1. Uzye yamwi yakauvwa uli ukulanda na antu umu mulimo wa kusimikila? (Loliniko ni cikope.)

 SWE antu yakwe Yeova tukaomba umulimo wa kusimikila pa mulandu wakuti twatemwa Tata witu uwa kwi yulu nupya tukalonda ukwazwa anji ukumumanya. Yakasimikila aingi yakaipakizya ukuomba umulimo uu. Nomba yamwi yene cikayatalila. Umulandu cii? Yamwi yakwata insonyi nupya yakalola ukuti yatanga yakwanisye. Yamwi nayo yatatemwa ukuya uku mang’anda ya antu ndi cakuti yatayamile. Yamwi yakatiina ukuyazinga. Yamwi nayo yasilonda ukusosya yauze. Aina ya na ya nkazi yatemwa sana Yeova nomba cikayatalila sana ukusimikila ilyasi lisuma uku yantu yano yatamanya ningo. Nomba yamanya vino umulimo uu wacindama fwandi yakaezya na maka ukuombako. Ukwaula nu kutwisika Yeova akauvwa ningo sana.

2. Umulandu ci uno mutalinzile ukutoovoka ndi cakuti cikumutalila ukuya ni nsansa umu mulimo wa kusimikila?

² Uzye insita zimwi cikamutalila ukuya nu luzango lino mukuomba umulimo wa kusimikila pa mulandu na vino mukayuvwa? Nga vino cili, mutalinzile ukutoovoka. Insita zimwi ukulola ukuti mutanga mukwanisye kungalanga ukuti mwaicefya, musilonda antu yaika amano kuli mwemwe nupya musilonda ukupazyanya na antu. Swensi kwene tusilonda ukutukanya, sana sana ndi cakuti tukulonda ukucitila yauze ivisuma. Tata winu uwa kwi iyulu wamanya vino mukayuvwa nupya akalonda ukumwazwa. (Eza. 41:13) Umu cipande cii tumasambilila  pa vintu 5 ivingamwazwa ukumala intazi zino mukakwata na vino mungacita pakuti mwaipakizya umulimo wa kusimikila.

MWALEKA IZWI LYAKWE LEZA LYAMUKOMYA

3. I cani cazwile Yelemiya ukulasimikila?

³ Ukufuma sile na mpiti, izwi lyakwe Leza likakomya antu yakwe ndi cakuti yapeelwa imilimo itale ukuomba. Wakwe, Elenganyini pali vino vyacitikile kasesema Yelemiya. Lino Yeova wapeezile Yelemiya umulimo wa kusimikila uvwile sana intete. Watiile “nemo nene mwance, nupya ntamanya ivyakuvwanga.” (Yele. 1:6) Nomba i cani camwazwile ukuya umusipe? Izwi lyakwe Leza ilyamwazwile ukuya umusipe. watiile: “ilandwe lyako iliya wa kulunkuma kwa moto. Nu munteo zyane ala mumila, nani inezya kuyacinyintila apapezile amaka yane, lelo mucumi imposiwa kucita cico.” (Yele. 20:​8, 9) Nanti cakuti Yelemiya wakweti icifulo ca kusimikilamo icitale, amazwi yakwe Leza yano wali nu kunena antu yamukomizye.

4. I vyani ivikacitika ndi cakuti tukubelenga izwi lyakwe Leza nu kwelenganyapo sana? (Kolose 1:​9, 10)

⁴ Aina Klistu yakakomeleziwa ndi cakuti yabelenga izwi lyakwe Leza. Lino Paulo walembelanga Aina Efeso kalata, wayanenyile ukuti ukumanya ningo icumi kwali nu kuyalenga yacita “ivintu wa yantu aakapepa Yeova” lino yakuomba “imilimo isuma.” (Belengini Kolose 1:​9, 10.) Apa milimo isuma paya nu umulimo wa kusimikila. Fwandi ndi cakuti tukubelenga Izwi Lyakwe Leza nu kwelenganyapo sana, tukataila sana Yeova nupya tukamanya umulandu uno cacindamila ukuomba umulimo wa kusimikila

5. Tungacita uli pakuti twaipakizya lino tukubelenga nu kuisambilizya Baibo?

⁵ Pakuti tuipakizye lino tukuisambilizya Izwi Lyakwe Leza, tulinzile kutala twimilila nu kwelenganya pali vino tukubelenga. Mwakwata insita ikulu. Ndi cakuti mwavilwa ukuvwikisya ivyeo vimwi apilembo limwi mutalinzile ukuya apilembo lyuze. Lelo, mwaezya ukuomvya Ibuku Ilya Kwazwa Inte Zyakwe Yeova Ukulondelezya Ivyeo nanti impapulo zyuze pa kuzana ulondolozi wi lembo. Ndi cakuti muli ateekele lino mukuisambilizya, mulakomya utailo winu uwakuti amazwi yakwe Leza acumi. (1 Tesa. 5:21) Nupya ndi cakuti utailo winu wakomelako, mulaipakizya ukunenako yauze vino mukusambila.

 MWAIPEKANYA NINGO LINO UTATALA MWAYA UMU KUSIMIKILA

6. Umulandu cii uno tulinzile ukuipekanyizizya lino tutatala twaya umu kusimikila?

⁶ Ndi cakuti mukuipekanya ningo lino mutatala mwaya umu mulimo wa kusimikila, cilamwangukila ukusimikila. Na Yesu kwene wazwile asambi yakwe ukuipekanya lino yatatala yaya umu kusimikila. (Luka 10:​1-11) Nupya pa mulandu wakuti yaomvyanga vino wayasambilizye, asambi yali sana nu luzango lino yaombanga umulimo wa kusimikila.—Luka 10:17.

7. Tungacita uli pakuti tuipekanye lino tutatala twaya umu kusimikila? (Loliniko ni cikope.)

⁷ Tungacita uli pakuti tuipekanye? Tulinzile ukumanya ningo vino tungalondolola icumi umu mazwi itu. Ukwelenganya pali vino antu aya umu cifulo cino tukasimikilamo yangaya yakalande kungatwazwa ukumanyila limwi ivya kucita. Lino tukulanzyanya na antu, tungezyako ukuteekela, ukumwentula nu kulanga ucuza.

8. Uzye Aina Klistu yakolana uli ni nyungu zino Paulo walanzilepo umu cilangililo?

⁸ Umutumwa Paulo walanzile umulandu ucindame ukalenga twasimikila lino watiile: “tuli ni cuma cii umu nyungu.” (2 Kol. 4:7) Icuma cii cino walandangapo? Umulimo wa kusimikila apa Wene wakwe Leza ulalenga antu ukupusuka. (2 Kol. 4:1) Uzye Inyungu ali cani? Inyungu ikaimililako aomvi yakwe Leza, akanenako yauze api lyasi lisuma. Umu manda yakwe Paulo, aakazyanga ivintu yaomvyanga inyungu pa kusenda ivintu ivicindame, wakwe ivyakulya, waini, alino ni impiya. Naswe kwene Yeova watupeela ivyeo ivicindame kuli kuti ilyasi lisuma. Pa mulandu wakuti Yeova akatwazwa, twakwata amaka akunena anji api lyasi lisuma.

MWAPEPA KULI LEZA PAKUTI AMWAZWA UKUYA ASIPE

9. Tungacita uli pakuti tutatiina antu nanti ukutiina ukuti yamakana ukuvwa? (Loliniko ni cikope.)

⁹ Insita zimwi tungatiina antu nanti ukutiina ukuti yamakana ukuvwa. Nomba tungacita uli pakuti tute ukwelenganya vii? Elenganyini api pepo lino atumwa yapefile lino ya yakanyizye ukusimikila. Yene yatuvwile intete lelo yapefile kuli Yeova ukuti  ayaazwe ‘yatwalilile ukulanda api zwi lyakwe nu kusipa.’ Nupya Yeova waswike ipepo lyao papo kwene sile. (Mili. 4:​18, 29, 31) Naswe kwene ndi cakuti twatandika ukutiina antu tulinzile ukupepa kuli Yeova. Mwalenga Yeova ukuti amwazwe ukutemwa sana antu pakuti mutatiina ukuyasimikila.

10. Uzye Yeova akatwazwa uli lino tukuomba umulimo wa kusimikila? (Ezaya 43:​10-12)

¹⁰ Yeova watusoolola ukuya Inte zyakwe nupya watulaya ukuti amatwazwanga ukuya asipe. (Belengini Ezaya 43:​10-12.) Elenganyini pa nzila 4 zino akacitilamo vivyo. Cakutandikilako, Yesu akaya naswe lino tukusimikila ilyasi lisuma. (Mate. 28:​18-20) Cakwe ciili, Yeova watupeela ya malaika akutwazwa. (Kuso. 14:6) Cakwe citatu, Yeova watupeela umupasi wa muzilo ukatwazwa ukwiusya vino twasambilila. (Yoa. 14:​25, 26) Cakusyalikizya, watupeela aina na ya nkazi yano tukaombela capamwi nayo. Pa mulandu wakuti Yeova alino na aina na ya nkazi yakatwazwa, twakwata vyonsi vino tukalondekwa lino tukuomba umulimo wa ukusimikila.

MWASENUKA UKULINGANA NA VINO IVINTU VILI

11. Mungacita uli pakuti muzane antu aingi lino muli umu mulimo wa kusimikila? (Loliniko ni cikope.)

¹¹ Uzye mukatoovoka nga mwazana pa mang’anda yamwi pasi antu umu cifulo cino mukaombelamo? Nga vino cili, mwayuzya mweineco amauzyo wakwe: ‘Uzye iyaya kwi?’ (Mili. 16:13) ‘Uzye yali uku ncito nanti iyaya umu kukala vimwi?’ Nga avino cili, Uzye mutange muzane antu aingi akusimikilako umu museo? Umwina Joshua watiile, “Nkakwata isyuko lya kusimikila ilyasi ilisuma lino indi ukukazanwa antu aingi.” Ya Joshua alino na aci ya Bridget, nga yaya umu kusimikila amanguzi alino na pa Mulungu akasanya yakazana antu pa ma ng’anda.—Efes. 5:​15, 16.

12. Tungacita uli pakuti tumanye vino antu yazumilamo nanti amalyasi yano yangatemwa ukuvwa lino tukusimikila?

¹² Ndi cakuti antu yasikupokelela icumi ni nsansa, mwaelenganya pali vino yazumilamo nanti malyasi yano yangatemwa ukuvwa. Ya Joshua naya Bridget yakaomvya iuzyo ilikaya apa kapepala ki landwe pa kutandika  ukulanzyanya. Wakwe ilyakuti, Uzye Mwemo Mukati Baibo i Buku lya Musango ci? Alino iyati: “Yamwi yakati Baibo wafuma kuli leza, yamwi nayo yakatwisika. Nga mwemo mungatuuli?” Ukucita vii kukalenga yatandika ukulanzyanya nu muntu.

13. Umulandu cii uno tungalandila ukuti antu nga yakana ukuvwa cisipiliula ukuti itufilwa ukuomba umulimo uu? (Mapinda 27:11)

¹³ Antu nga yakana ukuyasimikila cisipiliula ukuti itufilwa ukuomba umulimo uu. Umulandu cii? Pano ale ituomba umulimo uno Yeova na Yesu yakalonda twaomba kuli kuti ukusimikila. (Mili. 10:42) Tukatwalilila ukuya ni nsansa lino tukuomba umulimo wa kusimikila na lino tusikuzana antu pa mang’anda na lino yakukana ukuvwa pano tukamanya ukuti tukuzanzya Tata witu uwa kwi iyulu.—Belengini Mapinda 27:11.

14. Umulandu ci uno tungayela nu luzango ndi cakuti kasimikila wazana umuntu akulondesya ukuvwa?

¹⁴ Tungaya nu luzango ndi cakuti kasimikila wazana umuntu akulondesya ukuvwa. Lupungu lwa mulinzi lwakolinye umulimo witu uku antu akulonda umwana uwataponga. Antu aingi yangatandika ukulonda umwana, nu kuya umu ncende izipusane pusane. Ndi cakuti umwana waloleka, yonsi kwene yanga sansamuka nanti cakuti umuntu wenga uwatamulola. Vikwene avino caya nu ku mulimo wakupanga asambi, tukaombela pamwi. Pakuti icifulo consi cisimikilwe yonsi yalinzile ukuombako, nupya yalinzile ukusansamuka ndi cakuti umwi watandika ukwiza umu kulongana.

MWATEMWA SANA YEOVA NA ANTU

15. Uzye Mateo 22:​37-39 ingatwazwa uli ukulalondesya ukuomba umulimo wa kusimikila? (Loliniko ni icikope icili pa nkupo.)

¹⁵ Tungaalondesya ukuomba umulimo wa kusimikila ndi cakuti twatemwa sana Yeova na antu. (Belengini Mateo 22:​37-39.) Elenganyini pali vino Yeova akauvwa ningo ndi cakuti walola mukusimikila alino na pali vino antu yalaya nu luzango ndi cakuti ya tandika ukusambilila Baibo. Mwaiusya nu kuti yayo akazumila ukusambilila icumi nu kutandika ukuombela Yeova yalikala amanda pe.— Yoa. 6:40; 1 Tim. 4:16.

16. Tungacita uli pakuti twaipakizya ukusimikila nanti cakuti tukufilwa ukufuma apa ng’anda? Langililini.

¹⁶ Uzye mukafilwa ukukwanisya ukufuma  apa ng’anda? Nga avino cili, elenganyini pali vino mungacita pakuti mwalanga ukuti mwatemwa Yeova na antu. Lino kwali icikuko cakwe COVID-19, Ya Samuel na ya Dania yatakwanisyanga ukufuma apa ng’anda. Pa nsita yonsi iya itale, yasimikilanga ukuomvya foni, makalata, alino nu kutungulula masambililo ya Baibo ukuomvya Zoom. Ya Samuel yasimikilanga uku antu yano yazananga nga yaya uku cipatala uku kuyalwazya ulwale wakwe kansa. Ya Samuel yatiile: “Intazi zikalenga twasakamala nu kutonta nupya zikaezya utailo witu. Tulinzile ukulaya ni nsansa lino tukuombela Yeova.” Lino vii vyacitikanga, ya Dania yalwazile nupya yalalanga sile pa myezi itatu. Nupya yalondekwanga ukuomvya kajinga ka yalemale pa myezi 6. Yatiile: “Nezyanga ukuomba apapezile amaka yane. Nasimikilanga kuli nasi uwizanga, alino na antu yano yandetelanga ivintu pa ng’anda. Nupya nalanzyanyanga nu mwanaci uwaombanga uku kampani akakazya ivya imilembo pa foni.” Vino vyacitikile ya Samuel na ya Dania vyalenzile yataomba sana, nomba yaombanga apapezile amaka yao nupya ukucita vii kwalenzile yaye nu luzango.

17. Mungacita uli pakuti vino itusambilila umu cipande cii vimwazwe sana?

¹⁷ Ukuomvya ivintu vyonsi 5 vino twalandapo umu cipande cii kungamwazwa sana. Ivintu vii 5 vili wa vintu vino mungaomvya pa kweleka. Ndi cakuti mwaomvya vyonsi ivikalondekwa apa kweleka ivyakulya, vikazipa sana. Ukuomvya vyonsi vino itusambilila, kulatwazwa ukumala intazi zino tukakwata nupya tulaipakizya ukuomba umulimo wa kusimikila.