1. I cani icalenga antu yakwe Yeova yaye alemane?

TWAYA ni nsansa ukuya pa yantu yakwe Yeova. U mulandu ci uno twayela ni nsansa nupya alemane? Umulandu onga u wakuti swensi tukaezya na maka ukucindika yano Yeova wapeela utunguluzi. Nga twamanya ningo vino Yeova watantika utunguluzi, tukaya sana alemane.

2. A mauzyo ci yano tumaasuka umu cipande ci?

² Umu cipande cii tumalanda pali yano Yeova wapeela utunguluzi umu cilongano. Nupya tumaasuka na mauzyo yaa: U mulimo ci uno ya nkazi yakwata? Uzye i cacumi ukuti umwina wensi wakwata amaka pali ya nkazi yonsi umu cilongano? Uzye amaka yano ya eluda yakwata pa ina na ya nkazi aliyamwi na yano umutwe wa lupwa wakwata pa muci na anakwe? Lekini tutandikilepo ukulanda pali vino tulinzile ukulalola ya nkazi.

3. I cani icilatwazwa ukucindika sana imilimo ino ya nkazi yakaomba?

³ Twacindika ya nkazi aakaombesya ukusakamala ulupwa, ukusimikila ilandwe lisuma, alino nu kwazwa yauze umu cilongano. Ndi cakuti tukwelenganya pali vino Yeova na Yesu yakayalola cilalenga twayacindika sana. Tumasambilila na  pali vino tulinzile ukucitila anaci nga twasambilila pali vino Paulo wayacitilanga.

4. Uzye Baibo ikalangilila uli ukuti Yeova wacindika anaci na onsi?

⁴ Baibo ikalangilila ukuti Yeova wacindika anaci na onsi. Ikalangilila ukuti umu nsita ya atumwa Yeova wapeezile anaci na onsi umupasi wa muzilo na maka ya kucita ivizungusyo ivili wa kulandila umu ndimi izipusanepusane. (Mili. 2:1-4, 15-18) Anaci na onsi yapakwa nu mupasi wa muzilo nupya yalateeka na Klistu. (Gala. 3:26-29) Anaci na onsi yalapokelela icilambu ca umi wa manda pe pano nsi. (Umbw. 7:9, 10, 13-15) Nupya yonsi kwene aonsi na anaci yapeelwa umulimo wa kusimikila ilandwe lisuma nu kusambilizya. (Mate. 28:19, 20) Ibuku lya Milimo likalanda pali nkazi Pulisila, wene na iya Akwila yalondolwelile ningo Apolo icumi uwali umusambilile sana.—Mili. 18:24-26.

5. Uzye ilembelo lyakwe Luka 10:38, 39, 42, likalangilila uli ukuti Yesu wacindike anaci?

⁵ Yesu wacindike sana anaci. Atakolanyanga Afaliseo alolanga anaci ukuti yatacindime nupya aatalandanga nayo apali antu aingi nanti ukulanzyanya nayo Malembelo. Nomba Yesu walanzyanyanga na anaci na onsi icumi icicindame. * (Belengini Luka 10:38, 39, 42.) Nupya wazumilizyanga anaci ukupita nawe kuno wayanga umu kusimikila. (Luka 8:1-3) Nupya Yesu wapeezile na anaci isyuko lya kunenako yonsi ukuti watatuutululwa.—Yoa. 20:16-18.

6. Uzye umutumwa Paulo walangilile uli ukuti wacindike anaci?

⁶ Mutumwa Paulo wiwisyeko Timoti ukuti alinzile ukucindika anaci. Paulo wamunenyile ukuti alinzile ukulola anaci aikolo wakwe ya nyina anaci ance wakwe “ya nkazi” yakwe. (1 Tim. 5:1, 2) Nanti icakuti Paulo waombisye ukwazwa Timoti ukuya nu utailo ukome, wiwisye ukuti ya nyina na nyinakulu yakwe Timoti amusambilizye amalembelo ya muzilo. (2 Tim. 1:5; 3:14, 15) Lino Paulo walemvile kalata ku ina Loma walumbwile mazina yakwe ya nkazi pa kuyalamuka. Paulo waweni imilimo ino ya nkazi yaa yaomvile nupya wayataizye pa milimo iyo.—Loma 16:1-4, 6, 12; Filipi 4:3.

7. A mauzyo ci lyene yano tumaasuka?

⁷ Mapalaglafu afumako yalangilila ukuti Baibo italandapo ukuti aina yacindama ukucila ya nkazi. Ya nkazi aya nu kutemwa na ukapekape yakaazwilizya sana umu cilongano. Nupya ya eluda yamanya ukuti imiyele yao isuma ingalenga amu cilongano ukuya nu mutende nupya alemane. Nanti ciye vivyo tulinzile ukwasuka mauzyo yaa: U mulandu ci uno Yeova akalondela ya nkazi ukuvimba uku mutwe insita zimwi? Vino aina sile aakasontwa ukuya ya eluda na aomvi aakatumikila, uzye cii cikupiliula ukuti umwina wensi wakwata maka pali ya nkazi yonsi umu cilongano?

8. Ukulingana na Efeso 5:23, uzye umwina wensi wakwata amaka pali ya nkazi yonsi mu cilongano? Londololini.

⁸ Uzye umwina wensi wakwata amaka pali ya nkazi yonsi mu cilongano? Icasuko i cakuti awe! Klistu u wakwata amaka. (Belengini Efeso 5:23.) Mu lupwa, iya wakwata amaka pa muci. Umwana umonsi umubatiziwe atakwata amaka ya kutungulula ya nyina. (Efes. 6:1, 2) Nupya umu cilongano ya eluda yakwata sile amaka yamwi pa ina na ya nkazi.  (1 Tesa. 5:12; Ayeb. 13:17) Anaci asimbe asiikala pali ya isi na ya nyina yakatwalilila ukucindika avyazi yao na ya eluda. Wakwe vino caya ku ina yonsi umu cilongano, nayo kwene yakakonka sile Yesu.

9. U mulandu ci uno ya nkazi insita zimwi yalinzile ukuvimbila uku mutwe?

⁹ I cacumi ukuti Yeova wasonta aonsi nu kuyapeela umulimo wa kutungulula umu cilongano, nupya atapeela anaci umulimo uu. (1 Tim. 2:12) U mulandu ci? U mulandu uli umwi na uno wasontela Yesu ukuya umutwe wa monsi pakuti umu cilongano mutaya icimvulunganya. Pa mulandu ni vikacitika limwi nkazi angalondekwa ukuomba umulimo uno umwina alinzile ukuomba, nga caya vivyo Yeova akalonda ukuti nkazi avimba uku mutwe. * (1 Kol. 11:4-7) Yeova akalonda ya nkazi yacita vivyo pa kulanga ukuti yacindika masunde yakwe asi pa mulandu wakuti akalonda yayuvwa ukuti yatacindama. Lekini lyene twasuke iuzyo lii: A maka ci yano ya eluda ni mitwe ya ndupwa yapeelwa?

10. I cani limwi icingalenga eluda alonda ukupangila amu cilongano amasunde?

¹⁰ Ya eluda yatemwa Klistu ni mfwele zino Yeova na Yesu yayapeela ukuti yasakamala. (Yoa. 21:15-17) Pa mulandu wakuti ya eluda yakasakamala icilongano cingalenga yaelenganya ukuti aaisi kuli yonsi aya umu cilongano. Fwandi eluda angaelenganya ukuti ndi cakuti umutwe wa lupwa wakwata amaka ya kupangila amu lupwa lwakwe amasunde yano akulola ukuti yangayacingilila, nawe angapanga amasunde yano akulola  ukuti yangacingilila imfwele zyakwe Leza. Nupya aina na ya nkazi yamwi yangakomelezya ya eluda ukucita vivyo lino yakuya kuli aliyo uku kuyanena ukuti yayazwe ukupingulapo pali vimwi. Nomba uzye ya eluda ni mitwe ya ndupwa yakwata maka aliyamwi?

11. Uzye imilimo ino imitwe ya ndupwa yakwata yakolana uli na ino ya eluda yakwata?

¹¹ Umutumwa Paulo walangilile ukuti imilimo ino imitwe ya ndupwa yakwata yakolanako ni milimo imwi ino ya eluda yakwata. (1 Tim. 3:4, 5) Wakwe, Yeova akalonda amu lupwa ukulauvwila umutwe wa lupwa. (Kolo. 3:20) Nupya akalonda amu cilongano ukulauvwila ya eluda. Yeova akaenekela imitwe ya ndupwa na ya eluda ukusambilizya yonsi yano yakasakamala ukutemwa Yeova. Yonsi kwene yakasininkizya ukuti yonsi yano yakasakamala yakuyuvwa ukuti yatemwikwa. Wakwe vivi kwene vino imitwe ya ndupwa ikacita, ya eluda nayo kwene yakasakamala yonsi akweti intazi umu cilongano. (Yako. 2:15-17) Nupya Yeova akaenekela ya eluda ni mitwe ya ndupwa ukwazwa yauze ukulondela masunde yakwe nu kuyacelula ukuti yatalinzile ukucila muli vino vyaya “mu malembelo.”—1 Kol. 4:6.

12-13. Ukulingana na vino Loma 7:2 ikalanda, uzye imilimo ino imitwe ya ndupwa yapeelwa yapusana uli na ino ya eluda yakwata?

 ¹² Nomba amaka yano ya eluda yapeelwa yapusana sana na yano imitwe ya ndupwa yapeelwa. Wakwe, Yeova wapeela ya eluda mulimo wa kupingula na maka ya kuzinga yakacita ya viipe aasilapila umu cilongano umulimo utapeelwa uku mitwe ya ndupwa.—1 Kol. 5:11-13.

¹³ Lelo, Yeova wapeela imitwe ya ndupwa amaka yamwi yano atapeela ya eluda. Wapeela imitwe ya ndupwa amaka akupangila amu ndupwa zyao amasunde nu kusininkizya ukuti yakulondela amasunde kwene yayo. (Belengini Loma 7:2.) Umutwe wa lupwa wakwata amaka akupingwila anakwe insita ino yalinzile ukuwela pa ng’anda. Nupya wakwata na maka ya kufulula anakwe ndi cakuti yafilwa ukulondela isunde lii. (Efes. 6:1) Kwene, lino umutwe wa lupwa atatala wapanga isunde lya lupwa alinzile ukulanzyanya na mamakwe pano yene yaya “umwili onga.” *—Mate. 19:6.

14. (a) Ukulingana na vino Mako 10:45 ikalanda, i vyani ivikalangilila ukuti calinga Yeova ukusonta Yesu ukuya umutwe wa cilongango? (b) U mulimo ci uno Iumba Ilikatungulula lyakwata? (Lolini kambokosi kakuti “ Umulimo uno Iumba Ilikatungulula lyakwata.”)

¹⁴ Ukupitila umwi lambo lyakwe Yesu, Yeova wakazile yonsi aya umu icilongano kwikako sile na yonsi aataila muli Yesu. (Belengini Mako 10:45; Mil. 20:28; 1 Kol. 15:21, 22) Fwandi icilinga ukuti wasonsile Yesu ukuya umutwe wa cilongano uwapeezile umi  wakwe pa mulandu witu. Ali mulandu uno Yesu wakwatila amaka ya kupanga amasunde pali vino antu, indupwa alino na yonsi aya umu cilongano yalinzile ukucita, nupya wakwata na maka ya kusininkizya ukuti tukulondela amasunde kwene yayo. (Gala. 6:2) Nomba kwaya na vyuze vino Yesu akacita ukucila sile ukupanga amasunde. Akatusakamala ningo nupya watutemwa swensi.—Efes. 5:29.

15-16. I vyani vino mwasambilila kuli vino nkazi Marley nu mwina Benjamin yalanzile?

¹⁵ Ya nkazi yakalanga ukuti yakucindika Klistu lino ya kulondela vino aonsi yano wasonta ukulayatungula nu kulayasakamala ya kuyanena. Ya nkazi aingi yangazumilizya vino nkazi Marley, aakaikala ku United States walanzile. Watile: “Nacindika sana umulimo uno nakwata uwakuya umuci umu lupwa alino nu kuya nkazi umu cilongano. Ndinzile ukutwalilila ukucindika utunguluzi uno Yeova wapeela ya wane na ya eluda. Nomba ya wane na ina umu cilongano yalenga cingangukile ukucita vivyo pano yancindika nupya yakataizya pa milimo ino nkaomba.”

¹⁶ Aina yakalanga ukuti yakauvwila vino Yeova watantika utunguluzi lino yakucindika ya nkazi nu kuyataizya. Umwina Benjamin, aakaikala ku England walanzile ukuti: “Nasambilila ivingi kuli vino ya nkazi yakaasuka pa kulongana na kuli vino yakaomba umulimo wa kusimikila nu kusambilizya. Nkwelenganya ukuti umulimo uno yakaomba wacindama sana.”

17. U mulandu ci uno swensi tulinzile ukwiusya icisinka cakuti Yeova wapeela yamwi utunguluzi?

¹⁷ Ndi cakuti yonsi, aonsi, anaci, imitwe ya ndupwa, na ya eluda umu cilongana yakwiusya ukuti Yeova wapeela yamwi utunguluzi, umu cilongano mukaya umutende. Ni cicindamisye i cakuti tukalumbanya Tata witu uwa kwi yulu, Yeova.—Masa. 150:6.