Uzye namwe mwalola ukuti antu aingi ndakai yakalola ukuti antu yauze yalinzile ukulayalola ukuti yacindama sana ukucila yauze, yalinzile ukupeelwa, insambu, nanti ivifulo ivicindame ukucila yauze? Asi mulandu ni vintu uwingi vino yangakwata, yakaelenganya ukuti yalinzile sile ukukwata na vyuze. Antu aakaelenganya vii, yaya na ukaitemwe nupya yasitaizya pali vino yakwata. Vikwene ali vino na Baibo yalanda ukuti i vilacitika umu manda akusyalikizya.—2 Tim. 3:2.

Ukuya kwene, ukufuma na mpiti kwaya antu aya na ukaitemwe. Wakwe, Adamu na Eva yalondanga ukulaisoololwela ivya kucita, na cii calenga ukuti twacula pa mulandu na vino yapingwilepo. Uziya Umwene wa Yayuda, nawe welenginye ukuti walinzile ukupeela ivinunkile api tempele, lelo aatakweti insambu zya kucita vivyo. (2 Mila. 26:​18, 19) Nupya Afaliseo alino na Asaduki yazumile ukuti antu yalinzile ukulayacitila ivintu ivisuma ukucila antu aasyala pa mulandu wakuti yafumile umu lupwa lwakwe Abulahamu.—Mate. 3:9.

Tukaikala na antu aaya na ukaitemwe nupya aakailola ukuti yacindama ukucila yauze, nupya yangalenga twaelenganya wakwe aliyo. (Gala. 5:26) Tungatandika ukwelenganya ukuti tulinzile ukupeelwa umulimo umwi nanti ukutucitila ivintu ivisuma ukucila yauze. I vyani ivingatwazwa ukuta ukuya na melenganyo ya musango uu? Ica kutandikilapo, tulinzile ukumanya vino Yeova akaelenganya pa vintu vivyo. Ivisinte vya muli Baibo viili vingatwazwa.

 Yeova aliwe akasoolola vino tulinzile ukupokelela. Elenganyini pa vii.

• Umu lupwa, iya akalonda umuci wakwe ukumucindika, nu muci akalonda ukulayuvwa ukuti watemwikwa kuli iya wakwe. (Efes. 5:33) Yeova walanda ukuti atwalane yalinzile ukulatemwana nupya yatalinzile ukulalanga icintemwa kuli yauze. (1 Kol. 7:3) Avyazi yakalonda ukuti ana yao yaya ni cuvwila kuli aliyo, ana nayo yakalonda ukuti avyazi yayasakamala nu kuyatemwa.—2 Kol. 12:14; Efes. 6:2.

• Umu cilongano, Yeova walanda ukuti tulinzile ukucindika ya eluda pa mulandu na vino yakaombesya. (1 Tesa. 5:12) Nanti ciye vivyo, ya eluda yatakwata amaka aakutungulula aina na ya nkazi muli vyonsi.—1 Pet. 5:​2, 3.

• Leza wazumilizya mauteeko ukulapoka imisonko alino nu kulapokelela umucinzi kuli yano yakateeka.—Loma 13:​1, 6, 7.

Yeova akatupeela ukucila na pali vino tukalondekwa. Pa mulandu wakuti twapyana uluyembu ukufuma kuli Adamu, tukalondekwa sile ukufwa. (Loma 6:23) Lelo pa mulandu wakuti Yeova waya nu kutemwa watupeela ivintu ivingi ivisuma. (Masa. 103:​10, 11) Ivintu vyonsi ivisuma vino tukapokelela na masyuko yano tukakwata ukufuma kuli aliwe a pa mulandu ni cikuuku cikulu cino wakwata.—Loma 12:​6-8; Efes. 2:8.

Mwacenjela pakuti mutaelenganya wa yantu amu nsi. Ndi cakuti tutacenjile, tungatandika ukwelenganya ukuti tulinzile ukukwata ivingi ukucila yauze. Yesu walanzile pali vino tungatandika ukuya na melenganyo yaa lino waomvizye icilangililo ca yaomvi aapeezilwe dinali. Aomvi yamwi yatandike ukuomba katondo nupya yaomvile wanda onsi, lyene yauze yene yaomvile sile api awala lyonga. Amwi iumba ilya kutandikilapo yelenginye ukuti yali nu kuyapeela impiya izingi pa mulandu nu mulimo uno yaomvile. (Mate. 20:​1-16) Cino Yesu walandangapo umu cilangililo cii i cakuti, alondezi yakwe yalinzile ukulataizya pali vino Leza wayapeela.

Mwataizya nupya mutaenekela ukupokelela ivintu ukufuma kuli yauze. (1 Tesa. 5:18) Mwakolanya umutumwa Paulo, aatalenganga uku ina  amu Kolinto nanti cakuti wakweti insambu izya ukucita vivyo. (1 Kol. 9:​11-14) Tulinzile ukulataizya pa vintu vyonsi vino antu yakatupeela nupya tutalinzile ukulapatikizya yauze ukuti yatupeela vino tukulonda.

Mulinzile ukuya aicefye. Antu akailola ukuti yacindama sana, insita izingi yakaelenganya ukuti yalinzile ukukwata ivintu na vyuze ukucila pali vino yakwata. Ukuya aicefye kulatwazwa ukuta ukuya na melenganyo yaa aipe.

Kasesema Danieli wali u muntu umuicefye wino tungakolanya. Wafumile umu lupwa ulwakweti ivyuma, walolekanga ningo, nupya wamanyile imilimo iingi. Fwandi vii nga vyalenzile ukuti aye ni cilumba. (Dan. 1:​3, 4, 19, 20). Lelo, Danieli watwalilile ukuya umuicefye nupya imiyele yalenzile ukuti Yeova amutemwa sana.—Dan. 2:30; 10:​11, 12.

Lekini twataluka uku miyele iya ukaitemwe nu kukanailola ukuti twacindama ukucila yauze. Lelo tulinzile ukutwalilila ukuya ni nsansa pa visuma vino Yeova akatucitila pa mulandu ni cikuuku cakwe cikulu.