Ya Mary na ya iya ya John, a yakaikala uku ncende kuno ilyasi lisuma likasimikilwa ku aomvi afuma uku mpanga ya Philippines. Lino kwali ulwale wakwe COVID 19, ya Mary yatandike ukutungulula masambililo ya Baibo uku yantu akaikala umu mpanga yao alino nu ku yantu akaikala uku mpanga zyuze. Uzye yakwanisye uli ukucita vivyo?

Ya Mary yuzyanga asambi ya Baibo ukuti, “Uzye kuli aliwensi wino mwamanya angatemwa ukusambilila Baibo?” Ndi icakuti umusambi wasuka ukuti ee, lyene yamuzyanga ukuti ayatwale uku muntu wiyo. Ukuuzya iuzyo lii kukalenga ivisuma ukucitika. U mulandu ci? A pa mulandu wakuti antu akatemwa vino yakusambilila muli Baibo yakalondesya ukunenako ya lupwa ni vyuza pali vino yakusambilila. I visuma ci ivyacitika pa mulandu nu kuuzya iuzyo lii?

Asambi yakwe ya Mary, ya Jasmin yatungulwile antu 4 kuli ya Mary alondanga ukusambilila Baibo. Yonga pali yaa yali aa Kristine, aipakizyanga sana ukusambilila Baibo na ya Mary nupya yayalenzile ukuti yasambilila imiku iili mu mulungu. Lino yuzizye ya Kristine ndi icakuti yamanyako yamwi angatemwa ukusambilila Baibo, yazumile nupya yatiile, “Namamutungulula na kuli ya cuza yane.” Lino papisile imilungu inono, ya Kristine yatungulwile ya Mary uku yauze 4 atandike ukusambilila. Lino papisile insita, yamwi pali yaa nayo yatungulwile na yauze kuli ya Mary nu kutandika ukusambilila Baibo.

Ya Kristine yalondanga ukuti na ya lupwa yao aaku Philippines nayo kwene yasambilile Baibo. Fwandi yalanzile nu mwanao Andrea. Pa kutandika Andrea welenganyanga ukuti, ‘Upefi wakwe Ya Nte Yakwe Yeova u wa ufi, yatazumila muli Yesu nupya yakaomvya sile malembo amuli Baibo wa Upangano wa Mpiti.’ Lelo lino wasambilile sile umuku onga, wasenwike muli vino welenganyanga pali ya Nte yakwe Yeova. Lyonsi lino wasambililanga ivipya ivya muli Baibo walandanga ati, “Pa mulandu wakuti vikufuma muli Baibo, fwandi i vya cumi!”

Lino papisile insita, Andrea watungulwile ya cuza yakwe yaili kuli ya Mary alino na kuli wino waombanga nawe nupya yonsi yatandike ukusambilila Baibo. Andrea wakweti ya nyinasenge ya Angela, aali impafu nupya aakutikanga lyonsi ndi cakuti yakusambilila lelo ya Mary yatamanyile. Lyene wanda umwi, ya Angela yanenyile Andrea ukuti anene ya Mary ukuti nayo kwene yakulonda ukulasambilila Baibo. Ya Angela yatemilwe vino yasambililanga. Umu mwezi sile onga, ya Angela yasungiile amalembo aingi ku mutwe nupya yalondanga ukulasambilila imiku 4 cila mulungu. Nupya  Andrea wayazwile ukulakutika uku kulongana ukuomvya intaneti.

Lino ya Mary yamanyile ukuti ya Joshua ya iya yakwe ya Kristine yakutikanga lino yasambililanga na ya Kristine, ya Mary yayuzizye ndi cakuti yangatemwa ukusambilila pamwi nayo. Ya Joshua yaswike ukuti, “Namakutikangako sile, lelo kusi kunguzya mauzyo pano nga mwanguzya, ale namafumapo.” Lino papisile sile mamineti 5 ukufuma pano yatandikiile ukusambilila, ya Joshua yatandike ukuzya mauzyo aingi ukucila ya Kristine nupya yalondanga ukutwalilila ukusambilila.

Iuzyo ilyangupale lino ya Mary yuzyanga lyalenzile ukuti yakwate masambililo aingi sana. Nupya masambililo ya Baibo aingi yayapeezile kuli ya Nte yauze ukuti aliyo yayasambilizya. Fwandi masambililo yonsi yano yakweti yali 28 ukufuma umu mpanga 4.

Ya Jasmin, yano itulandapo aali asambi ya kutandikilapo yano ya Mary yasambilizyanga, izile iyabatiziwa umu Epuleo 2021. Ya Kristine nayo yabatiziwe umu Mei 2022 nupya yaswilila kuli ya lupwa lwao uku Philippines. Asambi yauze yaili yano ya Kristine yatungulwile kuli ya Mary nayo kwene yabatiziwe. Ya Angela izile iyabatiziwa pa cisila ca myezi inono nupya ndakai yakaomba upainiya wa nsita yonsi. Ya Joshua ya iya yakwe ya Kristine, nu mwanao Andrea, alino na asambi yauze nayo yakulunduluka.

Umu manda ya Ina Klistu akutandikilapo, antu aingi yanenanga ya lupwa ni vyuza pali vino yasambililanga pali Yesu. (Yoa. 1:​41, Mili. 10:​24, 27, 48; 16:​25-33) Namwe kwene mwauzya asambi inu aa Baibo alino na antu aakulonda ukusambilila Baibo iuzyo lyakuti, “Uzye kuli aliwensi wino mwamanya angatemwa ukusambilila Baibo?” Ndi cakuti mukuzya iuzyo lii, cilalenga ukuti mukakwate masambililo aa Baibo aingi.