Naviilwe umu 1955, nupya nakwata ya tatalenzi yaili. Nakuliile ku Katutu ka Finland, incende ino ndakai yakaama ukuti umusumba wa Vantaa.

Yamayo yabatiziwe nu kuya ya Nte Yakwe Yeova ala ntatala na avyalwa. Nomba ya tata yene yampasile sana icumi nupya yatalondanga yamayo yatusambilizya icumi nanti kutusenda umu kulongana. Fwandi yatusambilizyanga masambililo ya kutandikilako amu Baibo yatata nga yasipo.

Kufuma sile lino nali umwance nkacita ukulonda kwakwe Yeova. Wakwe, pa nsita imwi yamwalimu yansokiile sana pa mulandu wakuti ntalyangako Keeke wino yakapangila nu uwazi (verilättyjä). Yantinyile kanwa nu kwezya ukundisya. Nomba yavizilwe ukundisya.

Lino nali ni myaka 12 yatata yafwile. Lyene natandike ukuzanwa umu kulongana. Aina umu cilongano yali ni cikuuku cii calenzile na lunduluka muli vyakwe Leza. Nabelenganga nu kuisambilizya ukuomvya impapulo zitu. Vii vino nacitanga vyalenzile mbatiziwe umu 1969 apa 8 Ogasiti ala indi ni myaka 14 .

Lino namazile isukulu, natandike u painiya wa nsita yonsi. Lino papisile sile imilungu inono naile uku Pielavesi musumba uwayela umupipi  na pakasi ka panga ya Finland ukwalondekwanga yakasimikila.

Uku Pielavesi, akuno twaloline na ya Sirkka. Nayatemilwe pa mulandu wakuti yali aicefye nupya yatemilwe sana Yeova. Yatalondanga ivintu ivingi. Nupya swensi twalondesyanga sana ukuombela Yeova asi mulandu nu mulimo uno yali nu kutupeela. Umu 1974 apa 23 Maaci twizile tutwalana. Lino twatwaliine sile twaile uku Karttula, ukwalondekwanga yakasimikila.

Ukufuma sile lino twatwaliine Yeova walanga ukuti alatusakamala ndi cakuti tukukolezya ukulonda kwakwe. (Mate. 6:33) Lino twali uku Karttula, tutakweti motoka. Fwandi pa kutandika twapitanga ni injinga. Nomba insita zimwi kwazukanga sana. Pa mulandu wakuti ivifulo vimwi vyayelile ukutali twalondekwanga ukuomvya motoka pakuya umu kusimikila. Nomba tutakweti impiya izyakukalila.

Ukwaula nu kwenekela yatatalenzi yatutandalile. Yatupeezile motoka. Imisonko yonsi yali ilipile. Twalondekwanga sile ukukala amafuta. Fwandi twizile tukwata motoka ino twalondekwanga pa nsita itali.

Yeova watulangilile ukuti wali nu kulatusakamala muli vino twalondekwanga. Swemo cino twalondekwanga sile ukwika uwene wakwe Leza inkoleelo.

Lino twali ukwi Sukulu Lyakwe ya Painiya umu 1978, umwina Raimo Kuokkanen, a wenga pali yano yatungululanga watukomelizye ukuti tukazanweko ukwi Isukulu Lya Gilyadi. Fwandi twatandike ukusambilila cizungu pa kuti tukazanweko. Umu 1980, ala tutaatala twalenga ukuya ukwi Sukulu Lya Gilyadi yatwamile ukuya umu kuombela uku musambo wa ku Finland. Apa nsita ii aomvi ya pa Betele yatakweti isyuko ilya kulenga ukuya ukwi sukulu lya Gilyadi. Nomba twalondanga ukuombela kuno Yeova walondanga tuye asi kuno twalondanga. Fwandi twaile kuno yatwamile. Twatwalilile ukusambilila cizungu pano twalolanga ukuti limwi twali nu kukwata isyuko lyakulenga ukuzanwa ukwi Sukulu Lya Gilyadi.

 Lino papisile imyaka inono, Iumba Ilikatungulula lyalanzile ukuti na omvi ya pa Betele nayo kwene yangaya ukwi Sukulu Lya Gilyadi. Lilyo kwene sile twalevile makalata akulengelapo ukuya ukwi Sukulu Lya Gilyadi asi pa mulandu wakuti tutatemilwe ukuombela pa Betele. Lelo apa mulandu wakuti twalondanga ukuombela ukwalondekwanga yakasimikila aingi. Umu Sepetemba mu 1985 yatwamile twali umwi sukulu ilyalenga 79. Yatutumile uku Colombia.

Lino yatutumile uku Colombia twaombelanga pa Betele. Twaomba sile ningo nomba lino twaomvile umwaka onga nizile ntandika ukwelenganya ukuti twalondekwanga umulimo uze. Uu wali umuku wa kutandikilako umu umi wane ukulenga umulimo uze. Fwandi izile yatutuma nga ya misyonali umu musumba wa Neiva, umu citungu ca Huila.

Naipakizyanga sana ukuomba umulimo uu. Lino naombanga upainiya ala ntacili ntwale naombanga ukutandika katondo ukufika amanguzi. Lino nizile ntwala natwalilile ukuombela capamwi na mamane. Insita zimwi nga twaombela ukutali twalalanga muli motoka. Cii calenganga tutapita sana nupya twafikanga zuwa kuno tukuya uwanda uwalondelelapo.

Fwandi lino twatandike ukuomba umisyonali twatandike ukuipakizya wakwe vino twaipakizyanga pa kutandika. Icilongano cino twalimo catandike ukulunduka, nupya aina na ya nkazi aku Colombia yali nu kutemwa nupya yatutaizyanga.

Imisumba iyayelile umupipi na kuno twaombelanga mutali Nte wakwe Yeova nanti awenga. Nelenganyanga sana pali vino ilyasi ilisuma lyali nu kusimikilwa umu ncende zii. Nomba pa mulandu wakuti kwali amaumba alwisyanyanga nu uteeko citangwike uku muntu asimwikala muzi ukuya uku ncende zii. Fwandi napepanga ukuti umwi ukufuma uku ncende zii akaye Nte Wakwe Yeova. Nelenganyanga ukuti umuntu wii walondekwanga ukwikala uku Neiva pakuti asambilile icumi. Nupya napepanga nu kuti nga wabatiziwa nu kukula muli vyakwe Leza angaswilila nu kuyatandika ukuomba umulimo wa kusimikila. Ntamanyile ukuti Yeova wali nu kwazwa antu yaa ukusambilila icumi ukucila na pali vino nelenganyanga.

Natandike ukusambilizya Fernando González Baibo. Uwikalanga uku Algeciras, incende iyali pa ncende ukutali yakasimikila. Fernando wapitanga ama kilomita ukucila pali 50 pakuya kuno waombanga. Wapekanyanga ningo isambililo nupya lilyo kwene sile watandike ukulongana. Kufuma sile lino, Fernando watandike ukusambila Baibo wakolonganikanga antu nu ku tandika uku yalondelwela vino wasambililanga.

Fernando wabatiziwe umu Januwale 1990, ala papita sile imyezi 6 ukufuma pano watandikile ukusambilila Baibo. Patalengile watandike upainiya wa nsita yonsi. Pa mulandu wakuti umu Algeciras mwali Nte wakwe Yeova  cangukile akwi ofesi lya musambo ukutuma Painiya muiyele. Umu Febuluwale 1992, icilongano capanzilwe.

Uzye umwina Fernando wacefizyeko imiombele yakwe? Awe. Pa cisila cakuti watwala, wene nu muci yakuukile uku San Vicente del Caguán, icifulo ukutali ya Nte Yakwe Yeova. Nako kwene kwizile kuya icilongano. Umu 2002, Umwina Fernando wizile asontwa ukuya mwangalizi wa ciputulwa, Nupya wene na mamakwe yatwalilila ukuomba umulimo wa kutandalila ivilongano.

Cii calenzile imanye vino cacindama ukupepa amapepo amukulungatika lino tukuomba umulimo uno twapeelwa. Yeova akacita vino tutanga tukwanisye uku cita. Umulimo uno tukaomba uwakwe Yeova asi witu.—Mate. 9:38.

Mu 1990 natandike ukuomba umulimo wa kutandalila ivilongano. Iciputulwa cino twatandikiilepo ukuombelamo cayelile umu musumba ukalamba uwa Bogotá. Tuvwanga intete ukuti tutali nu kuomba ningo umulimo uu. Nemo na mamane tutamanyile milimo ingi. Nupya tutelizye ukwikala umu musumba ukalamba. Nomba Yeova wafikilizye ulayo ukazanwa pali Filipi 2:13: ukati “Leza akacita vino akulonda, aakamukomya ukupitila umu kumupeela amaka nu mwenzo wa kulondesya ukuomba.”

Lyene izile yatutuma uku Medellín, umusumba uno indandapo pa kutandika. Pa mulandu wakuti uku ncende ii kwacitikanga sana ivimvulunganya, antu aikalangako yatiile ukuvwa sana intete. Wakwe, uwanda umwi lino natungululanga isambililo antu yamwi yatandike ukulizya imfuti apanzi. Kwasyazile sile panono nga naponyile pansi nomba uno natungululanga isambililo wene watwalilile ukubelenga palaglafu. Lino wamazile ukubelenga wanenyile ukuti akulonda ukufuma panzi. Lino papisile insita inono wawezile na ana yaili, walanzile ati, “munjeleleko inaya umu kusenda ana yane.”

Kwali insita izingi zino twayanga umu uzanzo. Uwanda umwi lino twasimikilanga uku ng’anda ni ng’anda mamane wizile ala akusimula. Walanzile ukuti kwali umwi uwalondanga ukumupika. Cii calenzile nuvwe sana intete. Lino papisile insita twizile itumanya ukuti umonsi wii atalondanga ukupika mamane lelo walondanga ukupika umonsi uwimilile umupipi na mamane.

Lino papisile insita twizile twelezya. Ya Nte aikalanga uku ncende ii yazizimizyanga intazi zii alino ni zicizilepo nupya ci calenzile tukomeleziwe sana. Twizile tusininkizya ukuti ndi cakuti Yeova wayazwanga ale wali nu kutwazwa naswe kwene. Lyonsi twalondelanga vino ya eluda yatunenanga nu kutaila ukuti Yeova wali nu kulatwazwa.

Kwene insita zimwi ivintu vitipanga sana wakwe vino twelenganyanga. Uwanda umwi lino nayanga apa ng’anda imwi nuvwile kwati anaci  yaili ya kupontezyanya. Ntisile amano kuli vino vyacitikanga lelo vino wino nasimikilangako wacisile vyalenzile ntandike ukuvwa ivyacitanga. Nizile manya ikuti ivyunyi (parrots) vyakonkelezyanga vino inamupalamano ya citanga.

Umu 1997, napeezilwe umulimo wa kusambilizya umwi Sukulu Lyakwe ya Kakosoola ya Wene. Lyonsi naipakizyanga ukuzanwa uku masukulu aaya umwi uvi, nomba ntatazile nelenganyapo ukuti nali nu kukwata isyuko lya kutandika kusambilizya umu masukulu yaa.

Lino papisile insita nizile inja umwangalizi wa citungu. Lino mapekanyo yaa yafumiziweko natandike ukuomba umulimo wa kutandalila ivilongano. Fwandi ukucila pa myaka 30 naipakizya ukuomba umulimo wa kusambilizya alino nu kutandalila ivilongano. Imilimo yii yalenga naya ni nsansa. Nomba asi lyonsi lino cangukanga ukuomba imilimo yii. Nkandandeko pali vimwi ivyacitikanga.

Nasipa sana. Cii cangazwile ukuzizimizya intazi lino naombanga umulimo wa kutandalila ivilongano. Nomba insita zimwi ntapingulanga ningo pa vintu lino nkuombela pa milandu imwi iya mu cilongano. Pa nsita imwi napatikizyanga antu ukuti yalinzile ukulanga ukutemwa alino nu kuvwikisya auze. Icaulanda icakuti nemo ntalanganga imiyele kwene ii.— Loma 7:​21-23.

Pa mulanda na vino nacitanga natandike ukutoovoka. (Loma 7:24) Kwali insita imwi ino napefile kuli Yeova ukuti inte ukuomba umulimo wakwe umisyonali nu kuswilila uku Finland. Uwanda uwa kwene amanguzi naile uku kulongana. Vino naile nuvwa vyankomelizye nupya vyalenzile nalondesya ukutwalilila ukuomba umulimo uno naombanga nu kutwalilila ukuzifya imiyele yane. Na ndakai kwene ncili nkataizya pali vino Yeova waswike ipepo lino napefile. Nupya nkataizya na pali vino wangazwile ukuzifya imiyele yane.

Nemo na mamane tukataizya sana Yeova pa myaka yonsi ino ituomba umu mulimo wa nsita yonsi. Nkataizya Yeova pa kumpeela mamane uwaya nu kutemwa na upya uwa twalilila ukuya uwa cisinka pa myaka yonsi ii.

Indi umupipi nu ku kumanya imyaka 70 fwandi nasya nte ukuomba imilimo imwi ino napeelwa. Nomba cii cisilenga na uvwa uyi. Umulandu cii? Pano namanya ukuti icikazanzya Yeova ukuitemelwa ukumuombela nu kumulumbanya nu mwenzo onsi. (Mika 6:8; Mako 12:​32-34) Ukukwata imilimo imwi asi icikazanzya Yeova.

Nga nalola imilimo ino naipakizya ukuomba nsielenganya ukuti Yeova wampeezile imilimo yii pa mulandu wakuti nacindama nanti ukucenjela ukucila anji. Lelo Yeova wampeela imilimo yii pa mulandu ni cikuuku cakwe. Wampeela imilimo yii asi mulandu na vino nkaluvyanya. Namanya ukuti nkakwanisya ukuomba imilimo yii pa mulandu wakuti Yeova ankangazwa. Fwandi ningati lino nayuvwanga kutonta Leza uwampeelanga amaka.—2 Kol. 12:9.