U Mulandu ci Uno Antu Aingi Yasicindikila Antu Yauze Ndakai?
MULANDU UNO UKUCINDIKA YAUZE KWACINDAMILA
Ukucindika yauze kukalenga ivintu ivisi ningo ukukanaipilako.
-
Ipinda ilyaya muli Baibo likati: “Ukwasuka luse luse kukamala icipyu, lelo akasa kakakatusya ukali.” (Mapinda 15:1) Ukukanaya nu mucinzi umu milandile kukalenga ivintu ukwipilako.
-
Yesu walanzile ukuti: “umuntu akalanda ivyaya umu mwenzo wakwe.” (Mateo 12:34) Ukukanaya nu mucinzi kungalenga cimanyikwe vino tukalola antu yano twapusana nayo inkanda, mutundu, kuno twafuma, nanti inkulilo.
Umu kulondelezya ukwacitike likwene muno yuzizye antu ukucila pali 32,000 aakaikala umu mpanga 28, aingi pali yaa (65 percent) yalanzile ukuti antu yaleka ukucindika antu yauze ukucila vino cali mpiti.
VINO MUNGACITA
Lino muli uku ncito nanti ukusukulu, mwacindika antu yonsi nanti icakuti imupusana muli vino mukwelenganya. Mwalanda pa vintu vino mungazumilizyanya. Cii cingalenga ukuti mwauvwana nu kukanayapingula.
Mwacitila Yauze vino mungatemwa yamucitile. Ndi cakuti mukuvwikisya antu yauze nupya muli nu mulinganya, namwe kwene yalamucitila ivisuma.
Mwaelela. Mwataila ukuti umuntu atamusosizye uku mufulo nu kumwelela pali vino atacita nanti vino atalanda.
VINO YA NTE YAKWE YEOVA YAKACITA PA KWAZWA ANTU UKUYA NU MUCINZI
Ya Nte Yakwe Yeova yakakomelezya antu yano yakaikala nayo alino na yano yakaomba nayo ukuya nu mucinzi.
Tukanena antu vino Baibo ikalanda, nomba tusiyapatikizya ukuzumila muli vino twazumilamo nanti ukusenula imyelenganyizizye yao. Lelo tukaezya ukuya “nu ufuuke alino nu mucinzi sana” lino tukusimikila.—1 Petulo 3:15; 2 Timoti 2:24.
Tusilonda ukuya na kapatulula nupya tukapokelela antu yonsi aakaiza umu kulongana naswe pakuti yasambilile vino Baibo ikalanda. Tukaezya na maka ukuvwa kuli vino yauze yakulanda alino nu kucindika “antu amisango yonsi.”—1 Petulo 2:17.
Twacindika mauteeko aakatutungulula. (Loma 13:1) Tukalondela masunde alino nu kulipila imisonko. Nupya nanti cakuti tusiika umu vikanza vya miteekele, twacindika insambu zino antu yakwata izya kupingulapo ukucita vino yakulonda pa vya miteekele.
