Yesu wanenyile asambi yakwe ati: “Mulaya inte zyane . . . kufika kuno insi yapela.” (Milimo 1:8) Ndakai, ya Nte Yakwe Yeova aakufikilizya mulimo uwo. Lelo ncende zimwi umu nsi, ukwikako ni ncende izikalamba umwaya antu aingi sana, zitatala zyasimikilwamo sana. Nupya mu mpanga zimwi ya Nte yacepa. (Mateo 9:37, 38) I vyani vino tukucitapo pakuti tusimikile ku yantu aingi ukufika pano tungapezya?

 Pakuti tulondele isunde lyakwe Yesu, Komiti wa Mulimo Uwi Umba Ilikatungulula Lyakwe ya Nte Yakwe Yeova aakatuma ya misyonali ku ncende ukukalondekwa sana ya kasimikila umu nsi yonsi. Ndakai, kuli ya misyonali 3,090 umu nsi yonsi. a Aingi yasambiliziwa uku sukulu lya Baibo, wakwe ukwi Sukulu Lyakwe ya Kakosoola ya Wene. Ya misyonali yakaitemelwa ukusya mang’anda yao nu kukukila ku mpanga yuze. Pa mulandu wakuti ya misyonali yaa yalunduluka muli vyakwe Leza, ukusambiliziwa alino nu kumanya umulimo, calenga ukuti umulimo wa kusimikila ilyasi ilisuma waombwa sana nupya vino yakacita vikalenga asambi apya ukuyakolanya.

 Api ofesi lya musambo lyonga na lyonga, paya Iofesi Ilikaangalila Mulimo wa Kusimikila Ilyaya Muli Dipatimenti ya Mulimo, ilikaombela pamwi na Komiti ya Musambo ku kusakamala ivikulondekwa ya misyonali, ivili wa mwakwikala umulinge, umi wao, nu kuyapeelako kalupiya kanono aka kuomvya kuli vino yakulondekwa. Mu mwaka wa mulimo uwa mu 2020, ya Nte Yakwe Yeova yaomvizye impiya umupiipi na madola 27 milyoni (K567,000,000) uku kusakamala ya misyonali. Pa mulandu na mapekanyo yaa, calenga ya misyonali yiike sana mano na maka yao ku mulimo wa kusimikila, alino nu ku kukomya ivilongano vino yayamo.

 Uzye ya misyonali yalenga uli ukuti mulimo wa kusimikila ulunduluke? Ya Frank Madsen aakaomba muli Komiti ya Musambo uku Malawi, yalanzile iyati: “Pa mulandu nu kusipa kwakwe ya misyonali alino nu kumanyikisya mulimo, calenga ukuti yavwilizye uvilongano ukutandika ukuombela umu vifulo ivitale ukuombelamo, ivili wa vifulo ivipindililwe alino nu mu vifulo umwaya antu aakavwanga ululimi luze. Nupya vino yakaombesya pakuti yasambilila ululimi ulwa ku ncende ino ya kuombelako alino ni ntambi vikakomelezya yauze, nupya vikalenga acance yalondesya ukuombako mulimo wa nsita yonsi. Tukataizya Yeova pa kukwata ya misyonali.”

 Umwina na muze uwaya muli Komiti ya Musambo uku mpanga na yuze walanzile ati: “Vino ya misyonali yakacita vikalangilila ukuti antu yakwe Yeova umu nsi yonsi yalemana. Na asi ya Nte kwene yakalola ukuti tutapaatukana pa mulandu ni ntambi, lelo yakalola ukuti masambililo amuli Baibo yalenga kuti tuye ulupwa longa ululemane umu nsi yonsi.”

 Uzye ya misyonali yakaazwa uli ya kasimikila aya umu ncende ino yakaombelamo? Paulo uwa ku Timor-Leste, akataizya pali ya misyonali yano yatuma umu cilongano cino wayamo. Walanzile ati: “Ku mwitu kwakaya sana. Nomba nanti icakuti ya misyonali yafuma ku ncende izuke, yasileka ukuti imicele iyaya uku mwitu iyalesye ukusimikila. Lyonsi katondo yakaya umu kukomana kwa kuya umu mulimo wa kusimikila. Ilingi nkayalola yakuswilila kuli yano yasimikiile, umu nsita ya kasanya lino ikukaya sana, alino na manguzi. Yazwa antu aingi ukusambilila icumi, kumwi nani kwene. Pa mulandu nu kucincila kwao, yakaomvya umi wao onsi uku kuombela Yeova, na cii calenga amu cilongano yonsi yamuombela sana.”

 Ketti, painiya wa nsita yonsi uwa ku Malawi, walanzile vino ya misyonali atwalane yazwilizye ulupwa lwakwe, watiile: “Lino ya misyonali atwalane yayatumile umu cilongano citu, nene sile nenga nali Nte umu lupwa lwitu. Lelo atwalane yaa yantungilile sana, nupya izile iyaya acuza apalamisye uku lupwa lwitu. Imiyele yao isuma yazwilizye anane ukulola insansa alino ni visuma ivyaya umu kuombela Yeova. Imiyele isuma yakwe ya misyonali yalenga anane akazyana yatatu yaomba upainiya uwa nsita yonsi, nupya ya wane yatandika ukuzanwa umu kulongana.”

 Uzye impiya izya kusakamalilamo ya misyonali zikafuma kwi? Zikafuma ku misangulo ya mulimo wa mu nsi yonsi, muno aingi yakasangwilako ukuomvya inzila izikazanwa pa donate.pr418.com. pa intaneti. Tukataizya sana pa misangulo yii iya kuitemelwa.