U mulandu ci uno Yesu walandile amazwi yakwe Davidi aaya pa Masamu 22:1 lino atatala wafwa?

Pa mazwi yano Yesu walanzile lino atatala wafwa paya na mazwi aya pali Mateo 27:46 akuti: “Leza wane Leza wane pacani wantazyela.” Lino Yesu walanzile amazwi yaa wafikilizye amazwi yakwe Davidi aaya pa Masamu 22:1. (Mako 15:34) Citange ciziipe ukulanda ukuti Yesu walanzile amazwi yaa pa mulandu wakuti wasokiile Yeova nanti pa mulandu wakuti utailo wakwe wacefiile. Yesu wamanyile sana umulandu uno wali nu kufwila nupya waipeelisye ukucita vivyo. (Mate. 16:21; 20:28) Nupya wamanyile nu kuti pa nsita ino wali nu kufwa Yeova wali nu kuta ukumucingilila kuli vyonsi. (Yobo 1:10) Fwandi Yeova watiile ukumucingilila pakuti Yesu alangilile ukuti wali nu kutwalilila ukuya ni cisinka asi mulandu na vino wali nu kucuula ukufika ukumfwa.—Mako 14:35, 36.

Nomba u mulandu ci uno Yesu walandile amazwi yaa apa Masamu? Nanti cakuti tutamanya icalenzile, nomba tumalanda pali vimwi limwi ivyalenzile. *

Lino Yesu walanzile amazwi yaa walozyanga mukuti Yeova aatali nu kulesya imfwa yakwe. Yesu walinzile ukupeela ilambo ukwaula ukuti Yeova amwavwe. Wali umuntunze nupya walondekwanga ukufwa pakuti angafwila umuntu wensi.—Ayeb. 2:9, NWT.

Lino Yesu walanzile amazwi aaya pa Masamu 22:1, uzye walondanga ukuti antu yaelenganya pa mazwi yonsi aya umwi buku lya Masamu? Pa nsita iya ayuda yasungilanga sana nupya iusyanga sana amazwi yonsi aali umwi buku lya Masamu. Lino yuvwile icikomo conga icaya umwi buku lya Masamu yelenginye pa mazwi yonsi aaya umwi buku lya Masamu. Ndi cakuti avino Yesu walondanga nga wavwile ayuda ukwiusya mausesemo aingi aalandanga pali vino vyali nu kumucitikila ukufika nu ku mfwa yakwe. (Masa. 22:7, 8, 15, 16, 18, 24 ) Nupya icikomo ca kusyalikizyako ica Masamu cikalanda pa kulumbanya Yeova nu kuti umwene umu nsi yonsi.—Masa. 22:27-31.

Uzye lino Yesu walanzile amazwi yaa yakwe Davidi walozyanga ukuti wali uwakaele? Lino Yesu atatala wakomwa amu cilye ca Sanihedilini yamubepizye ukuti wapontelanga izina lyakwe Leza. (Mate. 26:65, 66) Zuwa zuwa amu cilye ca Sanihedilini yakongine usiku nu kupingula umulandu uwaa ukwaula ukulalondela amasunde ya uteeko uwaliko pa nsita iya. (Mate. 26:59; Mako 14:56-59) Lino Yesu uzizye iuzyo lyakuti Leza wane Leza wane pacani wantazyela? walozyanga umukuti pasi iciipe icili consi cino wacisile icali nu kulenga akomwe.

Uzye Yesu wanenanga antu ukuti Davidi kalemba wa Masamu wacuzile pa mulandu wakuti Yeova wamutazyezile? Iuzyo lyakwe Davidi litalangililanga ukuti atakweti utailo muli Leza. Pa cisila ca kuzya iuzyo lii walanzile ukuti wataile Yeova ukuti angapususya antu yakwe nupya Yeova watwalilile ukumupaala. (Masa. 22:23, 24, 27) Vikwene avino cali na kuli Yesu mwana Davidi, nanti cakuti wacuulanga pa cimuti ca kucuziwilwapo cii cisipiliula ukuti Yeova wamutazyezile.—Mate. 21:9.

Uzye Yesu walondanga yauze yalole ukuti uvwile uyi pali vino Leza watiile ukumucingilila pakuti alangizye ukuti wali uwakaele? Kutali ukulonda kwakwe Yeova ukufuma pa kutandika ukuti umwanakwe acuule nu kufwa. Cii cizile icicitika pa cisila cakuti Adamu na Eva yayembuka. Yesu atacisile iciipe icili consi nomba walondekwanga ukucuula nu kufwa pakuti aasuke iuzyo lino satana wakatwisye nu kupeela ilambo pali vino Adam na Eva yaponzizye. (Mako 8:31; 1 Pet. 2:21-24) Cii cali nu kucitika sile ndi cakuti pa nsita imwi Yeova wata ukucingilila Yesu wakwe vino wamucingililanga lyonsi.

Uzye Yesu walondanga alondezi yakwe ukulaelenganya pa mulandu uno Yeova wazumilizye ukuti afwe pa cimuti ca kucuziwilwapo? * Yesu wamanyile ukuti vino wali nu kufwa wa cipondo cali nu kulenga antu aingi ukuvwa uyi. (1 Kol. 1:23) Ndi cakuti alondezi yakwe yali nu kwika amano pa mulandu uno wafwilile nga yamanyile muno imfwa yakwe yalozyanga. (Gala. 3:13, 14) Lyene nga yatandike ukumulola ukuti a katuula asi cipondo.

Asi mulandu ni calenzile Yesu alande amazwi yaa, nomba wamanyile ukuti vyonsi vino wapitangamo kwali ukulonda kwakwe Yeova. Lino wamazile sile ukulanda amazwi aaya pa Masamu, Yesu walanzile ukuti: “Casila.” (Yoa. 19:30; Luka 22: 37) Pa mulandu wakuti Yeova watiile ukucingilila Yesu pa nsita imwi calenzile aombe vyonsi vino wizile umu kuomba pano nsi. Nupya calenzile afikilizye vyonsi ivyalemvilwe pali aliwe umu “Mpapulo zyakwe Mose na zyakwe ya Kasema nga nu Masamu.”—Luka 24:44.