1. A masunde ci yamwi yamwi aya muli Baibo, nupya i visuma ci ivilacitika ndi tukuvwila masunde yayo?

MULI Baibo, mwaya masunde yakwe Yeova akatwazwa ukumanya vino akalonda twacita. Watunena ukuti tutalinzile ukupepa utuluwi, ukwiya, ukukoleka, nanti ukucita upulumusi. (1 Kolinto 6:​9, 10) Yesu umwana wakwe Yeova, wapeezile alondezi yakwe isunde lya kuti: “Yangini konsi mu nsi mucite antu amu nko zyonsi kuya alondezi yane. Mwayawatizya mwi zina lyakwe Tata, nu Mwana, nu mupasi wamuzilo, nu kuyasambilizya kucita vyonsi vino namunenanga. Lyene nani namayanga pamwi namwe lyonsi kufika napa wanda wa mpelelekezyo ya nsi.” (Mateo 28:​19, 20) Vyonsi vino Yeova na Yesu yakatunena ukucita ivya kutwazwa. Masunde yakwe Yeova yakatusambilizya ivya kuisakamala sweineco ni vya kusakamala indupwa nupya yakatwazwa nu kumanya ivyakucita pakuti tuye nu umi usuma nu kuya ni nsansa. Ni cicindame cino tulinzile ukucita u kuvwila masunde yakwe Yeova, ukwikako ni  sunde lyakuti tulinzile ukusimikila, ndi twacita vivyo alazanga nupya alatupaala.

2, 3. (a) U mulandu ci uno Baibo itikilako amasunde pa vintu vyonsi ivikacitika umu umi? (b) A mauzyo ci yano tumalazyanya umu cipande cii? (Lolini icikope cakutandikilako.)

² Pa nsita iili imwi kwene, Baibo itatupeela masunde pa vintu vyonsi vino tukacita umu umi. Baibo itatunena umukulungatika ivyakuzwala vino tulinzile ukuzwala. Na cii cikaleenga tumanye mano yano Yeova wakwata. Nanti icakuti imizwalile ikuya ikwaluka aluka na antu muno nsi yakazwala ivipusane pusane, Baibo yene isialuka. Nupya itatuneenapo amasunde pa ncito ino tulinzile ukuomba, ivyakulezezyamo icitendwe vino tulinzile ukusoolola nanti vino tulinzile ukusunga umi witu. Yeova waleka ukuti cila muntu ni mitwe ya ndupwa yaipingwila aeneco pa kusoolola ivyakucita pa vintu vii.

³ Fwandi lino tukulonda ukupingulapo ukucita vimwi ivingalenga umi witu ukusenuka, nupya twazana ukuti muli Baibo mutaya isunde ilili lyonsi ilikalanda pali vivyo, tungayuzya tuti: ‘Uzye Yeova wikako amano kuli vino nkapingulapo ukucita? Uzye vino namapingulapo ukucita vimamuzanzya cikulu sile ntatamile masunde amuli Baibo? Ningasininkizya uli ukuti vyonsi vino namapingulapo ukucita vimamuzanzya?’

4, 5. Uzye vino twapingulapo ukucita vingasenula uli umi witu na wakwe yauze?

⁴ Antu yamwi yakaelenganya ukuti yangacita ivili vyonsi vino yakulonda ukucita. Nomba tukalonda ukucita ivintu ivingazanzya Yeova. Fwandi lino tutatala twapingulapo ivyakucita tulinzile ukwelenganya pali vino Baibo ikalanda nu kucita vivyo kwene vino ikutunena. Baibo ikatunena vino Leza akalola imiomvezye ya wazi, fwandi tulinzile ukukonka vino ikatunena. (Utandiko 9:4; Milimo 15:​28, 29) Tungapepa kuli Yeova ukuti atwazwe ukupingulapo ningo ivyakucita ivingamuzanzya.

⁵ Vino twapingulapo ukucita vingasenula umi witu. Ndi cakuti twapingulapo ningo ivyakucita tulapalama sana kuli Yeova. Nomba ndi tutapingwilepo ningo ucuza witu na Yeova ulasila. Nupya vino twapingulapo ukucita vingasenula umi wa yantu yauze. Tusilonda ukucita ivintu ivingasosya aina itu nanti ivingatoovola utailo wao. Nupya tusilonda ukuleta amavya uku ina itu mu cilongano. Fwandi caticicindama ukupingulapo ningo ivyakucita.​—⁠Welengini Loma 14:19; Galatiya 6:⁠7.

6. I vyani ivingatwazwa lino tukupingulapo ivyakucita?

⁶ Ndi cakuti Baibo itatunena umukulungatika vino tulinzile ukucita, tungapingulapo uli ivyakucita? Ukucila ukucita vino tukulonda sweineco, tulinzile ukwelenganya sana pa mulandu uwo nu kupingulapo ukucita ivingazanzya Yeova. Lyene tungasininkizya ukuti amatwazwa ukuomba ningo.​—⁠Welengini Masamu 37:⁠5.

7. Ngi cakuti Baibo italandapo vino tulinzile ukucita pali vimwi tungamanya uli vino Yeova akalonda twacita?

⁷ Nomba tungamanya uli ukuti vino twapingulapo vimazanzya Yeova? Pali Efeso 5:17 pakati: “Mwaezya kumanya vintu vino  Umwene [Yeova] akulonda kuti mwacita.” Ngi cakuti Baibo italanda umukulungatika vino tulinzile ukucita, tulinzile ukwiluka ningo ningo nanti ukuvwikisya vino Yeova akalonda ukuti twacita. Tungacita uli vivyo? Tulinzile ukupepa kuli aliwe nu kulenga umupasi wakwe uwa muzilo ukututungulula.

8. Yesu wacisile uli pakuti ailuke vino Yeova walondanga ukuti acita? Langililini.

⁸ Yesu lyonsi wilukanga vino Yeova walondanga ukuti acita. Amaila yaili antu aingi cuze yuvwile inzala, Yesu wapefile nupya umu cinzungusyo walisizye antu yaya. (Mateo 14:​17-20; 15:​34-37) Nomba lino uvwile inzala umu lwanga, Ciwa wamunenyile ukuti anene amawe yaye umukate, Yesu wakanyile. (Welengini Mateo 4:​2-4.) Wamanyile ningo sana Isi, fwandi wamanyile ukuti Yeova atalondanga ukuti aomvye umupasi wa muzilo kuli vino akulonda umweneco. Wasininkizye ukuti Isi wali nu kumutungulula nu kumupeela ivyakulya pa nsita ilinge.

9, 10. I cani cingatwazwa ukupingulapo ningo ivyakucita? Langililini.

⁹ Wakwe vino Yesu wacisile, naswe kwene tungapingulapo ningo ivyakucita ndi cakuti twataila ukuti Yeova amatutungulula. Baibo ikati: ‘Uwataila muli Yeova nu mwenzo wako onsi, utaezya ukutaila amano yako foo. Waiusya Yeova muli vyonsi vino ukucita, nga nawe amakulanganga muno ungacitila pe. Utaezya ukwelenganya ukuti wacenjela ukuluta pali vino waya, wemo uwakwatila Yeova icoopo, uwaleuka iviipe.’ (Mapinda 3:​5-7) Ndi tukusambilila Baibo na pali vino Yeova akaelenganya, tulamanya ningo vino akalonda twacita pali vino tukulonda ukupingulapo. Nupya ndi cakuti tukusambilila ivingi pali vino Yeova akaelenganya, cilatwangukila ukupingulapo ningo ivyakucita ivingamuzanzya. Na ci cilalenga ukuti akatwazwa nu kutupaala.​—⁠Ezekelo 11:⁠19.

¹⁰ Tuti limwi mama umutwalwe akukala ivintu, lyene walola insapato imwi iisuma. Nomba ikome sana umutengo. Nanti i cakuti asi na iya, angamanya ningo vino iya angelenganya ndi cakuti wakala insapato iyo. Angamanya uli vivyo? Angamanya pano patipalengela pano yatwaline, fwandi angamanya ningo ningo vino iya akalonda ukuti yaomvya impiya zino yakweti. Avino caya na kuli sweswe, ndi cakuti twasambilila pali vino Yeova akaelenganya na vino wacita mpiti, tulamanya vino akalonda twacita pa vintu vipusane pusane.

11. A mauzyo ci yano tungayuzya sweineco lino tukuwelenga nu kuisambilizya Baibo? (Lolini kambokosi kakuti “ Lino Mukusambilila Baibo, Mwayuzya Mweineco Mauzyo Yaa.”)

¹¹ Mungacita uli pakuti mumanye vino Yeova akaelenganya? Icintu cingatwazwa u kuwelenga nu kusambilila Baibo lyonsi. Lino tukucita vivyo tulinzile ukuyuzya sweineco ukuti: ‘Uzye vi vikunsambilizya  cani pali Yeova? U mulandu ci uno wacitiile vii?’ Wakwe vino Davidi wacisile, naswe tulinzile ukunena Yeova ukuti atwazwe ukumumanya ningo. Davidi walemvile ukuti: ‘We Yeova, unsambilizye inzila zyako. Undondolwele nu tumakula twakwe tondo kwene. Untungulule nu kunsambilizya ukwikala mu vyacumi vyako, pano wewe uli Leza wane, wino akantuula. Wewe nataila amanda yonsi.’ (Masamu 25:​4, 5) Ndi twasambilila vimwi pali Yeova, tungelenganya pali vimwi muno tungaomvya ivintu vivyo vino twasambilila pali aliwe. Limwi cingaya apali vimwi vino tukulonda ukupingulapo ukucita umu lupwa, uku ncito, uku sukulu, nanti sile lino tukusimikila. Ndi twacita vivyo cilatwangukila ukumanya vino Yeova akalonda kuti twaomvya vino twasambilila pali aliwe.

12. Uzye impapulo nu kulongana vingatwazwa uli ukumanya vino Yeova akaelenganya pa vintu ivipusane pusane?

¹² Inzila nayuze ino tungamanyilamo vino Yeova akaelenganya, u kwika sana mano kuli vino iuvi likutusambilizya ukuomvya Baibo. Katulangilile: Limwi tuti tukulonda ukupingulapo vimwi ivyakucita, ibuku lya mu Ciyemba ilyakuti Icisontelelo ca Mpapulo  sha Watch Tower ni lyakuti Ibuku Lya Kwazwa Inte Zyakwe Yeova Ukulondelezya Ivyeo yangatwazwa ukumanya vino Yeova akaelenganya. Nupya ukulongana kungatwazwa ndi cakuti tukuvwikisya ivikulandwa, tukwasukapo alino nu kwelenganyapo sana pali vino tukusambilila. Cii cilatwazwa ukulaelenganya wakwe vino Yeova akaelenganya. Nupya cii cilatwazwa ukupingulapo ningo ivyakucita ivilazanzya Yeova, nawe alatupolelela.

13. Langililini vino tungapingulapo ningo ivyakucita ndi cakuti twatitumanya vino Yeova akaelenganya.

¹³ Lekini tulande pali vino tungapingulapo ningo ivyakucita ndi twalola vino Yeova akaelenganya. Limwi tuti mukulonda ukuombako upainiya. Mwatimwangusyako ni mikalile inu pakuti mwakwata insita ikulu ya kusimikila. Nomba mutamanyile ngi cakuti mulaya ni nsansa vino mutakweti impiya izingi nupya mukweti sile ivintu ivinono ivingamwazwa. Icacumi Baibo italanda ukuti tulinzile ukuya yapainiya ala alino tukuombela Yeova, awe. Tungatwalilila ukumuombela ni cisinka na lino tuli yakasimikila sile. Nomba Yesu watunenyile ukuti Yeova akapaala yonsi akaipelesya pa mulandu wa Wene. (Welengini Luka 18:​29, 30.) Baibo nupya ikati Yeova akazanga ndi cakuti twezya na maka ukucita cimwi ku kumulumbanya, nupya akalonda ukuti twaya ni nsansa lino tukumuombela. (Masamu 119:108; 2 Kolinto 9:⁠7) Ndi cakuti tukupepa pa vintu vii nu kwelenganyapo sana, tulapingulapo ningo ivyakucita ivisuma ivyakutwazwa, nupya Yeova alatupolelela.

14. Tungacita uli pakuti tumanye ndi cakuti imizwalile itu ikuzanzya Yeova?

¹⁴ Tulangilile nupya tuti: Limwi mwatimutemwa icakuzwala cimwi, nomba mwatimumanya ukuti ndi cakuti mwazwala icakuzwala cico mungasosya yamwi umu cilongano. Baibo isitunena ivyakuzwala vino tulinzile ukuzwala. Nomba mungamanya uli vino Yeova akwelenganya? Baibo ikati: “Na anaci kwene nkulonda kuti yazwala vizwalo vya mucinzi, vya mano nupya vilingine kuzwala. Yene yatalinzile kuiyemvya ni misango yakuluka inyele nanti kuzwala tuyembelo tuno twapangwa kuli zaabu nanti mbela yamutengo, nanti vizwalo vyamutengo ukome. Lelo yene yalinzile kucita vintu visuma vilingine ni vicitwa vya anaci akayela Leza.” (1 Timoti 2:​9, 10) Mazwi yaa yasilanda sile pali ya mama, lelo na aomvi yonsi yakwe Yeova kumwi na onsi yangasambililako uku mazwi yaa. Ndi cakuti tukalangulukilako, tungelenganya vino yauze yanguvwa lino tutatala twasoolola ivyakuzwala vino tukulonda ukuzwala. Na pamulandu wakuti twatemwa aina itu tusilonda ukucita iciliconsi icingayasosya. (1 Kolinto 10:​23, 24; Filipi 3:17) Ndi twalola vino Baibo ikalanda na vino Yeova akaelenganya tulapingulapo ningo ivyakucita ivingamuzanzya.

15, 16. (a)  Uzye Yeova akauvwa uli ndi cakuti tukwelenganya pa vintu ivipe ivya upulumusi? (b) Lino tukusoolola ivyakulezezyamo icitendwe, tungamanya uli ivingazanzya Yeova? (c) Tungacita uli lino tukupingulapo ivyakucita pa malyasi acindame sana?

¹⁵ Baibo ikatusambilizya ukuti Yeova akauvwa uyi nu ulanda ndi walola viipe vino antu yakucita na vino yakaelenganya. (Welengini Utandiko 6:​5, 6.) Fwandi tutange twatwisika ukuti Yeova asilonda twaelenganya pa vintu viipe ivya upulumusi.  Ndi twatwalilila ukwelenganya pa vintu vya musango uwo, wanda umwi tungasuka tuvicite. Yeova akalonda ukuti twaelenganya pa vintu ivisanguluke nupya ivisuma. Umusambi Yakobo walemvile ukuti amano yakwe Yeova “nkolelo yakatwazwa kuya asanguluke, acuvwano, mutembo nu kuelezyanya. Yene yakatulenga kukwatisya mizu nga nu kucita vicitwa visuma. Yene yakatulenga kuntakwata vikanza nanti usomvi.” (Yakobo 3:17) Fwandi Baibo ikatusambilizya ukuti tutalinzile ukusoolola ivyakucita ivingalenga twaelenganya nanti ukukumbwa ivintu visi visanguluke nupya iviipe. Nupya ndi cakuti twamanya ningo vino Yeova watemwa na vino wapata, cilatwangukila ukumanya ningo mabuku yano tulinzile ukuwelenga, vino tulinzile ukutamba, ni vyangalo vino tulinzile ukucitako. Tutanga twauzya na yauze ukutunena vino tulinzile ukucita.

¹⁶ Ndi cakuti tukulonda ukupingulapo ivyakucita, kwaya ivintu vingi vino tungasoolola ukucita ivingazanzya Yeova. Nomba ndi tukulonda ukupingulapo ivintu ivicindame, cingazipa ukuzya ya eluda nanti sile yauze akalamba amanya ningo pali vivyo ukuti yatwazwe. (Tito 2:​3-5; Yakobo 5:​13-15) Nomba tutalinzile ukunena antu yayo ukuti yatupingwile ivyakucita. Tulinzile ukwelenganya sana pali vino Baibo ikalanda nu kuipingwila ivyakucita sweineco. (Ayebulai 5:14) Umutumwa Paulo watiile: “Umuntu wensi alinzile kuisendela cisendo cakwe umwisikulu.”​—⁠Galatiya 6:⁠5.

17. I visuma ci vino tulapokelela ndi cakuti tukupingula ukucita ivintu ivikazanzya Yeova?

¹⁷ Ngi cakuti twapingulapo ningo ivyakucita ivingazanzya Yeova, tulapalama sana kuli aliwe, nawe alatutemwa nupya alatupaala. (Yakobo 4:⁠8) Nupya utailo uno twakwata muli aliwe ulakomelako. Fwandi lekini twaelenganya pali vino tukuwelenga muli Baibo pakuti tumanye ningo vino Yeova akaelenganya. Kwene lyonsi tulaakwata ivipya ivya kusambilila pali aliwe. (Yobo 26:14) Nomba ndi cakuti tukusambilila sana pali aliwe ndakai, tulaya na mano nupya tulapingula ningo ivyakucita. (Mapinda 2:​1-5) Mapange na melenganyo ya yantu yakaaluka, lelo Yeova wene asialuka. Kalemba wa masamu watiile: ‘Uteyanyo wakwe Yeova wene ulasyalilila pee. Amelenganyo yamu mwenzo wakwe, yene yalasyalilila amanda yonsi.’ (Masamu 33:11) Cumi cumi tungapingulapo ningo ivyakucita ndi twasambilila ukwelenganya vino Yeova akaelenganya nu kucita ivingamuzanzya.