UZYE mukailola ukuti mukataizya? Swensi kwene tulinzile ukwelenganya sana api uzyo lii. Baibo yasoowile ukuti mu manda yano tukwikalamo, antu aingi “yatalataizya.” (2 Tim. 3:2) Limwi mwalolako antu yamwi aakaelenganya ukuti antu yauze yalinzile kulayacitila nanti ukuyapeela vimwi. Yakayuvwa ukuti yatalinzile kutaizya pa vintu vino yauze yakayapeela. Namwe kwene mungazumila ukuti citazipa ukwikala na antu ya musango uu.

Nomba, aomvi yakwe Yeova yene yayanena ukuti: “Mulinzile mwataizya.” Tulinzile ‘twataizya Leza muli vyonsi.’ (Kolo. 3:15; 1 Tesa. 5:18) Kuya nu mwenzo wa kutaizya kwazipa sana. Kwaya milandu ingi ino kucitila vivyo kwacindamila sana.

Mulandu onga ucindame sana uno tulinzile kulangila kutaizya lyonsi u wakuti kukalenga twauvwa ningo. Umuntu aakataizya akauvwa ningo sana, na wino wanena amazwi yayo nawe kwene akauvwa ningo. U mulandu ci uno kutaizya kukalenga ukuti swensi twaya ni nsansa? Lekini tulande pa cilangililo cii: ndi cakuti mwalola ukuti yamwi yakulondesya kumucitilako vimwi, ale antu yayo yamwikako sana mano. Yakamusakamala. Ndi cakuti mwalola vino yamusakamala, cingalenga muvwe ningo sana. Tungelenganya ukuti vivyo kwene avino cali kuli Luti. Boazi walangizye cikuuku kuli Luti. Ukwaula nu kutwisika Luti afwile uvwile ningo sana pa kumanya ukuti kwali umwi uwamusakamalanga.—Luti 2:10-13.

Cacindama sana kulanga kutaizya kuli Leza. Mufwile mwelenganyapo sana pa mawila aingi yano wamupeela na yano acili akumupeela. (Malan. 8:17, 18; Mili. 14:17) Kuluta sile ukwelenganya pa usuma wakwe Leza pa kasita sile kanono, Uzye citanga cizipe kukwata insita ya kwelenganya pa visuma vino Leza wamucitila pamwi na atemwikwa inu? Ukwelenganya pali vino Kaumba winu waya ni cikuuku kulamwazwa kulangizya sana kutaizya kuli aliwe nupya kulamwazwa ukulola vino wamutemwa na vino akataizya pali vino mukacita.—1 Yoa. 4:9.

Tulinzile kulaelenganya pali vino Yeova watupela nu kulataizya pa usuma wakwe. (Masa. 100:4, 5) Antu yakalanda ukuti “amazwi ya kutaizya yakalenga muntu kuvwa ukuti wacindama nupya yakaleta insansa.”

Mulandu nauze uno kutaizya kwacindamila kukalenga ucuza kukomelako. Swensi kwene tukauvwa ningo nga yatutaizya. Nga mwataizya umwi nu kumulanga cikuuku, mulaya ya cuza yasuma nu muntu wiyo. (Loma 16:3, 4) Nupya, antu aakataizya yatemwa ukwazwako yauze. Yakalola vino yauze yakayalanga cikuuku, nupya cico cikalenga nayo yacita vivyo kwene. Ukwazwa yauze kukalenga muntu ukuya ni nsansa. Cikaya wakwe vivi kwene vino Yesu walanzile ukuti: “Mukupeela mwaya upolelelo ukulu cuze kuluta mukupokelela!”—Mili. 20:35.

Ya Robert Emmons aakalamba ya pa University of California asambilila pa kulanga kutaizya, yalanzile iyati: “Pakuti twataizya tulinzile kusininkizya ukuti swensi tukalondekwa uwazwilizyo kufuma kuli yauze lino tukupeela na lino tukupokelela.” Cisinka i cakuti pakuti tuye nu umi usuma, tukalondekwa ukwazwiwa mu nzila izingi ukufuma kuli yauze. Yamwi yangatupeela ivyakulya, kutusakamala lino itulwala nanti kutusakamala umu nzila zyuze. (1 Kol. 12:21) Umuntu aakalanga  kutaizya, akataizya pali vino yauze yakamucitila. Uzye namwe mukalanga kutaizya pali vino yauze yakamucitila?

Mulandu nauze ucindame uno ukuya nu mwenzo wa kutaizya kwazipila, uwakuti kukatwazwa kwika sana mano ku visuma vino yauze yakatucitila ukuluta sile ukwika mano ku viipe. Kampingu witu akaomba kwati ulunyungo. Akatwazwa kulaelenganya pa visuma vino yauze yakatucitila kuluta kulaelenganya sile pa viipe vino yakacita. Akalenga twaika sana mano ku vintu ivicindame kuluta sile ukwika mano pa ntazi zino tukakwata. Nga mukutaizya, alino mulalola vino cazipa kucita vivyo nupya cilalenga mutwalilile kulataizya. Nga mukwika mano ku vintu ivisuma vino mukataizya, cilamwazwa kucita vino mutumwa Paulo walanzile ukuti: “Mwazanga mu Mwene.”—Filipi 4:4.

Kutaizya kukatwazwa kukanaelenganya pa vintu ivitacindama. Cingatala sana kulanga ukutaizya ale pa nsita yonga kwene tuli nu uzuwa nanti itusoka. Antu aakataizya yasiika sana mano ku kulondesya ivyuma. Yakataizya pali vino yakwata nupya yasiika mano kukulondesya kukwata na vyuze.—Filipi 4:12.

Pa mulandu wakuti mwemwe Ina Klistu, mwamanya ukuti Satana akalonda ukumisosya nu kumutoovola mu ntazi zino mukakwata mu manda yaa akusyalikizya. Akatemwa sana nga mwatandika ukwelenganya pa viipe nu kuilizyanya. Ndi cakuti mwaya ni miyele iyo, cingatalila sana antu kukutika kuli mwemwe lino mukuyasimikila ilandwe lisuma. Kutaizya ni miyeele ino mupasi wa muzilo ukatulenga kukwata, vyalemana sana. Tukaya ni nsansa nga twalola vintu visuma vino Leza watupeela nupya twaya nu utailo muli vino watulaya ukuti vilacitika ku nkoleelo.—Gala. 5:22, 23.

Pa mulandu wakuti mwemwe antu yakwe Yeova, mufwile imuzumila ukuti icaticilandwa sana mu cipande cii u kutaizya. Nomba mufwile imumanya ukuti citangupala ukulanga kutaizya nu kulaelenganya pa visuma. Mutaleka ukwelenganya kuko kumutoovole. Mungatandika kutaizya nu kutwalilila kucita vivyo kwene. Mungacita uli vivyo? Cila wanda mwaelenganya pa vintu ivisuma vino mungataizyapo. Nga mukucita vivyo, mulaataizya sana. Cilalenga muye sana ni nsansa kuluta yayo aakaika sile mano ku ntazi. Mwaelenganya pa vintu ivisuma vino Yeova na antu ya uze yacita ivikamukomelezya nu kumuletela insansa. Limwi mungaalemba cila wanda vintu viili nanti vitatu vino mukutaizya.

Yamwi asambilila sana api lyasi li yalanda ukuti: “Ndi cakuti lyonsi tukutaizya yauze wongowongo witu angaomba ningo nu kutandika ukwelenganya pa vintu ivisuma.” Umuntu aakataizya akaya sana ni nsansa. Fwandi mwaelenganya sana pa vintu ivisuma vino mwakwata, pa visuma ivyamucitikila nupya mwataizya. Kuluta kulapokelela sile ivintu kuli Yeova, mwamutaizya “pano wene umusuma.” Fwandi, “mwataizya Leza muli vyonsi.”—1 Mila. 16:34; 1 Tesa. 5:18.