Uzye Baibo Icili Ikamwazwa Ukusenuka?
“Lelo lekini Leza apindulule myenzo inu kuti imyelenganyizizye inu iye ipya.”—LOMA 12:2.
INYIMBO: 29, 52
1-3. (a) I vyani vimwi vimwi ivingatutalila ukusenula pacisila ca kuwatiziwa? (b) A mauzyo ci yano tungayuzya sweineco ndi cakuti cikututalila ukusenuka? (Lolini vikope vyakutandikilako.)
PA MYAKA iingi, Kevin wateyanga ivyangalo vyakusitikapo impiya, wapeepanga, ukukoleka sana, nupya waomvyanga sana imilembo ikavulunganya uwongo. [1] (Lolini vyeo vya ku mpela.) Lyene wizile asambilila pali Yeova nupya walondanga ukuya cuza wakwe. Nomba pakuti aye cuza wakwe Yeova, walondekwanga ukusenula umi wakwe. Yeova ni Izwi Lyakwe, Baibo, vyali nu kumwazwa ukucita vivyo.—Ayebulai 4:12.
2 Pacisila ca kuwatiziwa, Kevin walondekwanga ukusenuka muli vimwi vimwi pa kuti aye Umwina Klistu musuma. (Efeso 4:31, 32) Lino atatala wawatiziwa wasokanga zuwa sana. Wazungwike lino wizile amanya vino catala ukuta ukusoka zuwa. Kevin walanzile ukuti, ukusambilila vya kuta ukusoka zuwa kwatazile ukucila nu kuta ukucita iviipe vyuze vino wacitanga lino atatala wawatiziwa. Nomba watiile ukusoka zuwa pano wapefile kuli Yeova ukuti amwazwe, nupya wawelenganga Baibo.
3 Lino tutatala twawatiziwa, sweingi twalondekwanga ukusenula umi witu muli vimwi vimwi pakuti tuye ni miyele ino Baibo ikalanda ukuti aino tulinzile ukukwata. Nomba na ndakai kwene tukalola ukuti kwaya utuntu tumwi tunono tuno tukacita tuno tulinzile ukuta pakuti twakolanya Yeova na Klistu. (Efeso 5:1, 2; 1 Petulo 2:21) Limwi tungiluka ukuti tukailizyanya sana nanti limwi twatemwa sana ulwambo nu kulanda iviipe pa antu yauze. Nanti limwi tukatiina antu yauze ukuti yamaelenganya vyani nanti yamalanda uli ndi cakuti nacita ci. Limwi twezya na maka pa myaka iingi ukuta ukucita icintu cico nomba tusiita. Tungayuzya sweineco tuti: ‘U mulandu cii uno nkavililwa ukusenuka nu mu tuntu sile utunono? Ningacita uli pakuti nacita vino Baibo ikalanda pakuti nazifya imiyele yane?’
MUNGAZANZYA YEOVA
4. U mulandu ci uno tungavililwa ukuzanzya Yeova muli vyonsi vino tukucita?
4 Twatemwa Yeova nupya tukalondesya ukulamuzanzya nu mwenzo onsi. Nomba iciipako i cakuti tukafilwa ukumuzanzya lyonsi, pano tutamalilika. Insita zimwi tukayuvwa wakwe vino umutumwa Paulo wayuvwanga, watiile: “Nanti angala nkulonda kucita cisuma, nkaposiwa kucicita.”—Loma 7:18; Yakobo 3:2.
5. I vintu vya musango ci vino twatile ukucita lino tutatala twawatiziwa, lelo iintazi ci zino tukalwisyanya nazyo?
5 Lino tutatala twawatiziwa, twatile ukucita ivintu vino Yeova wapata. (1 Kolinto 6:9, 10) Nomba tucili tutamalilika. (Kolose 3:9, 10) Fwandi tukaluvyanya nanti icakuti ipalengela pano twawatiziwilwe. Limwi limwi tungalondesya ukucita iviipe nanti sile ukuyuvwa uyi, nanti limwi cingatutalila ukuta ukucita akamusango kamwi akiipe kano twakwata. Limwi cingasenda imyaka ingi sana ala tukalwisya ukuta ukucita vivyo.
6, 7. (a) I cani icalenga ukuti tutwalilile ukuya ya cuza yakwe Yeova nanti icakuti tutamalilika? (b) U mulandu ci uno tutalinzile ukuzingota ukuleenga uwelelo kuli Yeova?
6 Nanti icakuti tutamalilika, tungaya ya cuza yakwe Yeova nupya tungamuombela. Mwaiusya lyonsi icalenzile muye cuza wakwe. Aliwe waweni ivisuma muli mwemwe nupya walondanga ukuti mumumanye. (Yoane 6:44) Nupya wamanyile nu kuti mukaluvyanya nupya kwaya indema zimwi zino mwakwata nu kuti mwakulaluvyanya. Nomba Yeova wene walondesyanga ukuti muye cuza wakwe.
7 Yeova watutemwa sana ali mulandu uno watupeelile upe ucindamisye sana. Watumile Umwana wakwe ukuti aize pano nsi nu kwiza peela umi wakwe pa maifyo itu pa kuti atukulule. (Yoane 3:16) Ndi cakuti twaluvyanya, tungalenga Yeova ukuti atwelele. Nupya pa mulandu wakuti Yesu watufwilile tungasininkizya ukuti Yeova amatwelela nu kutwalilila ukuya ya cuza yakwe. (Loma 7:24, 25; 1 Yoane 2:1, 2) Mwaiusya ukuti Yesu wafwilile yayo akalapila. Fwandi nanti twalola ukuti vino itucita ivipe, tutalinzile ukuta ukupepa kuli Yeova ukuti atwelele. Ndi cakuti tutalenzile uwelelo cingaya ngati tukukana ukufulala iminwe nomba ala tuli ni vikwi. Tulinzile twataizya sana Yeova pano watulenga ukuti tuye ya cuza yakwe nanti icakuti tutamalilika.—Welengini 1 Timoti 1:15.
Ndi cakuti tukulonda ukupalama kuli Yeova, tulinzile ukulaezya na maka ukumukolanya nu Mwanakwe
8. U mulandu ci uno tutalinzile ukusuulako uku ndema zino twakwata?
8 Kwene, tutange tuvilwe ukumanya vino tukaluvyanya nupya tutange twakwata umwakusombekezya lyonsi lino twaluvyanya. Yeova watumanyisya vino akalonda ya cuza yakwe ukuya. (Masamu 15:1-5) Fwandi ndi cakuti tukulonda ukupalama kuli Yeova, tulinzile ukulaezya na maka ukumukolanya nu Mwanakwe. Tulinzile ukwezya na maka ukuikanya ukucita iviipe, nupya ndi twatwalilila ukulwisya tungata. Asi mulandu ni myaka uwingi iyatipita ukufuma pano twawatiziwilwe tulinzile ukutwalilila ukuzifya imiyele itu.—2 Kolinto 13:11.
9. I cani calenga tumanye ukuti tufwile ukutwalilila ukuzwala untu upya?
9 Umutumwa Paulo wanenyile Aina Klistu ukuti: “Tiini kucita micitile iipe iyampiti, ni miyele yakweyo yonsi ino ingamulovya. Myenzo inu nga na yakampingu inu viye vipya, nupya zwalini untu upya, uno waumvilwe mu mwata wakwe Leza. Lyene mulaya aololoke nupya amuzilo.” (Efeso 4:22-24) Cii cikupiliula ukuti tulinzile ukutwalilila ukwezya ukusenuka nu ‘kuzwala untu upya.’ Fwandi asi mulandu ni myaka iyatipitapo ukufuma pano twatandikile ukuombela Yeova, tulinzile ukutwalilila ukusambilila pa miyele yakwe. Nupya Baibo ingatwazwa ukutwalilila ukusenula imiyele itu nu kuya ngati aliwe.
U MULANDU CI UNO CIKATALILA UKUSENULA IMIYELE ITU?
10. I vyani vino tulinzile ukucita pakuti Baibo itwazwe ukuzifya imiyele itu, nupya amauzyo ci yano tunguzya?
10 Swensi tukalonda ukulacita vino Baibo ikalanda. Nomba tulinzile ukuombesya ndi cakuti tukulonda ukusenuka. U mulandu ci uno tulinzile ukuombesya? Uzye Yeova nga atalenzile sile ukuti catwangukila ukucita ivisuma?
11-13. U mulandu cii uno Yeova akalondela twaezya na maka ukuta ukucita ivipe?
11 Ndi twelenganya pi yulu ni nsi na vyonsi ivyayamo, tukasininkizya ukuti mu cumi Yeova wakwatisya amaka akucita ivili vyonsi. Wapanzile ilanzi, ilikalanga ukuti wakwatisya amaka. Lyonsi ilanzi likatupeela uluswepo ni cikailila; icikailila sile icinono i cikalondekwa pakuti ivya umi vitwalilile ukuyako pano nsi. (Masamu 74:16; Ezaya 40:26) Nupya Yeova akapeela aomvi yakwe a pano nsi amaka. (Ezaya 40:29) Yeova ndi walondanga, nga watwangusizyeko sana ukuti twasenuka ukwaula ukucula nu kuta ukukumbwa ukucita iviipe. Nomba u mulandu ci uno atacitila vivyo?
12 Yeova watupeela insambu zya kuisoolwela ivya kucita. Watuzumilizya ukuisoolwela sweineco ndi tumamuvwilanga nanti foo. Ndi cakuti twasoolola ukumuvwila nu kuombesya ukucita ukulonda kwakwe, tukalanga ukuti twamutemwa nupya tukalondesya ukumuzanzya. Satana akati Yeova atalinga ukuteeka. Nomba ndi cakuti tukuvwila Yeova, tukalanga ukuti tukulonda aye Kateeka witu. Nupya ndi twacita vivyo tulasininkizya ukuti Tata witu uwaya nu kutemwa wacindika ukulwisya kwitu konsi kuno tukalwisya pakuti sile tumuvwile. (Yobo 2:3-5; Mapinda 27:11) Ndi cakuti twaombesya ukuikanya ukucita iviipe vimwi nanti icakuti citanguka ukucita vivyo, ala tuli acisinka kuli Yeova nu kulanga ukuti tukalondesya aliwe ukuya Kateeka witu.
13 Yeova akatunena ukuti tulinzile ukuombesya pakuti tukolanye imiyele yakwe. (Kolose 3:12; welengini 2 Petulo 1:5-7.) Nupya akaenekela ukuti twaombesya ukukanya amelenganyo itu aipe na vino tukayuvwa. (Loma 8:5; 12:9) Ndi cakuti twaombesya ukuti tusenuke, nupya twasenuka nu kusenuka, tukaya sana ni nsansa.
LEKINI BAIBO ITWALILILE UKUSENULA IMIYELE INU
14, 15. I vyani vino tungacita pakuti tutwalilile ukuya ni miyele ino Yeova watemwa? (Lolini akambokosi akakuti “ Baibo ni Ipepo Vyasenwile Umi Wao.”)
14 Tungacita uli pakuti tutwalilile ukuya ni miyele ino Yeova watemwa? Ukucila ukuisoolwela sweineco imiyele ino tukulonda ukusenula, tulinzile ukuleka Leza atutungulule. Pali Loma 12:2 pakati: “Mutakolana na antu amu nsi mu miyele yao, lelo lekini Leza apindulule myenzo inu kuti imyelenganyizizye inu iye ipya. Lyene mulaya na maka akumanya kulonda kwakwe Leza.” Fwandi pakuti tumanye vino Yeova akalonda tulinzile ukutaila ukuti amatwazwa. Tulinzile ukuwelenga Baibo cila wanda, ukwelenganya pali vino tukuwelenga, alino nu kupepa kuli Yeova ukuti atupeele umupasi wa muzilo. (Luka 11:13; Galatiya 5:22, 23) Ndi twacita vii Yeova alatwazwa ukumanya ivingamuzanzya, nupya tungasambilila vino tulinzile ukwelenganya wakwe vino akaelenganya. Na cii cilatwazwa ukuzanzya Yeova muli vino tukwelenganya, vino tukalanda na vino tukucita vyonsi, nupya tulasambilila ivya kuikanya ukucita imisango imwi. Nomba nanti ciye vivyo, tulinzile ukutwalilila ukulwisya ukuta imisango iyo.—Mapinda 4:23.
Tungasunga ya magazini umuli ivipande na malembelo ivingatwazwa pali vino tungacita pakuti tucimvye imisango imwi ino twakwata nu kulawelengamo. (Lolini palagalafu 15)
15 Tutalinzile sile ukuwelenga Baibo cila wanda, lelo tulinzile nu kuisambilila ukuomvya impapulo, zili wa Lupungu na Loleni! Ivipande ivingi muli ya magazini yaa, vikatusambilizya ivyakucita pakuti twakolanya imiyele yakwe Yeova na vino tungacita pakuti tucimvye imisango imwi ino twakwata. Tungazanamo vipande vimwi na malembelo ivingatwazwa. Tungasunga ya magazini umuli ivipande vii umupipi pakuti twawelengamo lili lili.
16. U mulandu ci uno tutalinzile ukutoovoka ndi cakuti tukulola ukuti tusikusenula zuwa imiyele itu?
16 Cikasenda sana insita ukusambilila ukukolanya imiyele yakwe Yeova. Fwandi ndi cakuti mukuyuvwa ukuti mutasenula imiyele inu iingi umu umi winu, mulinzile ukuteeka umwenzo. Pa kutandika mulinzile ukuipatikizya ukucita vino Baibo ikalanda. Nomba ndi cakuti lyonsi mukwelenganya nu kucita vino Yeova akalonda mwacita, cilamwangukila ukulaelenganya vino Yeova akaelenganya nu kucita vyololoke.—Masamu 37:31; Mapinda 23:12; Galatiya 5:16, 17.
MWAELENGANYA PALI VINO UMI WITU ULAYA UKU NKOLEELO
17. Ndi cakuti tuli acisinka kuli Yeova, umi witu ulaya uli uku nkoleelo?
17 Tukalolela insita lino tulamalilika nu kuombela Yeova amanda pe. Insita iyo, tutalalondekwa ukulwisya ukuta imisango imwi, nupya ilaya insita ino cilatwangukila ukukolanya Yeova. Nomba na ino nsita kwene tukapepa Yeova pano watupeela uwila usuma cuze, watutumiile umwanakwe ukuti aize tufwile pa kuti atukulule. Nanti icakuti tutamalilika, tungazanzya Yeova ndi twatwalilila ukuombesya ukusenula imiyele itu nu kukonka vino akatusambilizya ukufuma muli Baibo.
18, 19. Tungasininkizya uli ukuti Baibo yakwata amaka ya kutwalilila ukusenula umi witu?
18 Kevin wezizye na maka ukusambilila ivya kuikanya pakuti atasoka zuwa. Welenginye pali vino wawelenganga muli Baibo nupya wezyanga na maka ukusenula umi wakwe. Nupya uvwilile nu kucita vino Aina Klistu yauze yamunenanga. Nanti cakuti papisileko imyaka pakuti azifye imiyele yakwe, wizile asenuka nu kuya umuomvi umu cilongano. Ipapita lyene imyaka 20 ukufuma pano watandikile ukuomba nga eluda pa cilongano. Nomba nanti ciye vivyo wamanya ningo ukuti alinzile ukutwalilila ukulwisya ukuta imisango imwi.
19 Wakwe vino Kevin wacisile, naswe kwene tungatwalilila ukuzifya imiyele itu. Ndi twacita vivyo tulatwalilila ukuya ya cuza yakwe Yeova. (Masamu 25:14) Nupya ndi cakuti tukwezya na maka ukusenuka pakuti twazanzya Yeova, alatwazwa. Tungasininkizya ukuti Baibo ilatwazwa, ndi cakuti twatwalilila ukusenula umi witu.—Masamu 34:8.
^ [1] (palagalafu 1) Izina asi lyao.
