Umulandu ci Uno Antu Yatacindikila Umi Ndakai?
U MULANDU UNO UKUCINDIKA UMI KWACINDAMILA
Ndi cakuti mukucita vimwi ivingalenga umu winu nanti umi wa yantu yauze ukuya umu uzanzo ale mukulanga ukuti mutacindika umi.
-
Ukupeepa fwaka kukalenga umuntu ukulwala kansa nupya kukalenga nu kuti umwili utakwata amaka aakulwisya ulwale uu. Nupya, cazanikwa ukuti antu aingi (90 percent) aakafwa na kansa, yakafwa pa mulandu wakuti yapeepanga fwaka nanti umuntu umwi wino yazanwanga nawe wapeepanga.
-
Ukupikwa kwa yantu aingi kukalenga antu aingi ukulasakamala sana alino nu kuleka ukuyuvwa acingililwe. Akaungwe kamwi (Stanford University) kalanzile ukuti: “Ukulingana nu kulondelezya kumwi ukwacitiike, cazanikwa ukuti ya kasukulu aakapusuka ndi cakuti isukulu lyazanzwa yakatwalilila ukucula ni ntazi zya mu melenganyo pa myaka iingi.”
-
Antu aakapisya ya motoka ale iyakoleka, yakalenga aakupita umu museo kumwi
sile na yano yakupitila umu mbali ya museo yataya aacingilwe. Ndi cakuti antu yasikucindika umi cikalenga ukuti antu aakaele yaculilemo.
VINO MUNGACITA
Mwacingilila umi winu. Mungakwanisya ukuleka ukucita iviipe wakwe ukupeepa fwaka, ukumwesya uwengwa nanti kuomvya imilembo yuze iikavulunganya uongo. Ivintu vya musango uu vingalenga ukuti umi winu uye umu uzanzo nupya nga mukucita vii ale mukulanga ukuti mutacindika umi wa yantu yauze ukwikako sile na ya lupwa inu.
Mwaicingilila uku mazanzo. Pakuti muicingilile uku mazanzo, mwazifya ing’anda inu. Mwapisya ningo motoka winu nupya mwasininkizya ukuti ali ningo lyonsi. Mutaleka yauze yamupatikizya ukucita ivintu ivingalenga mucisike nanti ukufwa.
Mwaya ni cikuuku kuli yauze. Pakuti tulange ukuti twacindika umi, tulinzile ukuya ni cikuuku uku yantu a mitundu yonsi, aafuma uku mpanga zyuze, apiina na aakankala, aasambilila alino na aatasambililila. Kapatulula alino nu lupato ilingi ivikalenga ukuti kwaya ivimvulunganya alino ni nkondo.
VINO YA NTE YAKWE YEOVA YAKACITA PA KWAZWA ANTU UKUCINDIKA UMI
Ya Nte Yakwe Yeova yakakomelezya antu ukulacita ivintu ivingalenga yaye nu umi usuma. Vino tukasambilizya ivyasintilila pali Baibo, vikaazwa antu ukuleka iviyelezyo iviipe nanti vyuze ivingalenga ukuti umi wao uye umu uzanzo.
Tukalondela sana masunde aakalanda pa kuicingilila lino tukuomba umulimo wa makuule. Aakaazwilizya umu mulimo wa kukuula ivikuulwa vino tukapepelapo alino ni vikuulwa vyuze ivikatungilila umulimo wa kusambilizya Baibo, yasambiliziwa ivyakucita pa kuicingilila uku mazanzo. Ivikuulwa tukaviceceta cila nsita pa kuti tusininkizye ukuti vili ningo ukulingana na masunde aakuicingilila aya uku ncende iyo .
Tukaazwa antu ndi cakuti yaponelwa na mazanzo. Umu myezi 12 iyatipita, twazwilizye uku mazanzo aacitike ukufika kuli 200 umu nsi yonsi nupya twaomvizye impiya umupipi na madola 12 milyoni zino antu yasangwilileko.
Lino ulwale wakwe Ebola wasalangine sana uku West Africa (2014) alino nu ku Democratic Republic of Congo (2018), twasambilizye antu ivyakucita pakuti yatasalanganya ulwale uu uwipisye. Twatumile aimilizi akuya landa malyasi aakweti umutwe uwatangi “Cuvwila Cikacingilila Umi.” Apa ncende zitu zyonsi izya kupepelapo twapanzile apa kufulalila iminwe nupya twalanzile sana pa mulandu uno cacindamila ukufulala uku minwe alino na pali vyuze vino yangacita pa kuicingilila
Uku Sierra Leone apa ledyo, yataizye ya Nte Yakwe Yeova pali vino yazwilizyanga ya Nte yauze alino na asi ya Nte ukuicingilila uku ulwale wakwe Ebola.
a Mpiti, uku Middle East, ukulondela isunde lii kwalangililanga ukuti umuntu wika sana mano kuli ya lupwa yakwe alino na antu yauze.