Uzye mwabelenga ivipande vyonsi ivili muli ya magazini a mwaka uu? Ndi cakuti mwabelenga, mungasuka mauzyo yaa alondelelapo:

Uzye Yeova watulangilila uli vino tulinzile ukulalola anaci?

Yeova ataaya na kapatulula uku yanaci, nupya asilola ukuti aonsi yacindama ukucila anaci. Leza akakutika kuli aliyo, nupya akaika mano kuli vino yakayuvwa na kuli vino vikayasakamika. Nupya wayataila ukuti yangakwanisya ukuomba umulimo wakwe.—w24.01, mafwa 15-16.

Uzye tungalondela uli mazwi aaya pali Efeso 5:​7, aakati: “Mutauvwana nayo”?

Umutumwa Paulo watucelwile ukuti tutalinzile ukulauvwana na antu aangalenga ukuti catutalila ukulondela masunde yakwe Leza. Antu yaa, yangaya antu yano tukazanwa nayo alino na yano tukalanzyanya nayo pa intaneti.—w24.03, mafwa 22-23.

A malyasi ci aufi yano tulinzile ukuicingililako?

Tulinzile ukucenjela uku malyasi yano tutamanyile kuno yafumilile yano aina na ya nkazi yangatutumila, ukuya acenjele ndi cakuti twapokelela ivyeo vimwi ivikulanda pa antu yakwe Yeova, alino nu kuya acenjele uku yasangu aangaloleka kwati yakulonda ukusambilila icumi.—w24.04, ifwa 12.

I vyani vino twamanya na vino tutamanya pali vino Yeova alapingula Umwene Solomoni, antu aafwile umu Sodoma na Gomola alino na aafwile kuli Mulamba Mukalamba?

Tutamanya ndi cakuti Yeova alonona antu yaa. Lelo twamanya ukuti aliwe wamanya ivisinka vyonsi pa yantu yaa nupya wakwatisya uluse.—w24.05, mafwa 3-4.

Uzye vino Leza yamukolanya uku “ciliwe” vikalenga tusininkizye vyani? (Malan. 32:4)

Yeova akatucingilila lino tuli ni ntazi. Atalatala atusye, lyonsi alatwalilila ukuyako nu kufikilizya vino watulaya. Nupya asisenuka, vino waya na vino akalonda ukucita visisenuka.—w24.06, mafwa. 26-28.

I vyani ivingamwazwa ndi cakuti mwakukila uku cilongano cuze?

Mwataila Yeova, alamwazwa wakwe vino wazwile aomvi yakwe uku cisila. Mutalinganya icilongano cino mwafumileko uku cilongano icipya. Mwaya apamviwe umu cilongano icipya, nupya mwaezya na maka ukupanga ivyuza ivipya.—w24.07, mafwa 26-28.

I vyani vino tukusambilila uku vilangililo vitatu ivikazanwa muli Mateo icipande 25?

Icilangililo ca mfwele ni mbuzi cikalanda sana pali vino tulinzile ukutwalilila ukuya acisinka. Icilangililo cakwe ya nacisungu aamano na aawelewele cikalanda pali vino tulinzile ukutwalilila ukuya aipekanye nupya apempuke. Lyene icilangililo ca matalanti cikalanda pa mulandu uno cacindamila ukutwalilila ukuombesya nu kuya acincile.—w24.09, mafwa 20-24.

Uzye umuputule wa kwingilila api tempele lino Solomoni wakuuzile watalimfile uli?

Ukulingana na 2 Milandu 3:​4, ivyalembwa vyampiti vimwi vikalanda ukuti umuputule wa kwingilila api tempele watalimfile mamita 53. Lelo ivyalembwa vyuze vikalanda ukuti watalimfile mamita 9. Ivyalembwa ivikalanda pa mamita 9 vikaloleka ukuti ivya cumi pano umuputule uu walingine nu kusaalala ukwi tempele.—w24.10, ifwa. 31.

Uzye cikapiliula cani umuomvi aakatumikila “ukukwata sile umuci wenga”? (1 Tim. 3:12)

Cikapiliula ukuti alinzile ukutwala sile mama wenga, nupya atalinzile ukulacita uzelele. Nupya atalinzile ukulalanga icintemwa uku yanaci yauze.—w24.11, ifwa 19.

U mulandu ci uno tungalandila kuti lino Yesu walanzile amazwi aaya pali Yoani 6:53 atalandanga pali vino cali nu kulaya apa kuzevya Icakulya Ca Manguzi Ica Mwene?

Yoani 6:53 ikalanda pa kulya umwili wakwe Yesu nu kumwa uwazi wakwe. Yesu walanzile amazwi yaa umu 32 C.E., umu Galili uku Yayuda aalondekwanga ukumutaila. Lelo, Yesu watandike Icakulya Ca Manguzi Ica Mwene umu Yelusalemu pa cisila ca mwaka onga ukufuma pano walandiile amazwi yaa. Pa Cakulya ca Manguzi Ica Mwene, Yesu walanzile kuli yano wali nu kuteeka nayo ukwi yulu.—w24.12, mafwa 10-11.