Lino Yesu wali ukwi yulu wasambilile imiyele isuma iyalenzile ukuti aomba ningo lino akuombela pamwi na antu yauze pano nsi. I vyani vino tungasambilila kuli vino Yesu wacisile? Nga tukwelenganya pali vino Yesu wacitanga, tungamanya ivisinte vitatu ivingatwazwa ukulaomba ningo lino tukuombela pamwi na yauze. Ivisinte vii vilatwazwa ukuya alemane sana na ina na ya nkazi.

Umuntu akaomba ningo lino aakuombela pamwi na auze akaya umuicefye, nupya asiilola ukuti wacindama ukucila yano akaomba nayo. Yesu wasambilile ukuya umuicefye kuli Isi. Nanti icakuti Yeova aliwe uwalinga ukwamwa ukuti Kaumba, walondanga yauze ukumanya imilimo ino Umwanakwe waomba. Tukasininkizya nga twalola amazwi yano Leza walanzile akuti: “Katuumbe umuntu mu cata citu.” (Utan. 1:26) Lino Yeova walanzile amazwi yaa, Yesu wamanyile ukuti Yeova waicefya.—Masa. 18:35.

Lino Yesu wali pano nsi, wali u muceifye. Lino antu yamutaizyanga pali vino wacitanga, walenganga ululumbi ukuya kuli Leza. (Mako 10:17, 18; Yoa. 7:15, 16) Yesu waombelanga pamwi na asambi yakwe umu mutende nupya atayalolanga ukuti aazya lelo wayalolanga ukuti aa cuza yakwe. (Yoa. 15:15) Wayafuzile ni ingazo pakuti ayasambilizye  ukuya aicefye. (Yoa. 13:5, 12-14) Naswe kwene tulinzile ukulakolezya vino yano tukaomba nayo yakulonda ukucila vino tukulonda. Ndi cakuti tukucindikana nu kukanalonda ukupokelela umucinzi, tungaomba imilimo iingi.—Loma 12:10.

Umuntu umuicefye akamanya ukuti ‘ukwavula yampandamano kwene amapange yakafikiliziwa.’ (Mapi. 15:22) Asi mulandu ni milimo ino twamanya, tulinzile ukulaiusya ukuti kusi umuntu uwamanya vyonsi. Na Yesu kwene wamanyile ukuti kwali ivintu vimwi vino ataamanyile. (Mate. 24:36) Nupya wisileko sana mano kuli vino asambi yakwe aatali amalilike yamanyile na vino yelenganyanga. (Mate. 16:13-16) Ali mulandu uno yano waombelanga pamwi nayo yayuvwanga ningo sana ukuya pamwi nawe. Naswe kwene nga tukwiusya ukuti tutamanya vintu vyonsi nupya tukukutika na kuli vino yauze yakutupandako mano, tulalenga kuye umutende nupya imilimo iingi ilaombwa.

Cacindama sana kuli ya eluda ukukolanya Yesu lino yakuombela pamwi. Yalinzile ukulaiusya ukuti umupasi wa muzilo ungazwa eluda aliwensi ukulanda ivyeo ivingazwa ya eluda yonsi ukupingulapo ningo pali vimwi. Ndi cakuti lino ya eluda iyakomenkana ku kulanzyanya pali vimwi yakulenga cila muntu ukulanda vino akwelenganya, cingalenga yapingulepo ivingazwa yonsi umu cilongano.

Umuntu aakaomba ningo lino akuombela pamwi na auze asiumilila sile pa cintu conga. Akaitemelwa ukusenuka nu kuvwa kuli vino yauze yakulanda. Insita izingi Yesu wailolelanga vino Isi atikanga amano kuli vino walondanga umwineco. Wakwe, Yeova wamutumile ukwizapususya antunze uku luyembu ni mfwa vino yapyanyile.—Yoa. 3:16.

Yesu wasenukanga nga calondekwa. Iusyini vino wavwile umwanaci umwina Fonisya nanti icakuti watumilwe uku kwazwa aina Izlaeli. (Mate. 15:22-28) Nupya atalondanga asambi ukulacita vino yatange yakwanisye. Lino Petulo wakanyile Yesu pa cintuwingi, Yesu wamwelezile. Na pa cisila Yesu wizile apeela Petulo imilimo icindame. (Luka 22:32; Yoa. 21:17; Mili. 2:14; 8:14-17; 10:44, 45) Vino Yesu wacisile vikatulangilila ukuti tutalinzile ‘ukumilila sile pali vino tukwelenganya.’—Filipi 4:5.

 Ukukanaika sile mano kuli vino tukulonda kulatwazwa ukulaombela pamwi na antu yonsi umu mutende. Yesu wacitilanga antu yano wazanwanga nayo ivisuma icakuti alwani yakwe yatandike nu kumupeela imilandu ukuti “a cuza wakwe ya kasonkisya ya misonko na ayembu” auvwanga kuli vino wasimikilanga. (Mate. 11:19) Uzye naswe tungaombela pamwi na antu yauze wakwe vino Yesu wacitanga? Umwina Louis uwaomba na antu apusanepusane umu mulimo wa kutandalila ivilongano na pa Betele watiile: “Nkakolanya cila umba lino naomba nalyo uku ciumba icakuulilwa na mawe apusanepusane. Ndi cakuti mukuteeka ningo amawe lino mukukuula, mungakuula iciumba icololoke. Nani kwene nkaezya ukusenuka pakuti nazwilizyeko ukukuula iciumba icololoke.” Umwina wii wali ni miyele isuma sana.

A muli vyani mumwi muno tungalangila ukuti tusiika sile mano kuli vino tukalonda lino tukuombela pamwi na amu cilongano citu? Tungalangilila vivyo lino itukomaana ni umba litu ukuya umu mulimo wa kusimikila. Limwi tungaombela pamwi na ya kasimila akwata indupwa nanti amisinku ipusanepusane. Tungasenulako imiombele itu nanti ukuitemelwa ukuomvya inzila zya misimikilile zino yangatemwa pakuti yaipakizya umulimo wa kusimikila.

Kaomba musuma akaipekanya “ukupeelako yauze.” (1 Tim. 6:18) Lino Yesu waombelanga pamwi na Isi, afwile walolanga ukuti Yeova atafisanga ivintu. Lino Yeova wapanganga iyulu, Yesu akuno wali nupya wasambililangako kuli aliwe. (Mapi. 8:27) Lyene lino Yesu wizile pano nsi, wanenyile asambi yakwe vyonsi vino uvwile kuli Isi. (Yoa. 15:15) Tungakolanya Yeova nga tukunenako aina na ya nkazi vino twasambilila. Umuntu aakaombela pamwi na yauze asikana ukunena yauze vino yalinzile ukumanya nanti ivingayazwa pakuti sile asungilile maka yano wakwata autunguluzi. Akaya ni nsansa lino akunenako yauze ivintu ivisuma vino wasambilila.

Nupya tungakomelezyako yauze. Uzye tusiuvwa ningo ndi cakuti umwi walola vino tukuombesya nu kututaizya? Yesu wanenanga ya kaomba yauze ivisuma vino walolanga muli aliyo. (Loliniko na Mateo 25:19-23; Luka 10:17-20.) Wayanenyile nu kuti yali nu kuomba imilimo “kucila pa milimo” ino waombanga. (Yoa. 14:12) Usiku pa wanda wa kusyalikizyako, wanenyile atumwa yakwe acisinka ati: “Mwemwe mwatwalilila ukuya nani umu mezyo yane.” (Luka 22:28) Elenganyini pali vino yakomeleziwe icakuti yalondesyanga nu kutwalilila ukulaomba umulimo. Ndi cakuti naswe tukutaizya yauze, yalaya ni nsansa na cico cilalenga yalunduluke.

Umwina Kayode walanzile ati: “Umuntu aakaombela ningo pamwi na yauze atalinzile ukuya umumalilike, lelo akalenga yauze ukuya ni nsansa nu kulenga umulimo ukwanguka.” Uzye namwe a vino mukacita nga mukuombela pamwi na antu yauze? Limwi munguzyako aina na ya nkazi ukuti yamunene vino mukaomba. Ndi cakuti yakaipakizya ukuomba namwe wakwe vino asambi yakwe Yesu yaipakizyanga ukuomba nawe, mungalanda wakwe vino umutumwa Paulo walanzile lino watiile: “Sweswe yaomvi yauzo aakamulenga ukuya ni nsansa.”—2 Kol. 1:24.