Uzye mwabelenga ningo ya magazini afumile uno mwaka aa Lupungu Lwa Mulinzi? Lolini vino mungasuka amauzyo aali apisika:

Uzye cikapiliula cani “ukusenula imyelenganyizizye inu”? (Loma 12:2)

Cisikupiliula ukuti tulinzile twacita ningo umu vintu sile ivinono. Lelo tulinzile ukwelenganya pali vino twaya nu kusenuka pakuti twaezya na maka ukuvwila masunde yakwe Leza.—w23.01, pa mafwa 8-9.

I vyani vino tutalinzile ukucita, nupya i vyani vino tungacita lino tukulola ivintu ivikucitika umu nsi?

Tukaika mano ukukulola kuno ivintu ivikucitika umu nsi vikufikilizya usesemo wa muli Baibo. Lelo ukucila ukulatunganya, ukungalenga ukuti tutaya alemane, tukalanda ivintu ukulingana na vino impapulo zitu zikalanda. (1 Kol. 1:10)—w23.02, apifwa 16.

Uzye ulubatizyo lwakwe Yesu lwapusana uli nu lubatizyo lwa yalondezi yakwe?

Yesu wavyalilwe umu luko ulwaipeezile mpiti kuli Leza, fwandi atalondekwanga ukuipeela kuli Yeova. Wali umumalilike nupya atali umuyembu. Yesu atalondekwanga ukulapila uku membu.—w23.03, apifwa 5.

Tungaazwa uli yauze ukulaasukapo pa kulongana?

Tungaasuka ivyasuko iviipi pakuti na yauze yangasukapo. Tutalinzile nu kulaasuka ivisinka ivingi. Nga twacita vii yauze yalakwata ivya kwasukapo.—w23.04, apifwa 23.

Uzye “Umuseo wakutungulula kuli Umuzilo” uwaya pali Ezaya 35:8 ukaimililako cani?

Umu manda a Yayuda, umuseo uu uwaunkolanya wimililangako umuseo uno Ayuda yali nu kupitamo ukufuma uku Babiloni ukuswilila uku ncende ya kumwao. Nga pali ndakai pene ukaimililako cani? Imyaka iingi uku cisila lino umwaka wa 1919 utatala wafika, umulimo wa kupekanya umuseo watandiike, yatandiike ukusenula nu ukupulinta Mabaibo alino ni mpapulo zyuze. Antu yakwe Leza yatwalilila ukupita “Umuseo wakutungulula kuli Umuzilo” uukalenga yaye muli paladaise wa unkolanya muno yakaipakizya amapaalo amu Wene wakwe Leza.—w23.05, pa mafwa 15-19.

U kusunda ci ukwaya pa Mapinda icipande 9 ukulozya uku anaci yaili aunkolanya?

Ibuku lya Mapinda lyalanda apa mwanaci iciwelewele wino ulwamo lwakwe lukatwala “ku mfwa” alino nu mwanaci wa “mano,” wino ulwamo lwakwe lukatwala “umu nzila zya kwiluka” alino nu ku umi. (Mapi. 9:​1, 6, 13, 18)—w23.06, pa mafwa 22-24.

Uzye Leza walangilile uli ukuti waicefya nupya asiumilila pali vino akwelenganya lino walanzyanyanga na Loti?

Yeova wanenyile Loti ukufuma umu Sodoma nu kuutukila uku ncende ya myamba. Lelo lino Loti wapapasile ukuti autukile uku mpanga ya Zoali, Leza wamuzumilizye.—w23.07, apifwa 21.

Uzye umuci angacita uli ndi cakuti iya akutamba ivikope vya uzelele?

Alinzile ukulaiusya ukuti asi aliwe atalenga ukuti iya acita vivyo. Alinzile ukwika mano kuli ucuza wakwe na Leza nu kwelenganya pa malyasi amuli Baibo aakalanda pa anaci yano Leza wateekizye. Nupya angazwa iya ukutaluka uku vintu ivingalenga ataamba ivikope vya uzelele.— w23.08, apa mafwa 14-17.

Uzye ukwiluka kungatwazwa uli ukwasuka umu ufuuke lino yamwi yatuuzya pali vino twazumilamo?

Ukucila ukulaelenganya ukuti yakutwezya, tulinzile ukulola iuzyo lilyo ngi syuko ilyakumanya vino yacindika umu umi. Kucita vii kulatwazwa ukuya afuuke lino tukwasuka.— w23.09, apifwa 17.

I vyani vino tungasambilila kuli Maliya pali vino yamukomeliizye?

Lino Maliya wamanyile ukuti wali nu kukwata umwana uwali nu kuya Mesiya, walenzile uwazwilizyo kuli yauze. Malaika Gabilieli na Elizabeti yakomeliizye Maliya ukufuma umu Malembo. Naswe kwene yakapepa yanji yangatukomelezya.—w23.10, pifwa 15.

Uzye Yeova akaasuka uli mapepa itu?

Yeova walaya ukwasuka mapepo itu ndi cakuti yakulingana nu kulonda kwakwe. (Yele. 29:12) Angasuka mapepo itu umu nzila izipusane pusane, lelo lyonsi kwene alatwazwa.—w23.11, pa mafwa 21-22.

Pali Loma 5:2 pa kalanda pa “upaalilo,” nomba u mulandu ci uno icikomo 4 calanda nupya pa upaalilo?

Ndi cakuti umwi uvwa api lyasi lisuma, akakwata upaalilo uwakwizaipakizya umi umu paladaise pano nsi. Lelo ndi cakuti wakwata intazi, wazizimizya, nu kulola vino Leza wamutemwa, upaalilo wakwe ukakomelako nupya ukaya uwa cumi cumi kuli aliwe.—w23.12, pa mafwa 12-13.