Uzye mwabelenga ningo ya magazini afumile uno mwaka aa Lupungu Lwa Mulinzi? Lolini vino mungasuka amauzyo aali apisika:

Uusininkizyo ci uwaya pali Yakobo 5:11 uukalangilila ukuti Yeova “waya sana nu kutemwa” nu “luse”?

Twamanya ukuti Yeova wakwatisya uluse nupya akalonda ukutwelela imembu zitu. Pali Yakobo 5:11 pakalanda nu kuti Yeova akaitemelwa ukutwazwa. Tulinzile ukulamukolanya.—w21.01, ifwa 21.

U mulandu ci uno Yeova wapeelileko yamwi amaka?

Wacisile vivyo pa mulandu wakuti waya nu kutemwa. Utunguluzi ukalenga ukuti ulupwa lwakwe Yeova lwaomba ningo ukwaula icimvulunganya. Cila muntu umu lupwa aakalondela utunguluzi uu akamanya alinzile ukupungulapo pa vintu nu kuya pa nkoleelo ukucita vivyo kwene.—w21.02, ifwa 3.

U mulandu ci uno Aina Klistu yalinzile ukucenjelela lino yakuomvya inzila zyakutumilapo nu kupokelela mameseji?

Ndi cakuti umwi wasololapo ukuomvya mapuloglamu aakutumilapo mameseji alinzile ukusolola ningo ivyuza. Cingatala sana ndi cakuti twaya umu maumba aakalamba akulanzyanyizizyamo. (1 Tim. 5:13) Mwaya amazanzo umu kusalanganya malyasi atasininkiziwe nanti ukuomvya ivyeo vyakwe ya Nte pa kupanga impiya.—w21.03, ifwa 31.

I milandu ci imwi iyalenzile ukuti Leza azumilizye Yesu ukucuula nu kufwa?

Umulandu onga uno Yesu wali nu kupopelwa pa cimuti, u wakuti wali nu kukulula Ayuda ukufuma uku citipu. (Gala. 3:10, 13) Umulandu wakwe ciili uwakuti Yeova wasambilizyanga Yesu ivyakwizaombanga nga waya Simapepo Mukulu. Umulandu wakwe citatu uwakuti vino Yesu watwalilile ukuya uwa cisinka ukufika nu ku mfwa walangilile ukuti na antunze kwene yangatwalilila ukuya na ucisinka asi mulandu yakweziwa. (Yobo 1:9-11)—w21.04, mafwa 16-17.

Uzye mungacita uli nga cikumutalila ukuzana antu umu mulimo wa kusimikila?

Mwaezya ukuya pa nsita ino yakazanwa sana pa mang’anda. Mwaezya ukusimikila mu vifulo ivipusanepusane. Mwaezya inzila izipusanepusane zya kulanzyanyizizyamo na antu, wakwe ukulemba makalata.—w21.05, mafwa 15-16.

Uzye umutumwa Paulo walozizye mwi lino walanzile ukuti: “Nafwile pa mulandu wa kulondela masunde”? (Gala. 2:19, NWT.)

Masunde Yakwe Mose yazwile antu aatamalilika nu kutungulula aina Izlaeli kuli Klistu. (Gala. 3:19, 24) Nupya masunde kwene ya yalenzile Paulo azumile Klistu. Fwandi Paulo “wafwile pa mulandu wa kulondela masunde” nupya masunde yatakweti amaka pali aliwe.—w21.06, ifwa 31.

Uzye Yeova watulangilila uli ukuti akazizimizya?

Yeova akazizimizya umuzewanya uno yaleeta api zina lyakwe, aingi yakakana Leza na ukateeka wakwe, vino anakwe yamwi yamupondokiile, ufi uno Ciwa watwalilila ukubepa, kucuula kuno aomvi yakwe yano watemwa yakacuula, kufwilwa ya cuza yakwe, vino antu aipe yakacuzya auze na vino antu yakonona insi ino wapanzile.—w21.07, mafwa 9-12.

Uzye vino Jozefu wacisile vikatusambilizya cani pa kuya ateekele?

Wazizimizye kucuziwa ukufuma uku ina yakwe. Na ci calenzile ukuti yamubepezye nu kumwika mu cifungo mu Ejipti pa myaka iingi.—w21.08, ifwa 12.

U kusunkanya ci ukwalondololwa pali Hagai 2:6-9, 20-22?

Amu nko aingi yakakana ukuvwa ukwi lyasi lisuma ilya Wene, lelo antu aingi yasambilila icumi. Likwene sile inko zilasunkanyiziwa lino zilononwa.—w21.09, mafwa 15-19.

U mulandu ci uno tutalinzile ukutovookela lino tukuomba umulimo wa kusimikila?

Yeova akatemwa nga walola vino tukuombesya. Nga tusikutovooka tulaya nu umi wa manda pe.—w21.10, mafwa 25-26.

Uzye Aina Levi icipande 19 cingatwazwa uli ukuomvya ukusunda ukwaya pali 1 Pet. 1:15 ukwakuti: “Muye amuzilo muli vyonsi vino Mukucita”?

Amazwi yaa yaya pa Aina Levi 19:2. Mu Cipande 19 ca Ina Levi mwaya ivilangilo ivingi ivingatwazwa ukumanya vino tungaomvya ilembo lyakwe 1 Petulo 1:15 umu umi witu.—w21.12, mafwa 3-4.