Umutumwa Paulo walembiile Timoti eluda muze ukuti: “Nkukukonkomezya pa manso yakwe Leza na Klistu Yesu na pali ya malaika asoololwa ukuti uwalondela ivintu vii ukwaula ulupato nanti akapaatulula.”—1 Tim. 5:21.

Pakuti tumanye ningo ya malaika yaa, tumatandikila ukulanda pali ya malaika aatalinzile ukuya umwi umba lii. Umu cumi ya malaika yaa yatalinzile ukuya umwi iumba lyakwe ya 144,000. Lino Paulo walembiile Timoti kalata, ala kutatala kwaya apakwe aatutululwa ukuya ukwi yulu. Pa nsita iya ala atumwa alino na yauze apakwe yatatala yaya iviumbwa vya kwi yulu, fwandi tungati “ya malaika asoololwa” yasilozya kuli ya 144,000.—1 Kol. 15:​50-54; 1 Tesa. 4:​13-17; 1 Yoa. 3:2.

Nupya, “ya malaika asoololwa” asi yaya afizilwe ukutwalilila ukuya ni cuvwila lino kwali Mulamba Mukalamba. Ya malaika yaya yalondiile Satana nupya izile iyaya iviwa nupya alwani yakwe Yesu. (Utan. 6:2; Luka 8:​30, 31; 2 Pet. 2:4) Uku nkoleelo, Yesu alayasumbila umu ciwina muno yalaya pa myaka 1,000. Pa cisila yalononwa pamwi na Satana.—Yuda 6; Kuso. 20:​1-3, 10.

“Ya malaika asoololwa” yano Paulo walanzilepo yafwile a yaya aali ukwi yulu aatwalilile ukutungilila “Leza na Klistu Yesu.”

Kwaya ya malaika aingi sana aaya na ucisinka. (Aeb. 12:​22, 23) Cikaloleka kwati Yeova atapeela ya malaika umulimo uli umwi. (Kuso. 14:​17, 18) Iusyini ukuti pa nsita imwi malaika wenga yamupeezile umulimo uwa kukoma asilika Aina Asilya aali 185,000. (2 Yamw. 19:35) Ya malaika yamwi yafwile yapeelwa umulimo ‘uwa kukolonganika aakalenga antu yauze ukuluvyanya kumwi na ya kacita ya viipe nu ku yafumya mu Wene wakwe.’ (Mate. 13:​39-41) Yauze yafwile yapeelwa umulimo ‘uwa kukolonganika asoololwe’ ukwi yulu. (Mate. 24:31) Nupya yauze yene yapeelwa umulimo uwa kutucingilila konsi kuno tuli.—Masa. 91:11; Mate. 18:10; Loliniko na Mateo 4:11; Luka 22:43.

“Ya malaika asoololwa” aalumbulwa pali 1 Timoti 5:21 yafwile aa malaika aapeelwa umulimo uwa kusakamala ivilongano. Umu mazwi yano Paulo walanzile, walanzile pali vino ya eluda yalinzile ukulasakamala amu cilongano na pali vino amu cilongano yalinzile ukulacindika ya eluda. Paulo walanzile ukuti ya eluda yatalinzile ukuya nu “ulupato nanti akapaatulula” nu kuti yatalinzile ukulapingula pa vintu ukwaula ukwelenganyapo sana. Umulandu uno cacindamila ya eluda ukulondela ukusunda kwakwe Paulo apa mulandu wakuti yakaombela aina na ya nkazi “pa manso yakwe Leza na Klistu Yesu na pali ya malaika asoololwa.” Fwandi vii vikulangilila sile ukuti ya malaika yamwi yapeelwa umulimo uwa kwazwa icilongano, wakwe kucingilila, kutungulula umulimo wa kusimikila, alino nu kunena Yeova vino amu cilongano yakuomba.—Mate. 18:10; Kuso. 14:6