CIPANDE CA KUSAMBILILAMO 14
Uzye Mukaomba Ningo Umulimo Wakwe Leza?
“Omba umulimo wa kukosola ilandwe lisuma nga nu kuomba incito yako yonsi.”—2 TIM. 4:5.
ULWIMBO 57 Tukakosoola Uku Yantu Amisango Yonsi
VINO TUMASAMBILILAPO *
Pa cisila ca kutuutuluka, Yesu wakomenkiine na asambi yakwe nupya wayanenyile ‘ukuya panga antu ukuya asambi” (Lolini palagalafu 1)
1. I vyani vino aomvi yakwe Leza yakalonda ukucita, nupya u mulandu ci? (Lolini icikope icili pa nkupo.)
KLISTU YESU wanenyile alondezi yakwe ati: “Yangini . . . mucite antu amu nko zyonsi kuya alondezi yane.” (Mate. 28:19) Aomvi yakwe Leza yonsi acisinka yakalonda ukusambilila vino ‘yangaomba ningo’ umulimo uno yapeelwa. (2 Tim. 4:5) Yamanya ukuti umulimo uu wacindama sana nupya ulinzile ukuombwa zuwa ukucila umulimo ulionsi uno tukaomba. Ukuya kwene citaangupala ukusumba insita ikulu umu mulimo wakwe Leza wakwe vino tungatemwa.
2. Iintazi ci zino tungakwata lino tukwezya na maka ukuomba ningo umulimo wakwe Leza?
2 Kwaya imilimo na yuze icindame iikalondekwa sana insita na maka. Limwi tungaomba incito ino twalembwa maawazi aingi cila wanda pakuti twaisakamala nu kusakamala indupwa zitu. Limwi tungaacula sana ni milimo yuze iya kusakamala ulupwa, ukulwala, ukusakamikwa sana, nanti ukuwaikwa sana pa mulandu nu kukota. Uzye tungacita uli pakuti twaomba ningo umulimo wakwe Leza lino tukuzizimizya intazi zizyo?
3. I vyani vimwi ivikalenga ya kakosoola ya Wene yafilwa ukuombesya umu mulimo wakwe Leza wakwe vino tukawelenga pali Mateo 13:23?
3 Ndi cakuti intazi zino twakwata zikalenga tutaombesya umu mulimo wakwe Yeova, tutalinzile ukutoovoka. Yesu wamanyile ukuti antu yatanga yaseeke ivizao vya Wene ivilingane. (Welengini Mateo 13:23.) Yeova akataizya sana pali vyonsi vino tukacita umu mulimo uno watupeela. (Ayeb. 6:10-12) Insita zimwi tungauvwa ukuti kusi ivyakutulesya ukuombesya mu mulimo wakwe Yeova. Umu cipande cii, tumasambilila vino tungaakolezya umulimo wakwe Leza muli vyonsi vino tukacita cila wanda, ukucefyanyako ivya kupumvyanya, nu kuzifyako imisimikilile ni misambilizizye itu. Lekini tutandikilepo ukumanya vino cikapiliula ukuomba ningo umulimo wakwe Leza.
4. Uzye ukuomba ningo umu mulimo wakwe Leza kukapiliula cani?
4 Tungati pakuti twaomba ningo umulimo wakwe Leza, tulinzile ukuombesya umu mulimo wa kusimikila nu kusambilizya. Nomba kwaya na vyuze ivikalondekwa ukucila sile pa nsita ino tukasumba. Cacindama sana ukumanya umulandu uno tukaombela umulimo wa kusimikila. Pa mulandu wakuti twatemwa Yeova na antu yanji, tukaomba nu mwenzo onsi umu mulimo wakwe Leza. * (Mako 12:30, 31; Kolo. 3:23) Ukuombela Leza nu mwenzo onsi kukapiliula ukuti tulinzile ukuipeelesya sana, ukuomba apapezile amaka itu umu mulimo uno watupeela. Ndi twamanya ucindami wa mulimo witu uwa kusimikila, tukaezya ukusimikila uku yantu aingi ukufika pano tungapezya.
5-6. Langililini vino umuntu aatakwata sana insita angaakolezya umulimo wakwe Leza muli vyonsi vino akacita.
5 Elenganyini pa mulumendo uwatemwa sana ukulizya gita. Akauvwa ningo ukulizya inyimbo lyonsi lino wakwata insita. Lyene umu kuya kwa nsita wazana incito ya kulizya gita pa Ciwelusi na pa Mulungu umu cikuulwa cino antu yakakala nu kumwelamo uwengwa. Nomba impiya zino akufola zyatizicepa icakuti atanga akale vyonsi vino vikulondekwa. Fwandi wasya wata incito iyo nu kutandika ukukazya umwi tuuka ukufuma pa Mande ukufika pali Cisano. Nanti icakuti akasumba insita ikulu sana umwi tuuka, watemwa sana ukulizya inyimbo pali gita. Akalondesya ukuzifya sana imilizizye yakwe gita nu kuya sile kiimba wa nyimbo. Nanti ciye vivyo, akaipakizya ukulizya inyimbo ndi wakwata insita, nanti icakuti asikwata sana insita.
6 Umu nzila iliyonga kwene, limwi mutanga mukwate insita ikulu iya kuomba umulimo wa kusimikila. Nomba ali mulimo uno mwatemwa sana ukuomba. Mukaezya ukuombesya pakuti mwafika antu pa myenzo lino mukusimikila ilandwe lisuma. Vino mwakwata imilimo iingi, limwi mungaelenganya imuti ningacita uli pakuti nakoleezya umulimo wa kusimikila muli vyonsi vino nkacita cila wanda?
VINO MUNGACITA PAKUTI MWAKOLEZYA UMULIMO WAKWE LEZA
7-8. Uzye tungakolanya uli vino Yesu walolanga umulimo wakwe Leza?
7 Yesu watemilwe sana ukuombela Leza. Ukulanda pa Wene Wakwe Leza ali cintu cino cacindime sana kuli aliwe. (Yoa. 4:34, 35) Wapitanga intamfu itali sana ukuya umu kusimikila antu aingi. Lyonsi walondanga inzila zya kulandilamo uku yantu umu mang’anda yao nanti sile uku ncende zyuze kuno yazanwanga. Yesu wakolezyanga ukuombela Leza muli vyonsi vino wacitanga.
8 Tungakolanya Klistu ndi tukulonda inzila zya kulanzyanyizyamo na antu pi landwe lisuma pa nsita iliyonsi nupya ukulikonsi kuno tungakwanisya ukusimikila antu. Tukaitemelwa ukuomba umulimo wa kusimikila na lino ivintu vikututalila. (Mako 6:31-34; 1 Pet. 2:21) Yamwi umu cilongano aapainiya aiyele, yamwi nayo aansita yonsi, nanti ansita inono. Yamwi yasambilila ululimi luze nanti yaya uku ncende ukukalondekwa ya kakosoola aingi. Nomba, aakaomba sana umulimo wa kusimikila aakakosoola ya Wene aakaombesya. Usi mulandu tungaombesya umu mulimo wakwe Leza nanti tungaomba sile panono, Yeova asilonda ukuti twaomba ukucila papezile amaka itu. Akalonda twaipakizya ukuomba umulimo uno watupeela lino tukukosoola ‘ilandwe lisuma lyakwe Leza wa nsansa.’—1 Tim. 1:11; Malan. 30:11.
9. (a) Uzye Paulo wacisile uli pakuti aakolezya umulimo wa kusimikila nanti icakuti waombanga nu mulimo wa pa lwakwe? (b) Uzye ilembelo lya Milimo 28:16, 30, 31 likalanga uli vino Paulo walolanga umulimo wakwe Leza?
9 Umutumwa Paulo wasumvile sana mano uku mulimo wa kusimikila. Lino wali umu Kolinto ala ali pa lwendo lwakwe ciili ulwa umisyonali, wakweti impiya izinono sana nupya waomvizye insita imwi uku kupanga matenti. Lelo, Paulo atalolanga ukupanga matenti ukuti wali ali mulimo ucindame sana kuli aliwe. Waombanga umulimo uu pakuti angazana ivyalondekwanga lino akusimikila ilandwe lisuma uku ina Kolinto ukwaula ‘ukuyalifya’ impiya. (2 Kol. 11:7) Nanti icakuti Paulo waombangako incito ya ku mwili, watwalilile ukukolezya umulimo wa kusimikila, nupya wakosoolanga lyonsi sile api Sabata. Lino vintu vyazipiileko, Paulo “wasumvile nsita yonsi mu kukosola ilandwe lya Mwene, ala akunena Ayuda ukuti Yesu ali Klistu.” (Mili. 18:3-5; 2 Kol. 11:9) Lino izile yamulema iyamuyalila umu ng’anda ino wasonkelanga umu Loma pa myaka iili, Paulo wasimikilanga kuli yano yayanga mu kumupempula nupya walembanga na ya kalata. (Welengini Milimo 28:16, 30, 31.) Paulo atalondanga iciliconsi ciye icicindame kuli aliwe ukucila mulimo wakwe Leza. Walemvile ati: ‘Vino twapeelwa mulimo wakwe Leza, tusyatonta.’ (2 Kol. 4:1) Wakwe vino Paulo wacitanga, naswe kwene nanti icakuti tulinzile kusumba insita ikulu ku mulimo wa pa lwitu, tungaombesya ukuti twakolezya mulimo wa Wene muli vyonsi vino tukacita mu umi witu.
Kwaya inzila izingi izingalenga twaomba ningo umulimo uno Leza watupeela (Lolini mapalagalafu 10-11)
10-11. Uzye tungaomba uli ningo umulimo wa kusimikila na lino tuli ni ntazi?
10 Ndi cakuti tutanga tukwanisye ukusimikila uku ng’anda ni ng’anda pa mulandu nu kukota nanti ukulwalilila, tungaipakizya ukuomvya inzila zyuze zino tukaomvya pa kusimikila. Aina Klistu akutandikilako yasimikilanga konsi kuno yazananga antu. Yaomvyanga insita ino yasyukila ukunena antu icumi. Yasimikilanga uku ng’anda ni ng’anda, uku vifulo ukwazanwanga antu aingi, lino yakuomba imilimo yakwe cila wanda, na kuli ‘yonsi yano yazananga.’ (Mili. 17:17; 20:20) Ndi cakuti tutanga tukwanisye ukupita sana, tungikala apa cifulo apakapita sana antu kuno tungasimikila apitanzila. Nanti tungaasimikila lino tukuomba imilimo yakwe cila wanda, ukulemba ya kalata, nanti ukusimikila ukuomvya foni. Ya kakosoola aingi atanga yakwanisye ukusimikila uku ng’anda ni ng’anda pa mulandu nu kulwalilila nanti intazi zyuze, yangaipakizya ukuombako ukuomvya inzila kwene zii izya kusimikililamo.
11 Asi mulandu ni ntazi zya kulwalilila, mungaomba ningo umulimo wa kusimikila. Elenganyini nupya pali vino Paulo waombanga. Walanzile ukuti: “Klistu wampeela maka akulungatana ni miyele ili yonsi.” (Filipi 4:13) Paulo walondekwanga amaka yayo lino walwile ala ali pa lwendo lwa umisyonali. Walondolwelile aina Galatiya ukuti: “Wakwe vino mumanyile lino natandike kukosola ilandwe lisuma kunomuli nali nene mulwale.” (Gala. 4:13) Umu nzila iliyonga kwene, namwe intazi zino mukakwata zingalenga mwasimikila ilandwe lisuma uku yantu ali wakwe ya dokota, ya nasi, na yauze aangamwazwilizya lino muli umu cipatala. Antu kwene yaa yakaya uku ncito pa nsita ino ya kakosoola yaya pa mang’anda yao.
VINO MUNGANGUPAZYA IMIKALILE
12. Uzye ukuya na “manso aali ningo” kuli kutuuli?
12 Yesu walanzile ukuti: “Manso yakoline wi lampi lya kukozezya mwili. Caleka manso inu ndi yali ningo, mili inu ilazulamo luswepo.” (Mate. 6:22) Uzye walozizye mwi? Walozizye umukuti tulinzile ukwangupazya umi nu kwika amano pa uyo onga nanti pa cintu conga cino tukulonda ukucita, ukwaula ukupumvyanyiziwa. Yesu umwisikulu watulangilile ivyakucita lino wikanga amano uku mulimo wakwe Leza, nupya wasambilizye na asambi yakwe ivya kwika amano ku kuombela Yeova nu kukosoola pa Wene wakwe. Tukakolanya Yesu ndi cakuti tukukolezya umulimo wa kusimikila umu umi witu, ‘kulonda Uwene wakwe Leza nga nu wololoke wakwe.’—Mate. 6:33.
13. I vyani ivingatwazwa ukwika amano uku mulimo wa Wina Klistu?
13 Inzila yonga ino tungakolezezyamo imilimo yakwe Leza u kwangupazya umi pakuti twasumba insita ikulu ku kwazwa antu ukumanya nu kutemwa Yeova. * Uzye citanga cizipe ndi twacefizyeko insita ino tukaomba imilimo yuze pakuti twasumba insita ikulu umu mulimo wa kusimikila umukasi ka mulungu? Uzye tungacefyako ivyakuizanzya ivikatusendela sana insita?
14. I vyani vino atwalane yamwi yacisile pakuti yakwata insita ikulu nu kuombesya mu mulimo wakwe Leza?
14 Vikwene ali vino eluda wi zina lyakuti Elias na mamakwe yacisile. Walondolwile ukuti: “Tutaatandike zuwa upainiya nomba kwali vino twacitanga pakuti twasumba insita ikulu umu mulimo wa kusimikila. Fwandi twatandike ukulundulula panono panono insita ino twasumbanga mu mulimo wa kusimikila. Twacefizyeko imiomvezye itu ya mpiya, kucefyako ivya kulezezyamo icitendwe vino ndakai tukalola ukuti vyatusendelanga sana insita, nupya twalenzile aatulemvile incito ukuti yatucefezyeko imilimo pakuti twakwata insita ikulu iya kuombako umu mulimo wa kusimikila. Cico calenzile ukuti twasimikilako ni nsita ya manguzi, kutungulula masambililo ya Baibo aingi, alino nu kusimikilako umukasi ka mulungu imiku iili mu mwezi. Twaipakizye sana ukuombako umulimo!”
VINO MUNGACITA PAKUTI MUZIFYE IMISIMIKILILE NI MISAMBILIZIZYE INU
Ukuomvya vino tukasambilila pa kulongana kwa mukasi ka mulungu kukatwazwa ukutwalilila ukulunduluka umu miombele itu umu mulimo wa kusimikila (Lolini mapalagalafu 15-16) *
15-16. Ukulingana na mazwi aaya pali 1 Timoti 4:13, 15, tungacita uli pakuti tutwalilile ukuzifya imisimikilile itu? (Lolini na kambokosi kakuti “ Amauyo Aangangazwa Ukuomba Ningo Umulimo wa Kusimikila.”)
15 Inzila na yuze ino ingatwazwa ukuomba ningo umulimo wakwe Leza u kuzifya imiombele umu mulimo wa kusimikila. Antu aakaomba imilimo imwi yakatwalilila ukusambilila pakuti yangatwalilila ukumanyilapo ivya kuomba ningo umulimo uno yakaomba. Vikwene avino cifwile ukuya na kuli ya kakosoola ya Wene. Tulinzile ukutwalilila ukusambilila ukuomba ningo umu mulimo wakwe Leza.—Mapi. 1:5; welengini 1 Timoti. 4:13, 15.
16 Nomba, uzye tungatwalilila uli ukulunduluka umu mulimo wakwe Leza? Tungalunduluka ndi tukulondela ivyeo vino tukasambilila pa kulongana kwa mukasi ka mulungu ukwakuti Swe Ina Klistu nu Mulimo Witu. Ukulongana kuu kukalenga tumanye ivingatwazwa ukuzifyako imiombele itu umu mulimo wa kusimikila. Lino ceyamani akusunda yano yakweti malyasi ya yasambi, tungasambilila ivintu ivingatwazwa ukuzifya imisimikilile itu. Tungaomvya vino twasambilila umuku ulalondelelapo lino tukusimikila antu ilandwe lisuma. Tungalenga umwangalizi wi umba litu ukuti atwazwe nanti ukuomba nawe umu mulimo wa kusimikila nanti sile ukuomba na kakosoola uwaelezya sana, painiya, nanti ukuombako nu mwangalizi wa ciputulwa. Lino tukumanyilako ivya kuomba ningo umulimo wa kusimikila nu kuomvya Viombelo Vino Tukaomvya pa Kusambilizya, tulaipakizya sana ukusimikila nu kusambilizya.
17. I visuma ci ivilacitika nga mukuomba ningo umulimo wakwe Leza?
17 Twasyuka sana ukuti Yeova watuzumilizya ukuti ‘tungaombela capamwi nawe’! (1 Kol. 3:9) Ndi cakuti mwamanya “kusoolola ivili visuma” nu kwika sana mano pa mulimo wakwe Leza, ‘mulaombela Yeova nu luzango.’ (Filipi 1:10; Masa. 100:2) Vino mwemwe yaomvi yakwe Leza, musitwisika ukuti alamupeela amaka yano mukalondekwa pakuti mungaomba ningo umulimo uno wamupeela asi mulandu ni ntazi zino mungakwata. (2 Kol. 4:1, 7; 6:4) Nanti icakuti ivikamucitikila vingalenga mwaomba sana nanti ukuomba sile panono umu mulimo wa kusimikila, ‘mungaya ni nsansa’ ndi mukuomba nu mwenzo onsi. (Gala. 6:4) Ndi mukuomba ningo umulimo wakwe Leza, mukalanga ukuti mwatemwa Yeova na antu yauze. ‘Ndi mwacita cii, ale lyene mulaituula mweisikulu nga na yao akumuvwa.’—1 Tim. 4:16.
ULWIMBO 58 Tukazuka Tukulonda Antu Atemwa Umutende
^ pala. 5 Yesu watupeela umulimo wa kukosoola ilandwe lisuma ilya Wene nu kupanga asambi. Icipande cii cimalanda pali vino tungaomba ningo umulimo wakwe Leza, nanti icakuti itukwata intazi izingi. Tumasambilila na pali vino tungazifyako imiombele itu pakuti twaipakizya lino tukuomba.
^ pala. 4 IZWI ILYATILILONDOLOLWA: Umu mulimo wakwe Leza mwaya imilimo iingi ino tukaomba wakwe ukusimikila nu kusambilizya, ukuomba umulimo wa makuule nu kuziifya ivikuulwa vya kulonganilamo, alino nu kuombako umulimo wa kwazwa aatiyaponelwa na mazanzo.—2 Kol. 5:18, 19; 8:4.
^ pala. 13 Loliniko inzila 7 izyati zilumbulwa umu kambokosi akakuti “Vya Kucita Pakuti Mwangupazye Imikalile” mu Lupungu Lwa Mulinzi lwakwe Julai 2016, ifwa 10.
^ pala. 62 ULONDOLOZI WA CIKOPE: Pa kulongana kwa mukasi ka mulungu, nkazi akulangilila vino mungacita ndi mwaswilila uku muntu wino mwalanzyanyizye nawe. Pa cisila lino ceyamani akusunda akulanda malyasi, nkazi akulemba ivyeo mu kabuku kakuti Kusambilizya. Lyene waomvya ivyeo vino wasambilile pa nsita yuze apa mpela ya mulungu lino ali umu mulimo wa kusimikila.
