1-2. Uzye ivyacitikile umwina Angelito vikutusambilizya ukucita cani?

UZYE avyazi inu a Nte Yakwe Yeova? Ndi cakuti a Nte, mwaiusya ukuti mutange muye ya cuza yakwe Yeova pa mulandu sile uwakuti avyazi inu a cuza yakwe Yeova. Asi mulandu avyazi itu yakaombela Leza nanti foo, swensi kwene tulinzile ukuipangila ucuza witu na Yeova.

² Elenganyini pali vino vyacitikile umwina Angelito. Wakuliile umu lupwa lwakwe ya Nte Yakwe Yeova. Nomba, lino wali umwance atayuvwanga ukuti wali acuza wakwe Leza. Watiile, “Naombelanga sile Yeova pa mulandu wakuti nalondanga ukucita vino ya lupwa yane yacitanga.” Nomba umwina Angelito wapingwilepo ukulasumba insita ikulu uku kuwelenga Izwi Lyakwe Leza nu kwelenganya pali vino wawelenganga, nupya watandike ukupepa insita izingi kuli Yeova. I vyani vino wasambilile? Umwina Angelito watiile: “Nasambilile ukuti inzila yonga ino ningapalamilamo sana kuli Tata wane Yeova, u kumumanya ningo nemwineco.” Ivyacitikile umwina Angelito vingalenga twaelenganya sana pa mauzyo acindame sana, aakuti: Uupusano ci uwaya pa kumanya ivintu ivinono sile pali Yeova na pa kumumanya ningo? Nupya tungacita uli pakuti tumanye ningo Yeova?

3. Uupusano ci uwaya pa kumanya ivintu ivinono sile pali Yeova na pa kumumanya ningo?

³ Tungelenganya ukuti umuntu wamanya Yeova ndi cakuti  wamanya izina lyakwe Leza nanti wamanya vino walanda na vino wacita. Nomba cii cisikupiliula ukuti wamumanya ningo. Tulinzile ukusumba insita ikulu ukusambilila pali Yeova na pa miyele isuma ino wakwata. Nga twacita vivyo tulamanya ivikalenga alanda vino akalanda nu kucita vino akacita. Kucita vivyo kulatwazwa ukumanya ndi cakuti Yeova watatemwa vino tukwelenganya na vino tukucita. Nga twamanya vino Yeova akulonda twacita, tulinzile ukucita vivyo kwene.

4. Uzye ukusambilila pa malyasi aalembwa muli Baibo kumatwazwa uli?

⁴ Antu yamwi yangatuseka nga tukulonda ukutandika ukombela Yeova, nupya yangaatukanya nga twatandika ukuya umu kulongana. Nomba ndi cakuti twataila Yeova, atalatala atutazyele. Tulatandika ukuya na ucuza ukome uulatwalilila manda pe. Uzye umu cumi tungamanya Yeova ningo? Ee, tungamumanya. Vino antu ataali amalilike, aali wakwe Mose nu Mwene Davidi yacisile vikalenga tusininkizye ukuti mu cumi tungamumanya. Lino tukusambilila pali vino yacisile, tumaasuka amauzyo yaa yaili: Uzye yacisile uli pakuti yamanye Yeova? I vyani vino tungasambilila kuli vino yacisile?

5. I vyani vino Mose wasoolwilepo ukucita?

⁵ Mose wacitanga vino wasambililanga. Lino Mose wali ni myaka 40, wasoolwilepo ukulazanwa na antu yakwe Leza Ayebulai ukucila ukumanyikwa ukuti wali u “mwizikulu wakwe Falao kateeka.” (Ayeb. 11:24) Mose wasiile icifulo ca papela. Lino Mose watungililanga Ayebulai, wisile umi wakwe umu uzanzo pano wamanyile ukuti Falao uwali umwene wa maka nupya uwamanyikwe nga leza wali nu kusoka sana. Walangilile ukuti wali nu utailo ukome. Mose wataile sana Yeova. Utailo uwo u walenzile Mose ukukwata ucuza na Yeova uwatwalilile umi wakwe onsi.​—Mapi. 3:⁠5.

6. I vyani vino tungasambilila kuli vino Mose wacisile?

⁶ I vyani vino tukusambililako? Wakwe Mose, swensi twakwata vino tulinzile ukuisoolwela ivyakucita: Uzye tulasoololapo ukuombela Leza nu kuzanwa na antu yakwe? Tungata ukucita vimwi pakuti sile tuombele Leza, nomba antu yamwi aatamanya Yeova yangatukanya. Nomba ndi cakuti twataila Tata witu uwa kwi yulu, tulasininkizya ukuti alatwazwa.

7-8. I vyani vino Mose watwalilile ukusambilila?

⁷ Mose watwalilile ukusambilila pa miyele yakwe Yeova nu kucita ukulonda kwakwe. Lino Leza wanenyile Mose ukuti aye akafumye uluko lwa Ina Izlaeli umu Ejipti, Mose waitwisike nupya pa miku iingi wailolanga ukuti atange akwanisye. Vino Leza waswike Mose vyalangilile ukuti wali sana ni cikuuku, kuli kuti wamanyile vino Mose wayuvwanga nupya wamwazwilizye. (Kufu. 4:10-16) Na cico calenzile Mose ukutwala amazwi yakwe Yeova aupinguzi kuli Falao. Mose waweni kuno Yeova waomvizye amaka yakwe ukukulula Aina Izlaeli nu kunona Falao ni vita vyakwe pali Yemba Muyenzu.​—⁠Kufu. 14:​26-31; Masa. 136:⁠15.

⁸ Lino Mose wafumizye Aina Izlaeli umu Ejipti, yailizyanyanga lyonsi. Nanti ciye vivyo, Mose waweni vino Yeova watekeliile antu yakwe yano wafumizye umu uzya. (Masa. 78:​40-43) Nupya Mose waweni vino Yeova waicefizye lino wasenwile amano yakwe pa konona Aina Izlaeli pa cisila lino  Mose wamulenga ukuti atacita vivyo.​—Kufu. 32:9-14.

9. Ukulingana ni lembelo lya Ayebulai 11:​27, ucuza wakwe Mose na Yeova wali uli?

⁹ Pa cisila ca kufumya Aina Izlaeli umu uzya, ucuza wakwe Mose na Yeova wakomileko cali kwati walolanga Isi wa kwi yulu. (Welengini Ayebulai 11:27.) Pa kulangilila vino ucuza uwo wakomile, Baibo ikati: “[Yeova] wavwanganga na Mose manso na manso wakwe vino umuntu wensi akavwanga na cuza wakwe.”​—Kufu. 33:11.

10. I vyani vino tulinzile ukucita pakuti tumanye Yeova ningo?

¹⁰ I vyani vino tukusambililako? Pakuti tumanye Yeova ningo tutalinzile sile ukusambilila pa miyele yakwe lelo tulinzile nu kulacita ukulonda kwakwe. Yeova akalonda “umuntu wensi kuti atuulwe nu kumanya cumi.” (1 Tim. 2:​3, 4) Inzila yonga ino tungacitilamo ukulonda kwakwe Leza u kusambilizya yauze pali aliwe.

11. Lino tukusambilizya yauze pali Yeova, tukamumanya uli ningo?

¹¹ Ilingi lino tukusambilizya yauze pali Yeova alino tukamumanyilako sana. Tukalola ukuti Yeova wakwata icikuuku nga watutungulula ku antu akulonda ukuya ya cuza yakwe. (Yoa. 6:44; Mili. 13:48) Tukalola vino Izwi Lyakwe Leza Baibo lyakwata amaka, pano likaazwa antu yano tukasambilila nayo ukuta ukuya ni miyele iipe nu kutandika kuya ni miyele isuma. (Kolo. 3:​9, 10) Nupya tukalola vino Leza wateekelela antu yano tukasimikila pano akatutuma ukuswilila imiku ni miku ku antu yayo pakuti tuyazwe ukumumanya nu kupusuka.​—⁠Loma 10:​13-15.

12. Wakwe vino ilembelo lya Kufuma 33:13 likalanda, i vyani vino Mose walenzile Yeova nupya u mulandu ci?

¹² Mose wacindike sana ucuza wakwe na Yeova. Yeova waomvizye Mose ukuomba imilimo iingi ikulu nupya iya maka, fwandi Mose wamanyile Yeova ningo nomba nanti ciye vivyo walenzile Yeova ukuti amazwe ukumumanya ningo. (Welengini Kufuma 33:13.) Lino Mose walenzile vivyo, wali ni myaka ukucila pali 80 nomba nanti ciye vivyo wamanyile ukuti wakweti ivingi ivya kusambilila pali Isi uwa kwi yulu.

13. Iinzila ci yonga ino tungalangilamo ukuti twacindika ucuza witu na Leza?

¹³ I vyani vino tukusambililako? Asi mulandu ni myaka uwingi ino twaombela Yeova, tulinzile ukucindika ucuza witu na aliwe. Inzila yonga ino tungalangilamo ukuti twacindika ucuza witu na Leza u kulapepa kuli aliwe lyonsi.

14. U mulandu ci uno ipepo lyacindamila pakuti tusambilile pali Leza?

¹⁴ Ndi cakuti tukulonda umwi ukuya cuza witu mupalamisye, tulinzile kulalanzyanya nawe insita izingi. Fwandi mwapepa kuli Leza insita izingi nupya mutauvwa intete kumunena vyonsi vino mukwelenganya na vino mukuyuvwa. (Efes. 6:18) Ya Krista aakaikala ku Turkey, yalanzile iyati: “Kutemwa kuno natemwa Yeova kukaya kukukulilako lyonsi lino nkupepa kuli aliwe nu kulola vino akangazwa nupya nkamutaila sana. Kulola vino Yeova akaasuka mapepo yane, kwangazwa ukulola Yeova ukuti a Tata nupya a Cuza wane.”

15. I vyani vino Yeova walanzile pa Mwene Davidi?

¹⁵ Umwene Davidi wavyalilwe umu luko ulwapepanga Yeova Leza. Nomba Davidi atapepanga Yeova pa mulandu wakuti ulupwa lwakwe avino lwacitanga. Waipangiile ucuza wakwe na Leza, nupya cico calenzile Yeova amutemwe sana. Yeova umwineco  walanzile pali Davidi ukuti, “ali muntu wino umwenzo wane watemwa.” (Mili. 13:22) Uzye Davidi wacisile uli pakuti aye cuza wakwe Yeova?

16. I vyani vino Davidi wasambililanga pali Yeova nga walola vino waumba?

¹⁶ Davidi wasambilile pali Yeova kuli vino waumba. Lino Davidi wali umwance, wasumbanga sana insita ikulu mu mpanga ala akusakamala imfwele zyakwe isi. Afwile ali lino watandike ukwelenganya pa vintu vino Yeova waumba. Lino Davidi walola umwi yulu usiku atalolanga sile ntanda, lelo walolanga ni imiyele yakwe Wino uwaziumvile. Calenzile Davidi alembe ukuti: “Amayulu yakalanda apa lulumbi lwakwe Leza, ulwelele lukaalazya apa lwalala vicitwa vya minwe yakwe!” (Masa. 19:1, 2) Ndi cakuti Davidi welenganya pali vino antu yaumbwa, walolanga amano yano Yeova wakwata. (Masa. 139:14) Lino Davidi welenganya pa vintu vino Yeova waumba, wilukanga ukuti wali u munono sana ngu kuilinganya kuli Yeova.​—Masa. 139:6.

17. I vyani vino tungasambilila nga tukwelenganya pa uumbo?

¹⁷ I vyani vino tukusambililako? Mwaika mano uku viumbwa. Mwasumba insita ikulu ukulola insi ii ino Yeova waumba nu kuzunguka pali vino yapangwa. Cila wanda, mwaelenganya pali vino iviumbwa ivyaya kuno mwikala ivili wa vilimwa, inyama na antu vikamusambilizya pali Yeova. Lyene cila wanda mulasambilila ivingi pali Tata winu uwaya nu kutemwa. (Loma 1:20) Nupya cila wanda mulalola vino ukutemwa kwinu kuli aliwe kulaya kukukulilako.

18. Wakwe vino Masamu 18 ikalanda, i vyani vino Davidi wilwike?

¹⁸ Davidi wamanyile ukuti Yeova wamwazwanga. Lino Davidi wacingilile imfwele zyakwe isi kuli cisama na kuli bere, wamanyile ukuti a Yeova uwamwazwilizye ukucimvya ivilyanyi vivi ivya maka. Lino Davidi wacimvizye Golyati ipombolo, waweni ukuti a Yeova uwamutungululanga. (1 Sam. 17:37) Nupya lino Davidi utwike Umwene Saulo, wilwike ukuti a Yeova uwamupuswisye. (Masa. 18, utumazwi twa papela) Ndi cakuti Davidi wali sana ni cilumba nga welenginye ukuti wacitanga vyonsi vivyo uku maka yakwe. Nomba Davidi waicefizye, fwandi wamanyile ukuti Yeova u wamwazwanga.​—Masa. 138:6.

19. I vyani vino tukusambilila kuli Davidi?

¹⁹ I vyani vino tukusambililako? Kuli na vyuze vino tulinzile ukucita ukucila ukulenga sile ukuti Yeova atwazwe. Tulinzile nu kumanya insita ino akatwazwilapo na vino akacita pa kutwazwa. Ndi cakuti twaicefya, tulamanya ukuti tutange tucite vyonsi uku maka itu nu kuti Yeova aliwe akatwazwa ukucita vino tutange tukwanisye. Nupya lyonsi lino twalola ukuti Yeova watwazwa, ucuza witu na aliwe ukakomelako. Umwina Isaac uwa ku Fiji uwaombela Yeova pa myaka iingi, wazana ukuti vii i vya cumi. Watiile: “Nga nalola vino umi wane waya ukufuma uku cisila, nkalola vino Yeova wangazwilizya ukufuma pano natandikile ukusambilila Baibo ukufika na ndakai. Na cico calenga nalola Yeova ukuti u wa cumi cumi.”

20. I vyani vino tungasambilila pali ucuza wakwe Davidi na Leza?

²⁰ Davidi wakolanyanga imiyele yakwe Yeova. Yeova watuumvile na maka ya kukolanya imiyele yakwe. (Utan. 1:26) Ndi cakuti tukusambilila sana pa miyele yakwe Yeova, tulamukolanya sana. Davidi wamanyile ningo Isi  uwa kwi yulu, fwandi wamukolanyanga sana lino ali na antu yauze. Elenganyini pi lyasi lii lyonga. Davidi wayembukiile Yeova lino wacisile ucende na Batisyeba nu kukoma iya. (2 Sam. 11:​1-4, 15) Nomba Yeova wasoolwilepo ukuvwila Davidi uluse, pano nawe uvwilanga yauze uluse. Pa mulandu wakuti Davidi wakweti ucuza wa musango uwo na Yeova, wali pa ene yano Aina Izlaeli yatemilwe sana nupya Yeova wamuomvyanga uku kusambilizizyako aene yauze amu Izlaeli.​—1 Yamw. 15:11; 2 Yamw. 14:1-3.

21. Ukulingana ni lembelo lyakwe Efeso 4:24 na 5:​1, i vyani vilacitika ndi cakuti tukukolanya Leza?

²¹ I vyani vino tukusambililako? Tulinzile ‘ukukolanya’ Leza. Ukucita vivyo kutalalenga sile ukuti ivintu vituzipile lelo kulalenga tumumanye ningo. Ndi cakuti tukukolanya imiyele yakwe tulalanga ukuti sweswe yana yakwe.​—Welengini Efeso 4:24; 5:1.

22-23. I vyani vilacitika ndi cakuti tukuomvya vino tukusambilila pali Yeova?

²² Wakwe vino itulola, tungasambilila pali Yeova ukupitila umu uumbo nu mwi Izwi lyakwe, Baibo. Muli Baibo mwaya amalyasi aakalanda pa ya omvi yakwe Leza yano tungakolanya aali wakwe Mose na Davidi. Yeova waomba umulimo wakwe. Casyalila lyene sweswe ukusambilila sana pali aliwe.

²³ Tutalatala tute ukusambilila pali Yeova. (Kasa. 3:11) Icintu icicindame asi vintu wingi vino twamanya pali aliwe, lelo avino tukacita pali vino twamanya. Ndi cakuti tukuomvya vino tukusambilila nu kukolanya Tata witu uwaya nu kutemwa, tulatwalilila ukupalama kuli aliwe. (Yako. 4:⁠8) Ukupitila umwi Izwi lyakwe, akatupeela usininkizyo wakuti atalatala atazyele yonsi akalonda ukumumanya.