Ilyasi ilyalembwa pa Malango 22:25-27 asi kulonda sile ukuti yasinile umonsi ukuti ali nu mulandu pano pa nsita ii ala umonsi wiyo ali nu mulandu na mpiti. Isunde lii lyapeelanga usininkizyo wakuti umukazyana wali uwa kaele. Uvwini vino ilembelo lii likalanda.

Ivikomo ivyafumako vikulanda pa monsi uwalala nu mwanaci “umu musumba” wino yataisya. Ndi wacita vivyo wayanga nu mulandu wa ucende pano ala umukazyana wiyo yamulolanga wa mwanaci umutwalwe. Ngu mukazyana wene, cayanga uli? “Atapunzile kuti atuulwe, nanti angala wali mu musumba mukasi muno yange yamuvwe.” Ndi cakuti apunda yauze ndi yamuvwile akupunda nupya nga yamwazwilizye. Nomba atapunzile. Kuli kuti nawe kwene wacitanga ucende, fwandi yonsi yoili yali nu mulandu.—Malan. 22:23, 24.

Isunde nupya lyalanzile ivipusaneko ivingacitika ukuti: “Ndi cali umonsi lino ali mu mpanga walema umukazyana ku maka wino yataisya nu kucita icansonyi kunoli, ale lyene umonsi wiyo sile aliwe alinzile ukukomwa. Mutalinzile ukucita icili consi ku mwanaci wiyo, pa mulandu wakuti wene atacisile iifyo ilingamulenga ukukomwa. Umulandu uu ukoline nu mulandu wa muntu uwatazanza umuntu muze nu kumukoma. Umonsi wiyo walemile umukazyana wiyo ku maka mu mpanga, nga lelo nanti angala wene wapunzile kuti yamutuule, kutali umwi uwakumwazwa.”—Malan. 22:25-27.

Fwandi ya kapingula yazumile ukuti umukazyana wali uwakaele. Mu nzila ci? Yelenganyanga sile ukuti “wapunzile kuti yamutuule,” nomba “kutaali umwi uwakumwazwa.” Fwandi atacitanga ucende. Nomba umonsi wene wapeelwanga umulandu wa kulema umukazyana uku maka nu wa kucita ucende pano ala walema umukazyana wino yataisya ku maka nu “kucita ica nsonyi kunoli.”

Fwandi nanti icakuti isunde likanga sana mano pali ukaele wa mukazyana, ilyasi likalondolola ukuti umonsi wayanga nu mulandu wa kulema umukazyana uku maka nu wa kucita ucende. Tungasininkizya ukuti ya kapingula ‘yalondelezyanga umulandu ningo’ nu kupingula umulandu ukulingana na vino Leza wayanenanga lyonsi ukuti avino yalinzile ukulacita.—Malan. 13:14; 17:4; Kufu. 20:14.