1. Uzye antu yakwe Yeova yalanganga uli ukuti yaombelanga pamwi mu manda ya atumwa?

 LYONSI lino Yeova wapela antu yakwe ivyakucita akalonda ukuti yaombela pamwi. (1 Kol. 14:33) Wakwe, Leza akalonda ukuti ilyasi lisuma lisimikilwe umu nsi yonsi. (Matt. 24:14) Yeova wapeela Yesu amaka akutungulula umulimo uu. Yesu akasininkizya ukuti umulimo uu ukuombwa ningo. Mu manda ya atumwa lino ivilongano vyapangangwa umu ncende izipusane pusane, Kwayanga ukusoolola ya eluda akutungulula. (Mili. 14:23) Apa nsita yii umu Yelusalemu mwali iumba lyakwe ya eluda ilyapanzilwe na atumwa alino na aikolo apingulanga pali vino amu cilongano yonsi yalinzile ukucita. (Mili. 15:2; 16:4) Pa mulandu wakuti amu vilongano yalondelanga vino yayanenanga, “ivilongano vyatwalilile ukukomeleka umu utailo nupya antu yavulilangako sile.”—Mili. 16:5.

2. Uzye Yeova akapeela uli utunguluzi alino ni vyeo vya kutwazwa ukutandika umu 1919?

² Na ndakai kwene Yeova watwalilila ukupela utunguluzi uku antu yakwe. Ukutandika umu 1919, Yesu akaomvya iumba ilinono ilya ina apakwe pa kutungulula umulimo wa kusimikila alino nu kupekanya ivyeo apa nsita ilinge. a (Luka 12:42) Ukwaula nu kutwisika Yeova akapaala umulimo uu uno yakaomba.— Eza. 60:22; 65:​13, 14.

3-4. (a) Usuma ci uwaya umu kulondela utunguluzi uwa mwi uvi. (b) I vyani vino tumasambilila umu cipande cii?

 ³ Ndi cakuti tusikuombela pamwi tutanga tukwanisye ukuomba umulimo uno Yesu watupeela. (Mate. 28:​19, 20) Wakwe, Elenganyini ndi cakuti yatatupeela ivifulo umwakuombela umulimo wa kusimikila, cila muntu angaombela kuno watemwa. Ci cingalenga ivifulo vimwi vyaombelwamo sana lyene vimwi vitaombelwamo. Kwaya ivisuma na vyuze vino tukaipakizya ndi cakuti tukulondela utunguluzi.

⁴ Wakwe vivi kwene vino Yesu wapeelanga utunguluzi uku yalondezi yakwe avino akacita na ndakai kwene. Umu cipande cii, Tumasambilila pali vino Yeu wacitanga alino na pali vino iuvi likamukolanya. Tumasambilila na pali vino tungalanga ukuti tukataizya nupya twataila iuvi lyakwe Yeova.

TUKAKOLANYA VINO YESU WACITANGA

5. Uzye tukalanga uli ukuti tukakolanya Yesu? (Yoani 8:28)

⁵ Vino Yesu wacitanga nu kulanda wasambilile kuli isi uwa kwi iyulu. Wakwe Yesu, iuvi lyakwe Yeova likaomvya Baibo pa kutwazwa ukumanya ciipe ni cisuma alino na pa kutupeela utunguluzi. (Belengini Yoani 8:28; 2 Tim. 3:​16, 17) Ilingi yakatwiusyako ukuti tulinzile ukulabelenga nu kuomvya vino tukusambilila. Uzye ukucita vii kukatwazwa uli?

6. Usuma cii uwaya umu kuisambilizya Baibo?

⁶ Tukaipakizya sana ukusambilila Baibo ukuomvya impapulo zitu. Wakwe tukaezya kulinganya vino tukasambilila umu malembo alino nu utunguluzi uno tukapokelela. Nga twazana ukuti utunguluzi uno itupokelela ukuvwana na vino amalembo yakalanda, tukataila sana iuvi lyakwe Yeova.—Loma 12:2.

7. Umulimo ci uno Yesu waombanga nupya uzye ya Nte Yakwe Yeova yakamukolanya uli?

⁷ Yesu wasimikilanga “ilyasi lisuma ilya Wene wakwe Leza.” (Luka 4:​43, 44) Yesu wanenyile asambi yakwe ukuti yalinzile ukusimikila ilyasi ilisuma. (Luka 9:​1, 2; 10:​8, 9) Ya Nte Yakwe Yeova yakasimikila ilyasi lisuma umu nsi yonsi asi mulandu na vino vintu vili kuno yali.

8. I syuko ci lino twapeelwa?

⁸ Isyuko sana ukuombako umulimo wa kunena antu apa wene wakwe Leza. Asi antu yonsi akwata isyuko lii. Nanti sile alino Yesu wali pano nsi atazumilizye iviwa ukusimikila pali aliwe. (Luka 4:41) Ndakai pakuti umuntu atandike ukuomba umulimo wa kusimikila pamwi ni cilongano cakwe Yeova alinzile ukufika pali vino vikalondekwa. Tukalanga ukuti tukataizya pi syuko lino twakwata ilya kusimikila ndi cakuti tukusimikila lyonsi. Tukalonda ukukolanya Yesu, fwandi tukaombesya mu mulimo wa kusimikila nu kusambilizya icumi.—Mate. 13:​3, 23; 1 Kol. 3:6.

9. Uzye ya Nte Yakwe Yeova yakalenga uli izina lyakwe Leza ukumanyikwa?

⁹ Yesu walenzile izina lyakwe Leza ukumanyikwa. Umwi pepo lino Yesu wapefile walanzile ukuti: “Imanyisya antu yaa izina lyako.” (Yoa. 17:26) Wakwe Yesu ya Nte yakwe Yeova ndakai yakaezya na maka ukwazwa antu ukumanya izina lyakwe Leza. Baibo Uwa Malembo ya Nsi Ipya akaazwa sana antu ukumanya izina lyakwe Leza ndakai pa mulandu wakuti izina lyakwe litafumiziwamo nupya likazanwa papa kwene pano lyayelile pa kutandika. Baibo wii wasenulwa umu ciputulwa nanti wensi umu ndimi ukucila pali 270. Ndi cakuti mwalola ivyeo vya kutandikilako umu Kabuku Ka kutwazwa Ukusambilila Izwi Lyakwe  Leza, mulazana ivyeo ivikalanda pi zina lyakwe Yeova, miku ino likazanwamo alino nu mulandu uno muli Baibo Uwa Malembo ya Nsi Ipya mwayela izina lyakwe Leza.

10. I vyani vino tukusambilila kuli vino vyacitikile umwanaci akaikala uku Myanmar?

¹⁰ Wakwe vino Yesu wacitanga naswe tukalonda antu aingi uku manya izina lyakwe Leza. Lino umwanaci umwi uwa myaka 67 akaikala uku Myanmar wamanyile izina lyakwe Leza walizile nupya walanzile ukuti: “Uu ali muku wa kutandikilako uku manya ukuti izina lyakwe Leza a Yeova. . . . Mwansambilizya icintu icicindame cino ntatala nuvwapo.” I vyacitikile umwanaci wii vikulangilila vino ukusambilizya antu aakulonda ukuvwa api izina lyakwe Leza kukasenula antu.

TWALILILINI UKUTAILA NU KUTAIZYA IUVI LYAKWE YEOVA

11. Uzye ya eluda yangalanga uli ukuti yakataizya iuvi lyakwe Leza? (Loliniko ni cikope.)

¹¹ Uzye ya eluda yangalanga uli ukuti yakataizya iuvi lyakwe Leza? Ndi cakuti yapokelela ivyeo yalinzile ukubelengamo sana alino nu kwezya na maka ukuomvya ivyeo vivyo. Wakwe, yasipokelela sile ivyeo ivya kuyazwa ukutungulula ningo ukulongana na vino yangapepa amapepo pa kulongana lelo yakapokelela ni vyeo vya kuyazwa ukusakamala ningo imfwele zyakwe Klistu. Ndi cakuti ya eluda yakulondela utunguluzi uno yakupokelela yakalenga amu cilongano yalola ukuti Yeova wayatemwa nupya akayasakamala.

12. (a) Umulandu cii uno tulinzile ukulondela utunguluzi uno akutungulula yakukupeela? (Aebele 13:​7, 17) (b) Umulandu ci uno tutalinzile ukwika amano kuli vino aakutungulula yakaluvyanya?

¹² Tulinzile ukuitemelwa ukulondela utunguluzi uno twapokelela ukufuma kuli ya eluda. Nga tukucita vivyo tulalenga caangukila yayo akututungulula ukuomba umulimo wao. Baibo ikatukomelezya ukuti tulinzile ukuya ni cuvwila nupya aicefye kuli yano yakutungulula. (Belengini Aebele 13:​7, 17.) Nomba insita zimwi cingatala ukucita vivyo. Umulandu cii? Apa mulandu wakuti aonsi akatutungulula yatamalilika. Lelo ndi cakuti mukwika amano uku viiipe vino yakacita ale mukutungilila alwani itu. Umu nzila cii? Mungatandika ukutwisika iuvi lyakwe Yeova nupya vikwene avino alwani itu yakalonda. Tungacita uli pakuti tumanye nu kutaluka uku ufi uno alwani itu yakabepa?

MUTALEKA VINO YAUZE YAKACITA VIMULENGE MUTE UKUCINDIKA NU KUTAILA IUVI LYAKWE LEZA

13. I vyani vino alwani yakwe Leza yakalanda api uvi lyakwe?

¹³ Alwani yakwe Leza yakalanda iviipe api uvi lyakwe. Wakwe, tukabelenga umu malembo ukuti Yeova akalonda yakapepa yakwe ukuya ni miyele isuma nupya akalonda yamupepa ukulingana na vino akalonda. Walanda ukuti wensi ali ni miyele iipe nupya atakulonda ukusenuka atalinzile ukuya umu cilongano cakwe. (1 Kol. 5:​11-13; 6:​9, 10) Tukalondela isunde lii. Pa mulandu wakuti tukalondela isunde lii alwani yakwe Leza yakalanda ukuti tutaya nu mulinganya nupya tutakwata ukutemwa.

14. Uzye aweni akalenga yalanda amalyasi aufi api uvi lyakwe Leza?

¹⁴ Tulinzile ukumanya umulwani witu. Satana aliwe akalenga antu yalanda iviipe api uvi lyakwe Leza. Pano wene “ali isi wa ufi.” (Yoa. 8:44; Utan. 3:​1-5) Fwandi tulinzile ukwenekela ukuti Satana angaomvya antu yakwe ukulanda ama lyasi aufi pi uvi lyakwe Yeova.  Vikwene ivyacitikile Yesu alino na ina Klisitu akutandikilapo.

15. I vyani vino ya simapepo yacisile kuli Yesu ali nu ku yalondezi yakwe?

¹⁵ Nanti icakuti Yesu wali umumalilike nupya wacisile ivizungusyo ivingi, Satana waomvizye antu yamwi ukusalanganya amalyasi aufi pali aliwe. Wakwe, ya simapepo yalandanga ukuti amaka yano Yesu wafumizyanga iviwa wafumizye kuli “kateeka wa viwa.” (Mako 3:22) Lino yapingulanga Yesu ya simapepo yamupeezile umulandu wa kuti waitunganga ukuya mwana Leza nupya yalenzile amaumba ukutandika ukulanda ukuti Yesu alinzile ukukomwa. (Mate. 27:20) Nanti sile alino alondezi yakwe Yesu yasimikilanga Ilyasi Lisuma alwani “yaleesile icimvulunganya nu kutunka antu amu nko pakuti yakatukile aina.” (Mili. 14:​2, 19) Ukulingana na Milimo 14:​2, Lupungu Lwa Mulinzi lwakwe Dizemba 1, 1998, lwalondolwile ukuti: “Alwani yakwe Leza yatuvwanga ilyasi ilisuma ilyasimikilwanga nupya yalandanga iviipe pakuti antu yatuuvwa nupya yapate aasimikilanga.”

16. I vyani vino tulinzile ukwiusya nga tuvwa malyasi aufi?

¹⁶ Satana watwalilila ukubepa. Na ndakai kwene “aakaponzya yonsi aya pano nsi.” (Kuso. 12:9) Ndi cakuti muvwa malyasi aufi api uvi lyakwe Yeova nanti pa onsi akatungulula mwaiusya vino alwani yakwe Yeova ya cisile kuli Yesu alino nu ku ina Klisitu akutandikilako. Yesu walanzile ukuti aakakanya yalacuzya nu kulanda amalyasi aufi pa yaomvi yakwe Yeova nupya vikwene ivikucitika ndakai. (Mate. 5:​11, 12) Tutalataila malyasi ya, ndi cakuti twamanya kuno yakufuma nu kuicingilila. Tungacita uli pakuti tuicingilile?

17. Uzye tungacita uli pakuti tuicingilile uku malyasi ya ufi? (2 Timoti 1:13) (Loliniko na kambokosi kakuti “Vino Tulinzile Ukucita Nga Tuvwa ma Lyasi ya Ufi.”)

 ¹⁷ Mwakana malyasi ya ufi. Umutumwa Paulo walanzile pali vino tulinzile ukucita nga tuvwa malyasi aufi. Wanenyile Timoti ukuti ‘uwakalipila yamwi ukuti. . . yataika mano uku malyasi ya ufi’ nupya wamunenyile ukuti “uwakana malyasi ya ufi.” (1 Tim. 1:​3, 4; 4:7) Elenganyini pali cii, umwana angatoola icintu apansi nu kwika umu kanwa nomba uwikolo wene atanga acite vivyo pano ala watamanya ukuti amalwala nga walya. Vikwene avino caya, tukaakana amalyasi ya ufi pano twamanya kuno yakafuma. Lelo lyonsi tukauvwa uku “mazwi asuma” a cumi.—Belengini 2 Timoti 1:13.

18. Uzye tungalanga uli ukuti tukataizya api syuko lino twakwata ilya kuya umwi uvi lyakwe Yeova?

¹⁸ Itulanda sile pa vintu vitatu vino tungalangilamo ukuti tukukolanya Yesu. Lino mukuisambilizya Baibo mwalola inzila na zyuze zino mungalangilamo ukuti mukakolanya Yesu. Mwaazwa aya umu cilongano cinu ukutaizya alino nu kutaila sana icilongano cakwe Yeova. Mutwalilile ukutaila iuvi lyakwe Yeova lino mukutwalilila ukumuombela alino nu kutwalilila ukuya umwi uvi lyakwe lino akaomvya pa kufikilizya ukulonda kwakwe. (Masa. 37:28) Fwandi lekini lyonsi twataizya api isyuko lino twakwata ilya kuombela pamwi na antu yakwe Yeova aya nu kutemwa nupya acisinka.