CIPANDE CA KUSAMBILILAMO 17
“Nkamwama ya Cuza”
“Nkamwama ya cuza, pano nati munena vintu vyonsi vino nuvwile kuli Tata.”—YOA. 15:15.
LWIMBO NA. 13 Lyonsi Twakolanya Klistu
VINO TUMASAMBILILAPO *
1. Mungacita uli pakuti muye ya cuza na umwi?
ILINGI, inzila yonga ino tungakomezyamo ucuza witu na umwi u kuya pamwi nu muntu kwene wiyo insita ikulu. Nga mukulanzyanya, ukunenako cila muntu vino akwelenganya nu kuyuvwa, mulaya ya cuza. Nomba tukakwata intazi nga tukulonda ukuya ya cuza yakwe Yesu. U mulandu ci?
2. Iintazi ci iya kutandikilapo ino tukakwata?
2 Intazi ya kutandikilapo iyakuti tutatala twalolanapo na Yesu. Aina Klistu aingi akutandikilapo yakweti intazi ili imwi kwene. Nanti ciye vivyo, umutumwa Petulo walanzile ukuti: “Mwamutemwa nanti angala mutamulola, nupya ndakai musyamulola lelo mwamutaila.” (1 Pet. 1:8) Fwandi tungaya ya cuza yakwe Yesu nanti icakuti tutaatala twamulolapo.
3. Iintazi ci yakwe ciili ino tukakwata?
3 Intazi yakwe ciili i yakuti tutanga tulande na Yesu. Lino tukupepa, tukanena Yeova vino tukwelenganya. Icacumi tukapepa kupitila umwi zina lyakwe Yesu, nomba tusilanda kuli aliwe. Alino Yesu asilonda ukuti twapepa kuli aliwe. U mulandu ci? Pa mulandu wakuti ipepo i nzila yonga iyakupepelamo, nupya Yeova ali wino tulinzile sile ukupepa. (Mate. 4:10) Nanti ciye vivyo, tungalanga ukuti twatemwa Yesu.
4. Iintazi ci yakwe citatu ino tukakwata, nupya i vyani vino tumasambilila mu cipande cii?
4 Intazi yakwe citatu i yakuti Yesu akaikala ukwi yulu, fwandi tutanga tuye pamwi nawe. Nomba tungamanya ivingi pali Yesu ukwaula ukuya pamwi nawe. Tumalanda pa vintu 4 vino tungacita pakuti tukomye ucuza witu nawe. Lekini tutandikilepo ukumanya umulandu uno cacindamila ukukomya ucuza witu na Klistu.
U MULANDU CI UNO TULINZILE UKUYELA YA CUZA YAKWE YESU?
5. U mulandu ci uno tulinzile ukuyela ya cuza yakwe Yesu? (Lolini na kambokosi kakuti “ Kuya ya Cuza Yakwe Yesu Kukalenga Tuye ya Cuza Yakwe Yeova” na kakuti “ Vino Tulinzile Ukulola Umulimo Uno Yesu Wakwata.”)
5 Tulinzile ukuya ya cuza yakwe Yesu ndi cakuti tukulonda ukuya ya cuza yasuma yakwe Yeova. U mulandu ci? Elenganyini pa milandu iili. Umulandu wa kutandikilapo, Yesu wanenyile asambi yakwe ukuti: “Tata umwisikulu wamutemwa. Wene wamutemwa pano mwemo mwantemwa.” (Yoa. 16:27) Nupya walanzile nu kuti: “Pasi umwi angiza kuli Tata suka wizila muli nene.” (Yoa. 14:6) Ukulonda ukuya ya cuza yakwe Yeova ukwaula ukuya ya cuza yakwe Yesu kungaya kwati ukulonda ukwingila umu cikuulwa ukwaula ukwingilila pa cisaasa. Yesu waomvizye cilangililo cili cimwi lino wailondolwile ukuti “nene mulyango wakwingililapo imfwele.” (Yoa. 10:7) Umulandu wakwe ciili u wakuti Yesu wakolanyanga imiyele yakwe Isi. Wanenyile alondezi yakwe ukuti: “Wino wandola, walola na Tata kwene.” (Yoa. 14:9) Fwandi inzila icindame sana ino tungamanyilamo Yeova u kusambilila pali Yesu. Lino tukusambilila pali Yesu, tukaya tukumutemelwako. Lino ucuza witu na Yesu ukuya ukukulilako, tukatemelwako sana Yeova.
6. U mulandu ci nauze uno tulinzile ukuyela ya cuza yakwe Yesu? Londololini.
6 Tulinzile ukuya ya cuza yakwe Yesu pakuti mapepo itu yasukwe. Cii cikupiliula ukuti tulinzile ukucita na vyuze kucila sile ukulanda ukuti “twapepa ukupitila muli Yesu” pa cisila ci pepo. Tulinzile ukumanya inzila ino Yeova akaomvezyamo Yesu pa kwasuka mapepo itu. Yesu wanenyile atumwa yakwe ukuti: “Consi cino mulalenga mwi zina lyane, acino ndacita.” (Yoa. 14:13) Nanti icakuti Yeova aliwe akauvwa uku mapepo itu, wapeela Yesu amaka ya kupingula. (Mate. 28:18) Fwandi lino Leza atatala wasuka mapepo itu, akalola ndi cakuti itulondela kusunda kuno Yesu wapeezile. Yesu watiile: “Ndi mwemo mwelela antu lino yaifya kunomuli, So uwa mwiyulu nawe kwene alamwelela. Lelo ndi musyakwelela antu maifyo yao, So nawe kwene atalamwelela maifyo inu.” (Mate. 6:14, 15) Fwandi icicindama ukuti twacitila yauze ivintu wakwe vino Yeova na Yesu yakatucitila!
7. Aaweni alaipakizya ivisuma ivyafuma umu mpolelwa yakwe Yesu?
7 Ya cuza yakwe Yesu sile aliyo yalaipakizya ivisuma ivyafuma mu mpolelwa yakwe. Twamanya uli vivyo? Yesu walanzile ukuti wali nu kupeela umi wakwe pa mulandu wakwe ya cuza yakwe. (Yoa. 15:13) Antu ali ni cisinka aikazile lino Yesu atatala wiza pano nsi yalinzile ukusambilila pali aliwe nu kumutemwa. Aonsi yayo na anaci ali wakwe Abulaamu, Sala, Mose na Laabu yalatuutululwa, nomba nayo kwene yalalondekwa ukuya ya cuza yakwe Yesu pakuti yakakwate umi wa pe.—Yoa. 17:3; Mili. 24:15; Ayeb. 11:8-12, 24-26, 31.
8-9. Wakwe vino ilembelo lyakwe Yoane 15:4, 5 likalanda, uzye ucuza witu na Yesu ukatulenga ukucita vyani, nupya u mulandu ci uno cacindamila ukucita vivyo?
8 Tukaipakizya kuombela pamwi na Yesu mu mulimo wa kusimikila nu kusambilizya ilandwe lisuma ilya Wene. Lino Yesu wali pano nsi wali a kasambilizya. Nupya vino Yesu u mutwe wa cilongano,ukufuma pano waswililile ukwi yulu watwalilila ukutungulula umulimo wa kusimikila nu kusambilizya. Akalola nupya akataizya pali vino mukaombesya ukwazwa antu aingi ukumumanya nu kumanya Isi. Nupya Yeova sile na Yesu aliyo yangatwazwa ukuomba ningo umulimo uu.—Welengini Yoane 15:4, 5.
9 Izwi Lyakwe Leza likatusambilizya ukuti tulinzile ukutemwa Yesu nu kutwalilila ukucita vivyo kwene pakuti twazanzya Yeova. Fwandi lekini tulande pa vintu 4 vino tungacita pakuti tuye ya cuza yakwe Yesu.
VINO TUNGACITA PAKUTI UCUZA WITU NA YESU UKOME
Mungaya ya cuza yakwe Yesu ndi cakuti (1) mwamanya ningo Yesu (2) mukwelenganya nu kucita ivintu wakwe Yesu (3) mukuombela pamwi na ina yakwe Klistu (4) mukutungilila Iuvi Lyakwe Yeova (Lolini mapalaglafu 10-14) *
10. I cintu ci ca kutandikilapo cino tulinzile ukucita pakuti tukomye ucuza witu na Yesu?
10 (1) Tulinzile ukumanya Yesu. Tungacita vivyo nga tukuwelenga muli Mateo, Mako, Luka na Yoane. Lino tukwelenganya pa malyasi amuli Baibo pa umi wakwe Yesu, tukamutemelwako sana nu kumucindika pa mulandu na vino wacitilanga antu. Nanti icakuti wali u Mwene, atacitilanga asambi yakwe ivintu wa azya. Lelo wasokolwile vino welenganyanga na vino wayuvwanga pali aliyo. (Yoa. 15:15) Ndi cakuti yali nu ulanda, Yesu nawe kwene wayanga nu ulanda nu kulilila pamwi nayo. (Yoa. 11:32-36) Na alwani yakwe kwene yaweni ukuti Yesu wali a cuza wa antu yonsi auvwanga ukwi landwe lino wasimikilanga. (Mate. 11:19) Ndi cakuti tukukolanya vino Yesu wacitilanga asambi yakwe, ucuza witu na yauze ukazipilako, tukaya ni nsansa nupya tukatemelwako Yesu nu kumucindika sana.
11. I cintu ci cakwe ciili cino tulinzile ukucita pakuti tuye ya cuza yakwe Yesu, nupya u mulandu ci uno kucitila vivyo kwacindamila?
11 (2) Twaelenganya nu kucita ivintu wakwe Yesu. Ndi cakuti twamanya ningo Yesu nu kumukolanya mu myelenganyizizye itu, ucuza witu na aliwe ulakomelako. (1 Kol. 2:16) Uzye tungakolanya uli Yesu? Lekini tulande pa nzila sile yonga. Yesu welenganyanga sana pa kwazwa yauze ukucila ukuizanzya. (Mate. 20:28; Loma 15:1-3) Pa mulandu wakuti welenganyanga vivyo, waipeelesyanga nu kweleela yauze. Atasokanga zuwa pali vino antu yalandanga pali aliwe. (Yoa. 1:46, 47) Nupya atalenganga vino umwi waluvyanya vilenge asenule vino wacitilanga antu yauze. (1 Tim. 1:12-14) Yesu watiile: “Ndi mukutemwana lyene antu yonsi yalamanya vino mwemwe alondezi yane.” (Yoa. 13:35) Cingazipa ukuyuzya ukuti “Uzye nkakolanya Yesu muli vyonsi pakuti inje nu mutende na ina na ya nkazi?”
12. I cintu ci cakwe citatu cino tulinzile ukucita pakuti tuye ya cuza yakwe Yesu, nupya tungacita uli vivyo?
12 (3) Twaombela pamwi na ina yakwe Klistu. Yesu akalola vino tukacitila aina yakwe apakwe ukuti tukacitila aliwe. (Mate. 25:34-40) Inzila yonga icindame sana ino tungalangilamo ukuti tukatungilila apakwe u kuombela pamwi nayo umulimo wa Wene uwa kusimikila nu kupanga asambi uno Yesu wanenyile alondezi yakwe ukuomba. (Mate. 28:19, 20; Mili. 10:42) Ndi cakuti a “mfwele na zyuze” yakwazwilizya aina yakwe Klistu alino yangakwanisya kuomba umulimo wa kusimikila uukuombwa ndakai umu nsi yonsi. (Yoa. 10:16) Ndi cakuti mwemwe amu mfwele na zyuze, lyonsi lino mwaomba umulimo uu musilanga sile ukuti mwatemwa apakwe lelo mukalanga nu kuti mwatemwa Yesu.
13. Uzye tungalondela uli ukusunda kwakwe Yesu ukwaya pali Luka 16:9?
13 Nupya tungaya ya cuza yakwe Yeova na Yesu ndi cakuti tukuomvya ivikwatwa vitu ukutungilila umulimo uno yakutungulula ndakai. (Welengini Luka 16:9.) Tungasangwilako ku mulimo uukuombwa mu nsi yonsi, nupya impiya zino twasangwilako zingaomba uku kwazwilizya umulimo wa kusimikila ilandwe lisuma umu ncende zya kutali, kukuula nu kuzifya ivikuulwa ivikaomviwa mu kupepa kwa cumi nu kwazwa aponelwa na mazanzo. Tungasangwilako ni mpiya izya kuomvya ku vikulondekwa pa cilongano citu nu kwazwilizyako yano tukulola ukuti yakulondekwa uwazwilizyo. (Mapi. 19:17) Zii ali nzila zino tungalangilamo ukuti tukaombela pamwi na ina yakwe Klistu.
14. Wakwe vino ilembelo lyakwe Efeso 4:15, 16 likalanda, i cintu ci calenga 4 cino tulinzile ukucita pakuti tuye ya cuza yakwe Yesu?
14 (4) Twatungilila iuvi lyakwe Yeova. Vino Yesu ali mutwe wa cilongano, tukaya ya cuza yakwe asuma nga tukutungilila asontwa ukusakamala amu cilongano. (Welengini Efeso 4:15, 16.) Ndakai tukasininkizya ukuti Mang’anda ya Wene yakuomviwa ningo. Pakuti vivyo vicitike, ivilongano vimwi yavyuminkanya pamwi nu kusenula ivifulo vya kusimikilamo. Kucita vii kwalenga ukuti impiya izikasangulwa umwi uvi ukuomviwa ningo. Nupya pa mulandu wakwe vii, ya kasimikila yamwi yakalondekwa ukuyelezya ukusenuka kuu. Limwi aina yamwi acisinka yali umu cilongano cimwi apa myaka iingi nupya yapanga ucuza na antu amu cilongano cico. Nomba yamwi yayanena ukukukila ku vilongano vyuze. Yesu akatemwa sana ndi cakuti walola asambi yakwe acisinka yakulondela ukusenuka kuu.
YA CUZA YAKWE YESU YALIKALA AMANDA PE
15. Uzye ucuza witu na Yesu ulazipilako uli uku nkoleelo?
15 Yonsi apakwa nu mupasi wa muzilo yakwata upalilo wa kuya pamwi na Yesu amanda pe, nu kuya ya kateeka yauze umu Wene Wakwe Leza. Yalamulola, ukulanda nawe nu kuya pamwi nawe insita ikulu. (Yoa. 14:2, 3) Yano yakwata upalilo wa kwikala pano nsi nayo kwene yalatemwikwa na Yesu nupya alayasakamala. Nanti icakuti yatalalola Yesu, yalaya ya cuza yakwe asuma nupya yalaipakizya umi usuma uno Yeova na Yesu yalayapeela.—Eza. 9:6, 7.
16. A mapaalo ci yano tukakwata nga twaya ya cuza yakwe Yesu?
16 Ndi cakuti twazumila ukuya ya cuza yakwe Yesu, tulapaalwa. Pali ndakai watutemwa nupya akatutungilila. Twapeelwa isyuko lya kwikala amanda pe. Ni cicindamisye icakuti ucuza witu na Yesu ulalenga tukwate ucuza ucindame sana na Isi, Yeova. Mu cumi cumi u wila uiyele ukwamwa ya cuza yakwe Yesu!
LWIMBO NA. 17 ‘Ntemilwe’
^ pala. 5 Atumwa iikazile nu kuombela pamwi na Yesu nupya yali ya cuza yakwe asuma. Nupya Yesu akalonda naswe kwene tuye ya cuza yakwe, nomba swemo tukakwata intazi zino atumwa yakwe yataatazile yakwatepo. Cipande cii cimalanda pa ntazi zimwi kwene zizyo alino na pali vino tungacita pakuti tuye ya cuza yasuma yakwe Yesu nu kutwalilila ukucita vivyo kwene.
^ pala. 55 ULONDOLOZI WA VIKOPE: Pa kupepa kwa lupwa, tungasambilila pa umi wakwe Yesu na pa mulimo uno waombanga. (2) Mu cilongano, tungaombesya ukuya amutende na ina na ya nkazi. (3) Ndi cakuti tukuombesya mu mulimo wa kusimikila ala tukutungilila aina yakwe Klistu. (4) Ndi cakuti ivilongano yavyuminkanya pamwi, tungalondela vino ya eluda yapingulapo.
