CIPANDE CA KUSAMBILILAMO 8
LWIMBO NA. 130 Mwaelela Auzo
Vino Tungakolanya Vino Yeova Akaelela
“Wakwe vino Yeova waitemiilwe ukumwelela avino namwe kwene mwaitemelwa ukwelelana.”—KOLO. 3:13.
VINO TUMASAMBILILAPO
Umu cipande cii tumasambilila pali vino tulinzile ukucita pakuti twaelela yauze ndi cakuti yatusosya.
1-2. (a) A lilaci lino cingatutalila ukwelela yauze? (b) Uzye ya Denise yalanzile uli ukuti yelezile umonsi wiya?
UZYE cikamutalila ukwelela yauze? Sweingi cikatutalila, sana sana ndi cakuti umuntu umwi walanda nanti watucitila ivintu iviipe sana. Lelo, kwaya vino tulinzile ukucita pakuti twaelela yauze nu kuta ukuyasokela. Wakwe elenganyini pali nkazi Denise, uwaitemilwe ukwelela yauze. Umu 2017, ya Denise pamwi nu lupwa lwao yaile umu kutandala uku Maofesi Yakalamba mu Nsi Yonsi yakwe Ya Nte Yakwe Yeova apya. Lino yaswililanga uku ng’anda, umonsi umwi uwapisyanga motoka iyali ku cisila wapumbwike nu kuyapunka muli motoka yao. Ya Denise yavulunganyiziwe nupya yatamanyile ni vyacitikanga. Lino izile iyatandika ukwiluka ivyacitiike, yazanyile ukuti ana yao yacisike sana nupya ya iya ya Brian yene yafwile. Lino ya Denise yelenginye pali vii ivyacitike, yalanzile ukuti, “navulunganyiziwe.” Pa cisila, izile iyamanya ukuti icalenzile umonsi wiya ukupunka muli motoka yao asi kuti wali umuvulungane nanti kwali ivyalenzile afilwe ukupisya ningo, nupya yapefile kuli Yeova pakuti yataelenganya pa viipe ivyacitike.
2 Umonsi wiya yamutwazile uku cilye nu kumupeela umulandu wakukoma umuntu umu kukanamanya. Wali nu kunyepwa ndi cakuti yamuzana nu mulandu. Lelo cilye canenyile ya Denise a ukuti vino yali nu kulondolola pali vino vyacitike, i vyali nu kulenga umonsi wiya ukunyepwa nanti foo. Ya Denise yalanzile ati: “Nuvwile kwati umwi wayula pa cilonda nu kwikapo umusilya, pano nali nu kutandika ukulondolola vyonsi iviipe ivyancitikiile.” Lino papisile sile imilungu inono, ya Denise yaile umu cilye ala iyaipekanya ukulondolola vino umonsi wiya wacisile ivyalenzile ukuti ulupwa lwao luye sana nu ulanda. I vyani vino yalanzile? Ya Denise yanenyile kapingula ukuti auvwile umonsi wiya uluse. b Lino yalanzile vii, kapingula watandike ukulila. Kapingula watile: “Apa myaka 25 ino naomba umulimo uu ntatala nuvwapo ivya musango uu umu cilye. Ntatala nuvwapo ya lupwa yano iyapangila umulandu ukupaapata icilye ukuti cuvwile umuntu ali nu mulandu uluse. Ntatala nuvwapo amazwi akulanga ukutemwa nu luse.”
3. I cani cazwile ya Denise ukwelela?
3 I cani cazwile ya Denise ukwelela umonsi wiya? Yelenginye pali vino Yeova akaelela. (Mika 7:18) Ndi cakuti tukutaizya pali vino Yeova akaelela, naswe kwene tulaelela yauze.
4. I vyani vino Yeova akalonda twacita? (Efeso 4:32)
4 Yeova akalonda twaitemelwa ukwelela yauze wakwe vino wene akaelela. (Belengini Efeso 4:32.) Akalonda ukuti twaya aiteyanye ukwelela yayo akatusosya. (Masa. 86:5; Luka 17:4) Umu cipande cii, tumasambilila pa vintu vitatu vingatwazwa ukulaelela yauze.
MWAIKA AMANO KULI VINO MUKUYUVWA
5. Kulingana na Mapinda 12:18, uzye insita zimwi tunguvwa uli ndi cakuti umwi watusosya?
5 Tunguvwa sana uyi ndi cakuti umwi walanda nanti kucita vimwi ivyakutusosya, sana sana ndi cakuti umuntu wiyo a cuza nanti lupwa witu. (Masa. 55:12-14) Insita zimwi tungasoka nanti kuvwa sana uyi icakuti twauvwa kwati umwi watatutota nu mupeni. (Belengini Mapinda 12:18) Limwi tungililako sile kuli vino tukuyuvwa. Lelo ukucita vivyo cingaya kwati umwi watutota alino twakana ukufumya umupeni pa cilonda. Avino cingaya na kuli sweswe ndi cakuti umwi watusosya alino twililako sile.
6. I vyani vino tungacita nga umwi watusosya?
6 Ndi cakuti umwi watusosya, cino tukatandikilapo ukucita u kusoka. Baibo ikalanda ukuti insita zimwi tungasoka. Lelo ikatucelula ukuti tutalinzile ukutwalila ukuya asoke. (Masa. 4:4; Efes. 4:26) U mulandu ci? Pano vino tukuyuvwa i vikalenga tucite vimwi. Nupya ukusoka ilingi kukalenga tucite iviipe. (Yako. 1:20) Mwaiusya ukuti nga umwi watusosya, tungasoka. Lelo ukutwalilila ukusoka, i cintu cino umuntu angapingulapo ukucita.
Mwaiusya ukuti nga umwi watusosya, tungasoka. Lelo ukutwalilila ukusoka, i cintu cino umuntu angapingulapo ukucita
7. Uzye tunguvwa uli ndi cakuti umwi watusosya?
7 Ndi cakuti yamwi yatucitila iviipe, tunguvwa uyi mu nzila izipusanepusane. Wakwe, nkazi Ann walanzile ukuti: “Lino nali umwance, ya tata yatanine na ya mayo nu kutwala umwanaci uwaombanga umulimo wa kunsakamala. Nuvwile kwati yandekelezya. Lino izile iyakwata ana, nuvwile kwati iyata ukunjikako mano. Nakulanga ala nkuyuvwa ukuti pasi uwantemwa.” Nkazi Georgette walondolwile vino wayuvwile lino wamanyile ukuti iya atali na ucisinka kuli aliwe, watiile: “Twali ivyuza ukufuma uku wance. Twaombelanga pamwi upainiya. Nuvwile sana uyi.” Nkazi Naomi nawe watiile: “Ntatazile nelenganyepo ukuti yawane yangansosya. Fwandi lino yanenyile ukuti yatambanga ivikope vya uzelele mu umfisolo, nuvwile sana uyi nupya naweni kwati yampondekela.”
8. (a) I vyani vimwi ivingalenga twaelela yauze? (b) I visuma ci ivikatucitikila ndi cakuti tukwelela? (Lolini kambokosi akakuti “ Nga ndi cakuti umwi watusosya sana?”)
8 Tutanga tusenule vino yauze iyatunena nanti vino iyatucitila, lelo tungasenula vino tungacita ndi cakuti umwi watusosya. Nupya vino tungacita u kuyelela. U mulandu ci? Apa mulandu wakuti twatemwa Yeova nupya akalonda twaelela yauze. Ndi cakuti twatwalilila ukuya asoke nu kukanaelela yauze, tungacita iviipe ivingalenga tulanguluke pa cisila nupya tungonona umi witu. (Mapi. 14:17, 29, 30) Elenganyini pali vino vyacitikile nkazi Christine. Watiile: “Ndi cakuti nasoka sana, nkata ukumwentula. Nkata ukusoolola ningo ivyakulya. Nsikasula nupya cikantalila ukusenula vino nkuyuvwa, na cii cikalenga ukuti tutauvwana ningo na ya wane alino na antu yauze.”
9. U mulandu ci uno tutalinzile ukutwalila ukuya asoke?
9 Nanti cakuti umuntu uwatatusosya asikulonda ukulenga uwelelo, kuli vimwi vino tungacita pakuti tutatwalilila ukuvwa uyi. Tungacita uli vivyo? Ya Georgette yano itulandapo, yalanzile ukuti: “Papisile insita itali pakuti inte ukuvwa uyi, lelo nizile inta ukuvwa uyi nu kusokela yano yalipo ya wane. Ni vyacitike ivyakuti nizile inja nu mutende.” Ndi icakuti twata ukusokela yauze, tukatandika ukuvwana na yauze. Nupya ndi cakuti twelela yauze tukata ukwelenganya pa ntazi iyo nu kutandika ukuipakizya umi nupya. (Mapi. 11:17) Nga ndi cakuti vino mukuyuvwa vyalenga cimutalile ukwelela yauze?
VINO TUNGACITA PAKUTI TUTE UKUSOKELA YAUZE
10. U mulandu ci uno tulinzile ukuipeela insita pakuti twelele yamwi? (Loliniko ni vikope.)
10 I vyani ivingamwazwa ukuta ukusokela yauze? Inzila yonga ingamwazwa u kuipeela insita. Ndi cakuti umuntu uwatacisika sana yamuombelapo ku cipatala, akalondekwa insita pakuti apole. Vikwene avino tukalondekwa insita pakuti twelele umwi ukufuma pa nsi ya mwenzo.—Kasa. 3:3; 1 Pet. 1:22.
Vivikwene vino nga twacisika tukalondekwa ukuisakamala ni nsita pakuti tupole, avino tulinzile ukucita ndi cakuti umwi watusosya. (Lolini palaglafu 10)
11. Uzye ipepo lingamwazwa uli ukulaelela yauze?
11 Mwapepa nu kulenga Yeova ukuti amwazwa ukwelela yauze. c Nkazi Ann wino itulandapo walondolwile vino ukupepa kuli Yeova kwamwazwile. Watiile: Napepanga kuli Yeova nu kumulenga ukuti atwelele swensi mu lupwa pali vino tutacisile ningo. Lyene nalembiile ya tata na yamayo apya kalata muno nayanenyile ukuti nayelezile. Nkazi Ann walanzile ukuti citali icangupale ukucita vino wacisile. Watiile: “Intaila ukuti nga nkukolanya vino Yeova akaelela, cingalenga ukuti ya tata na yamayo apya yasambilile ivingi pali Yeova.”
12. U mulandu ci uno tulinzile ukutaila Yeova ukucila ukutaila vino tukayuvwa? (Mapinda 3:5, 6)
12 Mutataila vino mukuyuvwa lelo mwataila Yeova. (Belengini Mapinda 3:5, 6.) Yeova lyonsi akamanya ivingatuzipila. (Eza. 55:8, 9) Nupya atalatala atunene ukucita ivintu ivingatuletelela. Ali mulandu uno akatunena ukuti twaelela yauze, nupya tungataila ukuti ndi cakuti tukucita vivyo cingatwazwa. (Masa. 40:4; Eza. 48:17, 18) Lelo, ndi cakuti tukutaila vino tukuyuvwa, cingatutalila ukwelela yauze. (Mapi. 14:12; Yele. 17:9) Ya Naomi yano itulandapo yalanzile ukuti: “Pa kutandika nalolanga ukuti ntanganelele ya wane pali vino yatambanga ivikope ivya uzelele. Natiinanga ukuti yangaswilizyapo ivili vimwi nupya, nanti ukwilila kuli vino yansozizye. Nupya nelenginye ukuti Yeova wamanyile vino nayuvwanga. Lelo natandike ukwelenganya ukuti nanti cakuti Yeova watamanya vino nkuyuvwa, cisikupiliula ukuti watazumilizya vino nkuyuvwa. Wamanya vino nkayuvwa nupya cikalondekwa insita pakuti inte ukuvwa uyi, lelo akalonda nu kuti naelela yauze.” d
VINO TUNGACITA PAKUTI TUTASOKELA YAUZE
13. Kulingana na Loma 12:18-21, i vyani vino tulinzile ukucita?
13 Ndi cakuti twelela umuntu uwatatusosya, tukalonda ukucita na vyuze ukucila sile ukuta ukulanda pali vino vyacitike. Ndi cakuti umuntu uwatatusosya u mwina nanti nkazi, uyo witu u kupanga umutende. (Mate. 5:23, 24) Ukucila ukutwalilila ukuya asoke tukasoololapo ukuya nu luse alino nu kwelela yauze. (Belengini Loma 12:18-21; 1 Pet. 3:9) I vyani ivingatwazwa ukucita vivyo?
14. I vyani vino tulinzile ukwezya na maka ukulacita, nupya u mulandu ci?
14 Tulinzile ukwezya na maka ukulalola umuntu wino watatucitila iviipe wakwe vino Yeova akamulola. Yeova akasoololapo ukulola ivisuma umu yantu. (2 Mila. 16:9; Masa. 130:3) Tungazana imiyele ino tukulonda umu yantu, ingaya iipe nanti isuma. Ndi cakuti tukwika amano uku miyele isuma ino yauze yakwata, cilatwangukila ukulaelela. Wakwe, umwina Jarrod walanzile ukuti: “Icikangazwa ukwelela umwina uwatansosya, u kulinganya iviipe vino watancitila uku visuma ivingi vino natemwa pali aliwe.”
15. Uzye ukunena umuntu uwatamusosya ukuti mwamwelela kungamwavwa uli?
15 Icintu na cuze icicindame cino tulinzile ukucita u kunena umuntu uwatasusosya ukuti itumwelela. U mulandu ci? Elenganyini pali vino ya Naomi yano itulandapo yalanzile, lino yatiile: “Ya wane yanguzizye ukuti, ‘Uzye watunjelela?’ Lino nakasi imvwange inti, ‘namwelela,’ nafizilwe ukulanda. Calenzile niusye ukuti ntayelezile ukufuma pansi ya mwenzo. Lino papisile insita, nakwanisye ukuyanena amazwi yaa akuti, ‘namwelela.’ Lino nayelezile, yali na minsozi umu manso. Nazungwike ukulola vino ya wane yuvwile ningo na vino nani nizile inja nu mutende. Ukufuma lili kwene, nataila ya wane nupya twatwalilila ukuya na ucuza usuma.”
16. I vyani vino mwasambilila pa kwelela?
16 Yeova akalonda ukuti twaelela yauze. (Kolo. 3:13) Nanti ciye vivyo cingatutalila ukwelela yauze. Lelo tungakwanisya ndi cakuti tusikwika mano kuli vino tukuyuvwa nu kwezya na maka ukukanasoka. Ukucita vii, kungatwazwa ukukanasokela yauze.—Lolini kambokosi akakuti “ Ivintu Vitatu Ivingatwazwa Ukwelela.”
MWAELENGANYA PA VISUMA IVIKACITIKA NDI CAKUTI MWELELA
17. I visuma ci ivikacitika ndi cakuti tukwelela?
17 Kwaya imilandu iingi ikalenga twaelela. Elenganyini pali yii. U mulandu wa kutandikilapo, tukakolanya Tata witu Yeova uwaya nu luse nupya tukamuzanzya. (Luka 6:36) Wakwe ciili, tukalanga ukuti tukataizya pali vino Yeova watwelela. (Mate. 6:12) Na wakwe citatu, tukaya nu umi usuma nupya tukakwata ucuza usuma na yauze.
18-19. I visuma ci ivingacitika ndi cakuti tukwelela?
18 Ndi cakuti twelela yauze, ivisuma vingatucitikila ukwaula nu kwenekela. Wakwe elenganyini ivyacitikile ya Denise yano itulandapo. Nanti icakuti nkazi atamanyile ivyacitike pa nsita iya, umonsi uwalenzile kuye uzanzo walondanga ukuikulika ndi cakuti yamuzana nu mulandu. Lelo watemilwe vino ya Denise yamwelezile icakuti watandike ukusambilila Baibo na Ya Nte Yakwe Yeova.
19 Limwi tungayuvwa ukuti ukwelela yauze i citale sana ukucita, lelo ukwelela yauze kungalenga ivintu ivisuma ukucitika. (Mate. 5:7) Fwandi lekini swensi twaezya na maka ukukolanya vino Yeova akaelela.
LWIMBO NA. 125 Antu ya Luse Yapaalwa!
a Asi mazina yao
b Ivya musango uu nga vyacitika, umwina Klistu wensi alinzile ukuipingwilapo ivyakucita.
c Yangini pa jw.org pakuti mulole mavidyo aa nyimbo izikweti imitwe yakuti “Twaelelana,,” “Forgive Freely,” nu lwa kuti “Friends Again.”
d Nanti cakuti ukutamba ivikope vya uzelele u luyembu nupya kwaipa, asi mulandu uwa mu Malembo uno uwa kaele angatelapo uwakwe.
