1. I vyani vino Yeova akalonda twacita?

 ATWALANE yakauvwa ningo sana nga yakwata umwana. Nanti icakuti yakauvwa ningo umwana nga wavyalwa yasilonda atwalilila ukuya akanya. Yangasakamala sana ndi cakuti umwana atakukula. Vikwene avino caya na kuli Yeova akauvwa ningo nga twatandika ukusambilila pali aliwe nomba asilonda tupeleela sile pa kusambilila. (1 Kol. 3:1) Lelo akalonda tuye “ikolo” muli vyakwe Leza.—1 Kol. 14:20.

2. I vya vino tumasambilila umu cipande cii?

² Uzye cikapiliula cani ukuya aikolo muli vyakwe Leza? Tungacita uli pakuti tuye aikolo muli vyakwe Leza? Uzye ukuisambilizya icumi icizike kungatwazwa uli ukukula muli vyakwe Leza? Nupya umulandu cii uno tutalinzile kuitaila sana? Umu cipande cii tumaasuka amauzyo yaa.

UZYE CIKAPILIULA CANI UKUYA AIKOLO MULI VYAKWE LEZA?

3. Uzye cikapiliula cani ukuya aikolo muli vyakwe Leza?

³ Izwi lino yasenula muli Baibo ilya Cigiliki ilyakuti “ukuya aikolo” likapiliula nu kuti “umumaliilike,” nanti “mufumaluke.” a (1 Kol. 2:6.) Wakwe vino umuntu akatwalilila kukula, avino naswe kwene tukalondekwa ukutwalilila ukulunduluka pakuti tuye aikolo muli vyakwe Leza. Na lino twaya aikolo muli vyakwe Leza tulinzile ukutwalilila ukulunduluka. (1 Tim. 4:15) Swensi ukwikako sile na acance tungaya aikolo muli vyakwe Leza. Nomba tungacita uli pa kuti tumanye nga tukukula muli vyakwe Leza?

4. I vyani ivikalangilila ukuti umuntu wakula muli vyakwe Leza?

 ⁴ Umuntu uwakula muli vyakwe Leza aka cita vyonsi vino Yeova akalonda. Nomba pa mulandu wakuti atamalilika angaluvyanya. Lelo lyonsi akalanga ukuti akaelenganya nu kucita vino Yeova akalonda. Akazwala untu upya nu kulalondesya lyonsi ukulalola ivintu wakwe vino Yeova akavilola. (Efes. 4:​22-24) Akapingula ningo pa vintu ukulingana na masunde alino ni visinte vino Yeova watupeela. Nupya akalondela vino watapingulapo.—1 Kol. 9:​26, 27.

5. Intazi ci zino umuntu aatakula muli vyakwe Leza angakwata? (Efeso 4:​14, 15)

⁵ Cikaanguka sana umuntu aatakula muli vyakwe Leza ukuzumila “usomvi”, alino ni nzila zya “ucenjezi” nupya akazumila vyonsi vino uvwa kumwi sile ni vikufuma uku yasangu. b (Belengini Efeso 4:​14, 15.) Insita zimwi umuntu aatakula muli vyakwe Leza angakwata uzuwa, ukupanga ivimvulunganya, ukusoka zuwa alino nupya angacita iviipe nga weziwa.—1 Kol. 3:3.

6. Umulandu cii uno tungakolanyizizya ukukula muli vyakwe Leza uku mwana akukula? (Loliniko ni cikope.)

⁶ Wakwe vino itulanda pa kutandika amalembo yakakolanya umuntu aakukula muli vyakwe Leza kuli vino umwana akakula. Kwaya ivintu ivingi vino umwana asimanya lino akukula fwandi akalondekwa uwa kumucingilila nu kumutungulula. Wakwe, ya nyina yanganena umwanao ukuti ayalema pi kasa lino ya kulambuka umuseo. Lino umwana akuya ukukula ya nyina yangazumilizya umwana ukutandika ukulamba umuseo ala ali wenga nomba yangatwalilila ukumwiusyako ukuti alinzile kulola ndi cakuti kuli motoka akwiza lino atatala walamba umuseo. Ndi cakuti umwana wakula akatandika ukuicingilila umwineco. Wakwe vino umwana akalondekwa ukucingililwa, avino nu mwina Klisitu aatakula muli vyakwe Leza akalondekwa uwazwilizyo ukufuma ku ina Klisitu aakula muli vyakwe Leza pakuti angataluka uku vintu ivingonona ucuza wakwe na Yeova alino na pakuti aapingula ningo pa vintu. Umwina Klistu uwakula muli vyakwe Leza wene lino akulonda ukupingula pa vintu akalondela ivisinte vya muli Baibo pakuti amanye vino  Yeova akalola ivintu vivyo alino nu kucita vivyo kwene.

7. Uzye umwina Klistu uwakula muli vyakwe Leza nawe akalondekwa ukupandwa mano?

⁷ Uzye umwina Klistu uwakula muli vyakwe Leza asilondekwa ukupanda amano? Awe. Aakula muli vyakwe Leza nayo kwene yakalondekwa ukupandwa mano. Nomba aatakula muli vyakwe Leza yene yakalonda uwa kuyanena ivyakucita na lino yalinzile ukuipingwila. Lelo Umwina Klistu uwakula muli vyakwe Leza akalenga uwazwilizyo ala atamanya ukuti aliwe alinzile ukuipingwila pali vimwi nupya akamanya ukuti alinzile ukuisendela “icisendo cakwe.”—Gala. 6:5.

8. Uzye aina Klistu aakula muli vyakwe Leza yapusana uli?

⁸ Wakwe vino antu yapusana imilolekele, ali vino na Ina Klistu aakula muli vyakwe Leza yapusana imiyele wakwe amano, kusipa, ukapekape, alino na vino yakayuvwa vimwi nga vya citika. Ndi cakuti vimwi vyacitikila Ina Klistu yaili aakula muli vyakwe Leza yangapingula ukulingana na vino malembo yakalanda lelo vino yangasoololapo ukucita vingapusana. Sana sana ndi cakuti yalinzile ukuomvya kampingu pali vino ivicitika. Ukumanya vii kuyazwa ukukana pingula yauze pali vino yapingulapo. Cino yakaikako sana amano ukutwalila ukuya alemane.—Loma 14:10; 1 Kol. 1:10.

UZYE UKUISAMBILIZYA ICUMI ICIZIKE KUNGATWAZWA ULI UKUKULA MULI VYAKWE LEZA?

9. Uzye tukakula uli muli vyakwe Leza? Londololini

⁹ Umwana akakula lino manda yakuya yakupita nomba umuntu atanga akule muli vyakwe Leza ndi cakuti ataombisye. Wakwe, aina na ya nkazi amu Kolinto yapokelile ilyasi ilisuma, yabatiziwe, yapokelile umu pasi wa muzilo nupya yasambilile ivingi kuli vino umutumwa Paulo wasambilizyanga. (Mili. 18:​8-11) Nomba yamwi yatakuzile muli vyakwe Leza nanti icakuti papisile imyaka. (1 Kol. 3:2) Uzye tungacita uli pakuti ivyamusango uu vitatucitikila?

10. I vyani vino tulinzile ukucita pakuti tukule muli vyakwe Leza? (Yuda 20)

¹⁰ Pakuti tukule muli vyakwe Leza icakutandikilapo tulinzile ukulalondesya ukuya aikolo muli vyakwe Leza. Yayo atatemwa “umanyililo,” nupya asilonda ukusambilila na vyuze yatalakula muli vyakwe Leza. (Mapi. 1:22) Tusilonda ukuya wa antu aikolo akalonda avyazi yao ukulayapingwila pa vintu. Swemo twamanya ukuti tukalondekwa kuisoolwela nu kusininkizya ukuti ucuza witu na Yeova ukukulilako. (Belengini Yuda 20.) Ndi cakuti mucili mukuombesya ukuti mukule muli vyakwe Leza, mulinzile ukutwalilila ukupepa pakuti amupeele “amaka nu mwenzo wa kulondesya ukuomba.”—Filipi 2:13.

11. I vyani ivingatwazwa ukulunduluka muli vyakwe Leza? (Efeso 4:​11-13)

¹¹ Yeova wamanya ukuti tutanga tulunduluke ukwaula ukwazwa kwakwe. Yayo akwata umulimo wa kucema nu kusambilizya umu cilongano yaipekanya lyonsi ukwazwa antu ukuya “aikolo” muli vyakwe Leza, “wakwe viivi kwene vino Klistu waya.” (Belengini Efeso 4:​11-13.) Yeova akatwazwa ukuomvya umupasi wakwe pakuti “twakwata melenganyo yakwe Klistu.” (1 Kol. 2:​14-16) Leza wazwile alembanga amabuku 4 amalandwe ukulanda pali vino Yesu welenganyanga, walandanga alino na vino wacitanga lino waombanga umulimo wa kusimikila pano nsi. Tungakwanisya ukukula muli vyakwe Leza ndi  cakuti tukukolanya vino Yesu welenganyanga na vino wacitanga.

VINO UKUISAMBILIZYA ICUMI ICIZIKE KUNGATWAZWA

12. Uzye “visambilizyo vya kutandikilako pali Klistu” ali vyani?

¹² Pakuti tukule muli vyakwe Leza tulinzile ukumanya ivintu ukucila na pa “visambilizyo vya kutandikilako pali Klistu,” Kuli kuti ivintu vino umwina Klistu akatandikilapo ukusambilila. Pa vintu vino umwina Klistu akatandikilapo ukusambilila paya ivikalanda pa kulapila, utailo, kubatiziwa, alino nu kutuutuluka. (Aeb. 6:​1, 2) Ivintu vii avino umwina Klistu wensi akatandikilapo ukusambilila. Fwandi ukwene uli mulandu uno umutumwa Petulo walandiile pa vintu vii uku maumba pa pentekositi. (Mili. 2:​32-35, 38) Tulinzile ukuzumila ivisambilizyo vii pakuti tuye asambi yakwe Yesu. Paulo walanzile ukuti wensi uwakana ukuzumila umu kutuutuluka ala asi mwina Klistu. (1 Kol. 15:​12-14) Pa cisila cakuti twasambilila pa vintu vii tulinzile ukutwalilila ukuisambilizya.

13. I vyani vino tulinzile ukucita pakuti twaipakizya ivyakulya ivyalumbulwa pa ya Aebele 5:14? (Loliniko ni cikope.)

¹³ Umuntu akalya ivyakulya ivikome wene asimanya sile amasunde yakwe Yeova lelo akamanya ivisinte ivikamwazwa uku manya vino Yeova akalola ivintu. Pakuti twaipakizya ivyakulya vii tulinzile ukulaisambilizya lyonsi ukwelenganya pali vino tukuisambilizya alino nu kuviomvya. Nga tukucita vivyo tulasoolola ivintu ivikazanzya Yeova. c—Belengini Aebele 5:14.

14. Uzye Paulo wazwile uli aina Kolinto ukukula muli vyakwe Leza?

¹⁴ Aina Klisitu aatakula muli vyakwe Leza cikayatalila sana ukupingula pa vintu ndi cakuti cikulondekwa ukuomvya visinte vya muli Baibo. Ndi cakuti pasi isunde ilya mukulungatika yamwi yangelenganya ukuti yalinzile ukucita vino yatemwa. Yamwi yangalonda amasunde na lino pasi isunde lyakulondela. Cikaloleka kwati Ina Klistu ali umu kolinto yuzizye paulo ndi cakuti yalizile ukulya  ivyakulya ivyapeezilwe uku tulubi. Lelo paulo ataayanenyile ivyakucita, pano wamanyile ukuti yalondekwanga ukuomvya ya kampingu yao nupya cila muntu wakwata insambu “izya kuisoolwela.” Walanzile pa cisinte cimwi ica muli Baibo icali nu kuyazwa ukutwalilila ukuya na kampingu musuma alino nu kukanasosya yauze pa cisila ca kupingula pali vimwi. (1 Kol. 8:​4, 7-9) Paulo wazwile aina kolinto ukulaipingwila pa vintu uku cila ukulolela yamwi uku yanena ivya ukucita nanti ukulonda amasunde amukulungatika.

15. Uzye Paulo wazwile uli Aina Klistu Aebele ukukula muli vyakwe Leza?

¹⁵ tukasambilila masambililo acindame kuli kalata wino Paulo walembiile Aebele. Yamwi yatiile ukukula muli vyakwe Leza nu kuswilila “uku mukaka, . . . [nu kuta] ukulya ivyakulya ivikome.” (Aeb. 5:12) Yatatwalilile ukuzumila ukusambiliziwa na Yeova. (Mapi. 4:18) Wakwe, Ayuda ingi yatwalilile ukulondela amasunde yakwe Mose na pa cisila ca myaka 30 ukufuma pano Yesu wapeelile ilambo. (Loma 10:4; Tito 1:10) Kwene cali nu kwangukila ayuda ukusenuka muli vino yelenganyanga pa myaka yii yonsi 30. Nga mwabelenga kalata wino Paulo walembiile Aebele mungasininkizya ukuti walondanga ukuyazwa ukuvwikisya. Kalata wino wayalembiile wayazwile ukutaila sana inzila ipya ino Yesu walesile iyakupepelamo Yeova alino nu kuyazwa ukwika sana amano uku mulimo wa kusimikila asi mulandu na antu aakanyanga.—Aeb. 10:​19-23.

MUTAITAILA SANA

16. Lino tukulunduluka muli vyakwe Leza, i vyani vyuze vino tulinzile uku cita?

¹⁶ Tutalinzile sile ukuombesya pakuti tukule muli vyakwe Leza lelo tulinzile ukutwalilila. Pakuti tucite vivyo tutalinzile ukuitaila sana. (1 Kol. 10:12) tulinzile ukutwalilila ‘ukuyezya’ pakuti twalola nga tukulunduluka.—2 Kol. 13:5.

17. Uzye kalata ino Paulo walembiile Aina Kolose yalangilile uli uku yalondekwanga ukutwalila ukuya aikolo muli vyakwe Leza?

¹⁷ Muli kalata wino Paulo walembiile Aina Kolose walanzile pa kutwalilila ukuya uwikolo muli vyakwe Leza. Nanti icakuti yali aikolo muli vyakwe Leza Paulo wayanenyile ukuti  yalinzile uku taluka uku myelenganyizizye ya mu nsi. (Kolo. 2:​6-10) Nupya Epafula uwamanyile ningo antu amu cilongano cii wayapepelanga ukuti yatwalilile ‘ukwimilila ndi,’ wa yantu aakula muli ukapepa. (Kolo. 4:12) I vyani vino tungasambililako? Paulo na Epafula yamanyile ukuti umuntu pakuti atwalilile ukuya uwikolo muli vyakwe Leza alinzile ukuombesya nu kulenga uwazwilizyo uku fuma kuli Leza. Yalondanga Aina Kolose yatwalilile ukuya aikolo muli vyakwe Leza nanti icakuti yakwatanga intazi.

18. I vyani vingacitikila Umwina Klistu uwakula muli vyakwe Leza? (Loliniko ni cikope.)

¹⁸ Paulo wanenyile Aebele ukuti nu Umwina Klistu uwakula muli vyakwe Leza nawe kwene nga atacenjile Yeova angata ukuzangila muli aliwe. Umwina Klisitu nga wata ukulondela masunde yakwe Leza cingamutalila ukulapila nupya Yeova atanga amwelele. Cazifile sana ukuti icamusango uu citacitikile Aebele. (Aeb. 6:​4-9) Uzye cikaya uli kuli yano yatonta nanti kuzingwa lyene pa cisila iza yalapila? Ndi cakuti yalapila yakalanga ukuti yataya wa yantu yano Paulo walandangapo. Lelo nga yawela kuli Yeova yakalondekwa uwazwilizyo. (Ezek. 34:​15, 16) Ya eluda yangatantika umwina nanti nkazi uwakwazwa uwatatonta ukukomya ucuza wakwe na Yeova nupya.

19. I vyani vino tulinzile ukulalondesya sana ukucita?

¹⁹ Ndi cakuti mukuombesya ukulunduluka muli vyakwe Leza mulaya akalamba. Mutwalilile ukulya ivyakulya ivikome nupya mwaezya ukulola ivintu wakwe vino Yeova akavilola. Nupya ndi cakuti mwakula mpiti muli vyakwe Leza mutwalilile ukulunduluka.