Awe foo, muli Baibo nanti mu mabuku aakalanda pa vyampiti mutaya pano tukabelenga ukuti Aina Klistu yabatiziwilwanga antu afwe.

Vino icikomo cii casenulwa umu Mabaibo aingi cikalenga antu yaelenganya ukuti Aina Klistu ya kutandikilako yabatiziwilwanga antu afwe. Mabaibo yamwi yakalanda ukuti: “Vino yamwi yakalanda ukuti afwe yasizyukuka, uzye pacani cino antu yaya yakawatiziwilwa afwe?”

Nomba, uvwini vino yamwi yaili asambilila pali Baibo yalanzile. Dr. Gregory Lockwood walanzile ukuti “kutaya usininkizyo muli Baibo nanti umu mabuku aakalanda pa vyampiti uwakuti antu yabatiziwilwanga afwe.” Vikwene avino uwasambilila pa upangano upya Gordon D. Fee walemvile ukuti: “Kutaya usininkizyo uli onsi umu Baibo ukalanda pa kubatiziwa kwa musango uu. Upangano upya utalandapo ivili vyonsi api lyasi lii nupya kutaya usininkizyo wakuti Aina Klistu ya kutandikilapo nanti amacalici atandike ukupangwa pa cisila ca mfwa ya atumwa yabatiziwilwanga afwe.”

Baibo ikalanda ukuti alondezi yakwe Yesu yali nu kulaomba umulimo wa kulenga ‘antu amu nko zyonsi kuya alondezi, kulayabatizya . . . , nu kuyasambilizya kucita vyonsi’ vino wayanenyile. (Mate. 28:19, 20) Lino umuntu atatala waya umusambi umubatiziwe, walinzile ukusambilila, ukutaila, nu kulauvwila Yeova nu Mwanakwe. Umuntu uwafwile mpiti ataali nu kucita vivyo nanti Umwina Klistu uwali nu umi ataali nu kumucitila vivyo.—Kasa. 9:5, 10; Yoa. 4:1; 1 Kol. 1:14-16.

I vyani fwandi vino Paulo walandangapo?

Aina Kolinto yamwi yalandanga ukuti afwe yatalatuutuluka. (1 Kol. 15:12) U mu nzila ci muno Paulo wayalangilile ukuti vino yelenganyanga vitali ningo? Walanzile ukuti ‘cila wanda nemo nalolenkananga ni mfwa.’ Lelo wali nu umi. Walanzile nu kuti cila wanda wayanga umu uzanzo wa kufwa, nomba wakweti upaalilo wakuti nga wafwa alatuutulukila kwi yulu wakwe vino Yesu watuutulwile.—1 Kol. 15:30-32, 42-44.

Aina Kolinto yalinzile ukumanya ukuti ukuya Umwina Klistu umupakwe kwapiliulanga ukuti yali nu kulakwata intazi cila wanda nu kufwa lino yatatala yatuutululwa. Fwandi lino ‘yawatiziwa muli Klistu Yesu, ala yawatiziwa nu mu mfwa yakwe kwene.’ (Loma 6:3) Cii cikapiliula ukuti wakwe vivi kwene vino cali kuli Yesu, nayo kwene yali nu kupita umu ntazi izingi nu kufwa alino yace yatuutulwilwe ukwi yulu.

Ukucila pa myaka iili ukufuma pano Yesu wabatiziwilwe umu manzi, wanenyile alondezi yakwe yaili ukuti: “Mulawatiziwa uluwatizyo luno nkuwatiziwa” (Mako 10:38, 39, NWT.) Yesu atalandanga pa kubatiziwa mu manzi. Walozyanga mu kuti ukutwalilila ukuya uwa cisinka kuli Leza kwali nu kulenga ukuti afwe. Paulo walemvile ukuti apakwe yali nu ‘kucula pamwi na Klistu pakuti yakakumeko nu ku lulumbi lwakwe kwene.’ (Loma 8:16, 17; 2 Kol. 4:17) Fwandi nayo kwene yali nu kufwa nu kwiza tuutulukila ukwi yulu.

Fwandi lyene, tunguvwikisya vino Paulo walanzile ukuti: “Uzye lyene tumati uli pali yano akawatiziwilwa afwe? Uzye yene yakupaalila kucita cani? Ndi cakuti cili icacumi, wakwe vino yamwi yakalanda ukuti afwe yasizyukuka, uzye pacani cino antu yaya yakawatiziwilwa afwe?”