UZYE mwatala mwakwatapo intazi yakuti kusi nu muntu ali wensi uwakuti amwazwe? Tukaikala umu “insita izitale” izingalenga twasakamikwa nu kuyuvwa ukuti tuli swenga. (2 Tim. 3:1) Nanti ciye vivyo, ndi cakuti twakwata intazi, kwaya antu angatwazwa. Baibo yalanda umulandu uno cacindamila ukukwata cuza wa cumi lino tukucula.—Mapi. 17:17.

Umutumwa Paulo wapitanga na ya cuza yakwe pa ulendo wakwe umisyonali nupya yamwazwile umu nzila izingi. (Kolo. 4:​7-11) Lino Paulo wali umu cifungo umu Loma, ya cuza yakwe yamwazwile ukuomba imilimo ino atakwanisyanga ukuomba. Wakwe, Epaflodito watwalilanga Paulo ivintu vino aina na ya nkazi amu Filipi yatumilanga Paulo. (Filipi 4:18) Tikikasi watwalanga makalata yakwe Paulo uku vilongano ivipusanepusane. (Kolo. 4:7) Pa mulandu na vino ya cuza yakwe yamutungililanga, calenzile ukuti Paulo akomelezye amu vilongano nanti cakuti yatamuzumilizye ukufuma pa ng’anda, na lino izile iyamwika umu cifungo. I vyani vino mungacita pakuti muye cuza wa cumi ndakai?

Kwaya aina na ya nkazi ndakai aakalangilila vino ukuya cuza wa cumi kwacindamila. Ya Elisabet, ya painiya aku Spain, yalondolwile vino nkazi umwi wayazwile lino yakweti intazi. Lino ya nyina yayazanyile na kansa, nkazi watumilanga ya Elisabet mameseji akuyakomelezya ukufuma umu malembo amuli Baibo. Ya Elisabet yalanzile ukuti, “Lino nalolanga mameseji yaa, nayanga ni nsansa ukumanya ukuti kwali umuntu umwi uwelenganyanga pali nene, nupya cii cankomelezyanga ukutwalilila ukuomba umulimo uno nalondekwanga ukuomba.”—Mapi. 18:24.

Tungakomya ucuza uno twakwata na ya kapepa yanji ndi cakuti tukuyazwa pakuti yaombako umulimo wa kusimikila nanti ukuzanwa umu kulongana. Wakwe, mungasendako umwina nanti nkazi uwacikalamba umu kulongana nanti umu mulimo wa kusimikila. Ndi cakuti mwayazwako ukucita vii, mungayakomelezya nupya namwe kwene yangamikomelezya. (Loma 1:12) Nomba Aina Klistu yamwi yasikwanisya ukufuma pa ng’anda. Uzye tungayazwa uli?

Ya kapepa yanji yamwi yakalwalilila nanti kwaya ivintu vimwi ivyalenga ukuti yatakwanisya ukulazanwa umu kulongana pa Ng’anda ya Wene. Elenganyini pali ya David yano yazanyile nu ulwale uno yakaama ukuti lymphoma. Ukucila pa myezi 6, ya David yayalwazyanga. Pa nsita yonsi ino yayalwazyanga, aci yao ya Lidia yalongananga ukuomvya intaneti.

Uzye aina na ya nkazi amu cilongano yayazwile uli? Pa cisila ca kulongana, aina na ya nkazi yamwi aalongananga pa Ng’anda, ya Wene yalanzyanyanga  nayo ala yakulolana ukuomvya intaneti. Nupya ndi cakuti ya David na ya Lidia yasukapo pa kulongana, aina na ya nkazi yayatumilanga mameseji aakuyakomelezya. I visuma ci ivyacitike? Ya David na ya Lidia yatiile ukuvwa ukuzukilwa.

Tungatantika kuomba nu umwina nanti nkazi aasikwanisya kufuma pa ng’anda. Tungasenulako vino tukaomba pakuti sile tuombeko nayo, nupya ukucita vivyo kungalanga ukuti twaikako mano. (Mapi. 3:27) Limwi mungatantika ukuti muombe nayo ukuomvya makalata nanti ukusimikila kuomvya foni. Limwi ya eluda yangatantika ukuti yayo atange yakwanisye ukufuma pa ng’anda yalongana nanti ukuomba umulimo wa kusimikila kuomvya intaneti. Ya David na ya Lidya yataizye sana pali vii vino amu cilongano yacisile. Ya David yatiile, “Ukuzanwa uku kukomaana ukwakuya umu mulimo wa kusimikila alino ni pepo kwatukomelezyanga sana.” Ndi cakuti cingacitika, mungapekanya ukuti mwasenda umusambi wa Baibo uku ng’anda ya mwina nanti nkazi aasikwanisya ukufuma pa ng’anda pakuti mukatungulwile pamwi isambililo.

Ndi cakuti mukukwatako insita yakuombela pamwi na ina naya nkazi aasikwanisya ukufuma pa ng’anda, mulayamanya ningo nupya mulaya ya cuza yao aapalamisye. Wakwe, ndi cakuti mwaomba nayo umu mulimo wa kusimikila nu kulola vino yamanya ukuomvya ningo izwi lyakwe Leza pa kufika asambi pa mwenzo, mulapalama sana kuli aliyo. Ndi cakuti mwazwa aina na ya nkazi ukulazanwa umu kulongana nu kulaomba umulimo wa kusimikila, mulakwata ya cuza aingi.—2 Kol. 6:13.

Lino Paulo wakweti intazi, Tito cuza wakwe wamutandalile nupya calenzile ukuti Paulo auvwe ningo sana. (2 Kol. 7:​5-7) Caziipa sana ukulanda amazwi akukomelezya uku ina na ya nkazi. Nomba vino Tito wacisile kuli Paulo vikatusambilizya ukuti tungateekezya yauze ndi cakuti tukukwata insita iyakucitila ivintu pamwi nayo alino nu kuyazwa.—1 Yoa. 3:18.

Tungasambililako kuli vino aina na ya nkazi umu Russia yakaazwana. Elenganyini ivyacitikiile ya Sergey na aci yao ya Tatyana. Ya kapokola yaile iyapeketa mu ng’anda yao lyene pa cisila yayasenzile uku kuyuzikisya. Ya Tatyana yayazumilizye ukuti yaswilile uku ng’anda. Ya Sergey yalanzile ukuti: “Lino ya Tatyana yafisile sile uku ng’anda, lilyo kwene nkazi umwi umusipe wayatandalile. Aina na ya nkazi na yauze izile umu kutwazwa ukulonga ningo ivintu umu ng’anda vino ya kapokola yasiile yasalanganya.”

Nupya Sergey yalanzile ukuti: “Lyonsi natemwa amazwi aya pa Mapinda 17:​17, apakati: ‘Cuza, umukundwe insita ili yonsi. Uwina nao uwacani fwandi ndi cakuti asi wakuculila pamwi?’ Umu nsita yii iya kucuziwa nkalondekwa sana ukwazwa ukufuma kuli ya cuza yane. Fwandi nasininkizya ukuti amazwi aya pali Mapinda 17:17 aacumi. Lyonsi Yeova akampeela ya cuza asipe nupya akangazwa.”

Lino ivintu vikuya vikutalilako sile, tukulondekwa sana ya cuza akutwazwa. Lino kulaya ucuzi ukalamba tulalondekwa nu ukucilapo ukukwata ya cuza yaa akutwazwa. Fwandi ndakai alino tulinzile ukuombesya ukuya ya cuza acumi.—1 Pet. 4:​7, 8.