1. U mulandu ci uno umutumwa Paulo wakomelezizye Aina Klistu Ayebulai ukulakomelezyanya “nu kuluta”?

U MULANDU ci uno tukaezezya na maka ukukomelezya yauze? Umutumwa Paulo walanzile umulandu muli kalata wino walembiile Aina Klistu Ayebulai. Wayanenyile ati: “Lekini twasakamalana nu kwazwana nu kutemwa kucita visuma. Tutata kukongana pamwi kulingana nu mwata witu, ndi vino yamwi yakucita. Lelo lekini twakomelezyanya nu kuluta, pano mwati mulola ukuti uwanda wa mwene ukupalama piipi.” (Ayeb. 10:24, 25) Mu myaka sile 5 iyapisilepo, Aina Klistu aikalanga mu Yelusalemu yaweni ‘uwanda wakwe Yeova’ ukupalama nupya yaweni ni vilangililo vino Yesu wayapeezile ivyali nu kulenga yutuke nu kufuma mu musumba uuwa, pakuti yapususye ama umi yao. (Mili. 2:19, 20; Luka 21:20-22) Uwanda uuwa wakwe Yeova wafisile mu 70 C.E. lino aina Loma yononyile umusumba wa Yelusalemu wakwe viivi kwene vino Yeova wapingwile.

2. U mulandu ci uno tulinzile ukutwalilila ukukomelezyanya ndakai?

² Ndakai, twasininkizya ukuti ‘wanda ukulu wakwe Yeova uwakoofya sana’ watiupalama. (Yowe. 2:11) Kasema Zefaniya walanzile ati: ‘Uwanda ukulu wakwe Yeova uli mupiipi, watiupalama, ala pasi pakukalauka ukufika!’ (Zefa. 1:14) Usoowelo uuwa uwa kucelula ukaomba na ndakai kwene. Vino uwanda ukulu wakwe Yeova iupalama, Paulo watunena ukuti “twasakamalana nu kwazwana nu kutemwa kucita visuma.” (Ayeb. 10:24) Fwandi tulinzile ukutwalilila ukutemwa aina itu na ya nkazi, pakuti tungaayakomelezya pano calondekwa ukucita vivyo.

3. I vyani vino umutumwa Paulo walanzile pa kukomelezya? (Lolini cikope cakutandikilako.)

³ “Ukutwisika kwa muntu kwaya ngi cisendo cinyome mu mwenzo wakwe, lelo amazwi ya mutembo yene yakasansamusya.” (Mapi. 12:25) Amazwi yaa aacumi kuli swensi. Swensi kwene tukalondekwa ukukomeleziwa insita zimwi. Paulo walangilile ukuti nanti sile umuntu akakomelezya yauze nawe kwene akalondekwa ukukomeleziwa. Walembiile Aina Klistu aikalanga mu Loma ukuti: “Nkulondesya kumulola kuti tukize tukankane wila wa mupasi wa muzilo uno napokelela pakuti mukomeleke. Ntwazile mukuti utailo uno mukweti wakomya utailo wane, nani utailo uno nakwata wakomya utailo winu.” (Loma 1:11, 12) I cacumi Paulo uwakomelezyanga yauze nawe kwene walondekwanga uwa kumukomelezya.—Welengini Loma 15:30-32.

4, 5. Aaweni yano tungakomelezya ndakai, nupya u mulandu ci?

⁴ Tulinzile ukutaizya antu aakaikala umi wa kuipeelesya. Pali yaayo paya na ya painiya acisinka. Aingi yaipeelesya sana pakuti sile yakwate insita ya kuombako umulimo wa upainiya. Vikwene avino caya na kuli ya misyonali, aomvi ya pa Betele, aangalizi ya viputulwa na ya mama yao alino na yaaya aya pa maofesi yakwe yakasenula. Yonsi yaa yaipeelesya sana ukwangupazya umi pakuti sile yakwate insita ikulu iya kuombako umulimo wakwe Leza. Fwandi yakalondekwa ukukomeleziwa. Na yaya kwene aakuti yaomvileko umulimo wa nsita yonsi yano yacili yakalondesya ukuombako, nomba ivikacitika mu umi vikayacilikila, nayo kwene yakalondekwa ukukomeleziwa.

⁵ Aina na ya nkazi aatatwala nanti ukutwalwa pa mulandu wakuti yakalonda ukuvwila isunde lya kutwalila nanti ukutwalilwa sile ‘mu Mwene’ nayo yakalondekwa ukukomeleziwa. (1 Kol. 7:39) Avino na aci aakaombesya yakauvwa ningo ngi cakuti ya iya yayanena amazwi yakukomelezya. (Mapi. 31:28, 31) Nupya na Ina Klistu autailo aakazunyiwa nanti ukulwala yakalondekwa ukukomeleziwa. (2 Tesa. 1:3-5) Yeova na Klistu yakatekezya aomvi yonsi yaa aacisinka.—Welengini 2 Tesalonika 2:16, 17.

6. U mulimo ci uno ya eluda yakwata uwalondololwa pali Ezaya 32:1, 2 vyakwata?

⁶ Welengini Ezaya 32:1, 2. Yesu Klistu akaomvya ina apakwe ni “vilolo” ivya mu mfwele zyuze ukukomelezya nu kucingilila aakacuziwa nu kuvwa sana uyi mu nsita ii itale. Vikwene avino cifwile ukuya kuli ya eluda, asi “yangalizi” pa utailo wa yauze lelo yakaomba pakuti aina na ya nkazi yaye ni nsansa.—2 Kol. 1:24.

7, 8. Ukulunda pa kukomelezya, i vyani na vyuze vino ya eluda yangacitila yauze?

⁷ Umutumwa Paulo watulangilile ivya kucita. Walembiile Aina Klistu amu Tesalonika azunyiwanga ukuti: “Pa mulandu wa kumutemwa kuno twamutemwa, swemo twaiteinye  kumusakamala, cakuti twalondesyanga kupeela maumi itu kunomuli lilyo lino twakosozile ilandwe lisuma kunomuli. Mwemo mwali akundwe cuze kunotuli.”—1 Tesa. 2:8.

⁸ Pa kulanga ukuti asi amazwi ya kukomelezya yatupu akalondekwa pa kukomelezya umwi, Paulo wanenyile ya eluda ya mu Efeso ukuti: “Tungazwa atonte, ukwiusya mazwi ya Mwene Yesu yano wavwanzile umwisikulu ati, ‘Mukupeela mwaya upolelelo ukulu cuze kuluta mu kupokelela!’” (Mili. 20:35) Paulo waitemilwe ‘ukupeela ni nsansa vyonsi vino wakweti pamwi nu umi wakwe’ ku ina na ya nkazi asi ukuyakomelezya sile. (2 Kol. 12:15) Avino caya na kuli ya eluda, yatalinzile sile ukukomelezya nu kuteekezya aina kuomvya sile amazwi lelo yalinzile nu kuyalanga ukuti yayatemwa.—1 Kol. 14:3.

9. Uzye ya eluda yangacita uli pakuti yasunde yauze mu kukomelezya?

⁹ Mu kukomelezyanya mwaya nu kusunda umwi, nomba nalyo kwene ya eluda yalinzile ukulondela amazwi aya muli Baibo aakalanda pali vino yangasunda umwi mu nzila yakukomelezya. Yesu watulanzile ivya kusunda nu mucinzi lino watuutulwike. Wakweti amazwi ya kusunda ivilongano vimwi ivyali mu Asia Minor, nomba lolini vino wacisile pa kuyasunda. Lino atatala wasunda amu vilongano vya mu Efeso, Pegamu, na Tilatila watandikilepo ukuyataizya. (Umbw. 2:1-5, 12, 13, 18, 19) Wanenyile amu cilongano ca mu Lodesiya ukuti: “Nkanenola nu kuvunuka yonsi yano natemwa. Lyene ikako mano nu kuzenzuka.” (Umbw. 3:19) Fwandi ya eluda yangacita ningo sana ndi cakuti yakukolanya Yesu lino yakusunda yauze.

10. I vyani vino swensi tungacita pakuti twakomelezyanya?

¹⁰ Ukukomelezya yauze asi umulimo wakwe ya eluda yatupu. Paulo wakomelizye Aina Klistu yonsi ukuvwanga ‘mazwi akakuula nu kupeela  vikulondekwa, pakuti vino yakulanda viye ivyakwazwa’ yauze. (Efes. 4:29) Swensi kwene wenga na wenga tulinzile ukumanya vino yauze ‘yakulondekwa.’ Paulo wasunzile Aina Klistu Ayebulai ati: “Mukomye makasa inu atonte nupya mutaleka makokola inu yazakaza! Twalililini kupita umu nzila zyololoke, pakuti ingazo izikasinta zitalemala lelo zipoziwe.” (Ayeb. 12:12, 13) Swensi kwene, ukwikako na acance, tukakomelezyanya lilyo lino tukulanda amazwi aakukomelezya.

11. Uzye nkazi Marthe yamwazwile uli lino wakweti icikonko pa nsita imwi?

¹¹ Nkazi Marthe, * uwakweti icikonko pa nsita imwi walemvile ati: “Wanda umwi lino napepanga ukuti nkomeleke, nakomenkinye nkazi wa cikalamba uwandanzile icikuuku nu kutemwa, vino nalondekwanga pa nsita iiya. Nupya nawe wansimikile ivyamucitikile ivyakoline na vino napitangamo nupya nayuvwile ukuti ntali nenga.” Limwi, nkazi wii uwacikalamba atamanyile nu kuti amazwi asuma yano wanenyile nkazi Marthe yamwazwile sana.

12, 13. Uzye tungaomvya uli ningo amazwi aaya pali Filipi 2:1-4?

¹² Paulo wapanzileko amano Aina Klistu yonsi amu cilongano ca mu Filipi ati: ‘Caleka ndi Klistu akumukomelezya, ndi nu kutemwa kwakwe kukamutekezya myenzo, ndi mu kuombela pamwi muli vyakwe Leza, nga nu kusakamala nu kuya nu luse ku antu yauze, lyene mukafikilizya insansa zyane. Mwikale mukusakamalana pa kulanga kutemwana. Mulemane mukwelenganya kwati limwi ukwelenganya kwa muntu wenga. Mutacita cimwi mukuitemwa nanti mu cilumba, lelo muicefye nu kulola auzo ukuya acindame kuluta mwemwe. Mutacita vingamuzipila mwenga sile lelo mwacita vingazipila na auzo kwene.’—Filipi 2:1-4.

¹³ Fwandi tulinzile ukulaezya na maka ukucita ivingazipila yauze, ukuyalanga “ukutemwa,” ‘kuombela pamwi muli vyakwe Leza,’ alino nu ‘kuyasakamala nu kuya nu luse’ lino tukuyakomelezya.

14. I vyani ivingatukomelezya?

¹⁴ Ukuvwa ukuti antu yano twavwilepo mpiti yatwalilila ukuya acumi kungalenga tukomeleziwe sana, wakwe vino cali ku mutumwa Yoane uwalemvile ukuti: “Kusi cuze icikanzanzya kuluta pakuvwa ukuti ana yane yakayela icumi.” (3 Yoa. 4) Ya painiya aingi yangalondolola vino yakomeleziwa pa kumanya ukuti antu yamwi yano yavwile ukusambilila icumi imyaka ingi iyapitapo yacili nu utailo nupya yatandika na upainiya. Ndi cakuti twiusyako sile ya painiya aatiyatoovoka pa nsansa zino yakwatanga mpiti yangakomeleziwa sana.

15. Iinzila ci yonga ino tungaomvya pa kukomelezya aakaombela Leza ni cisinka?

¹⁵ Angalizi ya viputulwa aingi na ya mama yao yakalanda pali vino yakakomeleziwa lino amu cilongano cino yaatandalila yayataizya. Vikwene avino caya na kuli ya eluda, ya misyonali, ya painiya, alino na aomvi ya pa Betele yano yamwi yakataizya pa mulandu nu kuombesya kwao mu mulimo wakwe Leza.

16. I vyani vikalondekwa pakuti umwi akomeleziwe?

¹⁶ Citange ciye ningo ukulaelenganya ukuti tutange tukomelezye yauze pa mulandu wakuti tusilanda sana. Asi vingi ivikalondekwa pakuti muntu akomelezye yauze, pano insita zimwi nu kumwentula sile lino tukulamuka umwi kungamukomelezya. Ndi cakuti wino twalamuka atamwentwile, tungalola ukuti pali uwavya umwi, fwandi ukuvwa sile kuli vino umuntu wiyo akulanda kungamuteekezya.—Yako. 1:19.

17. Uzye umwina wacance umwi wazwiwe uli pa nsita ino wasakamikwe sana?

 ¹⁷ Henri umwina wacance, wasakamile sana lino ya lupwa yakwe, ukwikako na ya isi kwene aali ya eluda acindikwe sana, yatiile ukulongana. Henri wakomeleziwe ku mwangalizi wa ciputulwa uwamusenzile mu kumwa kofi nu kuleka alande ivyamusakamikanga. Henri wilwike ukuti icaali nu kulenga aazwe ulupwa lwakwe ukuwela mu cumi u kutwalilila ukuomba ni cisinka. Wakomeleziwe sana lino wawelenzile Masamu 46; Zefaniya 3:17; na Mako 10:29, 30.

18. (a) I vyani vino Umwene Solomoni walanzile? (b) Uzye Paulo watunenyile ukucita uli?

¹⁸ Ivyacitikile nkazi Marthe na Henri vikulangilila sile ukuti tungakomelezya umwina nanti nkazi akulondekwa ukukomeleziwa. Umwene Solomoni walemvile ukuti: “Kulanda amazwi asuma kwazipa. Ilinso lya luse likasansamusya umwenzo. Ilandwe lisuma nalyo likakomya amafupa.” (Mapi. 15:23, 30) Nupya ukuwelenga Lupungu Lwa Mulinzi nanti ivyeo ivyaya pa webusaiti kungakomelezya umwi. Paulo walanzile ukuti ukwimbila pamwi ulwimbo lwa Wene kungatukomelezya sana. Walemvile ukuti: “Lekini Ilandwe lyapali Klistu likale mu myenzo inu, mu ukama wi landwe mwasambilizyanya nu kutungululana na mano onsi. Mwaimbi nyimbo zya kulumbanya, ni zyamuzilo kuli Leza. Mwaimbila Leza ni ntaizyo mu myenzo inu.”—Kolo. 3:16; Mili. 16:25.

19. U mulandu ci uno ukukomelezyanya kulaalondekwa sana uku nkoleelo, nupya i vyani vino tulinzile ukucita?

¹⁹ Ukukomelezyanya kulaalondekwa sana lino uwanda wakwe Yeova ukuya “ukupalama piipi.” (Ayeb. 10:25) Fwandi wakwe vino Paulo wanenyile Aina Klistu yauze, “mwakomelezyanya nu kwazwana, wakwe vino ndakai mukucita.”—1 Tesa. 5:11.