Cuza wa Ufi

Elenganyini ukuti mukweti “cuza” wino mwamanyine nawe ukufuma uku wance. Akamilenga ukulayuvwa kwati umukula sana nupya akamwazwa ukulauvwana ningo na ya cuza. Nga mwasakamikwa, akamwazwa “ukutekeziwa.” Umu cumi, mwamutaila sana ukuti angamwazwa umu nzila izingi.

Nomba lino papita insita, mwiza mwamanya ukuti umuntu wiyo asi cuza musuma. Akamupatikizya ukuti mwaya nawe insita izingi, nanti cakuti musitemwa ukuya ku ncende zimwi zino akamusendako. Nupya nanti icakuti akamulenga ukucita vintu wa mwikolo, ukucita vivyo kukalenga umi winu ukuya umu uzanzo. Nupya ukulunda pali vivyo, wamwiyila ni impiya zinu zimwi.

Apa nsita imwi, mwasolwilepo ukuti mute ukuya ivyuza, lelo atamuzumilizye ukucita vivyo. Cisiileko aalilwe atandika nu kumitungulula. Nupya mwatandika nu kulanguluka.

UCUZA uwa musango uu aali uno ya kapeepa yakwata na fwaka. Ya Earline, aapeefile pa myaka 50, yalanzile iyati: “Fwaka ingangavwa sana ukucila muntu. Itaali sile a cuze uno nakweti pa myaka ingi, lelo insita zimwi wali ali cuza wane wenga sile.” Nomba lino ya Earline izile iyiluka, ala fwaka waya mpiti cuza wa ufi nupya umwipe. Ivyacitikiile ya Earline, ivikolana na amazwi aatiyayulila icipande, nomba iyapusana sile muli conga. Lino yasambilile ukuti Leza wapata ukupeepa pa mulandu wakuti kukaonona imiili ino Leza watupeela, yatiile ukupeepa.—2 Kolinto 7:1.

Umonsi umwi uwi izina lyakuti Frank, nawe kwene watiile ukupeepa pakuti aazanzya Leza. Nomba lino papisile uwanda onga, waizanyile akusela umu ng’anda ala akulonda utusiki twakwe fwaka. Frank walanzile ukuti “Lili kwene alino nasoolwilepo ivya kucita. Ukuzana ukuti natandika ukusela umu ng’anda ala nkulonda utusiki twakwe fwaka kwalenzile nuvwe sana uyi. Fwandi nasoolwilepo ukuta kupeepa fwaka ukufuma uwanda kwene uwa.”

U mulandu ci uno catalila ukuta ukupeepa fwaka? Aakalondelezya yalanda pa milandu imwi: (1) Fwaka ingalenga umuntu ailondesya sana wakwe vino caya uku milembo yuze iikavulunganya uongo. (2) Vimwi ivyaya muli fwaka vino yakati nikotini vikafika zuwa ku ongo mu masekondi sile 7. (3) Aakapeepa yakalola ukuti ukupeepa kwacindama umu umi pano yakapeepa ala yakulya, yakumwa, lino yakulanzyanya na auze, alino na vyuze.

Lelo wakwe vino ya Earline na ya Frank iyalanda, cingacita umuntu ukuta ukupeepa fwaka. Ndi cakuti mukapeepa nomba mukulonda ukuta ukucita vivyo, ivipande ivyalondelelapo vingamwavwa ukucita vivyo.