1-2. I vyani ivikalenga aomvi yakwe Leza ukuya ni nsansa? (Yakobo 1:​22-25)

 YEOVA nu Mwanakwe yakalonda ukuti twaya ni nsansa. Uwalemvile Masamu 119:2 walemvile ati: “Alongo ayayo akawaka amasunde yakwe nu kumulonda ni myenzo yao yonsi.” Yesu nawe walanzile ati: “Ansansa aantu akauvwa izwi lyakwe Leza nu kulilondela!”—Luka 11:28.

² Swe ya kapepa yakwe Yeova twaya ni nsansa. U mulandu ci? Kwaya ivingi ivikalenga twaya ni nsansa, lelo icintu icicindamisye cino tukacita u kubelenga Izwi lyakwe Leza lyonsi alino nu kwezya na maka ukucita vino tukabelenga.—Belengini Yakobo 1:​22-25.

3. I visuma ci ivikacitika ndi cakuti tukuomvya vino tukubelenga umwi Izwi lyakwe Leza?

³ Kwaya ivingi vino tukaipakizya ndi cakuti ‘tukucita vino Izwi lyakwe Leza likalanda.’ Twamanya ukuti ali vino tulinzile ukucita pakuti twazanzya Yeova. Ukwiusya icisinka cii kukalenga twaya ni nsansa. (Kasa. 12:13) Ndi cakuti tukucita vino tukubelenga umwi Izwi lyakwe Leza, ucuza witu na amu lupwa lwitu alino na ina na ya nkazi ulakomelako. Nupya mufwile mwalola ukuti vii i vya cumi. Alino ukucita vii, kukalenga tutaya ni ntazi zino antu aasilondela masunde yakwe Yeova yakakwata. Nupya vikwene ali vino nu Mwene Devedi walanzile. Pa cisila ca kulanda pa masunde nu upinguzi wakwe Yeova, walanzile ati: “Umu kuyalondela ali muno ndapokelela ni cilambu icikalamba.”—Masa. 19:​7-11.

4. U mulandu ci uno citangukila ukulacita vino Izwi lyakwe Leza likalanda?

 ⁴ Ukuya kwene, citanguka ukucita vino tukubelenga umwi Izwi lyakwe Leza. Nanti cakuti twapamviwa, tulinzile ukupaatulako insita iya kubelenga nu kuisambilizya Baibo pakuti twamanya vino Yeova akalonda twacita. Fwandi lekini tulandeko pali vimwi ivingatwazwa pakuti twabelenga Baibo lyonsi. Lyene tumalanda na pali vino vingatwazwa ukulaelenganya pali vino tukubelenga alino nu kulola vino tungaviomvya umu umi witu.

MWAPAATULAKO INSITA IYA KUBELENGA IZWI LYAKWE LEZA

5. I milimo ci ino twakwata ikalenga twaya apamviwe?

⁵ Antu yakwe Yeova aingi yapamviwa. Tukasumba insita ikalamba umu kuomba imilimo icindame iyalondololwa muli Baibo. Wakwe, sweingi tukaomba incito pakuti twaisakamala sweineco alino nu kusakamala indupwa zitu. (1 Tim. 5:8) Aina Klistu aingi yakasakamala ya lupwa lwao akote nanti aakalwalilila. Alino swensi kwene tukalondekwa ukusakamala umi witu, nupya ukucita vii kukalondekwa insita. Kulunda pali vii, twakwata imilimo ino twapeelwa umu cilongano. Umulimo onga ucindame uno twakwata u wa kusimikila ilyasi lisuma. Asi mulandu ni milimo uwingi ino mwakwata, mungacita uli pakuti mwazanako insita iya kubelenga Baibo lyonsi, ukwelenganya pali vino mukubelenga, alino nu kuviomvya?

6. Uzye mungacita uli pakuti mwabelenga Baibo lyonsi? (Loliniko ni cikope.)

⁶ Ukubelenga Baibo kwaya pa “vintu ivicindamisye” kuli swe Ina Klistu, fwandi tulinzile ukusininkizya ukuti tukucita vivyo lyonsi. (Filipi 1:10) Masamu aakutandikilapo yalanda pa muntu uwa nsansa ukuti: “Akazangila mu kuyela amazwi yakwe Yawe, nu kuyelenganya usiku nu musanya.” (Masa. 1:​1, 2) Cii cikupiliula ukuti tulinzile ukulakwatako insita iya kubelenga Baibo. Insita ci isuma ino tulinzile ukubelengelapo Baibo? Swensi kwene tulinzile ukuisoolwela insita ingatuzipila. Lelo tulinzile ukusoolola insita ingatwazwa  ukulabelenga Baibo lyonsi. Umwina Victor walanzile ukuti: “Natemwa ukubelenga Baibo katondo. Nanti cakuti ntatemwa ukuzyuka katondo, kusiya ivingi ivya kumpumvyanya. Nkaya na melenganyo asuma nupya nkasumbako mano kuli vino nkubelenga.” Limwi vikwene avino caya na kuli mwemwe. Muyuzye mweineco muti, ‘Uzye i nsita ci inganzipila ukulabelenga Baibo?’

MWAELENGANYA PALI VINO MUKUBELENGA

7-8. I vyani ivingalenga tufilwe ukuipakizya lino tukubelenga? Langililini.

⁷ Limwi tungabelenga cila wanda lelo ukwaula ukuvwikisya vino tukubelenga. Uzye mwatala mwabelengapo ivyeo vimwi lyene pa cisila imwiusya sile ivyeo ivinono pali vino imwabelenga? Swensi kwene vii vyatucitikilapo. Vikwene ivingatucitikila ndi cakuti tukubelenga Baibo. Limwi tungimika uyo uwa kubelenga ivipande vimwi muli Baibo cila wanda. Ukucita vii u kusuma sana. Tulinzile ukwimika mauyo alino nu kuombesya pakuti tuyafikilizye. (1 Kol. 9:26) Nanti ciye vivyo ukubelenga Baibo intandikilo sile. Lelo kuli na vyuze vino tulinzile ukucita pakuti twaipakizya ukubelenga Baibo.

⁸ Elenganyini pa cilangililo cii: Amanzi ya mvula asuma pano ivimelwa vikalondekwa amanzi yaa pakuti vikule. Lelo imvula ndi cakuti yatoonya sana ala amanzi yamavulisya. Ndi cakuti caya vivyo, ala imvula isikwazwa imvimelwa. Amanzi ya mvula yakalondekwa ukwingila umu musili panono panono pakuti ivimelwa vingakula ningo. Vikwene ali vino naswe tutalinzile ukulakalauka lino tukubelenga Baibo, kuli kuti ukulabelenga ukwaula ukuteekela icakuti itufilwa nu kuvwikisya alino nu kwiusya vino tukubelenga.—Yako. 1:24.

9. I vyani vino tulinzile ukucita ndi cakuti twiluka ukuti tukukalauka pa kubelenga?

⁹ Uzye insita zimwi mukakalauka pa kubelenga? Ndi cakuti ali vino cikaya, i vyani vino mulinzile ukucita? Mwateekela. Mwaezya na maka ukwelenganya pali vino mukubelenga nanti vino imubelenga. Citalinzile ukulamitalila ukucita vivyo. Limwi mungalundako  insita iya kuisambilizya pakuti mwakwatako insita iya kwelenganya pali vino mukubelenga. Nanti limwi, mungasoololapo ukulabelenga ivikomo ivinono sile alino nu kuomvya insita iyatiisyala ukwelenganya pali vino imubelenga. Ya Victor yano itulandapo, yalanzile ukuti: “Nkacefyako insita ndi cakuti nkubelenga Baibo, limwi icipande sile conga. Pa mulandu wakuti nkabelenga katondo katondo, uwanda onsi nkatwalilila ukwelenganya pali vino inabelenga. Mungasoolola uwingi wa vyeo ivya kubelenga ukulinga na vino mukulonda, lelo cacindama ukuteekela lino mukubelenga pakuti mwaelenganya pali vino mukubelenga.—Masa. 119:97; Lolini kambokosi akakuti “ Mauzyo Akwelenganyapo.”

10. Langililini vino mungacita pakuti mwaomvya vino mukusambilila? (1 Tesalonika 5:​17, 18)

¹⁰ Asi mulandu ni nsita ino mukabelengelapo Baibo nanti utali wa nsita ino mukaomvya lino mukubelenga, mulinzile ukusininkizya ukuti mukuomvya vino mukubelenga. Lino mukubelenga Izwi lyakwe Leza, mwayuzya mweineco ukuti, ‘Uzye ningaomvya uli ivyeo vii ndakai nanti uku nkoleelo?’ Katulangilile, tuti mwabelenga 1 Tesalonika 5:​17, 18. (Belengini.) Pa cisila cakubelenga ivikomo vii viili, mungimilila nu kwelenganya pa miku ino mukapepa na pali vino mapepo inu yakaya. Nupya, mungelenganya na pa vintu vino mulinzile ukutaizizyapo. Limwi mungapingulapo ukutaizya Yeova pa vintu vitatu vino atamucitila. Nanti cakuti mwaomvya sile insita inono ukucita vivyo, cilalenga ukuti mwauvwa nu kucita vino Izwi lyakwe Leza likalanda. Elenganyini vino mungaipakizya ndi cakuti mukucita vikwene cila wanda lino mukubelenga ni vipande na vyuze ivya muli Baibo. Ndi cakuti mwatwalilila ukucita vivyo mulaya aomvi yakwe Yeova asuma. Nga ndi cakuti mwalola ukuti kuli ivingi vino mulinzile ukuombelapo?

MWAIMIKA MAUYO YANO MUNGAKWANISYA UKUFIKILIZYA

11. I vyani limwi ivingalenga mutoovoke? Langililini.

¹¹ Insita zimwi mungatoovoka ndi cakuti mwiluka ukuti kuli ivintu ivingi vino mulinzile ukuombelapo. Elenganyini ukuti vii vikucitika: Tuti ilelo mukubelenga ivyeo ivikulanda pa kukanaya na kapatulula. (Yako. 2:​1-8) Mwiluka ukuti mulinzile ukusenuka muli vino mukacitila yauze. Ukucita vii kwacindama. Lyene mutondo mwabelenga pa vipande vikalanda pali vino cacindamila ukulaomvya amazwi asuma lino mukulanda. (Yako. 3:​1-12) Mwiluka ukuti ilingi imilandile inu isiya isuma. Lyene mwapingulapo ukuti mumatandika ukuomvya amazwi asuma lino mukukomelezya yauze. Lyene uwanda uwalondelelapo  mwasoololapo ukubelenga ivyeo ivikalanda pa kukanaya na ucuza na antu amu nsi. (Yako. 4:​4-12) Mwiluka ukuti mulinzile ukulasoolola ningo ivya kuizanzya. Uwanda uwalondelelapo, limwi mungatoovoka nu kulola ukuti mutanga mukwanisye ukusenuka muli vii vyonsi.

12. U mulandu ci uno mutalinzile ukutoovokela ndi cakuti mwazana ukuti kuli mumwi muno mulinzile ukusenuka? (Loliniko na futunoti.)

¹² Ndi cakuti mwazana ukuti mukulondekwa ukusenuka umu vintu ivingi, mutalinzile ukutoovoka. Ukwiluka ukuti mulinzile ukusenuka muli vimwi ala cikulangilila sile ukuti mwaicefya nupya muli nu mwenzo wakulondesya ukusenuka. Umuntu uwaicefya nupya uwaya ni cisinka akabelenga Malembo nu kulola vino ivyeo vivyo vingamwazwa ukusenuka. a Nupya mwaiusya ukuti tulinzile ukutwalilila ukuzwala “untu upya.” (Kolo. 3:10; Loliniko ni ivyeo vyakusambilila apakuti “uukalengwa ukuya upya,” umu Ciyemba) I vyani ivilamwazwa ukulacita vino Izwi lyakwe Leza likalanda?

13. Mungacita uli pakuti mwimike mauyo yano mungafikilizya? (Loliniko ni cikope.)

¹³ Ukucila ukwezya na maka ukucita vyonsi vino mwabelenga, mulinzile ukwimika mauyo yano mungafikilizya. (Mapi. 11:2) Mungezyako ukucita vii. Lembini ivintu vino mukulonda ukuombelapo, lyene musoololepo conga nanti viili vino mungatemwa ukutandikilapo ukuombelapo, lyene ivyasyala mungaombelapo insita yuze. I vyani vino mungatandikilapo?

14. Uyo cii uno mungatandikilapo ukuombelapo?

¹⁴ Limwi mungatandikilapo ukwimika uyo uno mungafikilizya zuwa. Nanti limwi mungasoololapo ukuombela pa vintu vino mukulola ukuti mukulondekwa ukuombelapo zuwa.  Ndi cakuti mwimika uyo uno imisoolola, mulinzile ukulondelezya pa uyo uwo umu mpapulo zitu, limwi mungaomvya Cisontelelo ca Mpapulo nanti Ibuku Ilya Kwazwa Inte Zyakwe Yeova Ukulondelezya Ivyeo. Mwapepa kuli Yeova nu kumulenga ukuti amupeele “amaka nu mwenzo wa kulondesya ukuomba.” (Filipi 2:13) Lyene mwaomvya vino imusambilila. Ndi cakuti mwafikilizya uyo uno mwatandikilepo, cilalenga ukuti mwalondesya ukufikilizya na yauze. Nupya cii cilelanga ukuti cimwangukile ukusenuka na muli vyuze.

MWALEKA IZWI LYAKWE LEZA ‘LYAOMBA MULI MWEMWE’

15. Uzye antu wakwe Yeova yapusanako uli antu aingi aakabelenga Baibo? (1 Tesalonika 2:13)

¹⁵ Antu aingi yakalanda ukuti yabelenga Baibo pa miku iingi. Nomba uzye yazumila vino Baibo ikasambilizya? Uzye yakacita vino Baibo ikalanda nu kuleka ukuti isenule umi wao? Awe foo, antu aingi yasicita vivyo. Vii vyapusana ni vikacita antu yakwe Yeova. Wakwe vino Aina Klistu aakutandikilapo yacisile, naswe kwene twazumila ukuti Baibo ‘izwi lyakwe Leza, wakwe viivi kwene vino lyaya.’ Fwandi tukaezya na maka ukucita vino Baibo ikalanda.—Belengini 1 Tesalonika 2:13.

16. I vyani ivingatwazwa ukulacita vino Izwi lyakwe Leza likalanda?

¹⁶ Asi lyonsi lino cikaanguka ukubelenga Izwi lyakwe Leza nu kucita vino tukubelenga. Limwi cingatutalila ukuzana insita iya kubelenga. Nanti limwi tungakalauka pa kubelenga icakuti itufilwa nu kuvwikisya vino tukubelenga. Limwi tungatoovoka ndi cakuti vino tulinzile ukuombelapo vyavulisya. Asi mulandu ni ntazi zino mungakwata, lelo mungakwanisya. Yeova angamwazwa ukucimvya intazi. Fwandi twaleka ukuti Yeova atwazwa nupya tutauvwa sile lelo twacita vino Izwi lyakwe Leza likalanda. Ndi cakuti tukubelenga Izwi lyakwe Leza nu kulacita vino tukubelenga umu umi witu, tulaya sana ni nsansa.—Yako. 1:25.