CIPANDE CA KUSAMBILILAMO 42
Vino Tungazwa Yano Tukasambilizya Baibo Ukulunduluka Ukufika Uku Lubatizyo—Ciputulwa 2
“Uisunge nupya ucenjele mu kusambilizya kwako.” —1 TIM. 4:16.
LWIMBO NA. 77 Luswepo ku Yantu Aaya Umu Mfinzi
VINO TUMASAMBILILAPO *
1. Uzye twamanya uli ukuti umulimo wa kupanga asambi ukapususya antu?
UMULIMO wa kupanga asambi ukapususya antu. Twamanya uli vivyo? Lino Yesu wapeezile isunde ilyalembwa pali Mate. 28:19, 20, walanzile ukuti: “Yangini, . . . mucite antu amu nko zyonsi kuya alondezi . . . , mwayawatizya.” Uzye ukubatiziwa kwacindama uli? Tulinzile ukubatiziwa pakuti tukapusuke. Umuntu aakalonda ukubatiziwa alinzile ukuzumila ukuti angaya nu umi wa manda pe pa mulandu wakuti Yesu watufwilile. Ali mulandu uno umutumwa Petulo waneniile Aina Klistu yauze ukuti: “Luwatizyo luno lukumutuula ndakai . . . kupitila mu kuzyukuka kwakwe Yesu Klistu.” (1 Pet. 3:21) Fwandi lino umusambi umupya wabatiziwa, akaya nu upalilo wa kwikala amanda pe.
2. Kulingana na 2 Timoti 4:1, 2, tulinzile ukuya ya kasambilizya ya musango ci?
2 Pa kupanga asambi tulinzile ukuya ya kasambilizya yasuma. (Welengini 2 Timoti 4:1, 2.) Umulandu ci? Apa mulandu wakuti Yesu watupeezile isunde lyakuti: “Yangini, . . . mucite antu amu nko zyonsi kuya alondezi . . . , nu kuyasambilizya.” Umutumwa Paulo walanzile ukuti: “Utwalilile” umu mulimo uu, pano “ale lyene ulaituula wemwisikulu nga na yao akukuvwa.” Ali mulandu kwene uno Paulo walandile ukuti:“Uisunge . . . mu kusambilizya kwako.” (1 Tim. 4:16) Pa mulandu wakuti ukusambilizya nu kupanga asambi kwalemana, imisambilizizye itu ilinzile ukuya ningo sana.
3. I vyani vino tumasambilila pa kutungulula masambililo ya Baibo mu cipande cii?
3 Tukasambilizya antu aingi sana icumi icaya muli Baibo. Nomba ukulingana na vino twasambilile mu cipande icafumileko, tukulondesya ukumanya vino tungacita pa kwazwa aingi ukuya asambi yakwe Yesu Klistu. Mu cipande cii, tumasambilila pa vintu na vyuze 5 vino kasambilizya wensi alinzile ukucita pakuti aazwe umusambi ukulunduluka ukufika uku lubatizyo.
MWAOMVYA BAIBO LINO MUKUSAMBILIZYA
Munguzyako kasambilizya uwamanya sana ukusambilizya ukumwazwa ukumanya ivya kuomvya ningo Baibo (Lolini mapalaglafu 4-6) *
4. U mulandu ci uno kasambilizya atalinzile ukulalanda sana lino akutungulula isambililo lya Baibo? (Lolini na futunoti.)
4 Twatemwa vino tukasambilizya ukufuma umwi Izwi lyakwe Leza. Fwandi limwi tungaalonda ukulanda sana ivingi vino twatemwa. Lelo katungulula wa Lupungu Lwa Mulinzi, uwi Sambililo Lya Baibo pa Cilongano nanti Isambililo lya pa ng’anda atalinzile ukulalandapo sana. Cila kasambilizya akalonda ukulaomvya Baibo pa kusambilizya, fwandi alinzile ukucenjela pakuti atalandapo sana pali vyonsi vino wamanya api lembelo nanti api lyasi lilyo. * (Yoa. 16:12) Elenganyini pali vino mwamanyile pali Baibo lino mwabatiziwe sile na vino mwamanya ndakai. Lino mwabatiziwe sile, mwamanyile sile ivisambilizyo ivicindame sana ivya muli Baibo. (Ayeb. 6:1) Camusendela imyaka iingi pakuti musambilile vino mwamanya ndakai, fwandi, mutasambilizya umusambi ivyeo ivingi pa nsita yonga.
5. (a) Kulingana na 1 Tesalonika 2:13, i vyani vino tukalonda umusambi witu ukuvwikisya lino tukusambilila nawe? (b) Tungakomelezya uli umusambi kulalanda pali vino akusambilila?
5 Tukalonda asambi itu ukumanya ukuti vino yakusambilila vikufuma umwi Izwi lyakwe Leza. (Welengini 1 Tesalonika 2:13.) Tungacita uli vivyo? Tulinzile ukukomelezya musambi ukulalanda pali vino akusambilila. Kucila ukuti lyonsi sweswe twamulondolwela malembelo, tungamuzya ukuti nawe atulondolweleko yamwi. Mwaazwa umusambi ukulola vino Izwi lyakwe Leza lingamwazwa. Mwamuzya iuzyo ilingalenga alondolole vino akwelenganya na vino akuyuvwa api lembelo lino wabelenga. (Luka 10:25-28) Limwi mungamuzya muti, “Uzye ilembelo lii lyakwazwa uli ukulola imiyele imwi yakwe Yeova?” “Uzye vino wasambilila muli Baibo vingakwazwa uli?” “Uzye ukuyuvwa uli pali vino wasambilila?” (Mapi. 20:5) Icacindamisya sana asi vino umusambi wamanya, lelo avino watemwa nu kucita vino akusambilila.
6. U mulandu ci uno cingazipila ukusendako ya kasimikila aamanya ukusambilizya lino tukuya mukutungulula isambililo?
6 Lino mukuya mu kutungulula isambililo lya Baibo, uzye mukasendako ya kasimikila aamanya ukusambilizya? Ndi cakuti mukacita vivyo, mungayuzya pali vino yakwelenganya pa mitungulwile inu ii sambililo nanti nga mukuomvya ningo Baibo. Nga mukulonda ukuya ya kasambilizya yasuma, mulinzile ukuicefya. (Loliniko na Milimo 18:24-26.) Pa cisila, uzyini kasimikila ndi cakuti umusambi akuvwikisya vino akusambilila. Munganena kasimikila kwene wiyo ukusyala akumutungulwila isambililo ndi cakuti mukufumapo. Kucita vivyo kulalenga isambililo ukutwalilila nupya cilalenga umusambi amanye vino ukusambilila kwacindama. Mutayuvwa ukuti lii isambililo linu sile nu kuti kusi umuntu muze angatungulula. Cino mukalondesya ukulola ivingazipila umusambi pakuti atwalilile ukulunduluka nu kusambilila icumi.
MWALANGA UKUTI IMUTEMWA NU KUZUMILA MULI VINO MUKUSAMBILIZYA
Mwanenako umusambi winu pa ina na ya nkazi akweti intazi wakwe zino akweti na vino yacisile pa kucimvya intazi zizyo na vino nawe angasambililako (Lolini mapalaglafu 7-9) *
7. I cani cilaazwa umusambi winu ukutemwa vino akusambilila?
7 Umusambi alinzile ukulola ukuti mwatemwa nu kuzumila muli vino Baibo ikasambilizya. (1 Tesa. 1:5) Kucita vivyo kulalenga atemwe sana vino akusambilila. Limwi mungamunenako vino Baibo yamwazwa umu umi winu. Cilalenga amanye ukuti nawe kwene Baibo ingamwazwa.
8. I vyani na vyuze vino mungacita pakuti mwazwe umusambi winu, nupya u mulandu ci uno mulinzile ukucitila vivyo?
8 Lino mukusambilila, mwanenako umusambi winu pa ina na ya nkazi akweti intazi wakwe zino akweti na vino yacisile pa kucimvya intazi zizyo. Limwi mungasendako umwi ukwi sambililo wino ivyamucitikiile vingakomelezya umusambi winu. Nanti mungazana malyasi ya kukomelezya pa jw.org pa ciputulwa cakuti “Baibo Ikaavwa Antu Ukusenuka.” * Ivipande na mavidyo yayo vilazwa umusambi winu ukumanya ukuti Baibo ingamwazwa ukusenuka.
9. Mungakomelezya uli umusambi ukulanenako ya lupwa ni vyuza pali vino akusambilila?
9 Ndi cakuti umusambi winu watwala nanti ukutwalwa, uzye uwakwe nawe kwene akasambilila Baibo? Ndi cakuti asisambilila, mungamunena ukuti azanwako pi sambililo. Mungakomelezya umusambi winu ukulanenako ya lupwa ni vyuza pali vino akusambilila. (Yoa. 1:40-45) Mungacita uli vivyo? Limwi mungamuzya ukuti: “Ungalondolwela uli ya lupwa yako pa cisinka cii?” Nanti “i lembelo ci lino ungaomvya uku kwazwa cuza wako ukuvwikisya icisinka cii?” Nga mukucita vivyo, mulaasambilizya umusambi ukuya kasambilizya. Lyene nga walinga, angatandika ukusimikila pamwi ni cilongano. Munguzya umusambi winu ndi cakuti wamanyako ali wensi aangatemwa ukusambilila Baibo. Lyene nga wazumila, mungalolana zuwa nu muntu wiyo nu kutandika ukusambilila nawe. Mungamutambisya vidyo yakuti Ivyani Ivikacitika pi Sambililo Lya Baibo? *
MWAKOMELEZYA UMUSAMBI UKUPANGA IVYUZA MU CILONGANO
Mwakomelezya umusambi ukupanga ivyuza mu cilongano (Lolini mapalaglafu 10-11) *
10. Wakwe vino 1 Tesalonika 2:7, 8 ikalanda, uzye kasambilizya angakolanya uli vino Paulo wacitanga?
10 Ya kasambilizya yalinzile ukwika sana amano ku yasambi. Mwayalola ukuti ku nkoleelo yangaya aina na ya nkazi. (Welengini 1 Tesalonika 2:7, 8.) Cisi canguke ukusya ivyuza vino yakwata nu kusenuka pakuti yatandike ukuombela Yeova. Tulinzile ukuyazwa pakuti yazane ya cuza ya cumi umu cilongano. Mwaya yacuza uku musambi winu lino mukuya capamwi nawe, asi sile lino mukusambilila Baibo lelo na pa nsita zyuze. Kumutumilako foni, meseji nanti sile ukumutandalila lino musikusambilila, kungalanga ukuti mwamusakamala.
11. I vyani vino tukalonda asambi itu ukuzana umu cilongano nupya u mulandu ci?
11 Kwaya ipinda limwi ilikalanda ukuti: “Antu yonsi mu muzi yakaazwilizyako ukukuzya umwana.” Tungati: “amu cilongano yakaombela pamwi ukupanga umusambi.” Fwandi lino aakasambilizya ningo Baibo yazwa asambi yao ukumanya ningo aina na ya nkazi mu cilongano, aina na ya nkazi yakayazwa ukupalama kuli Yeova. Lyene asambi yangauvwa ningo ukuya pamwi na ina na ya nkazi aangayazwa ukuya ya cuza yakwe Yeova nu kuyakomelezya lino yakwata intazi. Tukalonda musambi wenga na wenga ayuvwa ukuti waya umu cilongano umwaya aina na ya nkazi alemane. Tukalonda umusambi apalame sana umu lupwa lwa ina na ya nkazi aaya nu kutemwa. Lyene cilamwangukila ukuta ukuya pamwi na antu atanga yamwazwe ukutemwa Yeova. (Mapi. 13:20) Ndi cakuti ivyuza vino wakweti vyamutaluka, alamanya ukuti angazana ya cuza ya cumi umwi uvi lyakwe Yeova.—Mako 10:29, 30; 1 Pet. 4:4.
MWALANDA SANA PA KUIPEELA NU KUBATIZIWA
Panono panono, umusambi aakaika mano kuli vino akusambilila angalunduluka ukufika uku lubatizyo! (Lolini mapalaglafu 12-13)
12. U mulandu ci uno tulinzile ukunenela umusambi witu pa kuipeela nu kubatiziwa?
12 Mulinzile ukulanda sana pa mulandu uno cacindamila ukuipeela kuli Yeova nu kubatiziwa. Umulandu uno tukatungulwila isambililo lya Baibo u kwazwa umuntu kulaombela Yeova nu kubatiziwa. Lino umusambi wasambilila pa myezi inono, watandika nu kwiza mu kulongana, alinzile ukumanya ukuti tukulondesya ukumwazwa ukuya Nte Wakwe Yeova.
13. I vyani vino umusambi alinzile ukucita pakuti afikepo ukubatiziwa?
13 Kwaya ivintu ivingi vino umusambi akulonda kubatiziwa alinzile ukucita! Ica nkoleelo, umusambi alinzile ukumanya nu kutemwa Yeova nu kumutaila. (Yoa. 3:16; 17:3) Alinzile ukuya cuza wakwe Yeova nu kuya cuza wa ina na ya nkazi umu cilongano. (Ayeb. 10:24, 25; Yako. 4:8) Lyene umusambi akauvwa uyi pa viipe vino wacitanga nu kuta ukucita vintu vivyo. (Mili. 3:19) Nupya akatandika ukunenako yauze pali vino wazumilamo. (2 Kol. 4:13) Lyene akaipeela kuli Yeova nu kulangizya ukuipeela kwakwe lino wabatiziwa. (1 Pet. 3:21; 4:2) Uwada uwo ukaya uwa nsansa kuli yonsi! Lino umusambi watwalilila ukucita ivingalenga afikepo ukubatiziwa, tulinzile ukulamutaizya nu kumukomelezya ukutwalilila ukucita vivyo kwene.
MWALOLA VINO UMUSAMBI WINU AKULUNDULUKA
14. Uzye kasambilizya angamanya uli vino umusambi akulunduluka?
14 Tulinzile ukuya atekele lino tukwazwa umusambi witu ukufikapo ukubatiziwa. Nomba insita zimwi, tulinzile ukulola ndi cakuti akulondesya ukuombela Yeova Leza. Uzye umusambi akalanga ukuti akauvwila masunde yakwe Yesu? Nanti uzye akalonda sile ukusambilila ivyaya muli Baibo?
15. I vyani vingalangizya kasambilizya ukuti umusambi watalinga ukubatiziwa?
15 Lyonsi mwapituluka muli vino umusambi akulunduluka. Uzye akalangizya vino akayuvwa pali Yeova? Uzye akapepa kuli Yeova? (Masa. 116:1, 2) Uzye akaipakizya ukubelenga Baibo? (Masa. 119:97) Uzye akazanwa umu kulongana lyonsi? (Masa. 22:22) Uzye wasenuka muli vimwi pa kulanga ukuti akaomvya vino akusambilila? (Masa. 119:112) Uzye watandika ukunenako ya lupwa ni vyuza pali vino akusambilila? (Masa. 9:1) Ni cicindamisye i cakuti: uzye akulonda ukuya Nte Wakwe Yeova? (Masa. 40:8) Ndi cakuti umusambi asikulangizya ukulunduluka mu nzila zino twalandapo, mu mucenjelo ezyini ukulondelezya nu kumanya umulandu lyene mungalanzyanya nawe ukwaula ukupita mu mbali. *
16. A lilaci lino mungata ukusambilila nu muntu?
16 Nga papita insita mwayuzya ndi cakuti mungatwalilila ukusambilila nu musambi wiyo. Mwayuzya mweineco ukuti uzye umusambi akafilwa ukupekanya isambililo? Uzye asilonda ukulazanwa umu kulongana? Uzye acili wakwata ivicitwa ivipe? Uzye acili akatungululwa ni mipepele ya ufi? Ndi cakuti mwasuka ukuti ee uku mauzyo yaa, ukutwalilila ukusambilila nu muntu wiyo cingaya kwati ukusambilizya umuntu ukowa asikulonda ukuomba! Ndi cakuti umusambi atatemilwe vino akusambila nupya asikulonda ukusenuka, mutalinzile ukutwalilila ukusambilila nawe.
17. Ukulingana na 1 Timoti 4:16, I vyani vino aakasambilizya Baibo yonsi yalinzile ukucita?
17 Cacindama sana ukufikilizya ukuomba umulimo witu uwakupanga asambi, nupya tukalonda ukwazwa yano tukasambilizya Baibo ukulunduluka ukufika nu ku lubatizyo. Ali mulandu kwene uno tulaomvyezya Baibo pa kuyasambilizya nu kuyalanga ukuti twataila nu kutemwa vino tukayasambilizya. Tulakomelezya asambi ukupanga ivyuza umu cilongano. Nupya tulalanda sana pa kuipeela nu kubatiziwa nu kulola vino umusambi witu akulunduluka. (Lolini ka mbokosi apifwa 13, kakuti “ Vino ya Kasambilizya Yalinzile Ukucita Pakuti Yazwe Asambi Ukulunduluka Ukufika Uku Lubatizyo.”) Twaya nu luzango pano tukaazwilizyako umu mulimo wa kupususya antu! Lekini twaezya na maka pakuti twaazwa asambi ukulunduluka ukufika nu ku lubatizyo.
LWIMBO NA. 79 Mwayasambilizya Ukuti Yazyansya
^ pala. 5 Ukutungulula masambililo ya Baibo u wila usuma ukufuma kuli Yeova. Tungazwa asambi ukulaelenganya nu kucita ivintu umu nzila ino Yeova akalonda. Cipande cii cimalanda pali vino tungacita pakuti tuzifye imisambilizizye itu.
^ pala. 4 Lolini cipande cakuti “Vintu Vino Mutalinzile Ukucita Lino Mukutungulula Isambililo” mu Kabuku Aka Kuomvya mu Kulongana Kwakuti Swe Ina Klistu nu Mulimo Witu kakwe Sepetemba 2016.
^ pala. 8 Yangini apakuti PALI SWESWE > IVYACITIIKILE YA NTE YAKWE YEOVA.
^ pala. 9 Pa JW Library®, yangini apakuti MEDIA > OUR MEETINGS AND MINISTRY > TOOLS FOR THE MINISTRY.
^ pala. 15 Lolini vipande vyakuti: “Ukutemwa Yeova nu Kumutaizya Kulalenga Muwatiziwe” ni cakuti “Uzye Imuipekanya Ukuwatiziwa?” mu Lupungu Lwa Mulinzi lwakwe Maaci 2020.
^ pala. 77 ULONDOLOZI WA CIKOPE: Pa nsita imwi pa cisila ci sambililo, nkazi uwamanya ukusambilizya wazwa katungulula pali vino atalinzile ukulandapo sana pi sambililo.
^ pala. 79 ULONDOLOZI WA CIKOPE: Lino yakusambilila, umusambi wasambilila vino angaya umuci musuma. Pa cisila wanenako iya vino watasambilila.
^ pala. 81 ULONDOLOZI WA CIKOPE: Umusambi na iya yakwizizya pamwi nu muze wino yakomenkine uku Nga’nda ya Wene.
