutaizya nu kutaizya iuvi lyakwe.”

 Ukwazwilizya aa ku Zimbabwe Lino Kwali Cilala. Umu mwaka wa mulimo uwa mu 2020, ku Zimbabwe kwali sana icilala, nupya cii calenzile ukuti antu aingi yatwakwata ivyakulya ivikumanile. Ya nte aingi yatakweti ivyakulya ivilinge.

 Twapanzile makomiti ali 5 aakwazwilizya ukutwalila aina ivyakulya. Ya kasimikila aingi yazwilizye ukulonga ivyakulya, alino nu kwazimisya ya motoka * pakuti yaomviwe ukusendelako ivyakulya. Umu mwaka wa mulimo uwa mu 2020, twaomvizye impiya madola 691,561 ukukalila antu 22,700 ivyakulya.

 Mu ncende zimwi, yazananga ukuti aina yamala ivyakulya vino yakweti pa nsita ino yayatwalilanga ivyakulya. Ndi cakuti vyakulya vyafika, yalumbanyanga Yeova. Nupya yamwi yatandikanga nu kwimba inyimbo zya Wene.

 Umu ncende imwi, ya mukamfwilwa yaili ya Nte yaile iyazanwa uku kukomana kumwi ukwali mu muzi, kuno yalanzyanyanga pa vyakulya vino kaungwe kamwi akasi ka mu uteeko kali nu kuyapeela. Fwandi lino ya nkazi yaweni ukuti mukulanzyanya kuko mwali sana ivikanza ivya miteekele, yasoolwilepo ukukanacitako ivyalondekwanga pakuti yakapokeko ivyakulya vino yali nu kupeelwa. Lino yafumanga pa kukomana kuko, antu yamwi yayatumfizye nu kuyanena ati: “Mutakize mukulenga ivyakulya kuli sweswe.” Lelo, lino papisile sile imilungu iili, ya nkazi yaa yapokelile ivyakulya ivyafumile kuli komiti iikaazwilizya atiyaponelwa na mazanzo ala ni vyakulya ivya mu kaungwe akasi ka mu uteeko vitatala vyafika.

 Ukwazwilizya aina uku Zimbambwe kwalenzile ukuti mulimo wa kusimikila uombwe ningo. Wakwe, elenganyini pali nkazi Prisca aakaikala umu muzi umwi unono. Usi mulandu ni ntazi zino nkazi Prisca wakweti pa mulandu ni cilala, wayanga lyonsi mu mulimo pali Citatu na pali Cisano, nu munsita ya kulima kwene. Aa mu muzi muno wikalanga yamutumfyanga nu kumunena iyati: “Ulalenga ya lupwa yako yafwe ni inzala pa mulandu nu kusimikila. Lelo nkazi Prisca wayanenanga ukuti: “Yeova asilekelezya aomvi yakwe.” Lino papisile insita inono, wapokelile ivyakulya ukufuma kuli Komiti Iikaazwilizya Atiyaponelwa na mazanzo. Cii calenzile ukuti ainamupalamano yakwe yamwi yuvwe ningo, nupya yamunenyile iyati: “Leza atatala wakulekelezya, fwandi tukulonda ukusambilila pali aliwe.” Ndakai ainamupalamano yakwe 7 yakakutika uku kulongana kuno yakaika pa ledyo.

 Lino tukuya tukupalama uku mpelelekezyo, twakulaponelwa na mazanzo aingi akuiponela. (Mateo 24:3, 7) Tukataizya sana pa misangulo ino mukasangula ukuomvya inzila izipusanepusane izya pa donate.pr418.com. Misangulo ii ikaomviwa ningo sana nupya pa nsita ilinge uku kwazilizizyako yao aakulondekwa uwazwilizyo.