1-3. (a) Uzye Aina Klistu yakalanga uli ukuti yakalondesya ukukongana pamwi? (Lolini icikope cakutandikilako.) (b) I vyani vino tumalazyanya umu cipande cii?

LINO Corinna wali ni myaka 17, ya nyina yayalemile nu kuyatwala uku cifungo ukutali. Lino papisile insita, Corinna nawe kwene yamusenzile uku Siberia ukwali ukutali sana na kuno wikalilanga. Waombanga umu famu alino yayaomvyanga ngati aazya. Insita zimwi yamupatikizyanga ukuomba ala ikuzuka sana ala atazwite ni vyakuzwala ivyakumucingilila uku mpepo. Nanti ciye vivyo, uwanda umwi Corinna na nkazi muze yapingwilepo ukupuuka pa famu ukuya uku kulongana, nupya yezizye na maka pakuti sile yacite vivyo.

² Corinna watile: “Twafumile pa famu usiku nu kupita makilomita 25 ukuyafika apa citesyeni ca masitima. Isitima lyakatukanga ni nsita yakwe 2 koloko wa katondo, lipita pa maawala 6 ukufika uku ncende ino  twalonganilangako lyene itupita amakilomita 10 ukuyafika apa kulonganila.” Corinna watemilwe sana pali vino wacisile. Watiile: “Pa kulongana, twasambilile Ulupungu nu kwimba inyimbo zya Wene. Twakomeleziwe sana nu kuya nu utailo ukome.” Lino papisile amanda yatatu yaswilile uku famu, nomba umwineco wi famu atamanyile nu kumanya ukuti yafumilepo.

³ Antu yakwe Yeova yakalondesya ukuya pamwi na ina insita izingi. Aina Klistu yakutandikilapo yalondesyanga ukukongana pamwi uku kupepa Yeova nu kusambilila pali aliwe. (Milimo 2:42) Namwe kwene mufwile avino mukayuvwa, mukalondesya ukulongana lyonsi. Nomba wakwe vino caya uku ina na ya nkazi yonsi insita zimwi cikatala ukuzanwa uku kulongana. Limwi apa mulandu ni ncito ino mukaomba iikamusendela sana insita ikulu nanti limwi ivyakucita vikavula, nupya limwi mukauvwa ukutonta. Nga lyene icani cingatwazwa ukwezya na maka yonsi ukuzanwa uku kulongana lyonsi? ^[1] (Lolini vyeo vya ku mpela.) Tungacita uli pakuti tukomelezye yano tukasambilila nayo Baibo na yauze sile ukulaiza uku kulongana lyonsi? Icipande cii cimatwazwa ukumanya vino (1)  ukulongana kukatwazwa, (2)  tukaazwa anji ndi tukuzanwa uku kulongana, na vino (3) tukazanzya Yeova ndi tukuzanwa lyonsi uku kulongana. ^[2] —Lolini vyeo vya ku mpela.

4. Uzye ukulongana capamwi kungatwazwa uli ukusambilila pali Yeova?

⁴ Ku kulongana tukasambiliziwa ivingi. Ukulongana konsi kukatwazwa ukusambilila ivingi pali Yeova. Aeli kwene sile lino umu vilongano ivingi yasambililanga umwi buku lya ciyemba ilyakuti Palameni Kuli Yehova api Sambililo Lya Baibo Pa Cilongano. Uzye muvwile uli lino mwasambililanga pa miyele isuma ino Yeova wakwata na lino muvwile vino aina yakauvwa pali Yeova? Kwaula nu kutwisika calenzile mutemwe sana Yeova. Nupya pa kulongana tukasambilila ivingi pali Baibo, tukaika amano uku malyasi akalandwa, ni ivilangililo ivikapeelwa alino nu kuvwikisya lino Baibo ikuwelengwa. (Neemiya 8:8) Elenganyini pa vintu uwingi vino tukasambilila lino tukupekanyizizya ukuwelenga Baibo ukwa cila mulungu, nu kuipekanya kuya uvwa vino yauze yatiyasambililako.

5. Uzye ukulongana kukamwazwa uli ivya kuomvya vino mukasambilila muli Baibo ni vya kucita pa kuzifyako imisimikilile inu?

⁵ Mu kulongana tukasambiliziwa ivya kuomvya vino tukasambilila muli Baibo. (1 Tesalonika 4:9, 10) Uzye mwatala mwazanwapo pi Sambililo Lya Lupungu ilya mwazwile ukutandika ukulonda ukuombesya umu mulimo wa kusimikila, nanti ukuzifyako vino mukapepa nanti vyakwelela aina na ya nkazi? Ukulongana kuno tukakwata umukasi ka mulungu kukatusambilizya ivya kusimikila ilandwe lisuma ni vyakwazwa  yauze ukuvwikisya icumi ca muli Baibo.—Mateo 28:19, 20.

6. Uzye ndi twaya ukukulongana tukakomeleziwa uli nu kwazwiwa ukukomya utailo witu?

⁶ Ku kulongana tukakomeleziwa sana. Antu aya umu nsi ii yakwe Satana yakaezya na maka ukututoovola nu kutulenga ukuti twayuvwa ukuti tutange tutwalilile ukuombela Yeova. Nomba ndi cakuti twaya uku kulongana tukakomeleziwa sana nupya tukakwata amaka akutwalilila ukuombela Yeova. (Welengini Milimo 15:30-32.) Ilingi tukasambilila pali vino mausesemo aingi amuli Baibo yafikiliziwa. Cii cikalenga tusininkizye ukuti amalayo yonsi yano Yeova watulaya ukutucitila ukunkoleelo yalafikiliziwa. Aina itu na ya nkazi yakatukomelezya mu malyasi yano yakapeela, lino yakwasukapo na lino sile yakwimba nu mwenzo onsi. (1 Kolinto 14:26) Na pa cisila ca kulongana, ndi twalanda na ina yaa tukakomeleziwa nu kuya nu luzango pano ala tukulanda na ya cuza itu aatutemwa nupya akatusakamala.—1 Kolinto 16:17, 18.

7. U mulandu ci uno cacindamila ukuzanwa uku kulongana?

⁷ Umu kulongana tukapokelela umupasi wa muzilo ukufuma kuli Leza. Yesu akaomvya umupasi wa muzilo ukutungulula icilongano. Watunenyile ukuti tulinzile ‘tuvwe vino umupasi wa muzilo ukulanda uku mauvi.’ (Umbwilo 2:7) Umupasi wa muzilo ungatwazwa ukutaluka matunko nu kuya asipe lino tukusimikila. Nupya ungatwazwa ukupingulapo ningo ivyakucita. Ali mulandu uno tulinzile ukwezya na maka ukuzanwa uku kulongana pakuti umupasi wa muzilo utwazwe.

8. Lino aina itu yatulola uku kulongana nu kuvwa vino tukwasukapo alino nu kwimba, yakaazwiwa uli? (Lolini na kambokosi kakweti umutwe wakuti “ Yakauvwa Ningo Lyonsi Ndi Yaya Uku Kulongana.”)

⁸ Lino tuli umu kulongana tukakwata isyuko lya kulanga aina itu na ya nkazi ukuti twayatemwa. Aingi umu vilongano vitu yazizimizya amezyo aingi. Umutumwa Paulo walemvile ukuti: “Lekini  twasakamalana nu kwazwana.” (Ayebulai 10:24, 25) Tukalanga ukuti tukasakamala aina itu ndi tukuya lyonsi uku kulongana nu kukomelezyanya. Ndi twaya uku kulongana, tukalanga ukuti tukulondesya ukuya pamwi nayo, kulanda nayo nu kuti tukalondesya ukuvwa vino yakuyuvwa. Nupya tukayakomelezya ndi yuvwa vino tukwasuka nu mwenzo onsi.—Kolose 3:16.

9, 10. (a) Londololini vino amazwi yakwe Yesu aya pali Yoane 10:16 yakatwazwa ukumanya cino cacindamila ukukongana pamwi na ina itu. (b) Uzye ndi tukuya lyonsi uku kulongana tukaazwa uli aina na ya nkazi akwata ya lupwa yao asi ya Nte Yakwe Yeova?

⁹ Ndi twaya uku kulongana, tukaazwa amu cilongano ukulemana nu kulauvwana. (Welengini Yoane 10:16.) Yesu waikolinye umwineco kuli kacema, lyene wakolinye alondezi yakwe ku mfwele. Tale elenganyini pali cii: Ngi cakuti mfwele ziili zili pa mwamba, lyene ziili zili mu nyika, yonga nayo iili kuze, uzye mungati imfwele zizyo zisano ufyo? Awe, pano ufyo wa mfwele ukaikala apali pamwi nu kukonka kacema. Mu nzila ili imwi kwene, ndi cakuti tusikuzanwa umu kulongana ale itutaluka uku ina itu. Tulinzile ukukongana pamwi pakuti tuye “ufyo onga” nu kukonka “mucemi wenga.”

¹⁰ Ukulongana kukalenga tuye alemane nu kutemwana sana. (Masamu 133:1) Yamwi umu vilongano vino twayamo yayakana ku ya vyazi yao, ya kalume yao nanti ya kaci yao. Nomba Yesu wayalavile ukuyapeela ya lupwa ayatemwa nupya angayasakamala. (Mako 10:29, 30) Ndi cakuti mukuzanwa uku kulongana lyonsi, mungaya ya isi, ya nyina, kalume, nanti kaci kuli umwi umu cilongano. Ndi twelenganya pali vivyo, cikatulenga  twalondesya ukulaya uku kulongana lyonsi.

11. Uzye ukuya uku kulongana kukalenga uli ukuti tupeele Yeova vino tulinzile uku mupeela?

¹¹ Kulongana kulalenga twapeela Yeova vino tulinzile ukumupeela. Yeova ali Kaumba witu, ali cino tulinzile ukumutaizya, ukumucindika, alino nu kumulumbanya. (Welengini Umbwilo 7:12.) Tungacita vivyo lino tukupepa Yeova pa kulongana, ukwimba inyimbo, nu kulanda pali aliwe. I cintu cisuma sana ukukwata isyuko lya kupepa Yoeva cila mulungu!

12. Uzye Yeova akauvwa uli ndi tukuvwila isunde lyakwe ilyakuti tulinzile ukuzanwa lyonsi uku kulongana?

¹² Yeova watuumvile, fwandi tulinzile ukumuvwila. Watunena ukuti tulinzile ukutwalilila ukukongana pamwi, sana sana lino tukupalamila ukumpela ya nsi ii. Fwandi ndi tuvwila isunde lilyo, Yeova akazanga. (1 Yoane 3:22) Yeova akalola vino tukaezya na maka pakuti sile tuzanwe uku kulongana.—Ayebulai 6:10.

13, 14. U mu nzila ci muno tukapalamila kuli Yeova na Yesu lino tuli pa kulongana?

¹³ Ndi tukuya uku kulongana lyonsi tukalanga Yeova ukuti tukalondesya ukupalama kuli aliwe nu Mwanakwe. Pa kulongana tukasambilila muli Baibo nu kusambilila vino Yeova akalonda twacita na vino tulinzile ukwikala. (Ezaya 30:20, 21) Ndi yamwi aasiombela Yeova iiza uku kulongana yakamanya ukuti mu cumi Leza aakatutungulula. (1 Kolinto 14:23-25) Yeova akatutungulula lino tuli pa kulongana ukuomvya umupasi wa muzilo nupya vino tukasambilila vikafuma kuli aliwe. Fwandi lino twaya uku kulongana, tukauvwa kuli vino Yeova akatusambilizya, nu kulola vino watutemwa, nu kupalama kuli aliwe.

¹⁴ Yesu intunguluzi ya cilongano watiile: “Pano kuno antu yaili nanti yatatu yakongana mwi zina lyane, nani ndaya nao.” (Mateo 18:20) Baibo nupya ikati Yesu “akapita pakasi” ka vilongano. (Umbwilo 1:20–2:1) Mu cumi Yeova na Yesu yakaya naswe lyonsi nu kutukomya lino tuli pa kulongana. Uzye mukati Yeova akauvwa uli ndi walola ukuti tukwezya na maka ukupalama kuli aliwe?

15. Uzye ndi tukuzanwa lyonsi uku kulongana tukalanga uli ukuti tukulonda ukuvwila Leza?

¹⁵ Ndi twaya uku kulongana tukalanga Yeova ukuti tukalondesya ukumuvwila. Yeova asitupatikizya ukucita vino akalanda. (Ezaya 43:23) Fwandi ndi cakuti tuvwila isunde lyakwe ilya kuzanwa lyonsi uku kulongana, tukalanga ukuti twamutemwa nu kuti twazumila ukuti wakwata insambu zya kutunena ivyakucita. (Loma 6:17) Tungacita uli ndi cakuti aatwingizya incito yatunena ukuti twaomba insita ikulu icakuti tukufilwa nu ukuya uku kulongana lyonsi? Nanti limwi amu uteeko yati yonsi yano twazana iyakongana pamwi uku kupepa Yeova yalalipila impiya, nanti ukuyatwala uku cifungo? Nupya insita zimwi tungatemwa ukuomba vyuze pa nsita ya  kulongana. Lino kwaya ivintu vya musango uwo, tulinzile ukuipingwila ivyakucita sweineco. (Milimo 5:29) Nomba ngi cakuti twapingulapo ukuvwila Yeova, akazanga.—Mapinda 27:11.

16, 17. (a) Uzye twamanya uli ukuti Aina Klistu yakutandikilako yacindike sana ukulongana? (b) Uzye umwina George Gangas umvwanga uli pa kulongana kwa Aina Klistu?

¹⁶ Pa cisila ca kukongana pamwi pa pentekositi umu mwaka wa 33, Aina Klistu yatandike ukulakongana pamwi lyonsi uku kupepa Yeova. “Yatwalilile kusambilila ku atumwa nu kwankana vino yaakweti.” (Milimo 2:42, NWT) Yene yatwalilile sile ukukongana pamwi na lino yayazunyanga uku antu amu uteeko wa ina Loma na ya simapepo a Ciyuda. Nanti cakuti citali icanguke ukucita vivyo yatwalilile sile ukukongana pamwi uku kupepa Yeova.

¹⁷ Na ndakai kwene, aomvi yakwe Yeova nayo yakaipakizya uku kongana pamwi uku kupepa Yeova. Ya George Gangas, aali umwi Umba Ilikatungulula pa myaka ukucila pali 22, yatiile: “Nemo ukuzanwa lyonsi uku kulongana pamwi na ina ali cino cikandetela uluzango umu umi wane nupya ali lino nkakomeleziwa sana. Natemwa sana ukufika zuwa pa Ng’anda ya Wene, nu kusyalikizya ukufumapo. Nkaya nu luzango ndi nkuvwanga na antu yakwe Leza. Nga tuli pamwi nayo nkauvwa ukuti indi pamwi na ya lupwa lwane, muli paladaise wa unkolanya.” Lyene nupya yatiile: “Cino nkalondesya sana ukulacita, u kuzanwa lyonsi uku kulongana.”

18. Uzye mukayuvwa uli ndi muli pa kulongana, nupya i vyani vino mukulondesya ukucita?

¹⁸ Uzye namwe mukaya nu luzango lyonsi lino mwaya uku kulongana? Nga avino caya mwazanwa lyonsi uku kulongana pamwi na ina inu nanti ivintu vitale uli. Mwalanga Yeova ukuti mukayuvwa wakwe vino Umwene Davidi wayuvwanga, watiile: “We [Yeova], nemo natemwa ukwikala umu ng’anda yako.”—Masamu 26:8.